Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli— Oomuhuserya

  |  Marsu 2017

Mukhaleno Nroromelo—Mulakelele Mwamiruku!

Mukhaleno Nroromelo—Mulakelele Mwamiruku!

‘Nveke ni nroromelo, muhikhwile minikwa.’TIYAKO 1:6.

MACIPO: 54, 42

1. Tiheeni yaamweerinhe Kayine opaka yoolakelela yoonanara, nave teevi yaari yookhumelela?

KAYINE aakhalano yoolakelela yookhweleya wi apake. Owo anwerya othanla ovareryela moonelo awe woonanara, weerano yeeyo yaahaala oruuha sookhumelela saphaama. Naari anwerya weemererya wi moonelo awe woonanara ohoolele saweera sawe, weerano yeeyo yaahaala oruuha sookhumelela soonanara. Piipiliya onnanleela wi Kayine aapanke yoolakelela yoonanara. Yoolakelela awe yaahikumiherya okhwa wa munnawe Apele nave enanariha onthamwene wa Kayine ni Mpatusa awe.Maphatxuwelo 4:3-16.

2. Ntakhara heeni ti yaphaama opaka soolakelela saphaama?

2 Moolikana, oothene ahu nookhalano murici wa opaka soothanla ni soolakelela muukumini. Soolakelela ikina sinnakhala itokotoko, nave ikina hooye. Naamwi hiiha, soolakelela sahu sincipale sinanwerya ovolowela vancipale okumi ahu. Vaavaa nnapakaahu soolakelela saphaama, nnakhalano sookacamiha vakhaani, ni murecele wawaaca. Nyenya wakhala wi noopaka soolakelela soonanara, okumi ahu onnasareya ni makacamiho.Masiposipo 14:8.

3. (a) Wi nipake soolakelela mwamiruku, nnaphwanela okhalano nroromelo mu eheeni? (b) Makoho taani nnahaalaahu othokororya?

 3 Tiheeni eni enikhaviherye opaka soolakelela mwamiruku? Nnaphwanela okhalano nroromelo mwa Muluku, ororomela wi owo onnachuna onikhaviherya nave wi onahaala onivaha miruku nnachunaahu wi nipake soolakelela sa miruku. Nnaphwanelatho okhalano nroromelo mu Masu awe, ororomela ekano awe. (Mwaalakhanye Tiyako 1:5-8.) Vaavaa nnamwaacamelaahu Yehova ni osivela vancipale Masu awe, ennanikhaviherya ororomela wi owo oosuwela yeeyo eri yaphaama wa hiyo. Voocharela, nnahaala ovarerya Masu awe nihaakumve opaka soolakelela. Nyenya nni niwerye hai wunnuwiha mavyakelo ahu a opaka soolakelela saphaama? Mano, ninnaphwanela otoroka yoolakelela nipankaahu?

OOTHENE AHU NINNACHUNA OPAKA SOOLAKELELA

4. Yoolakelela taani Atamu aapankeiye, nave teevi yaari yookhumelela?

4 Ovinyerya woopaceryani, achu annapaka soolakelela sookhweleya. Mulopwana oopacerya, Atamu, aaphwanela olakelela waakhanle wi aahaala onwiriyana Mpatusa awe, Yehova, naari wi aahaala onwiriyana mwaariye, Eva. Atamu aathanla onwiriyana Eva, yoowo aamuceenyenrye opaka yoolakelela yoonanaraxa. Ntoko yookhumelela, Yehova aamwiikara Atamu mu emaca ya Eteni, nave ohoolo waya aakhwa. Olelo, ninnahooxeyatho ntoko yookhumelela ya yoolakelela yoonanara ya Atamu.

Yehova oonivaha Masu awe, yaawo ananihusiha mukhalelo wa opaka soolakelela sa miruku

5. Nnaphwanela woonaka hai murici wa opaka soolakelela?

5 Akina anuupuwela wi waahaala okhala wookhweya ohipaka soolakelela mu ichu soothene. Akhweya nyuwaano munoona mmukhalelo woolikana. Nyenya ti waphaama wuupuwela wi Yehova haapatunxe achu wi ekhale ntoko maakina yaawo ahinawerya wuupuwela naari opaka soothanla. Owo oonivaha Masu awe, yaawo ananihusiha mukhalelo wa opaka soolakelela sa miruku. Yehova onachuna wi nipake soolakelela, nave murici yoola onanwerya onikhaviherya. Muupuwelele sootakiherya inacharela.

6, 7. Yoolakelela taani Aisarayeli yaaphwanelaaya opaka, nave ntakhara heeni waavinlaaya weerano? (Moone eruku yoopacerya.)

