Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli— Oomuhuserya

  |  Marsu 2017

Apwanne Munahaala Opharihela Yeeyo Erempwale?

Apwanne Munahaala Opharihela Yeeyo Erempwale?

‘Vano sothene . . . irempwale wi ikhale ikano sahu, hiyo nnakhala mu ilukuluku sokutxhula.’1 KORINTO 10:11.

MACIPO: 11, 29

1, 2. Ntakhara heeni nneeraahu nthokororye sootakiherya sa mamwene masese o Yuteya?

WAAKHANLE wi moomoona muchu uuwale vaphironi, akhweya mwaahaala woovaka weeca mu ephiro ene yeeyo. Moolikana, moorweela wa othokororya soohesa seiyo akina apankaaya muukumini mwaya, nnanwerya osepa opaka soohesa imohamoha. Ntoko yootakiherya, nnanwerya ohuserya orweela wa soohesa sa achu aromoliwe Mpiipiliya.

2 Mmwaha ovinre noothokororya wi mamwene masese o Yuteya yaahimurumeela Yehova ni murima waphaama. Naamwi hiiha awo yaanapaka soohesa itokotoko. Sootakiherya saya soorempwa Mpiipiliya wi niwerye wuupuwelela ni ohuserya ichu sa esisapo. Tiheeni nnahuseryaahu orweela wa yeeyo yeeren’ye ni yaawo, nave nni nsepe hai opaka soohesa imohamoha?Mwaalakhanye Aroma 15:4.

OROROMELA MIRUKU SA ACHU ONNAKUMIHERYA EPAHU

3-5. (a) Naamwi murima wa Asa waari waphaama vamiithoni va Yehova, yoohesa taani owo aapankeiye? (b) Ntakhara heeni Asa aaroromenleiye achu vaavaa aawaneiye ni Paasa?

3 Voopacerya hankooni nimuthokororye Asa. Owo aahimuroromela  Yehova vaavaa anakhoco 1.000.000 o Etiyopiya yaacuphenlaaya o Yuteya. Nyenya, haamuroromenle Yehova vaavaa aawanneiye ni Paasa mwene o Isarayeli. Asa aachuna omuhiiha Paasa wi ahiphiye o Rama, yeeyo yaari epooma yookhweleya ya Isarayeli, waacamela minlaano sa omwene wa o Yuteya. (2 Matharihelo 16:1-3) Asa aalakelela wi waahaala okhala waphaama omvaha ewooro ni eparata mwene o Asiriya wi amukhaviherye. Vaavaa anakhoco a wa Asiriya yaavolonwaaya mu epooma ya Aisarayeli, Paasa “àhiya olipiha epoma yo Rama.” (2 Matharihelo 16:5) Woopaceryani, Asa akhweya uupuwela wi aapanke yoolakelela yaphaama.

4 Nyenya Yehova oonne hai? Yehova haasiveliwe woona wi Asa haamuroromenle, nave aahimurumiha mulipa miririmu Hananiya wi amulake Asa. (Mwaalakhanye 2 Matharihelo 16:7-9.) Hananiya aahimuleela Asa: “Wa nthowa na yeyo ovinya vano oyaka muholo, onan’wana ikhotxho.” Asa aahikusa epooma yo Rama, nyenya ophiyerya omakuchuwelo wa ekumi awe, owo ni achu awe yaanawaniha ikhoco.

5 Mwaha ovirale, noohuserya wi Yehova aanahakalala ni Asa. Naamwi Asa aari oohiphaameya, Muluku oona murima wa Asa okhala waphaama. (1 Mamwene 15:14) Naamwi hiiha, vaavaa Asa aapankeiye yoolakelela yoonanara, owo haawenrye osepa sookhumelela sene. Ntakhara heeni iiroromenleiye ni waaroromela achu akina omuhiya Yehova? Akhweya Asa uupuwela wi anwerya opharihela mavyakelo awe wi avoothe ekhoco. Naari akhweya owo aanawiriyana ikano soonanara sa akina.

