Ijkuak okinmasikej niman okinuikakej Babilonia, israelitas okintlatlatakej tla melauak tlaneltokayaj. Sadrac, Mesac iuan Abednego okomintlajkalkej ijtik se horno tlen tlikuitika, san ika, toTajtsin okinmakixti. Sakin, ijkuak medos iuan persas yokinotlatkitijkaj Babilonia, Daniel okontlajkalkej ijtik se teostotl kampa nemij leones, toTajtsin noijki okimakixti ijkuak okinkamatsauk leones.

Sakin, Ciro intekiuaj persas kinmakixtia israelitas. Ijkuak kaxiltiaj 70 xiuitl ika nemiyaj Babilonia, israelitas oksejpa nokuepaj ipan inpaís. Kachtopa okichijchiujkej iteopan Jehová ijkuak onokuepkej Jerusalén. San ika, akin kintlauelitayaj israelitas xokinkauilijkej makichijchiuakan. Opanok kanaj 22 xiuitl, ijkuak yonokuepkaj Jerusalén niman kuakon otlankej kichijchiuaj teopan.

Sakin, tiueliskej itech Esdras ijkuak nokuepa Jerusalén niman kikualtsintilia teopan. Yejuin opanok 47 xiuitl, ijkuak yotlankej kichijchiuaj teopan. Aman, opanok 13 xiuitl, ijkuak Esdras yoajsika Jerusalén, kuakon Nehemías tlapaleuiya makinyektlalikan itepanuan Jerusalén, tlen yoxoxotonkaj. Ijkon ipan Parte MAKUIJLI panoua 152 xiujtin niman ipan yejuin xiujtin nochiua nochi yejuin.

Esdras niman tlaltikpakchanejkej kichiujtokej teoyotl