Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli— Oomuhuserya

  |  Novempuru 2017

Muhihiye wi Echu Vyakala Ewaakheeni Nchuwelo

Muhihiye wi Echu Vyakala Ewaakheeni Nchuwelo

“Muhihiye wi mwakhiwe ntxhuwelo nanyu.”​—KOLOSI 2:18.

MACIPO: 27, 7

1, 2. (1) Nchuwelo taani akapuro a Muluku anaweheryaaya? (2) Tiheeni enanikhaviherya otikitherya miitho ahu mu nchuwelo? (Moone eruku yoopacerya.)

AKRISTU oothanliwa aakhalano ewehereryo yasisapo. Awo anaweherya okhala wirimu. Murummwa Paulo iichana ewehereryo eyo “ntxhuwelo nawitxhaniwa wa wirimu onarwa wa Muluku.” (Filipi 3:14) Wirimu, awo anahaala olamulela ni Yesu Kristu mu Omwene awe nave anahaala olapa ni yoowo wi yaakhaviherye achu okhala oophaameya. (Wupulula 20:6) Chiri ela ewehereryo yootikhiniha! Ipucepuche ikina inaweherya nchuwelo noohiyana. Awo anaweherya okhala Mparataiso veelaponi yavathi okhala wookhala, nave ewehereryo ela ennaahakalaliha chiryene!​—2 Pedro 3:13.

2 Paulo aachuna waakhaviherya Akristu akhwaawe oothanliwa wi ekhale oororomeleya wi ewine nchuwelo. Owo aahaaleela: “Siveliwani sa wirimu.” (Kolosi 3:2) Awo yaaphwanela okhala ootikitheryeya mu ewehereryo aya yasisapo ya wirimu.  (Kolosi 1:4, 5) Wuupuwela mareeliho a Yehova ennaakhaviherya akapuro oothene a Muluku otikitherya miitho aya mu nchuwelo. Eyo eparipari moohipwacha waakhanle wi anaweherya okhala wirimu naari veelaponi.​—1 Korinto 9:24.

3. Paulo aaloponle Akristu vooloca sa eheeni?

3 Paulo tho aahaalopola Akristu vooloca sa yawoopiha yeeyo yaahaala oweeriha ohaakhela nchuwelo. Ntoko yootakiherya, owo aahaarepela Akolose vooloca sa Akristu atheru yaawo yeererya omuhakalaliha Muluku moorweela wa ochara Nlamulo na Mose ohiya ohela nroromelo mwa Kristu. (Kolosi 2:16-18) Paulo aahithokororyatho sawoopiha seiyo nlelo irivovo olelo ni seiho saahaala onimaaliha owina nchuwelo. Owo aahithariha mukhalelo wa okhoma ni soochuna soocapaheya ni echu yaweera wakhala wi nookhalano makacamiho veemusini vahu naari ni annihu mmulokoni. Ekano yasisapo ya Paulo enanwerya onikhaviherya olelo. Va nthowa nenla hankooni nthokororye olopola wookhwela nnaphwanyaahu mu ekaarata aarepenleiye Akolose.

MWIIPHE SOOCHUNA SOOCAPAHEYA

4. Ntakhara heeni soochuna soocapaheya sinanwerya onimaaliha owina nchuwelo?

4 Paulo amanle owuupuxerya annawe vooloca sa ewehereryo aya yootikhiniha, owo aahirepa: “Mwiphe sinawerihani sonanara sa vathiva: otxapaheya, sotxheka, okhwela sonanara, oluluwa, nave mìko.” (Kolosi 3:5) Soochuna soocapaheya inanwerya okhala soolipa nave inamuneeriha oyeleela onthamwene ahu ni Yehova ni ewehereryo ahu yoomwaahiyu. Munna mmoha yoowo eemerenrye soochuna soocapaheya nave ohoolo waya akookela mmulokoni olonce wi soochuna seiya saahinnuwa “ahiwerya ohiyererya ophiyerya ocapaheya.”