Mmikhalelo soothene, nnaphwanela omuroromela Yehova, ohiya ororomela muupuwelo ahu

6. Tiheeni nnahuseryaahu orweela wa yoohesa ya Asa? Mvahe yootakiherya.

6 Tiheeni nnahuseryaahu orweela wa yoohesa ya Asa? Mmikhalelo soothene, nnaphwanela omuroromela Yehova, ohiya ororomela muupuwelo ahu. Nnaphwanela omveka nikhaviheryo, moohipwacha nikacamiho nahu naari ntokotoko naari nikhaani. Ti yaphaama wuupuwela sa ela: Apwanne ilukuluku ikina ninniiroromela moorweela wa weererya omaliha nikacamiho mmukhalelo nnuupuwelaahu wi ti waphaama? Apwanne wiiliwiili ninnathokororya yeeyo Piipiliya onaloceiye voocharela neererya opharihela sooleeliherya seiyo wi nimalihe makacamiho ahu? Ntoko yootakiherya, akhweya emusi anyu ennaweerihaani ohiphwanyeya mmithukumano sa muloko naari sa ekulucu. Apwanne munnamveka Yehova wi ookhaviheryeeni osuwela echu yaweera? Naari akhweya soovira iyaakha sincipale muhirino muteko, vano momphwanya muchu yoowo onachuna woovahaani muteko. Apwanne munahaala omuleela wi munnakhalano mithukumano esumana ti esumana ophiyerya wi ikwaha ikina hamuni muweryeke ophwanyeya omutekoni? Moohipwacha nikacamiho nene, nnaphwanela wuupuwela ekano ya namarepa a salumu: “Waroromeleke Apwiya mwa ekumi-à, wawehereryeke yawo ntakhara anamwerano sothene.”Salumu 37:5.

 SOOKHUMELELA SA WAATHANLA ASINTHAMWE OOHIPHWANELELA

7, 8. Soohesa taani Yosafati aapankeiye, nave ni sookhumelela taani? (Moone eruku yoopacerya.)

7 Hankooni vano nthokororye yootakiherya ya Yosafati mwaana a Asa. Owo aahikhalano mikhalelo mincipale saphaama ophiyerya wi Yehova aanahakalala. Nave vaavaa amuroromeleiye Yehova, owo aanapaka ichu sincipale saphaama. Nyenya owotho aahipaka soolakelela soonanara. Ntoko yootakiherya, owo aahipaka marehereryo wi mwanawe amuthele mwaana a Akape Mwene oonanara murima. Ohoolo waya Yosafati aahikhala ni Akape mu owana ni anakhoco a wa Asiriya, naamwi mulipa miririmu Mikeya aamuloponle wi ahikhale ni yoowo. Okhoconi, anakhoco a wa Asiriya yaahimphara Yosafati enahaala vakhaani omwiipha. (2 Matharihelo 18:1-32) Vaavaa aakookenleiye o Yerusalemu, mulipa miririmu Yehu aahimukoha: “Ti nthowa na seni wakelawe omukhaviherya mutxhu ònanara murima? Onaweryevo hai wi weyano watàne ni mwitxana a Apwiya?”Mwaalakhanye 2 Matharihelo 19:1-3.

8 Apwanne Yosafati aahihuserya orweela wa yeeyo yamphacuwenle ni olopola wa mulipa miririmu? Moothananiha, owo haawenrye ohuseryavo echu. Nyenya Yosafati aanamusivela Yehova ni ochuna omuhakalaliha. Naamwi hiiha owo ahaataana ni mulopwana yoowo ahaachuna omulapela Yehova. Mulopwana owo aari Mwene Akasiya, mwaana a Akape. Yosafati ni Akasiya yaahaapaka apophoro. Nyenya apophoro awo yaahinanara ehaakumve waapharihela.2 Matharihelo 20:35-37.