6 Vaavaa Aisarayeli yaakhalaaya mu Elapo ya Nlakano, awo yaakhalano murici wa othanla omulapela Yehova naari waarumeela amuluku akina. (Mwaalakhanye Yosuwa 24:15.) Waakhala ntoko wi yaari yoolakelela yookhweya. Nyenya, yoothanla aya yaahaala okumiherya okumi naari okhwa. Variyari va elukuluku ya Mamwene, Aisarayeli yaanatitelela opaka soothanla soonanara. Yaahiya omulapela Yehova nave epacerya waalapela amuluku atheru. (Amuthoriha 2:3, 11-23) Ohoolo waya, mu elukuluku ya mulipa miririmu Eliya, achu a Muluku yaaphwanela olakelela waakhanle wi yaahaala omurumeela Yehova naari Pala, muluku atheru. (1 Mamwene 18:21) Waakhala ntoko wi yaamukhalano yoothanla yookhweya wi epake, woona wi omurumeela Yehova wiiliwiili ti waphaama. Muchu a miruku haahaala  ochuna omurumeela muluku atheru. Nyenya achu hiyaapanke yoolakelela. Piipiliya onnaloca wi Aisarayeli yaari “anamphara pili.” Mwamiruku, Eliya aahaaceenyerya achu wi ethanle omulapela Muluku eeparipari, Yehova.

7 Ntakhara heeni waaryaaya woovila Aisarayeli opaka yoolakelela ya miruku? Yoopacerya, awo hiyaarino nroromelo mwa Yehova, nave yaahikhooca onwiriyana. Awo hiyaamuroromela Yehova, nave hiyaamaliha elukuluku ehuseryaka sa yene ni miruku sawe. Waakhanle wi yaaneerano, yeeyo yaahusenryaaya yaahaala waakhaviherya opaka soolakelela sa miruku. (Salumu 25:12) Yanaawiili, Aisarayeli yaahivoloweliwa ni achu a maloko makina. Akhopela yaale, yaahivolowela muupuwelo wa Aisarayeli ophiyerya waapakela soolakelela. Ntoko yookhumelela, Aisarayeli yaapacerya waachara akhopela yaale nave yaanaalapela amuluku aya. Echu ene ti yeela, yaamweerinhe Yehova waalopola Aisarayeli mu iyaakha sincipale muculi.Mukwaha 23:2.

APWANNE AKINA ANNAPHWANELA ONIPAKELA SOOLAKELELA?

8. Echu taani yookhweleya nnahuseryaahu orweela wa Aisarayeli?

8 Yootakiherya ya Aisarayeli ennanihusiha wi wakhala wi ninnachuna opaka soolakelela sa miruku, nnaphwanela opharihela Masu a Muluku. Galasya 6:5 onnanuupuserya wi muchu ti muchu ookhalano murici ntakhara soolakelela sawe. Mweeparipari, hannaphwanela omvaha muchu mukina murici wa onipakela soolakelela. Moohiyana, muchu ti muchu a hiyo onaphwanela ohuserya yeeyo Muluku onaloceiye wi ti yoophwanelela ni othanla weerano.

Wakhala wi nooheemererya wi akina enipakele soolakelela, nnahaala olakelela waachara

9. Ntakhara heeni ti yawoopiha oweemererya akina onipakela soolakelela?

9 Nni neemererye hai wi akina enipakele soolakelela? Moorweela wa oweemererya onikhinyererya opaka soothanla soonanara. (Masiposipo 1:10, 15) Ela echu yawoopihaxa. Murici ahu, ori ochara oleela-wa-murima yoowo ovyakihiwe ni Piipiliya. Wakhala wi nooheemererya wi akina enipakele soolakelela, nnahaala olakelela waachara. Yoothanla eyo enahaala onikeriha vamiiwani.

10. Olopola taani Paulo aavanheiye Akalatiya?

10 Murummwa Paulo aahaalopola Akalatiya wi ehiweemererye akina waapakela soolakelela. (Mwaalakhanye Galasya 4:17.) Anna akina o Kalatiya yaaneererya opaka soolakelela ntakhara akina a mmulokoni. Ni yoolakelela taani? Alopwana yaale a nrima yaanachuna wi annaya yaachareke awo, ohiya arummwa. Awo hiyaari awiiyeviha, nave hiyaacicimiha ophwanelela wa annaya opaka soolakelela saya.

