Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli— Oomuhuserya

  |  Akostu 2017

Apwanne Muri Ooreheryeya Oweherya Moovilela?

Apwanne Muri Ooreheryeya Oweherya Moovilela?

“Nyuwotho mukhale òvilela.”​—TIYAKO 5:8.

MACIPO: 35, 7

1, 2. (1) Tiheeni enahaala oneeriha okoha, “Ophiyerya lini?” (2) Ntakhara heeni sootakiherya sa arummwa akhalai inanwerya onlipihatho?

“OPHIYERYA lini?” Nikoho nla yaakonhe ti alipa miririmu oororomeleya Isaiya ni Habakukhi. (Isaiya 6:11; Habakukhi 1:2) Vaavaa Mwene Tavite aamurempeiye Salumu 13, owo aahipaka nikoho nimohamoha nenla ikwaha sese. (Salumu 13:1, 2) Nave vaavaa Yesu Kristu aarukureryiweiye ni achu oohiroromeleya, owo aahaakoha ariki: “Ophiyerya lini?” (Mateu 17:17) Akhweya hiyaanotho olelo nnanwerya wiipakela nikoho ntoko nenla.

2 Tiheeni yaahaala oneeriha wiipakela nikoho, “Ophiyerya lini?” Akhweya vaavaa echu yoonanara enaniphacuwelaaya. Naari nthowa nawi nnamwiiceliwa naari nnamuuluvala. Akhweya ninnathanana nthowa nawi nnakhala mu “ilukuluku sokatxamiha.” (2 Timóteo 3:1) Naari akhweya nthowa na moonelo woonanara wa achu anirukurenrye onaneeriha  okhala oovelavela ni ooceecheya. Moohipwacha nthowa nene, ti yoolipiha osuwela wi Yehova haanyeenyen’ye ni arummwa awe oororomeleya akhalai yaawo yaamukoha.

3. Tiheeni enahaala onikhaviherya ovilela ni mikhalelo soovila?

3 Tiheeni enahaala onikhaviherya ovilela ni mikhalelo soovila? Tiyako aahiveereliwa onleela masu ala: “Asinna, mukhale òvilela, ophiyerya orwa wa Apwiya.” (Tiyako 5:7) Mwawiihiiha, oothene ahu nnaphwanela okhala oovilela. Nyenya ovilela tiheeni, nave nni nooniherya hai mukhalelo yoola waphaama?

OVILELA TIHEENI?

4, 5. (1) Ovilela tiheeni, nave nni niwerye hai okhala oovilela? (2) Tiyako otharinhe hai ovilela? (Moone eruku yoopacerya.)

4 Piipiliya onnaloca wi ovilela onarweela wa munepa waweela wa Muluku. Voohikhala nikhaviheryo na Muluku, onamukhala woovila achu oohiphaameya ovilela mikhalelo soovilaxa. Ovilela yoovaha ya Muluku, nave ninnooniherya osivela wahu wa Muluku ni akina vaavaa nnooniheryaahu mukhalelo yoola. Wakhala wi hannavilela, nsivelo variyari va hiyaano ni akina ninnapwata. (1 Korinto 13:4; Galasya 5:22) Mano, ovilela onavolowela eheeni? Enavolowela ovilela ni makacamiho ni otitelela okhalano moonelo waphaama. (Kolosi 1:11; Tiyako 1:3, 4) Ovilelatho onnanikhaviherya otitelela okhala oororomeleya wa Yehova moohipwacha makacamiho nryaahuno. Onamunikhaviherya osepa okookiherya yoonanara vaavaa nnahooxeyaahu. Piipiliya onnaloca wi nnaphwanela okhala ooreheryeya weemererya okhweleya waya owehererya. Ola mukhalelo woochuneya yoowo nnahuseryaahu orweela wa yoorepa ya Tiyako 5:7, 8. (Mwaalakhanye.)

5 Ntakhara heeni ninnaphwanela onwehererya Yehova wi eerevo echu? Oohuserya Tiyako oolikanyiha mukhalelo ahu ni namalima. Naamwi namalima alapaka mwakuru wi aale mmiso awe, owo hanawerya ovareryela elukuluku naari wunnuwiha mwawaakuveya ichu aanleiye. Owo onaphwanela owehererya moopisa murima “sawima sophwanelela sa ematxa.” Mmukhalelo mmohamoha, sookhala ichu sincipale seiho nihinaweryaahu ovareryela vaavaa nnaweheryaahu okhwaanela wa soororomeliha sa Yehova. (Marko 13:32, 33; Saweriwa T’arummwa 1:7) Moolikana ni namalima, ti woochuneya ovilela moowehererya.