5. Nni niikhapelele hai mu mikhalelo sawoopiha?

5 Nnaphwanela wiikosopa xaxaxa wakhala wi nri mmukhalelo yoowo oni oneerihe ohiiwelela malakiheryo a Yehova. Ntoko yootakiherya, ti yamiruku achu anuuryana ohela miphimo woopaceryani vooloca sa ichu ntoko waapapelana, onuulana, ni okhala meekhaaya mapuro awiipitheya. (Masiposipo 22:3) Mikhalelo mikina sawoopiha sinanwerya ophacuwa vaavaa nnayaahu weeca maroca naari vaavaa nnalapaahu ni muchu a mwiikho woohiyana. (Masiposipo 2:10-12, 16) Tiheeni munaphwanelaanyu opaka wi mwiikhapelele? Mwiisuwanyeihe ntoko Namoona a Yehova. Mwiikhaliheke moophwanelela, nave muhicuwale wi wooseela onnakeriha vancokwani. Nnaphwanelatho okhalano ephoole wakhala wi nri ooximwa naari meekhihu. Akhweya nnammuchuna muchu wi aneerihe okhala oochuneya. Akhweya nnamukhala ookhulumuwa ophiyerya weemererya opwacha wa muchu vyakala. Eyo ti yawoopiha. Wakhala wi montoko woona mmukhalelo yoowo, muhipake echu enahaala woohiihaani owina nchuwelo. Mveke nikhaviheryo na Yehova, ni na anna ni arokora anyu.​—Mwaalakhanye Salumu 34:19; Masiposipo 13:20.

6. Tiheeni nnaphwanelaahu wuupuwelela vaavaa nnathanlaahu mathatelo?

6 Wi niiphe soochuna soocapaheya, nnaphwanela okhooca mathatelo anavuwiha ocapaheya. Olelo, mathatelo mancipale akhanle annanuupuserya mukhalelo ichu saaraaya o Sotoma ni Komora. (Yuda 7) Yaale anavuwiha mathatelo anneeriha ocapaheya okhala ntoko waweemereryeya ni woohipahula. Mwawiihiiha mahiku oothene  nnaphwanela okhala awiilipelela. Hannaphwanela weemererya mathatelo vyakala elapo ela enavahaaya. Moohiyana, nnaphwanela othanlela mathatelo yaawo ahinahaala onimaaliha owina nchuwelo na okumi.​—Masiposipo 4:23.

“WARANI MURIMA WA” OKHWELA NI OPHAAMA

7. Makacamiho taani anahaala okhumelela mmuloko Weekristu?

7 Nri oohakalala opaka makupa a muloko Weekristu. Ninnahuserya Masu a Muluku mmithukumano, nave ninnakhaviheryana mookhwela. Eyo ennanikhaviherya otikitherya miitho ahu mu nchuwelo. Nyenya ikwaha ikina onnakhalavo ohiiwanana yoowo onaruuha makacamiho ni anna ni arokorahu. Wakhala wi hinimalinhe makacamiho yaawo, moohilekela anamuneeriha okuha mathowa.​—Mwaalakhanye 1 Pedro 3:8, 9.

8, 9. (1) Mikhalelo taani sinahaala onikhaviherya owina nchuwelo? (2) Tiheeni eni enikhaviherye okhapelela murecele wakhala wi asinthamwene Eekristu aanichekela?

8 Niheemererye wi okuha mathowa eniyeleelihe owina nchuwelo. Paulo oothariha yeeyo Akristu anaphwanelaaya opaka: “Nyuwo muri atxhu òthanliwa, awela murima, ni òkhweleya a Muluku, warani murima wa ikharari, waphama, wawiyeviha, womàla, ni wovilela. Mukhale òvilela ni akhwinyu, nave mulevelelaneke wakhalavo nthowa ni mukhwinyu. Ntoko Apwiya olevelenlayani, ni nyuwotho mwaleveleleke akhwinyu. Opwaha sothene iha warani murima wa okhwelana t’ori nimakelo nawakhwanela.”—Kolosi 3:12-14.

9 Okhwela ni ophaama onamunikhaviherya waalevelela akina. Wakhala wi noosooseya wa yeeyo muchu olonceiye naari opankeiye, nnaphwanela wuupuwela elukuluku hiyaano naaloncaahu naari naapankaahu echu yookooka owaruni wa akina nave awo enilevelela. Chiri naahitepa othamalela okhwela ni ophaama waya! (Mwaalakhanye Eklesiyaste 7:21, 22.) Ninnathamalela osuwela wi Kristu oowaataaniha alapeli eeparipari. (Kolosi 3:15) Oothene ahu nnamukhwela Muluku mmohamoha, nnalaleerya muchaka mmohamoha, nave ancipale aakhalano makacamiho mamohamoha. Wakhala wi nri aphaama ni ookhwela ni olevelelana mukina ni mukhwaawe, muloko onahaala okhala wawiiwanana nave nnanwerya otikitheryeya mu nchuwelo.

10, 11. (1) Ntakhara heeni nrima ti nawoopiha? (2) Nni nroromele hai wi nrima hinniyeleeliha owina nchuwelo?