9. Tiheeni eni yeereye wakhala wi naathanlile asinthamwene oohiphwanelela?

9 Tiheeni nnahuseryaahu orweela wa yeeyo yeeren’ye ni Yosafati? Yosafati aahipaka  yeeyo yaari yaphaama nave ‘ahatxhara Apwiya mwa sothene ni murima wothene.’ (2 Matharihelo 22:9) Naamwi hiiha owo aamaliha elukuluku ni achu yaawo yahaamusivela Yehova, nave eyo yaahimuruuhela makacamiho mancipale. Wookuchulani, owo aahiiphiwa. Muupuwele masiposipo ala a Mpiipiliyani: “Onetxa ni atxhu a miruku, onamukhala namiruku; onetxa n’alolo onamphwanya epahu.” (Masiposipo 13:20) Nnachuna waaleela akina vooloca sa Yehova. Nlelo, waahaala okhala woonanara okhalano onthamwene ni achu yaawo ahinamurumeela Yehova.

Apwanne munneemererya wi Yehova onahaala okhapelela soochuna sanyu moosivela nave mwa ikharari?

10. (a) Wakhala wi nnachuna othela, tiheeni nnahuseryaahu orweela wa Yosafati? (b) Tiheeni nnaphwanelaahu wuupuwelela?

10 Ntoko yootakiherya, wakhala wi nnachuna othela, tiheeni nnahuseryaahu orweela wa Yosafati? Akhweya nnampacerya okhalano osivela wa muchu yoowo ohinamurumeela Yehova. Akhweya naahaala wuupuwela wi haniwerya omphwanya oothelanano variyari va achu a Muluku. Naari amusi ahu anamunikhinyeererya othela nihaakumve winnuwa. Eparipari wi Yehova onipatunse ni ochuna osivela ni osiveliwa. Nyenya, wakhala wi haniwenrye omphwanya muchu oophwanelela, tiheeni nnaphwanelaahu weera? Echu emoha eni enikhaviherye ori wuupuwelela yeeyo yeeren’ye ni Yosafati. Owo wiiliwiili aanamukoha Yehova wi amuhoolele. (2  Matharihelo 18:4-6) Nto vaavaa aakhanleiye nthamwene a Akape, yoowo ahaamusivela Yehova, Yosafati aahikhooca olopola wa Yehova. Yosafati aaphwanela wuupuwela wi “Apwiya, annavarerya itxhu sothene inaphatxuwa mwelaponi, nave annàkhaviherya yale anàroromela yawo ni murima wothene.” (2 Matharihelo 16:9) Hiyaanotho nnaphwanela wuupuwela wi Yehova onnachuna onikhaviherya. Owo onniiwexexa mukhalelo ahu nave onnanisivela. Apwanne munneemererya wi Yehova onahaala okhapelela soochuna sanyu moosivela nave mwa ikharari? Muroromele wi owo onahaala weerano ntoko onaweryeleiyevo!

Muhimuthele naari muhitheliwe ni muchu ohinamurumeela Yehova (Moone eparakrafo 10)

MUHEEMERERYE WI MURIMANYU OKHALE WAWIIRUMIHA

11, 12. (a) Tiheeni Esekiya aapankeiye yeeyo yoonihenrye echu yaari mmurimani mwawe? (b) Ntakhara heeni Yehova aahimulevelela Esekiya?

11 Tiheeni nnahuseryaahu orweela wa Esekiya? Yehova aahimukhaviherya Esekiya woona yeeyo yaari mmurimani mwawe. (Mwaalakhanye 2 Matharihelo 32:31.) Vaavaa Esekiya iiceliweiye, Muluku aahimuleela wi aahaala openuwa nave aahimvaha eneneeryo wi asuwele. Yehova aahikookiherya oculi muuruxi miphimo khumi. Ohoolo waya, waakhala ntoko wi asitokweene o Papulu yaanachuna osuwela sincipale vooloca sa eneneeryo, nave yaahaarumiha alopwana wa Esekiya wi yamukohe vooloca sa yeeyo. (2 Mamwene 20:8-13; 2 Matharihelo 32:24) Yehova haamulenle Esekiya mukhalelo wa owaakhula. Piipiliya onaloca wi Yehova  “àhimuhiya Ezekiya” wi oone yeeyo aahaaleiye opaka. Esekiya aahiwooniha alopwana o Papulu muhakhu woothene aareiyeno. Ela yaahooniherya yeeyo yaari mmurima mwa Esekiya. Mmukhalelo taani?

