Xuiya kampa tlen onka ijtik

Xuiya kampa tlen kipiya

Historia 103: Ijtik cuarto kampa tlatsatsaujtok

Historia 103: Ijtik cuarto kampa tlatsatsaujtok

IJKUAK Pedro iuan Juan kisaj ijtik teostotl kampa onkatka itlalnakayo Jesús, María san iselti ompa nokaua. Peua choka. ¡Kuakon, ontlachia ijtik teostotl niman kimita omemej iluikaktekitkej! Yejuamej kitlajtoltiaj: ‘¿Tleka tichoka?’

María tlanankilia: ‘Okikixtijkej itlalnakayo noTeko, niman xnikmati kanon okitlalijkej’. Kuakon ontlachia ikuitlapan niman kita se tlakatl. Yejuin tlakatl kitlajtoltia: ‘¿Akinon tiktejtemoua?’

María kinemilia ika yejuin tlakatl kinmatekiya xochimej, niman ika kanaj yejua okitkik itlalnakayo Jesús. Ika yejon, kijlia: ‘Tla otikitkik, xnechijli kanon otiktlali’. Yejuin tlakatl yejua Jesús. San ika, María xkixmati pampa xijki tlachia. Ijkuak Jesús kinotsa ika itoka, María kimati ika yejua Jesús. Yauj notlaloua kominijlia inomachtijkauan: ‘¡Onikitak toTeko!’

Sakin, ipan yejon tonajli, ijkuak omemej inomachtijkauan Jesús yauej ipan se kalpan tlen itoka Emaús, se tlakatl kinnisiuiya. Yejuamej melak noyolkokouaj ika omik Jesús. San ika, ijkuak yauej ipan ojtli, yejuin tlakatl kintomilia miyek tlemach itech Biblia niman yejuin kinyolseuia. Ijkuak noteltiaj kampa tlakuaskej, yejuamej kixmatij, ika yejua Jesús. Kuakon Jesús popoliui, niman omemej inomachtijkauan nokuepaj Jerusalén kominijliaj itlatitlankauan Jesús.

Ijkuak panotika yejuin, Jesús nonextia ixpan Pedro. Oksekimej melak yolpakij ijkuak kikakij yejuin. Kuakon, yejuin omemej inomachtijkauan Jesús yauej Jerusalén, kampa kinnextiaj itlatitlankauan. Kimijliaj ika okitakej Jesús ipan ojtli. Ijkuak kimijlitokej yejuin, ¿tikmatstika tlenon panoua?

Xkita tlaixkopinajli. Imixpan nesi Jesús, ijtik yejon cuarto, maski kuajli tsaujtika. ¡Melak yolpakij inomachtijkauan! ¡Kualtsin tlen opanok ipan yejuin tonajli! ¿Tikmatstika kechpa noteititia Jesús imixpan? ¿Makuilpa?

Noteititia Jesús ixpan inomachtijkauan

Tomás, se itlatitlankauj Jesús, ximiuan nemi ijkuak Jesús nonextia itech inomachtijkauan. Ika yejon, yejuamej kijliaj: ‘¡Otikitakej toTeko!’ San ika, Tomás kijtoua ika kachtopa noneki kitas niman kuakon tlaneltokas. Ijkuak panoua chikueyi tonajli inomachtijkauan Jesús nemij oksejpa ijtik cuarto tlen kuajli tsaujtika, niman aman Tomás ompa nemi. Ompa nonextia Jesús. Aman Tomás tlaneltoka.

Juan 20:11-29; Lucas 24:13-43.



Tlajtoltilistin

  • ¿Tlenon María kijlia se tlakatl akin kinemilia ika kinmatekiya xochimej, san ika, kenon kimati ika yejua Jesús?
  • ¿Tlenon panoua ika omemej inomachtijkauan Jesús, ijkuak yauej kampa kalpan tlen itoka Emaús?
  • ¿Tlenon panoua ijkuak omemej inomachtijkauan Jesús kimijliaj tlatitlankauan ika okitakej Jesús?
  • ¿Kechpa noteititia Jesús ixpan inomachtijkauan?
  • ¿Tlenon kijtoua Tomás ijkuak kikaki ika inomachtijkauan Jesús, okitakej, niman tlenon panoua ipan chikueyi tonajli?

Okseki tlajtoltilistin

  • Xpoua Juan 20:11-29.

    Itech tlen okijto ipan Juan 20:23, ¿kijtouaya Jesús ika tlaltikpakchanejkej uelis kintlapopoluiskej intlajtlakoluan oksekimej? Xkijto tleka ijkon titlanankilia (Sal. 49:2, 7; Isa. 55:7; 1 Tim. 2:5, 6; 1 Juan 2:1, 2).

  • Xpoua Lucas 24:13-43.

    ¿Kenon uelis tikchiuaskej ika toyojlo makiseli tlen melauak itech itlajtol toTajtsin? (Luc. 24:32, 33; Esd. 7:10; Mat. 5:3, NM; Hech. 16:14; Heb. 5:11-14).