XKITA Jesús nikan kenon kinapalojtika se telpokatsin. Ueli tikita ika kintlasojtla kokonej. Akin ompa kitlajtlastokej yejuamej itlatitlankauan. ¿Tikmatstika tlenon kimijlia Jesús?

Jesús iuan itlatitlankauan oyajkaj uejka, aman yonokuepatoj. Ipan ojtli itlatitlankauan okipixkej se tlauejli. Ika yejon, ijkuak yoyejkokej, Jesús kintlajtoltia: ‘¿Tleka nenmouajkualanijtiayaj ipan ojtli?’ Jesús kimatiya tleka. San ika, kintlajtoltia pampa kineki kinkakis tla kijliskej.

Jesús niman se telpokatsin

Itlatitlankauan xkinankiliaj, pampa ipan ojtli uajnokualanijtiayaj niman kinekij kimatiskej akinon melak ueyixtika itech yejuamej. Sekimej kinekij makinueyikaitakan. ¿Kenon kimijlis Jesús ika xkuajli tla se kineki noueyilis?

Jesús kinotsa se telpokatsin, niman kitelketsa imixpan. Kuakon kimijlia itlatitlankauan: ‘Nikneki kuajli xmatikan yejuin: Tla xnenmopatlaj niman xnenmochiuaj ken yejuin telpokatsin, xuelis nenkalakiskej ipan itekiuajyo toTajtsin. Akin nochiua ken yejuin telpokatsin, yejua akin melak ueyixtika ipan itekiuajyo toTajtsin’. ¿Tikmatstika tleka okijto yejuin?

Kokonej xkinemiliaj noueyimatiskej noso makinueyikaitakan oksekimej. Ika yejon, itlatitlankauan nonekiya makichiuakan ken kokonej niman maka manouisokikan pampa kinekij noueyimatiskej.

Okseki tonaltin, noijki Jesús kiteititia ika melak najmana inpampa kokonej. Opanokej seki metstin, sekimej tajtin kinuajuikaj inkoneuan kampa nemi Jesús. Itlatitlankauan xkinkauiliayaj makinisiuikan. San ika, Jesús kimijlia: ‘Xkinkauilikan kokonej mauajlakan notech, niman maka xkintsakuilikan, pampa itech itekiuajyo toTajtsin nemiskej tlaltikpakchanejkej ijkon ken yejuamej’. Kuakon kinnapaloua kokonej, niman kinteochiua. ¡Melak kuajli pampa tikmatij ika Jesús kintlasojtla kokonej! ¿Xmelak?

Mateo 18:1-4; 19:13-15; Marcos 9:33-37; 10:13-16.



Tlajtoltilistin

  • ¿Tleka itlatitlankauan Jesús nokualaniaj ijkuak nokuepaj ipan ojtli?
  • ¿Tleka Jesús kinotsa se telpokatsin niman kitelketsa imixpan itlatitlankauan?
  • Ijkon ken kokonej, ¿tlenon noneki kichiuaskej itlatitlankauan Jesús?
  • Ijkuak opanok seki metstin, ¿kenon Jesús teititia ika kintlasojtla kokonej?

Okseki tlajtoltilistin

  • Xpoua Mateo 18:1-4.

    ¿Tleka Jesús tlamachtiaya ika neskayomej? (Mat. 13:34, 36; Mar. 4:33, 34).

  • Xpoua Mateo 19:13-15.

    Ijkon ken inkualneskayouan kokonej, ¿tlenon noneki tikchiuaskej, tla tiknekij tikseliskej tlateochiualistin itech Tekiuajyotl? (Sal. 25:9; 138:6; 1 Cor. 14:20).

  • Xpoua Marcos 9:33-37.

    Itech tlen Jesús okinmachti inomachtijkauan, ¿tlenon noneki kichiuaskej akin kinekij kiseliskej tekitl ipan tlanechikojli? (Mar. 9:35; Mat. 20:25, 26; Gál. 6:3; Fili. 2:5-8).

  • Xpoua Marcos 10:13-16.

    ¿Kenon Jesús kinseliaya tlaltikpakchanejkej, niman tlenon kinmachtia akin tlayekanaj ipan tlanechikoltin? (Mar. 6:30-34; Fili. 2:1-4; 1 Tim. 4:12).