10 Nrima nnamuniyeleeliha owina nchuwelo. Sootakiherya sa Mpiipiliyani sinnooniherya wi nrima ti nawoopiha. Ntoko yootakiherya, Kayine aahimukhalela nrima Apele nave amwiipha. Kora, Tatani, ni Apiramu yaahimukhalela nrima Mose nave yaahim- mwareela. Mwene Sawuli aahimukhalela nrima Tavite nave eererya omwiipha. Yeeyo Masu a Muluku analocaaya ti yeeparipari: “Txhiri oriwo nrima ni marapwa, wokhalavo wakanyerya ni sonanara sothene.”​—Tiyako 3:16.

11 Wakhala wi ninnawetha okhala ookhwela ni aphaama, hinni naakuveleke okhala anrima. Masu a Muluku aaloca: “Okhwela ti wovilela, ti wa orèra murima. Hiwano nrima.” (1 Korinto 13:4) Wi nroromele wi nrima hinnapaka makupa a omuchu ahu, nnaphwanela weererya woona ichu hiiha ntoko Yehova onooneleiye. Nnaphwanela owoona anna ni arokorahu ntoko makupa a mwiili mmoha, yoowo ori muloko.  Piipiliya ooloca: “Yammwilini emoha yakhalano ntxitximiho, sothene sinnahakalala ni yeyo.” (1 Korinto 12:16-18, 26) Wakhala wi yoheereya echu yaphaama ni munnihu, nnahaala okhala oohakalala ni yoowo, ohiya omukhalela nrima. Muupuwele sa yootakiherya yaphaama ya Yonata mwaana a Mwene Sawuli. Yonata haamukhalenle nrima Tavite vaavaa aathanliweiye wi akhale mwene ohiya yene. Ophiyerya wi owo aahimulipiha nave aahimukhaviherya Tavite. (1 Samuwele 23:16-18) Apwanne naanwerya okhala aphaama ni ookhwela ntoko Yonata?

NWINE NCHUWELO NTOKO EMUSI

12. Ekano taani ya Mpiipiliya enahaala okhaviherya emusi ahu owina nchuwelo?

12 Vaavaa muchu ti muchu aveemusini onaphariheleiye muteko malakiheryo a Mpiipiliya, emusi ahu enahaala okhala yamurecele, yoohakalala nave nnahaala owina nchuwelo. Paulo oovaha ekano ela yamiruku wa imusi: “Nyuwano, athiyana, n’wiweleleke asiyanyu, ntoko munaphwanelanyu mwa Apwiya. Nyuwanotho, alopwana, mwakhweleke asarinyu ni muhakhaleleke òpwalu. Nyuwano, anamwane, n’wiweleleke asitithinyu mwa sothene, ntakhara yeyo t’enàsivela Apwiya. Nyuwo, asitithi, muhanyenyiheke murima aninyu, wi ehikhaleke òvolola.” (Kolosi 3:18-21) Apwanne munnawerya woona mukhalelo ekano ela eneeraaya ekhaviherye emusi anyu?

13. Murokora Eekristu oni awerye hai omukhaviherya iyawe ohiri Mukristu ochuna omurumeela Yehova?

13 Akhweya nyuwaano mwa murokora iyanyu ohinamurumeela Yehova. Tiheeni munahaalaanyu weera wakhala wi munnoona wi owo hanookhalihani phaama? Nyuwaano akhweya munamunyeeyeya ni waakhulana ni yoowo, nyenya apwanne eyo enahaala weeriha mukhalelo okhala waphaama? Naamwi okhalaka wi moowina waakhulana iwo,  apwanne munahaala omweeriha owo omurumeela Yehova? Akhweya hooye. Nyenya wakhala wi munnooniherya ncicimiho ntakhara murici awe ntoko muhooleli a emusi, munanwerya okhaviherya emusi anyu okhala yamurecele nave munahaala omucicimiha Yehova. Yootakiherya anyu yaphaama akhweya enam- mweeriha iyanyu ochuna omurumeela Yehova, nave voocharela oopiili anyu munanwerya owina nchuwelo.​—Mwaalakhanye 1 Pedro 3:1, 2.

