Xuiya kampa tlen onka ijtik

Xuiya kampa tlen kipiya

Historia 105: Tlamachiaj ipan Jerusalén

Historia 105: Tlamachiaj ipan Jerusalén

YEJUIN akin nikan nemij, yejuamej inomachtijkauan Jesús. Okitlakamatkej niman onokaujkej Jerusalén. Ijkuak nochimej san sekan nemiyaj, opeuj tlakokomoka kalijtik. Onokak kentla melak chikauak oajakak. Niman aman nesi kentla tlitl inpan intsontekon. ¿Ueli tikita yejon tlitl? ¿Tlenon kijtosneki yejon?

Espíritu santo ipan inomachtijkauan Jesús

¡Yejuin se milagro! Jesús oksejpa nemi iluikak iuan iTaj, niman aman kinmaka inomachtijkauan iespíritu santo toTajtsin. ¿Tikmatstika tlenon kichiua iespíritu santo toTajtsin itech inomachtijkauan? Nochimej peuaj tlajtoua tlatlamantik noso sesejneka tlajtoltin.

Ipan Jerusalén miyekej tlaltikpakchanejkej kikakij kentla chikauak ajakatl, niman uajlauej kualitaj tlenon panoua. Sekimej tlaltikpakchanejkej oualajkej itech oksekimej países oiluipanokoj iuan israelitas tlen kitokayotiaj Pentecostés. ¡Melak mojkatlachiaj akin ompa nemij! Inomachtijkauan kinnotsaj ika intlajtol itech nochi tlemach tlen kualtsin yokichiuj toTajtsin.

‘Nochimej chanejkej Galilea’, kijtouaj akin otetlajpalokoj. ‘Kuakon, ¿kenon uelij tlajtouaj tlatlamantik noso sesejneka tlajtoltin itech países kampa tiualeuaj?’

Aman, Pedro notelketsa niman peua kintomilia. Kimijlia tlaltikpakchanejkej kenon okimiktijkej Jesús, niman kenon Jehová okiyoliti. ‘Aman Jesús nemi iluikak iyekma toTajtsin yeuatika’, kijtoua Pedro. ‘Niman yejua yokinmakak espíritu santo tlen yokimijlika. Ika yejon, nochiuaj yejuin milagros.’

Ijkuak Pedro kijtoua yejuin, miyekej tlaltikpakchanejkej melak kinyolkokoua tlen ipan onochiuj Jesús. ‘¿Tlenon noneki tikchiuaskej?’, tetlajtoltiaj. Pedro kinnankilia: ‘Noneki xpatlakan nemonemilis niman xmoapolaktikan’. Ipan yejon tonajli kanaj yeyi mil onoapolaktijkej niman onochiujkej inomachtijkauan Jesús.

Hechos 2:1-47.



Tlajtoltilistin

  • Ken nesi ipan tlaixkopinajli, ¿tlenon panoua iuan inomachtijkauan Jesús akin tlamachiaj ipan Jerusalén?
  • ¿Tlenon kinmojkatlachialtia akin otetlajpalokoj ipan Jerusalén?
  • ¿Tlenon Pedro kintomilia tlaltikpakchanejkej?
  • ¿Kenon nomachiliaj miyekej tlaltikpakchanejkej ijkuak kikakij tlen kintomilia Pedro, niman tlenon noneki kichiuaskej?
  • ¿Kechmej tlaltikpakchanejkej noapolaktiaj ipan Pentecostés, xiuitl 33?

Okseki tlajtoltilistin

  • Xpoua Hechos 2:1-47.

    Itech tlen kijtoua Pedro ipan Hechos 2:23, 36 NM, ¿kenon tikitaj ika judíos okipixkej tlajtlakojli ika omik Jesús? (1 Tes. 2:14, 15).

    ¿Tlen kuajli neskayotl okitemakak Pedro, itech kenon tikintlanemililtiskej oksekimej ika iTlajtol toTajtsin? (Hech. 2:16, 17, 29, 31, 36, 39; Col. 4:6).

    Pampa Jesús yokijlika Pedro ika kinmakaskia llaves tlen kitlapoua Tekiuajyotl ipan iluikak, ¿kenon okitekitilti kachtopa llave? (Hech. 2:14, 22-24, 37, 38; Mat. 16:19).