11. Nni naakhaviherye hai akina vaavaa anachunaaya opaka soolakelela?

11 Oothene ahu nnanwerya ohuserya orweela wa yootakiherya yaphaama ya murummwa Paulo. Owo aanasuwela wi anna awe yaakhalano ophwanelela wa opaka soolakelela saya, nave aanacicimiha ophwanelela yoowo. (Mwaalakhanye 2 Korinto  1:24.) Olelo, atokweene ananwerya ochara yootakiherya yeela vaavaa anavahaaya ekano vooloca sa miyaha seiyo sinavolowela yoothanla ya muchu mukhateiye. Awo, annasiveliwa wuuka sooleeliherya inathipeleya mu Masu a Muluku ni anna ni arokoraya. Naamwi hiiha, atokweene annamweemererya Mukristu ori oothene wi apake soolakelela sawe esuwelaka wi onahaala okhalano sookhumelela sene. Nlelo, anna ni arokorahu aakhalano ophwanelela ni murici wa opaka soolakelela saya. Vaavaa anapakaaya soolakelela sa miruku, awo annaphura. Mweeparipari, nihirwe nuupuwele wi nookhalano olamulelo wa olakelela yeeyo anna ni arokora anaphwanelaaya opaka.

Atokweene oosivela annaakhaviherya akina ohuserya opaka soolakelela saya (Moone eparakrafo 11)

MUHEEMERERYE WI MURIMA ANYU OHOOLELEKE SOOLAKELELA SANYU

12, 13. Ntakhara heeni ti wawoopiha opaka soolakelela vaavaa nnakhalaahuno esara naari ooceecheya?

12 Oolelo, achu ancipale anachara murima aya vaavaa anapakaaya soolakelela. Nto ela enamukhala yawoopiha. Piipiliya onnanlopola wi nihipake soolakelela sinarweela mmurima ahu woohiphaameya. (Masiposipo 28:26) Nihiroromele murimahu nthowa nawi “murima onnatepa wòtotha opwaha etxhu ekina: honalakeya.” (Yeremiya 17:9) Mpiipiliyani sookhalamo sootakiherya sincipale seiyo inooniherya sookhumelela soothananiha sa ororomela murima woohiphaameya. (1 Mamwene 11:9; Yeremiya 3:17; 13:10) Vanonto, tiheeni enahaala weereya wakhala wi noochara murima ahu vaavaa nnapakaahu soolakelela?

13 Yehova onnanilamulela omusivela owo ni murima ahu woothene ni omusivela mwaacamani ahu ntoko hiyo aneene. (Mateu 22:37-39, Nlakano Nahihano) Nyenya nnaphwanela okhalano ephoole. Soorepa siri mu eparakrafo ya muculi sohooniherya wi ti wawoopiha weemererya wi murimahu ohoolele muupuwelo ni saweera sahu. Ntoko yootakiherya, ti woovila muchu a esara opaka soolakelela saphaama.  (Masiposipo 14:17; 29:22) Ti woovilatho wa muchu ori ooceecheya opaka yoothanla ya miruku. (Namarepela 32:6-12; Masiposipo 24:10) Nnaphwanela weemererya wi nlamulo na Muluku nihoolele muupuwelo ahu. (Aroma 7:25) Vaavaa nnapakaahu soolakelela sookhweleya, niheemererye wi murima ahu ohoolele yeeyo nnapakaahu.

WAKHALA WI TI WOOCHUNEYA OTOROKA SOOLAKELELA SANYU

14. Nnasuwela hai wi ti woophwanelela otoroka soolakelela ikina?

14 Nnaphwanela opaka soolakelela sa miruku. Naamwi hiiha, muchu amiruku onnasuwela wi ikwaha ikina onamuchuna othokororya yoolakelela aapankeiye nave akhweya otoroka eyo. Yehova ootikitherya yootakiherya yoophaameya wa hiyo. Moone yeeyo owo aapankeiye wa Aninive mmahiku a Yona: “Muluku, onneiye wi atxhu o Nínive yanatxharuwa metxelo aya òtakhala, àhiya owerela yele àtxhunneiye nave hàvan’he ekoi ntoko awopopin’heiye.” (Yona 3:10) Vaavaa Yehova onneiye wi Aninive yaatorokeya nave yaahiya opaka ichu soonanara, owo aahitoroka yoolakelela awe. Eyo yooniherya wi toophimelela, tawiiyeviha ni aikharari. Moohiyana ni achu ancipale, Yehova hanapaka soolakelela ahuupuwelenle, naamwi ikwaha ikina anyeenyeyaka.