6. Tiheeni nnahuseryaahu orweela wa yootakiherya ya mulipa miririmu Mikeya?

6 Mulipa miririmu Mikeya aaphwanela ovilela mikhalelo soovila, hiyaano nnavilelaahu olelo. Owo aakhanle mu elukuluku ya olamulelo wa Mwene Akasiya. Akasiya aari mwene oonanara murima. Ntoko yookhumelela, mu elapo yeele waahisareyamo ohookololowa. Ichu saahitepa onanara ophiyerya Piipiliya oloca wi ‘awo yatepa osuwela wera sonanara.’ (Mwaalakhanye Mikeya 7:1-3.) Mikeya aahisuwela wi haki awerye otoroka mikhalelo seiye. Vano tiheeni aahaaleiye weera? Owo onnanleela ariki: “Nto miyano kinawehererya Apwiya Muluku aka anakivulusà. Muluku aka onan’wiriyana nivekelo naka.” (Mikeya 7:7) Hiiha ntoko Mikeya, hiyaanotho nnaphwanela wooniherya moonelo ‘wowehererya.’

7. Ntakhara heeni nnaphwanelaahu opaka sincipale opwaha onwehererya pahiru Yehova okhwaaniherya soororomeliha sawe?

 7 Wakhala wi nookhalano nroromelo ntoko Mikeya, nnahaala okhala ooreheryeya onwehererya Yehova. Mukhalelo ahu hori ntoko muchu yoowo owaleliwe mukalaposo aweheryaka nihiku oneereiye iiphiwe. Owo onnakhinyereriwa owehererya, nave hanachuna waakuveya wa nihiku nenlo. Ichu ti soohiyana vancipale wa hiyaano! Nri ooreheryeya onwehererya Yehova nthowa nawi noosuwela wi chiryene, mu elukuluku yoophwanelela onahaala okhwaaniherya yoororomeliha awe ya onivaha okumi woohimala! Mwawiihiiha, ‘ninnavilela’ moomalela “ni ohakalala.” (Kolosi 1:11, 12) Vaavaa nnawehereryaahu, ninniikasoopa ohimukhupanya Yehova wi onnalekela weeravo echu. Waakhanle wi ninneerano yeela, owo haahaala ohakalala.​—Kolosi 3:12.

SOOTAKIHERYA SAPHAAMA SA OVILELA

8. Tiheeni nnahuseryaahu orweela wa alopwana ni athiyana oororomeleya akhalai?

8 Tiheeni enahaala onikhaviherya okhala ooreheryeyaxa owehererya? Nnaphwanela wuupuwela sa alopwana ni athiyana oororomeleya a ilukuluku sa khalai yaawo yaanweherenrye moovilela Yehova wi akhwaaniherye soolaiherya sawe. (Aroma 15:4) Vaavaa nnuupuwelaahu sootakiherya saya, ti yaphaama wuupuwelela elukuluku yaavinrevo ewehereryaka, ntakhara heeni awo yaaryaaya ooreheryeya owehererya, nave ti mwawiihai Yehova aareelinheiye ntakhara ovilela waya.

Aparahamu aahiwehererya iyaakha sincipale ehaakumve oyariwa asisulwaawe Esawu ni Yakopo (Moone iparakrafo 9, 10)

9, 10. Elukuluku taani yaavinrevo Aparahamu ni Sara enweheryaka Yehova?

9 Muthokororye yootakiherya ya Aparahamu ni Sara. Nthowa na wooniherya  “wemererya ni nthìti [naari ovilela],” awo “yàphwanya nroromeliho.” Piipiliya onnanleela ariki Aparahamu amanle wooniherya “nthìti,” Yehova aahimuroromeliha wi aahaala omureeliha wi akhale tiithi a nloko ntokotoko. (Ahebri 6:12, 15) Ntakhara heeni Aparahamu aanaphwanela wooniherya ovilela? Nthowa nawi yaahala oviravo elukuluku yincipale wi ekhwaaniheryiwe yoororomeliha yeele. Mu 14 a Nisani a eyaakha ya 1943 E.E.K., Aparahamu ni Sara ophitaanyerya achu oothene a veechokoni vaya yaahilapuwa Muhice Eufrate evolowa mu Elapo ya Nlakano. Nyenya Aparahamu aaphwanela owehererya iyaakha 25 ahaakumve oyariwa mwanawe Isaki, ni iyaakha 60 ehaakumve oyariwa asisulwaawe Esawu ni Yakopo.​—Ahebri 11:9.

10 Elapo ya nlakano Aparahamu aakhenleiye yunnuwe mwawiihai? Piipiliya onnaloca wi Yehova “hanvan’he Abrahamu ematxa mwa elapo yela, nari mano nipuro nawitxhuwavo, nto àmuroromeliha wi ammuvaha elapo owo ni nloko nawe, nnamwi Abrahamu elukuluku yeyo aharino mwana.” (Saweriwa T’arummwa 7:5) Saahiviravo iyaakha 430 Aparahamu amanle olapuwa Muhice Eufrate wi nloko nawe nikhale mu elapo yeele.—Mukwaha 12:40-42; Galasya 3:17.

11. Ntakhara heeni Aparahamu aareiye ooreheryeya owehererya, nave mareeliho taani oneereiye oone ntoko yookhumelela ya ovilela wawe?

