KEMA yejua Jesús, nemi ipan tepetl tlen itoka Olivos. Nauimej tlakamej akin iuan nemij, itlatitlankauan. Andrés iuan ikniuj Pedro, niman Santiago iuan ikniuj Juan. Yejon kajli tlen nesi, iteopan toTajtsin tlen onka Jerusalén.

Yopanok ome tonajli ijkuak Jesús okalak Jerusalén ipan se poloko. Aman martes. Ika kualkan Jesús nemiya kampa teopan. Ompa akin tlamachtijkej itech tlanauatijli kinekiyaj kajsiskej niman kimiktiskej. San ika, xkichiuaj pampa kinmakasij tlaltikpakchanejkej.

Jesús niman itlatitlankauan

‘¡Kouamej niman ikoneuan kouamej!’ Jesús ijkon okintokayoti akin tlamachtiayaj itech tlanauatijli. Kuakon okijto ika toTajtsin kintlajyouiltis pampa yokichiujkaj tlemach tlen xkuajli. Sakin, Jesús otlejkok ipan tepetl tlen itoka Olivos, niman kuakon yejuin nauimej itlatitlankauan opeuj kitlajtlatoltiaj. ¿Tikmatstika tlenon kitlajtoltiaj?

Itlatitlankauan kinekij kimatiskej tlemach tlen panos ika tlayekapan. Kimatstokej ika Jesús kipopolos nochi tlen xkuajli nochiua ipan tlaltikpaktli. San ika, kinekij kimatiskej kemanon nochiuas yejuin. ¿Kemanon Jesús uajlas oksejpa niman ijkon tlayekanas kentla tekiuaj?

Jesús kimatstika ika ipan tlaltikpaktli, inomachtijkauan xuelis kitaskej ijkuak uajlas oksejpa. Yejuin ijkon yes pampa yejua nemis ipan iluikak, niman yejuamej xuelis kitaskej. Ika yejon, Jesús kimijlia itlatitlankauan seki tlemach, tlen panotoskiaj ijkuak yejua uajtlanauatijtos iluikak. ¿Tlenon panos?

Jesús kijtoua ika onias uejueyimej guerras, miyekej tlaltikpakchanejkej kualoskej niman xtlaj onias tlen kikuaskej, nomiktilos niman chikauak tlalolinis. Noijki kijtoua ika noteijlis ipan nochi tlaltikpaktli, yejon kuajli tlajtoltin itech itekiuajyo toTajtsin. ¿Ijkon nochiujtika ipan yejuin tonaltin? ¡Kema! Aman kuajli tikmatstokej ika Jesús tekiuajtitika iluikak. Xok uejkauis, kipopolos nochi tlen xkuajli nochiua ipan tlaltikpaktli.

Mateo 21:46; 23:1-39; 24:1-14; Marcos 13:3-10.



Tlajtoltilistin

  • Ipan tlaixkopinajli, ¿katlejua Jesús, niman akinomej akin iuan nemij?
  • ¿Tlenon kinekiyaj teopixkej kichiuiliskej Jesús ipan teopan, niman tlenon okimijli?
  • ¿Tlenon itlatitlankauan kitlajtoltiaj Jesús?
  • ¿Tleka Jesús kimijlia itlatitlankauan seki tlemach tlen nochiuaskia ipan tlaltikpaktli ijkuak yejua tekiuajtis ipan iluikak?
  • ¿Tlenon Jesús kijtoua kachtopa panos niman kuakon kipopolos nochi tlen xkuajli ipan tlaltikpaktli?

Okseki tlajtoltilistin

  • Xpoua Mateo 23:1-39.

    Maski Biblia kijtoua ika uelis tikintekitiltiskej tokayomej tlen teueyichiuaj, ¿tlenon xnoneki manotekitilti ipan tlanechikojli ijkon ken okijto Jesús ipan Mateo 23:8-11? (Hech. 26:25; Rom. 13:7; 1 Ped. 2:13, 14).

    ¿Tlenon kichiuayaj fariseos niman ijkon xkinkauiliayaj tlaltikpakchanejkej makichiuakan ken Cristo, niman kenon aman noijki kichiuaj akin tlayekanaj ipan tlaneltokiltin? (Mat. 23:13; Luc. 11:52; Juan 9:22; 12:42; 1 Tes. 2:16).

  • Xpoua Mateo 24:1-14.

    ¿Kenon kijtoua Mateo 24:13 ika noneki titlaxikoskej?

    ¿Tlenon kijtosneki tlajtojli “nochi tlamis” tlen kijtoua Mateo 24:13? (Mat. 16:27; Rom. 14:10-12; 2 Cor. 5:10).

  • Xpoua Marcos 13:3-10.

    ¿Tlen tlajtoltin itech Marcos 13:10 kijtoua ika melak noneki manoteijli kuajli tlajtoltin? niman ijkuak tijkakij itlajtoluan Jesús, ¿tlenon noneki matikchiuakan? (Rom. 13:11, 12; 1 Cor. 7:29-31; 2 Tim. 4:2).