Vaavaa Yehova onneiye wi Aninive yaatorokeya nave yaahiya opaka ichu soonanara, owo aahitoroka yoolakelela awe

15. Ntakhara heeni akhweya onamuchuneya otoroka yoolakelela?

15 Akhweya enamukhalavo elukuluku onahaalaaya okhala waphaama wa hiyo othokororya yoolakelela, ntoko vaavaa mikhalelo sinatorokeyaaya. Muupuwele wi ilukuluku ikina Yehova aahitoroka soolakelela sawe. (1 Mamwene 21:20, 21, 27-29; 2  Mamwene 20:1-5) Akhweya nnamutoroka yoolakelela vaavaa nnaakhelaahu miselo mivyaani. Nkuupuwelani yootakiherya ya Mwene Tavite. Owo aahipaka yoolakelela vooloca sa musulwa a Sawuli Meripayali moorweela wa museelo watheru aaleeliweiye. Ohoolo waya, vaavaa Tavite aakhenleiye museelo weeparipari, owo aatoroka yoolakelela awe. (2 Samuwele 19:24-30) Ikwaha ikina, onamukhala wamiruku wa hiyo opaka echu emohamoha.

16. (a) Sooleeliherya taani sinakhaviherya opaka soolakelela? (b) Ntakhara heeni ninnaphwanela waalikhela soolakelela sakhalai, nave nni neereno hai?

16 Piipiliya onnaloca wi hannaphwanela okhuma murima vaavaa nnapakaahu soolakelela sookhweleya. (Masiposipo 21:5) Nnaphwanela omaliha elukuluku nuupuwelelaka mwawiiseela wi niwerye opaka yoolakelela yamiruku. (1 Tesalónika 5:21) Ahaakumve olakelela echu yaweera, muhooleli a echoko onaphwanela omaliha elukuluku atholatholaka Soorempwa ni soolaleeryiwa Seekristu. Onamukhalatho waphaama owiriyana moonelo wa akina a veemusini. Muupuwele wi Muluku aamuceenyerya Aparahamu onwiriyana mwaariye. (Maphatxuwelo  21:9-12) Atokweene tho anaphwanela omaliha elukuluku etholatholaka. Vaavaa yooleeliherya evyaani enooniheryaaya wi awo annaphwanela otoroka soolakelela apankaaya woopaceryani, awo hanoova wi anahaala oyeleela ncicimiho na akina. Moophimelela ni mwawiiyeviha atokweene anaphwanela okhala ooreheryeya wi etoroke muupuwelo aya ni soothanla wakhala woochuneya. Nave onamukhala waphaama oothene ahu ochara yootakiherya aya. Ela ennakhaviherya muloko okhala wa murecele ni otitelela okhala wawiiwanana.Saweriwa T’arummwa 6:1-4.

MPAKE YEEYO MULAKELENLAANYU

17. Tiheeni eni enikhaviherye okhumelela phaama mu opaka soolakelela?

17 Soolakelela ikina inahaala okhala itokotoko opwaha ikina. Ntoko yootakiherya, olakelela othela naari taani oni akhale oothelanano eyo yoolakelela etokweene. Yoolakelela ekina etokweene ori vaavaa nnapaceryaahu muteko wa elukuluku yoothene. Nihaakumve opaka soolakelela sookhweleya ntoko seiya, nnaphwanela wuupuwelela mwawiiseela ni oveka nikhaviheryo na Yehova. Akhweya nnammaliha elukuluku, nyenya wakhala wi noopaka yoolakelela yamiruku, nnaphwanela omuroromela Yehova, owiriyana sooleeliherya sawe ni ochara ohoolela wawe. (Masiposipo 1:5) Yehova onnanivaha ekano yaphaama mu Masu awe. Mwawiihiiha ti wookhweleya otholathola ni oveka ohoolela wa Yehova. Owo onamunivaha mikhalelo nnachunaahu wi nipake soolakelela seiyo siniiwanana ni yookhwela awe. Nihaakumve opaka soolakelela sookhweleya, nnaphwanela wiikoha: ‘Apwanne yoolakelela yeela ennooniherya wi kinnamusivela Yehova? Mano enahaala oruuha ohakalala ni murecele veemusini vaka? Nave apwanne enahaala wooniherya wi kiri oopisa murima ni aphaama?’

18. Ntakhara heeni Yehova onnaweherya wi nipake soolakelela sahu?

18 Yehova hananikhinyererya omusivela ni omurumeela. Moohiyana, owo onnanivaha otaphuwa wa opaka yoothanla. Owo onnacicimiha murici ahu ni ophwanelela wa opaka yoothanla waakhanle wi nnahaala omurumeela. (Yosuwa 24:15; Eklesiyaste 5:4) Nyenya owo onaweherya wi nipake yeeyo nlakelenlaahu enathipeleya mu Masu awe. Vaavaa nnakhalaahuno nroromelo mwa soohoolela sa Yehova ni opharihela muteko malakiheryo onanivaheiye, nnanwerya opaka soolakelela sa miruku. Nave nnahaala wooniherya wi nri aweemeleleya mu iphiro sahu soothene.Tiyako 1:5-8; 4:8.