Xuiya kampa tlen onka ijtik

Xuiya kampa tlen kipiya

Historia 86: Kitokaj se sitlalin

Historia 86: Kitokaj se sitlalin
Akin nomachtiaj itech sitlalimej

¿UELI tikita sitlalin tlen kimajpiluijtika se tlakatl? Inpaís nokaua ikisayan tonajli, niman nomachtiaj itech sitlalimej. Kinemiliaj ika yejuin sitlalin tlen xkeman kitayaj kinuikas itech akin ueyixtika.

Ijkuak tlakamej oajsikej Jerusalén, otetlajtoltijkej: ‘¿Kanon nemi konetsintli akin intekiuaj yes judíos?’ Israelitas noijki kimixmatij kentla “judíos”. ‘Kachtopa otikitakej isitlalin ijkuak tinemiyaj ipan topaís’, kijtouaj tlakamej, ‘niman otiuajlakej otikueyichiuakoj’.

Ijkuak Herodes, akin tekiuajti Jerusalén okimat yejuin, melak okualan. Yejua xkinekiya okse tekiuaj makitekipatla. Kuakon okintlajtolti uejueyixtokej teopixkej: ‘¿Kanon tlakatis tekiuaj akin yonoijtoka uajlas?’ Yejuamej okinankilijkej: ‘Biblia kijtoua ika tlakatis ipan ueyikalpan Belén’.

Kuakon Herodes okimijli tlakamej akin inpaís onka ikisayan tonajli: ‘Xtejtemotij konetsintli. Tla yonenkinextijkej xnechijlikij. Nejua noijki nikneki nikueyichiuas’. ¡San ika, Herodes kinekiya kimiktis konetsintli!

Ijkuak yejuamej kisaj itech Jerusalén, oksejpa kitaj sitlalin niman kinyekana yejuin tlakamej hasta Belén, kuakon noteltia kampa nemi konetsintli. Ijkuak yejuin tlakamej kalakij ipan yejon kajli, kinextiaj María niman konetsintli. Kimakaj Jesús tetlayokoliltin. Sakin, Jehová kimijlia ipan se temiktli ika maka mayakan itech Herodes. Ika yejon, yauej itech okse ojtli, ijkuak nokuepaj ipan inpaís.

Ijkuak Herodes kimati ika tlakamej yoyajkej, melak kualani. Tlanauatia makinmiktikan nochimej konetsitsintin akin kipiyaj ome xiuitl niman akin xkaxiltiayaj, san ika, Jehová kijlia José tlen panos ipan se temiktli, niman José yauj Egipto iuan ichanejkauan. Sakin ijkuak José kitekakilia ika Herodes yomik, oksejpa kinuika María iuan Jesús ipan Nazaret. Nikan ipan ueyikalpan Nazaret noskaltia Jesús.

¿Akinon tiknemilia okichiuj mapetlani yejuin sitlalin? Xkilnamiki, ika tlakamej oyajkej kachtopa ipan Jerusalén ijkuak okitakej yejuin sitlalin. Satanás kinekiya kimiktis ikoneuj toTajtsin, niman kimatiya ika akin tekiuajti Jerusalén itoka Herodes, kitejtemoskia kenon kimiktis. Kuakon uelis tikijtoskej ika Satanás yejua akin okichiuj mapetlani yejuin sitlalin.

Mateo 2:1-23, NM; Miqueas 5:2.



Tlajtoltilistin

  • ¿Akinomej tlakamej akin nesij ipan yejuin tlaixkopinajli, niman tleka se kimajpiluijtika se sitlalin petlanki?
  • ¿Tleka melak kualani Herodes, niman tlenon kichiua?
  • ¿ Kanon kinyekana tlakamej se sitlalin petlanki, niman tleka ijkuak nokuepaj ipan inpaís yauej ipan okse ojtli?
  • ¿Tlenon tlanauatia Herodes, niman tleka?
  • ¿Tlenon Jehová kijlia José?
  • ¿Akinon okichiuj mapetlani sitlalin, niman tleka?

Okseki tlajtoltilistin

  • Xpoua Mateo 2:1-23, NM.

    ¿Kech xiuitl kipiaya Jesús niman kanon chantiya ijkuak akin nomachtiaj sitlalimej okitatoj? (Mat. 2:1, 11, 16, NM).