12 Moothananiha, Esekiya aahikhala awiisoona. Ntoko yookhumelela, owo “hathamanle Apwiya wa nthowa na itxhu saphama akhenleiye.” Piipiliya hanaloca mathowa yaamweerinhe otoroka muupuwelo awe. Akhweya waari nthowa na waavootha wawe anakhoco a wa Asiriya naari nthowa nawi Yehova aahimpenusa. Naari akhweya waari nthowa na oreela ni ovuwa. Naamwi Esekiya aamurumeenle Yehova ni murima waphaama, mweelukuluku aya owo aahikhala awiisoona nave Yehova haasiveliwe. Ohoolo waya, Esekiya ‘ahiyeviha,’ nave Muluku aahimulevelela.2 Matharihelo 32:25-27; Salumu 138:6.

Yeeyo nneeraahu nipake enahaala wooniherya yeeyo eri mmurimani mwahu

13, 14. (a) Mikhalelo taani sini sooniherye yeeyo eri mmurimani mwahu? (b) Tiheeni nnaphwanelaahu opaka vaavaa akina ananthamalelaaya?

13 Tiheeni nnahuseryaahu orweela wa Esekiya ni soohesa aapankeiye? Muupuwele wi Esekiya aari awiisoona, Yehova amanle omukhaviherya waavootha anakhoco a wa Asiriya ni ompenuxa. Vanonto hanka wakhala wi ichu sooneecela phaama naari akina annanthamalela, tiheeni nnahaalaahu weera? Yeeyo nneeraahu nipake enahaala wooniherya yeeyo eri mmurimani mwahu. Ntoko yootakiherya, akhweya munna ohiilipixerya orehererya mwaha nave aperekha wa achu awaaca. Ancipale annathamalela mwa yeeyo olonceiye. Oni oone hai mathamalelo yaawo?

14 Mahiku oothene nnaphwanela wuupuwelelaka yeeyo Yesu aalonceiye: “Nyuwanotho mwerà itxhu sothene murummwanyu, mulotxeke muriki: nri anamalapa asiyo; hiyo nenre yeyo yakhweleya weriwa.” (Luka 17:10) Muupuwele wi vaavaa Esekiya aakhanleiye awiisoona, owo haathamalenle mukhalelo Yehova aamukhavihenryeiye. Vano wakhala wi akina annanthamalela ntakhara mwaha niperenkhaahu, tiheeni eni enikhaviherye otitelela wiiyeviha? Nnaphwanela wuupuwelela yeeyo Yehova oneerenleiye. Nave nnanwerya oloca sa yene ni mukhalelo onanikhaviheryeiye. Opwaha soothene, ti yoowo onivanhe Piipiliya ni munepa awe waweela wi niwerye operekha mwaha.

MWEEMERERYE OHOOLELIWA NI YEHOVA VAAVAA MUNAPAKAANYU SOOLAKELELA

15, 16. Tiheeni Yosiya aapankeiye yeeyo yaamweerinhe okhwa?

15 Wookuchulani, tiheeni nnahuseryaahu orweela wa Yosiya? Naamwi Yosiya aari mwene aphaama, owo aahipaka yoohesa yeeyo yaamweerinhe okhwa. (Mwaalakhanye 2 Matharihelo 35:20-22.) Tiheeni yeeren’ye? Yosiya aahipacerya owana ekhoco ni Neko, mwene o Yikuputu, naamwi nahaarivo nthowa na owana. Chiryene, Neko aahimuleela Yosiya wi haaya owana ni yene. Piipiliya onaloca wi masu a Neko ‘yàrwa wa Muluku.’ Nyenya Yosiya aaya okhoconi nave aahiiphiwa. Vano ntakhara heeni aaya owana ni Neko? Piipiliya hanaloca.

