Xuiya kampa tlen onka ijtik

Xuiya kampa tlen kipiya

Historia 81: Tlaneltokaj ipan toTajtsin

Historia 81: Tlaneltokaj ipan toTajtsin

MELAK miyekej israelitas kisaj itech Babilonia niman nokuepaj Jerusalén. San ika, ijkuak ajsij, Jerusalén nesi kentla se tlaluaktli. Xakaj chanti ompa. Israelitas oksejpa kipiya ika nochi kiyektlaliskej.

Ijkuak ajsij, peuaj kichijchiuaj tlaixpan, ompa yejuamej uelij kitemakaj yolkamej kentla uentli noso tetlayokoliltin, tlen kiuentlaliliaj Jehová. Sakin ijkuak panoua seki metstin, israelitas peuaj kichijchiuaj teopan. San ika, países tlen nisiu nokauaj, akin kintlauelitaj israelitas, kinekij kinmojmojtiskej niman ijkon maka sa matekitikan. Kuakon akin kintlauelitaj, kichiuaj ika akin aman peua tekiuajti ipan Persia matlanauati maka sa matekitikan.

Panouaj 17 xiuitl ika israelitas yonokuepkej itech Babilonia. ToTajtsin kintitlanilia iteotlajtokauan Ageo iuan Zacarías niman ijkon makimijlikan israelitas ika oksejpa matlachijchiuakan. Israelitas kineltokaj ika toTajtsin kinpaleuis niman kitlakamatij. Oksejpa peuaj tlachijchiuaj maski tlanauatijli tlen onotlali kijtoua ika xkipiya kichiuaskej.

Ika yejon, Tatenai, se akin kinyekana soldados persas, kintlajtoltia tleka kichijchiuaj teopan. Israelitas kijliaj ika ijkuak okiskej itech Babilonia, tekiuaj Ciro okinnauati: ‘Xuiyan Jerusalén niman xchijchiuilikan iteopan nemoTajtsin Jehová’.

Tatenai kititlani se amatlajkuilojli ipan Babilonia niman tetlajtoltia tla Ciro, akin yomik, melauak ijkon otlanauati. Nimantsin Darío kuajtitlani amatlajkuilojli kampa kinankilia ika kema. Ika yejon, tekiuaj komintlajkuilouilia: ‘Xkinkauilikan israelitas makichijchiuilikan iteopan inTajtsin. Niman nimechnauatia xkinpaleuikan’. Panoua kanaj naui xiuitl ijkuak tlamij kichijchiuaj teopan, niman israelitas melak pakij.

Aman yopanok kanaj 48 xiuitl ijkuak otlankej kichijchiuaj teopan. Akin chantij Jerusalén xkipiyaj tomin, niman ueyikalpan iuan iteopan toTajtsin xkualtsin nesij. Ne ipan Babilonia, se israelita itoka Esdras, kimati ika noneki makiyektlalikan iteopan toTajtsin. Ika yejon, ¿tikmatstika tlenon kichiua?

Esdras yauj kampa Artajerjes, intekiuaj persas, niman yejuin tekiuaj akin kuajli iyojlo kimaka Esdras miyek tetlayokoliltin, ijkon makimitki Jerusalén. Esdras kimijlia israelitas akin nemij Babilonia makipaleuikan, niman kanaj chikuasen mil kijtouaj ika yaskej. Kitkij miyek plata, oro iuan okseki tlemach tlen kualtsin.

Esdras najmana pampa ipan ojtli nemij tlakamej xkuakualtin. Yejuin tlakamej uelis kinkuiliskej plata niman oro tlen kitkij, noijki uelis kinmiktiskej. Ika yejon, Esdras kinsentlalia israelitas, ken nesi ipan tlaixkopinajli. Kuakon kichiuiliaj teoyotl Jehová niman kijliaj makintlajpiya ipan ojtli ijkuak nokuepaskej Jerusalén.

Esdras kichiujtika teoyotl iuan tlaltikpakchanejkej

Jehová kintlajpiya, ipan yejon naui metstli kech nejnemij, kuajli ajsij Jerusalén. ¿Xtechititia yejuin ika Jehová ueli kintlajpiya akin tlaneltokaj itech?

Esdras, tlaxeloltin uejueyimej 2 ontlami ipan 8.



Tlajtoltilistin

  • ¿Kechmej israelitas kisaj itech Babilonia niman nokuepaj Jerusalén, san ika, tlenon kinextiaj ijkuak ajsij?
  • ¿Tlenon peua kichijchiuaj israelitas ijkuak ajsij, niman tlenon kichiuaj akin kintlauelitaj?
  • ¿Akinomej katkaj Ageo iuan Zacarías, niman tlenon kimijliaj israelitas?
  • ¿Tleka Tatenai kititlani se amatlajkuilojli ipan Babilonia, niman kenon kinankiliaj?
  • ¿Tlenon kichiua Esdras ijkuak kimati ika noneki makiyektlalikan iteopan toTajtsin?
  • Ken nesi ipan tlaixkopinajli, ¿tlenon Esdras kitlajtlanilia Jehová? ¿Kenon Jehová kinankilia iteoyouj? ¿Niman tlenon techmachtia yejuin?

Okseki tlajtoltilistin

  • Xpoua Esdras 3:1-13.

    Tla tinemij kampa xonka kanon nonechikouaj iteixpantijkauan Jehová, ¿tlenon noneki nochipa tikchiuaskej? (Esd. 3:3, 6; Hech. 17:16, 17; Heb. 13:15).

  • Xpoua Esdras 4:1-7.

    Itech tlen okichiuj Zorobabel, ¿kenon noijki kipiya ika totlajpiyaskej maka matiknelokan tlaneltokijli melauak iuan oksekimej tlaneltokiltin xmelajkej? (Éxo. 34:12; 1 Cor. 15:33; 2 Cor. 6:14-17).

  • Xpoua Esdras 5:1-5, 17 niman 6:1-22.

    ¿Tleka akin kintlauelitayaj israelitas xouel okinteltijkej ijkuak kichijchiujtoyaj teopan? (Esd. 5:5; Isa. 54:17).

    Ijkon ken akin kinyekanayaj judíos okitejtemojkej itlayekanalis Jehová ijkuak okixnamijkej tlauejli, ¿kenon kinyolchikaua aman akin tlayekanaj ipan tlanechikoltin? (Esd. 6:14; Sal. 32:8; Rom. 8:31; Sant. 1:5).

  • Xpoua Esdras 8:21-23, 28-36.

    Ijkuak tiknemiliskej itlaj tikchiuaskej, ¿tlenon itech tlen okichiuj Esdras uelis techpaleuis? (Esd. 8:23; Sal. 127:1; Pro. 10:22; Sant. 4:13-15).