14. Tiheeni mulopwana Eekristu onaphwaneleiye weera wakhala wi mwaariye ohiri Mukristu hanamucicimiha?

14 Akhweya mwa munna mwaarinyu ohinamurumeela Yehova. Tiheeni munahaalaanyu weera wakhala wi munnoona wi owo hanoocicimihaani? Wakhala wi munneererya omooniherya wi nyuwaano mwa xeefi moorweela wa omuruwana, apwanne onahaala woocicimihakaani? Mweeparipari hooye! Muluku onaweherya wi nyuwaano mukhale mulopwana ookhwela yoowo onamutakiherya Yesu. (Éfeso 5:23) Yesu, muru wa muloko, mahiku oothene toopisa murima ni ookhwela. (Luka 9:46-48) Wakhala wi munnamutakiherya Yesu, veelukuluku aya mwaarinyu onahaala ochunatho omurumeela Yehova.

15. Mulopwana Eekristu onooniherya hai wi onnamukhwela mwaariye?

15 Yehova onnaahusiha alopwana: “Nyuwanotho, alopwana, mwakhweleke asarinyu ni muhakhaleleke òpwalu.” (Kolosi 3:19) Mulopwana ookhwela onnamucicimiha mwaariye. Mwawiihai? Owo onnawiriyana sooloca sawe nave onnamweeriha osuwela wi yeeyo onaloceiye ti yookhweleya wa iyawe. (1 Pedro 3:7) Naamwi wiiliwiili mulopwana ahipakaka yeeyo mwaariye onavekeiye, onwiriyana enammukhaviherya opaka soolakelela saphaama. (Masiposipo 15:22) Mulopwana  ookhwela hanamuruma mwaariye wi amucicimiheke. Moohiyana, owo onneererya wooniherya omukhwela wawe. Vaavaa mulopwana onamukhweleiye mwaariye ni anaawe, awo anakhala oohakalala vaavaa anamurumeelaaya Yehova ni owina nchuwelo na okumi.

Nni niwerye hai osepa makacamiho aveemusini wi ehiniyeleelihe nchuwelo? (Moone iparakrafo 13-15)

AMIRAVO​—MUHIHIYE WI ECHU VYAKALA YOOMAALIHEENI OWINA NCHUWELO

16, 17. Ntoko mmiravo, muni musepe hai okhala oonyeenyeyasa ni asitiithinyu?

16 Akhweya mwa mmiravo nave munnoona wi asitiithinyu hanawiiwexexani naari wi awo annoovareryelaanixa. Eyo enanwerya woonyeenyeihaani vancipale ophiyerya wiikoha waakhanle wi munnachuna omurumeela Yehova. Nyenya wakhala wi moomuhiya Yehova, munahaala woona wi haamo muchu mweelaponi onookhwelaani vancipale opwaha asitiithinyu Eekristu ni asinthamwene anyu a mmulokoni.

17 Muupuwele sa ela: Waakhanle wi asitiithinyu hantonko woolakani, mwaahaala osuwele hai wi awo chiryene annookhapelelaani? (Ahebri 12:8) Mweeparipari, awo tahi oophaameya, mwawiihiiha mukhalelo anoolakaayaani akhweya honi woosiveleeni. Nyenya muhiteteiwe ni yeeyo. Moohiyana, mweererye wiiwexexa mathowa anaweeriha opaka yeeyo ni oloca. Mukhale oomaaleleya, nave muhinyeenyeye moopwaha mphimo. Masu a Muluku aaloca: “Opiserya murima olotxa, miruku; osuwenle wiphima, mutxhu a miruku.” (Masiposipo 17:27) Ekhale yoolakelela anyu okhala muchu awiichwelavo yoowo oneemererya ekano nave onahuserya orweela wa yeeyo moohipwacha mukhalelo enavahiwaaya. (Masiposipo 1:8) Muhicuwale wi okhalano asitiithi anamusivela Yehova yamahala yasisapo. Awo anachuna wookhaviheryaani okhalano ekumi okhala wookhala.

18. Ntakhara heeni muryaanyu oolakelela otikitheryeya miitho anyu mu nchuwelo?

18 Moohipwacha waakhanle wi ewehereryo ahu ori okhala wirimu naari mu parataiso veelaponi, mmoha ti mmoha a hiyo onan- werya owehererya omwaahiyu wootikhiniha. Ewehereryo ahu ti yeeparipari. Enathipeleya mu yoororomeliha ya Mpatusa a elapo yoothene, yoowo olonce: “Elapo enamusareya osuwela w’Apwiya.” (Isaiya 11:9) Moohilekela muchu ti muchu veelaponi onahaala ohusihiwa ti Muluku. Nla nchuwelo nihinaphwanelaahu oyeleela. Va nthowa nenla mahiku oothene muupuwelele yeeyo Yehova oolaihenryeiyeni, nave muhihiye wi echu vyakala yoomaaliheeni owina nchuwelo!