Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli—Oomuhuserya  |  Yulyu 2017

“Mwinleke ni Yawo Aninla”

“Mwinleke ni Yawo Aninla”

“Muhakalalihaneke ni mukhaviheryaneke.”​—1 TESALÓNIKA 5:11.

MACIPO: 53, 28

1, 2. Ntakhara heeni ninnaphwanela othokororya mukhalelo wa waahakalaliha yaale aninla? (Moone eruku yoopacerya.)

SUSI onnaloca: “Voovira wa eyaakha amanle okhwa mwanihu, naahoona wiicela otokotoko.” Amanle okhwa mwaariye mootutusa, munna mmoha aahiloca wi owo aahoona “wiicela otokotoko woomwiilini.” Moohiciha, achu ancipale annakumanano ohooseya wa mukhalelo yoola. Mmiloko Seekristu olelo, anna ni arokorahu ancipale hiyaaweherya okhwa wa oosiveliwaaya ahaakumve Armaketo. Akhweya muchu munamusivelaanyu ookhwa, naari moomusuwela muchu yoowo oninla. Wakhala wi ti hiiha akhweya munnakoha: ‘Mano, muchu oninla, oni awerye hai ophwanya nihakalaliho?’

2 Achu akina analoca wi elukuluku enanwerya ovoliha makhwaca. Nto apwanne mahiku oothene eneereya hiiha? Naamukhwele mmoha ooloca: “Kinnoona okhala woophwanelela oloca, wi yeeyo eneeriwa moovira wa elukuluku ennakhaviherya openuwa wa muchu.” Makhwaca a mmwiilini  ennachuneya elukuluku ni opwacha wi evole. Moolikana, ennaviravo elukuluku ni opwacha wi openuwe wiicela wa mmuupuweloni. Vano tiheeni enahaala waakhaviherya yaale aninla ovukula osooseya waya mmuupuweloni?

YEHOVA TI “MULUKU A NIHAKALALIHO NOTHENE”

3, 4. Ntakhara heeni nnaroromelaahu wi Yehova onniiwexexa othanana wahu?

3 Tiithi ahu aikharari, Yehova, ti yoowo pahiru onanivaha nihakalaliho nnachunaahu. (Mwaalakhanye 2 Korinto 1:3, 4.) Owo yootakiherya etokweene ya niphwanya, nave onnaaroromeliha achu awe: “Ti miyano kinohakalalihà.”​—Isaiya 51:12; Salumu 119:50, 52, 76.

Yehova chiryene onnaweherya elukuluku yeeyo onahaaleiye waaviiha alopwana oororomeleya

4 Tiithi ahutho oosivela aahisooseya waayeleela achu aasiveleiye, ntoko murummwa awe Aparahamu, Isaki, Yakopo, Mose, Mwene Tavite ni akina. (Namarepela 12:6-8; Mateu 22:31, 32; Saweriwa T’arummwa 13:22) Piipiliya onnooniherya wi Yehova chiryene onnaweherya elukuluku yeeyo onahaaleiye waaviiha alopwana yaawo oororomeleya. (Yobi 14:14, 15) Mu elukuluku yeeyo, awo anahaala ohakalala ni opuha ekumi yoophaameya. Yehova aahisooseyatho va okhwa wa Mwanawe oopacerya. Piipiliya onaloca wi Yesu aari ‘mwana òkhweleyasa’ a Muluku. (Mateu 3:17) Chiri hannawerya waanyiherya osooseya wa Yehova omoona Mwanawe akhwaaka.​—Yohani 5:20; 10:17.

5, 6. Yehova onanihakalaliha hai?

5 Nnanwerya ororomela moomalela wi Yehova onahaala onikhaviherya. Mwawiihiiha, nnaphwanela okhala ootaphuwa oveka wa yoowo ni oloca osooseya ni winla wahu. Echu yoohakalaliha osuwela wi Yehova onniiwexexa miyoonelo sahu nave wi onnanivaha nihakalaliho nnachunaahu! Nyenya owo oneerano hai yeela?

6 Mukhalelo mmoha wa mincipale Yehova onanihakalaliheiye ti moorweela wa munepa awe waweela. (Saweriwa T’arummwa 9:31) Yesu aalaiherya wi Tiithahu aahaala waavaha munepa awe waweela oothene yaale anamveka yoowo. (Luka 11:13) Susi oromoliwe woopaceryani, onnaloca: “Saanakhalavo ilukuluku sincipale naakokhoraahu ni omveka Yehova wi anihakalalihe. Vakhaani vakhaani, murecele wa Muluku waanakhapelela mirima sahu ni muupuwelo.”​—Mwaalakhanye Filipi 4:6, 7.

