Xuiya kampa tlen onka ijtik

Xuiya kampa tlen kipiya

Historia 90: Iuan se siuatl kampa onka se pozo

Historia 90: Iuan se siuatl kampa onka se pozo

JESÚS onotelti niman onoseui kampa onka se pozo ipan Samaria. Inomachtijkauan oyajkej okikouatoj tlakuajli. Siuatl akin iuan tlajtoua Jesús okikixtiko atl. Jesús kijlia: ‘Xnechmaka atl’.

Jesús tlajtotika iuan se siuatl chanej Samaria

Siuatl melak mojkatlachia. ¿Tikmatstika tleka? Jesús judío, niman yejuin siuatl chanej Samaria. Niman judíos xnouikaj iuan samaritanos. ¡Nion xkinnotsaj! San ika, Jesús kintlasojtla nochimej tlaltikpakchanejkej. Kuakon Jesús kijlia: ‘Tla tikmatiskia akinon mitstlajtlanilia atl, tejua tiktlajtlaniliskia atl, niman yejua mitsmakaskia atl tlen temaka nemilistli’.

‘Noteko’, kijtoua yejon siuatl, ‘pozo melak uejkatlan, niman tejua xtikpiya tlen ika tijkixtis atl. ¿Kanon tikonkuis yejuin atl tlen temaka nemilistli?’

‘Tla tikoni atl tlen kisa ipan yejuin pozo oksejpa tamikis’, kijtoua Jesús. ‘San ika, atl tlen nejua niktemakas uelis kichiuas se manemi nochipa.’

‘Noteko’, kijtoua yejuin siuatl, ‘¡xnechmaka yejuin atl! Tla tinechmakas xok keman namikis. Niman xok oksejpa niuajlas nikan nikuajkuis atl’.

Yejon siuatl kinemilia ika Jesús tlajtotika itech atl tlen melauak nooni. San ika, yejua tlajtotika tlen melauak itech toTajtsin niman itekiuajyo, yejuin tlaixmatilistli kentla atl tlen kitemaka nemilistli. Ueli kitemaka nemilistli tlen xkeman tlamis.

Aman Jesús kijlia yejuin siuatl: ‘Xuiya xnotsati moueuentsin niman oksejpa xuajla nikan’.

‘Nejua xnikpiya noueuentsin’, kijtoua yejua.

‘Kuajli otinechnankili’, kijlia Jesús, ‘san ika, yotikpix makuijli moueuentsin, niman akin iuan tinemi aman xmoueuentsin’.

Yejuin siuatl mojkatlachia, pampa nochi tlen kijlia melauak. ¿Kenon kimatiya Jesús nochi yejuin? Kema, pampa Jesús, yejua akin toTajtsin yokijtoka uajlaskia, toTajtsin okuajtitlan, niman kichiua makimati nochi yejuin. Kuakon inomachtijkauan Jesús yejkoj, niman kinmojkatlachaltia pampa iuan tlajtotika se akin chanej Samaria.

¿Tlenon tiuelij? Ika Jesús yolkuajli iuan nochi tlaltikpakchanejkej. Tejuamej noijki noneki ijkon tikchiuaskej; xtiknemiliskej ika xkuajli tla tiknotsaj se akin sejneka noso okse tlamantik tlachia, ualeua oksekan noso tlajtoua okse tlajtojli. Jesús kineki nochi tlaltikpakchanejkej makixmatikan tlen melauak, niman ijkon makiselikan nemilistli tlen xkeman tlamis. Niman tejuamej noijki tiknekiskej tikinpaleuiskej tlaltikpakchanejkej manomachtikan.

Juan 4:5-43; 17:3.



Tlajtoltilistin

  • ¿Tleka onotelti Jesús kampa onka se pozo ipan Samaria, niman tlenon kijlia se siuatl akin ompa oyaj?
  • ¿Tleka mojkatlachia yejon siuatl, tlenon kijlia Jesús, niman tleka?
  • ¿Itech tlen atl kinemilia yejon siuatl tlajtotika Jesús, san ika, itech tlenon melauak kinojnotsa?
  • ¿Tleka mojkatlachia yejon siuatl itech tlen Jesús kimatstika itech yejua, niman kenon kimati Jesús yejuin?
  • ¿Tlenon tiuelij itech yejuin tlen otikitakej?

Okseki tlajtoltilistin

  • Xpoua Juan 4:5-43.

    Ijkon ken Jesús okichiuj, ¿kenon tikinseliskej akin sejneka noso okse tlamantik tlachiaj, ualeuaj oksekan noso tlajtouaj okse tlajtojli? (Juan 4:9; 1 Cor. 9:22; 1 Tim. 2:3, 4; Tito 2:11).

    ¿Tlen tlateochiualistin kiselia akin nochiua inomachtijkauj Jesús? (Juan 4:14; Isa. 58:11; 2 Cor. 4:16).

    Ijkon ken samaritana melak okitlasojkamat tlen okiseli niman ika iyojlo oteijli tlen okimat, ¿tlenon tejuamej noijki tikchiuaskej? (Juan 4:7, 28; Mat. 6:33; Luc. 10:40-42).