Xuiya kampa tlen onka ijtik

Xuiya kampa tlen kipiya

Historia 100: Jesús nemi ipan Getsemaní

Historia 100: Jesús nemi ipan Getsemaní

IJKUAK yokiskej ijtik cuarto, Jesús iuan itlatitlankauan yauej kampa onka kojtin niman tlaxochiyo, itoka Getsemaní. Nikan miyekpa youalajkaj. Aman Jesús kimijlia matlachixtokan niman makichiuakan teoyotl, yauj kampa tlaxomolko, notlakuanketsa, niman peua kichiua teoyotl.

Sakin, Jesús nokuepa kampa nemij itlatitlankauan. ¿Tlenon tiknemilia kichiujtokej? ¡Yejuamej kochij! Yexpa kimijlia Jesús ika matlachixtokan, san ika, ijkuak nokuepa kinnextia kochtokej. ‘¿Tleka nenkochij ipan se yeuajli ken yejuin?’, kijtoua Jesús ijkuak nokuepa ika yexpa. ‘Yoyejkok hora ijkuak nechtemakaskej itech akin nechtlauelitaj.’

Ijkuak ijkon kijtotika, kikakij ika tojlan uajlalo. ¡Xkita! ¡Uajlauej miyekej tlakamej ika espadas niman ika intlakouan! Kiteketstiuij tlitl tlen ika notlauiluiyaj. Ijkuak ajsij, se nonisiuiya itech Jesús. Kipipitsoua noso kitenkua, ken tikita nikan. ¡Yejon tlakatl yejua Judas Iscariote! ¿Tleka kipipitsoua noso kitenkua Jesús?

Judas kitemakatika Jesús

Jesús kitlajtoltia: ‘Judas, ¿ijkon tinechtemaka?’ Kema, pampa okipipitso noso okitenkua, ijkon okitemakak. Tlakamej akin nemij iuan Judas okimatkej akinon katka Jesús. Ika yejon, akin kitlauelitayaj Jesús kinisiuiyaj niman kajsij. San ika, Pedro xkineki kitekauilis makuikakan Jesús. Kikixtia iespada niman ika kixnamiki akin nisiu nemi. Kitekilia inakas. San ika, aman Jesús kikitskilia inakas yejuin tlakatl niman kipajtia.

Jesús kijlia Pedro: ‘Xkejyeua moespada. ¿Tiknemilia xuelis niktlajtlanilis noTaj makinuajtitlani melak miyekej iluikaktekitkej niman ijkon manechmakixtikan?’ ¡Kema, uelis! San ika, Jesús xkitlajtlanilia toTajtsin makinuajtitlani iluikaktekitkej, pampa kimatstika ika yoyejkok tonajli ijkuak akin kitlauelitaj kuikaskej. Yejua kitekauilia makuikakan. Aman, matikitakan tlenon ipan nochiua Jesús.

Mateo 26:36-56; Lucas 22:39-53; Juan 18:1-12.



Tlajtoltilistin

  • ¿Kanon yauej Jesús iuan itlatitlankauan ijkuak yokiskej ijtik cuarto tlen onka tlakpak, niman tlenon kimijlia Jesús makichiuakan?
  • ¿Kenon Jesús kinnextia itlatitlankauan ijkuak nokuepa, niman kechpa ijkon kinnextia?
  • Ken nesi ipan tlaixkopinajli, ¿akinomej kalakij Getsemaní, niman tlenon kichiua Judas Iscariote?
  • ¿Tleka Judas kipipitsoua noso kitenkua Jesús, niman tlenon kichiua Pedro?
  • ¿Tlenon Jesús kijlia Pedro, san ika, tleka Jesús xkitlajtlanilia toTajtsin makinuajtitlanili iluikaktekitkej?

Okseki tlajtoltilistin

  • Xpoua Mateo 26:36-56.

    ¿Tleka melak kuajli neskayotl kinmaka akin tlayekanaj ipan tlanechikojli, ijkuak Jesús okintlajtolpaleui inomachtijkauan? (Mat. 20:25-28; 26:40, 41; Gál. 5:17; Efe. 4:29, 31, 32).

    Ijkon ken okichiuj Jesús, ¿tikintekitiltiskej armas ijkuak yakaj techixnamikis? (Mat. 26:52; Luc. 6:27, 28; Juan 18:36).

  • Xpoua Lucas 22:39-53.

    Ijkuak se iluikaktekitketl okiyolchikauato Jesús ipan Getsemaní, ¿kijtosnekiya ika xchikauak katka itlaneltokil? Xkijto tleka ijkon titlanankilia (Luc. 22:41-43; Isa. 49:8; Mat. 4:10, 11; Heb. 5:7).

  • Xpoua Juan 18:1-12.

    ¿Kenon Jesús okinpaleui inomachtijkauan itech akin kitlauelitayaj, niman tlenon tiuelij? (Juan 10:11, 12; 18:1, 6-9; Heb. 13:6; Sant. 2:25).