YESU THO ONNIIWEXEXA MIYOONELO SAHU

7, 8. Ntakhara heeni nnaphwanelaahu ororomela wi Yesu onahaala onihakalaliha?

7 Vaavaa Yesu aareiye veelaponi yavathi owo aahitakiherya moophaameya mikhalelo sa Tiithi awe moorweela wa yeeyo aaloceiye ni aapakeiye. (Yohani 5:19) Yehova aahimurumiha Yesu veelaponi wi ahakalalihe “awiniwa murima” ni oothene yaale ‘aninla.’ (Isaiya 61:1, 2; Luka 4:17-21) Achu yaanasuwela wi Yesu aaniiwexexa ohooseya  waya nave chiryene aanachuna waakhaviherya.​—Ahebri 2:17.

8 Vaavaa Yesu aareiye mmiravo, moohikhwa minikwa aahikhalano asinthamwene awaacameleya nave aahaayeleela amusi mookhwani. Ntoko yootakiherya, onakhala wi Yosefe tiithi a Yesu, akhweya aakhwile nlelo Yesu ari mmiravo. * (Moone masu avathi.) Mwaanyiherye mukhalelo eyo yaaryaayano ntakhara mmiravo yoola oothokororya ovilela othanana wawe, hiiha ntoko othanana wa amamaawe, asinna ni arokorawe!

9. Yesu oonihenrye hai niphwanya vaavaa Lasaro aakhwileiye?

9 Variyari va muteko awe woolaleerya, Yesu aahooniherya wi chiryene aanawiiwexexa achu nave aahikhalano niphwanya wa yaawo. Ntoko yootakiherya, vaavaa nthamwene awe avamurimani Lasaro aakhwileiye, Yesu aahisooseya vancipale hiiha ntoko Mariya ni Marta yoonaaya. Niphwanya nawe wa yaawo naari noolipa ophiyerya apacerya winla, naamwi aasuwela wi aahaala omviiha Lasaro.​—Yohani 11:33-36.

10. Ntakhara heeni ninnaroromela wi Yesu onniiwexexa mukhalelo nnoonaahu olelo?

10 Masu a nihakalaliho a Yesu mmahiku akhalai ananikhaviherya hai olelo? Piipiliya onnooniherya wi Yesu nlelo hatoroken’ye. Piipiliya onnaloca: “Yesu Kristu ori mmohamoha osilo, olelo ni mahiku othene.” (Ahebri 13:8) Owo oniichaniwa “mwanene a ekumi” woona wi oheeriha okhala wooweryeya wa hiyo okhalano ewehereryo ya ekumi yoohimala. Yesu onniiwexexatho othanana wa muchu ti muchu nave “onnawerya wakhaviherya yale ari awereryiwa.” (Saweriwa T’arummwa 3:15; Ahebri 2:10, 18) Mwawiihiiha nnanwerya ororomela wi Yesu nlelo onnasooseya vaavaa akina anathananaaya. Owo onniiwexexa othanana waya, nave onnawerya waavaha nihakalaliho “elukuluku yophwanelela.”​—Mwaalakhanye Ahebri 4:15, 16.

‘NIHAKALALIHO NA MASU A NLIVRU NA MULUKU’

11. Soorempwa taani sinoohakalalihani?

11 Yaweereya ya othanana wa Yesu elukuluku ya okhwa wa Lasaro, yaweereya emoha wa sincipale sinaphwanyeya mu Masu a Muluku. Ela henantikhiniha, woona wi “sothene iri mwa Sorempwa sa Muluku irepeliwe wi inihusihe wi, nivilelaka ni nihakalalaka ni masu a nlivru na Muluku, nikhaleno owehererya.” (Aroma 15:4) Wakhala wi munnathanana, munanweryatho ophwanya nihakalaliho neeparipari orweela wa soorempwa ntoko iha inacharela:

  • “Apwiya ari vakhiviru va yale awiniwa murima, annavulusa atxhu awotxeya.”​—Salumu 34:19, 20.

  • “Sotxhuna saka sakhala sintxipale, mahakalaliho anyu annakiriryiha murima.”​—Salumu 94:19.

  • “Yowo ene Yesu Kristu Pwiya ahu, ni Muluku Tithihu onikhwenle ni mwa ikharari sawe onivan’heiye nihakalaliho nohimala ni oweherya otokotoko, ehakalalihe mirima sanyu ni  yolipiheni.”​—2 Tesalónika 2:16, 17. *​—Moone masu avathi.

