Xuiya kampa tlen onka ijtik

Xuiya kampa tlen kipiya

Historia 99: Ijtik cuarto tlen onka tlakpak

Historia 99: Ijtik cuarto tlen onka tlakpak

YOPANOKA ome tonajli, niman aman jueves ika yeuajli. Jesús iuan 12 itlatitlankauan ouajlakej nikan, ijtik yejuin ueyi cuarto tlen onka tlakpak kipanoltiskej Pascua. Akin kistika yejua Judas Iscariote. Yauj itech teopixkej niman kimijlis kenon kajsiskej Jesús.

ITlakualis toTeko

Judas imiuan yotlajtoka niman okintlajtolti: ‘¿Tlenon ninechmakaskej tla nemechpaleuis nenkasiskej Jesús?’ Okijlikej: ‘Treinta platajtomin’. Aman Judas yauj itech teopixkej niman ijkon kinuikas kampa nemi Jesús. ¡Melak xkuajli tlen kichiuas! ¿Xmelak?

Tlami kipanoltiaj Pascua. San ika, aman Jesús kipanoltia okse tlakuajli tlen xkeman ijkon nochiua. Kinmaka itlatitlankauan pan niman kijtoua: ‘Xkuakan, pampa yejuin kijtosneki notlalnakayo tlen notemakas nemopampa’. Kuakon, kontilana se vaso ika vino, niman kijtoua: ‘Xkonikan, pampa yejuin kijtosneki noyesyo, tlen toyauis nemopampa’. Biblia kitokayotia yejuin tlakuajli ‘itlakualis toTeko’.

Israelitas kipanoltiayaj Pascua niman ijkon kilnamikiyaj ijkuak iiluikaktekitkauj toTajtsin ‘okinpanaui’ inchan israelitas ne Egipto, niman okinmikti inkoneuan egipcios akin kachtopa otlakatkej. San ika, aman Jesús kineki inomachtijkauan yejua makilnamikikan, niman ika yejua inpampa omik. Ika yejon, nochi xiujtin noilnamiki.

Ijkuak yotlan kipanoltiaj iTlakualis toTeko, Jesús kimijlia itlatitlankauan makipiyakan yolchikaualistli niman tlaneltokijli. Ijkuak tlamij, kiueyichiuaj toTajtsin ika tlakuikajli niman kisaj. Amantsin, kanaj yopanok tlajkoyeuajli. ¿Kanon yauej?

Mateo 26:14-30; Lucas 22:1-39; Juan, tlaxeloltin uejueyimej 13 ontlami ipan 17; 1 Corintios 11:20.



Tlajtoltilistin

  • Ken nesi ipan tlaixkopinajli, ¿tleka Jesús nemi iuan doce itlatitlankauan ijtik ueyi cuarto tlen onka tlakpak?
  • ¿Akinon katka akin kistika, niman tlenon konchiuas?
  • ¿Tlen tlakuajli kipeualtia Jesús ijkuak yotlankej kipanoltiaj Pascua?
  • ¿Tlenon kilnamikiyaj israelitas ipan Pascua, niman tlenon kinmilnamiktia yejuin tlakuajli inomachtijkauan Jesús?
  • Ijkuak yotlankej kipanoltiaj itlakualis toTeko, ¿tlenon Jesús kimijlia inomachtijkauan, niman tlenon kichiuaj yejuamej?

Okseki tlajtoltilistin

  • Xpoua Mateo 26:14-30.

    ¿Kenon techititia ipan Mateo 26:15 ika tlen Judas okichiuili Jesús yejua ijkon yokinemilijka?

    ¿Tlenon ome tlemach okichiuj Jesús pampa okitoyauj iyesyo? (Mat. 26:27, 28; Jer. 31:31-33; Efe. 1:7; Heb. 9:19, 20).

  • Xpoua Lucas 22:1-39.

    ¿Kenon Satanás okalak ipan Judas? (Luc. 22:3; Juan 13:2; Hech. 1:24, 25).

  • Xpoua Juan 13:1-20.

    Itech tlen kijtoua ipan Juan 13:2, ¿uelis se kitlajtlakolmakas Judas itech tlen okichiuj, niman tlenon tiuelij akin tiktekichiuiliaj toTajtsin? (Gén. 4:7; 2 Cor. 2:11; Gál. 6:1; Sant. 1:13, 14).

    ¿Tlen kuajli neskayotl okitemakak Jesús? (Juan 13:14, 15; Mat. 23:11; 1 Ped. 2:21).

  • Xpoua Juan 17:1-26.

    ¿Tleka Jesús okitlajtlanili toTajtsin “san sekan manemikan” inomachtijkauan? (Juan 17:11, 21-23; Rom. 13:8; 14:19; Col. 3:14).