Xuiya kampa tlen onka ijtik

Xuiya kampa tlen kipiya

Historia 95: Kenon tlamachtia Jesús

Historia 95: Kenon tlamachtia Jesús

SE TONAJLI, Jesús kijlia se tlakatl ika noneki kintlasojtlas oksekimej. Yejua kitlajtoltia: ‘¿Akinon niktlasojtlas?’ Jesús kimatstika tlen yejuin tlakatl kinemilijtika. Yejuin tlakatl kinemilia ika san akin tlachiaj ken yejua niman noijki tlaneltokaj, noso san akin nisiu chantij. Ika yejon, matikitakan tlen Jesús kijlia.

Jesús kemantika tlamachtia ika se neskayotl. Niman aman ijkon kichiua. Kimijlia itech se judío niman se samaritano. Yotiuelkej ika miyekej judíos xnouikaj imiuan samaritanos. Yejuin tlen kimijlia:

Se tonajli, se judío uajtemotiaya ipan ojtli tlen kuikaya ipan ueyikalpan Jericó. San ika, seki tlakamej okitlachtekilijkej. Okikuilijkej itomin, okiuisojkej niman ikimiktiayaj.

Sakin, se teopixki judío opanok ipan ojtli. Okitak yejuin tlakatl ompa tlajkaltok. ¿Tlenon tiknemilia okichiuj? San okipanaui niman oyaj. Kuakon okse tlakatl akin melak tlaneltoka opanok. Se levita katka. ¿Onotelti? Ka, xonotelti niman xokipaleui yejuin tlakatl. Ueli tikita teopixki niman levita kanon yauej, temotiuij ipan ojtli.

San ika, xkita akinon ompa iuan nemi akin okiuisojkej. Se samaritano. Niman kipaleuijtika yejuin judío. Yejua kitlalilia pajtli kampa okikokojkej. Sakin, kuika judío kampa uelis noseuis niman pajtis.

Samaritano yolkuajli

Ijkuak otlan kimijlia yejuin, Jesús kijlia akin okitlajtolti: ‘Aman, ¿akinon itech yejuin yeyimej oteititi tlasojtlalistli niman okipaleui akin okiuisojkej? ¿Teopixki, levita, noso samaritano?’

Yejuin tlakatl kinankilia: ‘Samaritano. Yejua okipaleui yejon tlakatl akin okiuisojkej’.

Jesús kijlia: ‘Kema, melauak tlen tikijtoua. Aman, xuiya niman noijki xkinchiuili oksekimej tlaltikpakchanejkej ken yejua okichiuj’.

¿Xtikuelita ken Jesús tlamachtia? Tejuamej noijki tiueliskej miyek tlemach tlen melak tepaleui itech tlen Jesús kijtoua ipan Biblia, ¿xmelak?

Lucas 10:25-37.



Tlajtoltilistin

  • ¿Tlenon se tlakatl kitlajtoltia Jesús, niman tleka?
  • ¿Tlenon kemantika kitekitiltia Jesús tlen ika tlamachtia, niman tlenon yotiuelkej itech judíos niman samaritanos?
  • Itech neskayotl tlen okijto Jesús, ¿tlenon ipan nochiua se judío akin yauj ipan ojtli tlen kuikaya ipan ueyikalpan Jericó?
  • ¿Tlenon kichiua se teopixki judío niman se levita ijkuak panouaj ipan ojtli kampa tlajkaltok yejon tlakatl?
  • Ipan tlaixkopinajli, ¿akinon kipaleuijtika judío akin okikokojkej?
  • Ijkuak Jesús tlami kimijlia neskayotl, ¿tlenon tetlajtoltia, niman kenon tlanankilia yejon tlakatl?

Okseki tlajtoltilistin

  • Xpoua Lucas 10:25-37.

    Maski ueliskia nimantsin tlanankiliskia, ¿kenon Jesús okipaleui se tlakatl akin kixmatiya itlanauatiluan toTajtsin, manonankili san iselti? (Luc. 10:26; Mat. 16:13-16).

    ¿Kenon Jesús kintekitiltiaya neskayomej niman ijkon kinpaleuiaya tlaltikpakchanejkej maka makinemilikan tlen xkuajli itech oksekimej? (Luc. 10:36, 37; 18:9-14; Tito 1:9).