MULOKO EHIME YA NIHAKALALIHO NTOKWEENE

12. Nni niwerye hai waahakalaliha akina?

12 Yaale anathanana ananwerya ophwanya nihakalaliho mmuloko Weekristu. (Mwaalakhanye 1 Tesalónika 5:11.) Vanonto, muni nwerye hai waalipiha ni waahakalaliha yaale a “winiwa murima”? (Masiposipo 17:22) Muupuwelele wi yookhala “elukuluku yomàla, elukuluku yoloca.” (Eklesiyaste 3:7) Naamukhwele onichaniwa Talene onnathariha wi yaale aninla annachuna oloca mukhalelo anoonaaya. Mwawiihiiha echu yookhweleyaxa munaphwanelaanyu weera ori waawiriyana muhaakwatelenle. Yuniya, yoowo munnawe isiiphale, onnaloca: “Naamwi muhiweryaka waamaaliha moomalela, echu yookhweleya ti yawi munnachuna wiiwexexa moonelo aya.”

13. Tiheeni nnaphwanelaahu wuupuwelela vooloca sa winla?

13 Nnaphwanela wuupuwela wi tahi wi oothene ahu nnoona nave nnooniherya othanana wahu mmukhalelo woolikana. Ikwaha ikina honaweryeya othariha mwawaakhwanela ophiyerya mweeryo taani nnasooseyaahu. Masu a Muluku annaloca: “Weyano mekhà onnasuwela ohawa wà havotho mutxhu mukina onasuwela wèliwa wà murima.” (Masiposipo 14:10) Naamwi muchu achunaka oloca moonelo awe, tahi wi mahiku oothene onakhala wookhweya akina wiiwexexa yeeyo oneereryeiye oloca.

Wiiliwiili, echu yookhaviheryaxa nnaphwanelaahu opaka ori ‘winla ni yawo aninla.’

14. Tiheeni nnaphwanelaahu oloca wi naahakalalihe yaale aninla?

14 Enamukhala yoovila osuwela echu ya oloca wa muchu yoowo onathanana. Nyenya Piipiliya onnaloca wi “malotxelo a anamiruku, t’openusa.” (Masiposipo 12:18) Ancipale annaphwanya masu a waahakalaliha akina moorweela wa eproxura Quando Morre Alguém Que Amamos. * (Moone masu a vathi.) Wiiliwiili echu yookhaviheryaxa nnaphwanelaahu opaka ori ‘winla ni yawo aninla.’ (Aroma 12:15) Kapi, yoowo aiyawe akhwile, onnaloca wi ikwaha ikina mukhalelo mmoha onooniheryeiye moonelo awe ori moorweela wa winla. Owo onnaacererya: “Ti hiiha kinaakhelaaka nihakalaliho vaavaa asinthamwene aninlaaya ni miyo. Mu elukuluku yeeyo, nkiniisoona okhala meekhaaka mu othanana waka.”

15. Nni naahakalalihe hai akina wakhala wi ennanivila weerano mwawooneya? (Moone ekaaxa “ Masu Eeparipari a Nihakalaliho.”)

15 Wakhala wi ennoovilaani oloca echu wi mmuhakalalihe muchu, onamukhala wookhweya omurepela ekaarata, ovonya michaka mu telefoni naari emaili. Munaphwanela orepa masu oohakalaliha a mu soorempwa, oromola mikhalelo munuupuwelaanyu  wa muchu yoowo okhwile, naari oloca ichu soohakalaliha munuupuwelaanyu. Yuniya onnaloca: “Waakhela michaka soolipiha mu telefoni naari nwopelo wi kamalihe elukuluku ni Akristu akina yookikhaviherya vancipale. Meerelo yaala aakeeriha wiisoona okhala oosiveliwa ni ookhapeleleya.”

16. Mukhalelo taani wawaahakalaliha akina onakhumelela phaama?

16 Mavekelo ahu ananwerya waakhaviherya anna ni arokorahu anathanana. Nnanwerya waavekelela naari ovekela ni yaawo. Akhweya onamukhala woovila weerano hiiha moovaka wi munahaala winla, nave nivekelo nanyu na vathi vamurima nnanwerya okhala nihakalaliho nakuru. Talene onnuupuwela: “Ikwaha ikina vaavaa arokora yaarwaaya okihakalaliha, kaanaakoha waakhanle wi ari ooreheryeya wi evekele. Awo yaanapacerya ovekela, wiiliwiili yaavyaavyaka masu a oloca wuupaceryani, nyenya elukuluku ti elukuluku, ni masu avakhaani, nsu naya naanakhala noolipa nave epaka nivekelo na vathi vamurima. Nroromelo naya noolipa, osivela waya ni opwacha waya waari woolipiha nroromelo.”