 16 Yosiya aaphwanela osuwela waakhanle wi yeeyo Neko aalonceiye chiryene yaarweela wa Yehova. Mwawiihai? Owo aaphwanela omukoha Yeremiya, mmoha a alipa miririmu a Yehova. (2 Matharihelo 35:23, 25) Navetho Yosiya aaphwanela othokororya phaama mwaha yoowo. Neko, aaya o Karkamisi wi awane ni nloko nikina, ohiya ni achu o Yerusalemu. Nave Neko haamunyemunle Yehova ni achu awe. Yosiya huupuwelenle mwawiiseela vooloca sa ichu seiya ahaakumve opaka yoolakelela. Tiheeni nnahuseryaahu? Vaavaa nnakhalaahuno nikacamiho nave onachuneya opaka yoolakelela, voopacerya nnaphwanela othokororya yeeyo Yehova aahaaleiye ochuna wi nipake.

17. Vaavaa nnakhalaahuno makacamiho, nni nsepe hai opaka yoohesa ntoko Yosiya aapankeiye?

17 Vaavaa nnachunaahu opaka yoolakelela, voopacerya nnaphwanela wuupuwelela mukhalelo malakiheryo a Piipiliya aneeraaya enikhaviherye ni mukhalelo wa opharihela. Mu ilukuluku ikina, akhweya nnamuchuna otholathola mu soolaleeryiwa sahu naari oveka miruku wa mutokweene. Owo onamunikhaviherya wuupuwelela vooloca sa malakiheryo makina a Mpiipiliya. Mwaanyiherye yaweereya ela: Murokora otheliwe ni muchu ohiri Namoona. Owo onnapaka marehereryo wi aye mmuteko woolaleerya nihiku nimoha. (Saweriwa T’arummwa 4:20) Nyenya mu nihiku nenlo, iyawe hanachuna wi aye mmuteko woolaleerya. Owo onnamuleela wi hanamaliha elukuluku yincipale vamoha nave aamusiveliwa omukuxa mwaariye wi eye nipuro nammoori. Vano murokora onnathokororya iciciri sa Piipiliya wi imukhaviherye opaka yoolakelela ya miruku. Owo onnasuwela wi onaphwanela omwiiwelela Muluku nave wi Yesu onlamulela waapaka oohuserya. (Mateu 28:19, 20; Saweriwa T’arummwa 5:29) Nyenyatho onnuupuwela wi muthiyana onaphwanela omucicimiha iyawe nave wi akapuro a Muluku anaphwanela okhala aphaama. (Éfeso 5:22-24; Filipi 4:5) Apwanne iyawe oneererya omuhiiha olaleerya, naari wi owo onachuna omaliha elukuluku ni mwaariye mu nihiku nenlo? Ntoko akapuro a Yehova, nnachuna opaka soolakelela saphaama nave inahaala omuhakalaliha Yehova.

MUKHAPELELE MURIMA WAPHAAMA NAVE MUHAKALALE

18. Tiheeni munahuseryaanyu orweela wa sootakiherya seiya sa mamwene masese o Yuteya?

18 Ilukuluku ikina, nnahaalatho opaka yoohesa emoha sa seiya mamwene yaala maxexe o Yuteya yaapankaaya. Hiyaano akhweya (1) nnamuroromela muupuwelo ahu, (2) nnamwaathanla asinthamwene oohiphwanelela, (3) nnamukhalano moonelo wa wiisoona, naari (4) nnampaka soolakelela nihithokoronrye voopacerya teevi eri yookhwela ya Muluku. Naamwi hiiha, hinaavo nthowa na wuupuwela wi hanrwa nimuhakalaliha Yehova. Owo onnoona yeeyo eri yaphaama, hiiha ntoko onneiye ichu saphaama mwa mamwene yaale maxexe. Yehova onnoonatho ophiyerya mweeryo taani nnamusivelaahu ni mukhalelo nnachunaahu omurumeela mwawaakhwanela. Mwawiihiiha, owo onnanivaha sootakiherya seiyo sinanikhaviherya osepa opaka soohesa itokotoko. Hankooni nuupuweleleke saweereya seiyo sa Mpiipiliyani ni othamalela yeeyo Yehova onanivaheiye!