MUTITELELE OVAHA NIHAKALALIHO

17-19. Ntakhara heeni ninnaphwanela otitelela ovahererya nihakalaliho?

17 Honaweryeya osuwela phaama elukuluku muchu onahaaleiye omaliha athananaka. Vaavaa oosiveliwa onakhweiye, woopaceryani asinthamwene ancipale ni amusi anakhala vaava wi evahe nihakalaliho. Nyenya achu emanle okookela owannyaya, yaale akhweliwe nlelo annachuna nihakalaliho. Mwawiihiiha mukhale ooreheryeya wi  mukhaviherye. “Nthamwene onamukhwela nthamwen’awe mahiku othene, onnakhala munnawe, elukuluku y’epahu.” (Masiposipo 17:17) Nnaphwanela waahakalaliha yaale anathanana ophiyerya vaavaa eneeraaya echune.​—Mwaalakhanye 1 Tesalónika 3:7.

18 Muupuwele wi moohilekela muchu onanwerya wuupuwelela othanana wawe veelukuluku vyakala. Eyo enanwerya weereya nthowa na wuupuwelela nihiku na othela, macipo, iruku, miteko naari woona wunkhela, wiiwa, naari elukuluku vyakala vayaakhani. Woopaceryani, vaavaa naamukhwele oothanana onapakeiye ichu meekheiye, ntoko ophiya va muthukumano wa muceche naari va Mukonelo, eyo enanwerya okhala yoosoosa. Munna mmoha ooloca: “Miyaano kaanaweherya oohakalalaxa yaakhwanaka eyaakha yoopacerya ya othela, nave hiwaari wookhweya. Nyenya anna ni arokora yaarehererya nikhuuru nikhaani na asinthamwene a vamurimani, wi kihikhale meekhaaka.”

19 Muupuwele wi yaale anathanana annachuna nceenyeryo, ohiya pahiru mu ilukuluku savameekhaaya. Yuniya onnathariha: “Wiiliwiili nikhaviheryo ni opwacha onavahiwa nihiri nihiku na othata ennakumiherya mphurelo. Ilukuluku seiyo soohilakelela ti sa esisapo nave sinnaruuha nihakalaliho ntokweene.” Eparipari tiyawi, haniwerya omaliha othanana woothene naari omeekha, nyenya nnanwerya waahakalaliha moorweela wa opaka ichu ntakhara yaawo. (1 Yohani 3:18) Kapi ooloca: “Miyaano chiryene kinnamuthamalela Yehova ntakhara atokweene oosivela yaawo anakeeciha mu makacamiho aka oothene. Awo chiryene annakeeriha woona nikhaviheryo noosivela na Yehova.”

20. Ntakhara heeni soororomeliha sa Yehova ehime ya nihakalaliho ntokweene?

20 Echu yoohakalaliha osuwela wi Yehova, Muluku a nihakalaliho noothene onahaala oviihavo moomalela othanana woothene mu elukuluku ya ovinya mookhwani. (Yohani 5:28, 29) Muluku oororomeliha wi “onahaala oviihavo okhwa okhala wookhala, nave Mutokweene Apwiya Yehova onahaala ovuta miithori owanoni wa achu oothene.” (Isaiya 25:8, Tradução do Novo Mundo) Voocharela, ohiya ‘winla ni yawo aninla,’ muchu ti muchu veelaponi onahaala ‘ohakalala ni yawo anahakalala.’​—Aroma 12:15.

^ par. 8 Piipiliya onnooniherya wi Yosefe iiha akhanle vaavaa Yesu aareiyeno iyaakha 12 sa oyariwa. Nyenya, Yosefe haaromoliwe vaavaa Yesu aapankeiye yootikhiniha awe yoopacerya ya otatusa maahi ekhala eviinyu, naari mu elukuluku ekina ovinyerya vaava. Ela akhweya enataphulela wi elukuluku yeele Yosefe aahikhwa. Mwawaacererya, vaavaa Yesu aareiye va mwirini woohooxa, owo amvenke Yohani wi aakhapelele amamaawe, echu yeeyo Yesu eereiye ahipake waakhanle wi Yosefe aari mukumi.​—Yohani 19:26, 27.

^ par. 14 Moonetho mwaha Console os enlutados, assim como Jesus fezmu Mulipeleli 1 a Novempuru a 2010.