11 Aparahamu aari ooreheryeya oweherya nthowa nawi owo aahiroromela wi Yehova aahaala okhwaaniherya soororomeliha sawe. Owo aahikhalano nroromelo mwa Yehova. (Mwaalakhanye Ahebri 11:8-12.) Aparahamu aari oohakalala owehererya naamwi owo ahonne okhwaanela wa soororomeliha soothene sa Muluku ahaakumve okhwa. Nyenya nkaanyiheryani ohakalala wa Aparahamu vaavaa oneereiye aviihiwe mookhwani wi akhaleke mu parataiso veelaponi yavathi! Owo onahaala otikhina vaavaa oneereiye aalakhanye yaweereya ya okumi awe ni ya emusi awe mmakupa mancipale a Piipiliya. * (Moone masu avathi.) Mwaanyiherye tho ohakalala oneereiye akhaleno vaavaa oneereiye ahuserye muteko opankeiye wi ekhwaanele yookhwela ya Yehova vooloca sa Mesiya! Ninnaroromela wi owo onahaala woona wi waari woophwanelela owehererya mareeliho yaale.

12, 13. Ntakhara heeni Yosefe aanachuna okhala oovilela, nave moonelo taani woophwanelela aareiyeno?

12 Musulwawe Aparahamu, Yosefe aaritho ooreheryeya ovilela. Owo aahihoolela ohookololowa otokweene. Voopacerya, asinnawe yaahimutumiha ntoko kapuro vaavaa aareiyeno iyaakha 17. Voocharela, owo aahootheryiwa wi aaheererya omukoniha mwaara a pwiya awe nave aahiwaleliwa mukalaposo. (Maphatxuwelo 39:11-20; Salumu 105:17, 18) Naamwi Yosefe aari kapuro oororomeleya a Muluku, waakhala ntoko wi aamulakiwa, ohiya oreelihiwa. Nyenya ivirale iyaakha 13, ichu saahitorokeya. Yosefe aahikumihiwa mukalaposo nave aahikhala mulamuleli anaawiili oowerya o Yikuputu.​—Maphatxuwelo 41:14, 37-43; Saweriwa T’arummwa 7:9, 10.

Yosefe aahisuwela wi waari woophwanelela owehererya mareeliho anarweela wa Yehova

13 Apwanne ohookololowa yoole waahimweeriha Yosefe okhala oonyeenyeya? Apwanne aahuupuwela wi Yehova aahimuhiya?  Hooye. Yosefe aahivilela. Tiheeni yaamukhavihenrye? Naari nroromelo nawe mwa Yehova. Owo aahiiwexexa wi Yehova aanamvareryela. Ninnasuwela yeeyo orweela wa masu aalonceiye ni asinnawe ariki: “Muhòve etxhu! Miyano nkiri Muluku, nkinawerya wothorihani. Mwàtxhuna okèrela yotakhala, ntoko enòneyaya olelo, Muluku àtxhunne otatusa yotakhala wi ekhale yòrèra, wi avuluse ekumi ya nloko n’atxhu antxipale.” (Maphatxuwelo 50:19, 20) Yosefe aahisuwela wi waari woophwanelela owehererya mareeliho anarweela wa Yehova.

14, 15. (1) Ntakhara heeni ovilela wa Tavite ti wootannya murima? (2) Tiheeni yaamukhavihenrye Tavite ovilela moowehererya?

14 Mwene Tavite aahihooseya ni ohookololowa wawaaca. Yehova aamuthanlile Tavite wi akhale mwene a Aisarayeli ari mmiravo. Nave Tavite aaphwanela owehererya iyaakha 15 ahaakumve okhala mwene a nloko nawe. (2 Samuwele 2:3, 4) Variyari va elukuluku yeele, Tavite aaphwanela ochawa ni wiipitha amoovaka Mwene Sawuli, yoowo aamwaavya wi amunyoke. * (Moone masu avathi.) Ntoko yookhumelela, Tavite haarino empa awe. Owo aaphwanela okhala mu ilapo sookhopela ntoko namarwa, naari mmakhukuni ni mutakhwani. Veelukuluku aya, Sawuli aahiiphiwa okhoconi. Nyenya Tavite nlelo aaphwanela owehererya opwaha iyaakha thanu napiili ahaakumve okhala mwene a nloko noothene na Isarayeli.​—2 Samuwele 5:4, 5.

15 Ntakhara heeni Tavite aareiye ooreheryeya owehererya moovilela? Owo onnanivaha naakhulo mu Salumu mmohamoha mummo aakonheiye ikwaha xexe ariki: “Ophiyerya lini?” Owo aaloca: “Miyano kòroromela ikharari sanyu; ohakalale murima aka munivulusoni mwanyu! Kinan’wipela Apwiya wa nthowa na saphama akerenlaya.” (Salumu 13:5, 6) Tavite aahisuwela wi Yehova aanamusivela nave aahaala okhala oororomeleya wa yene ilukuluku soothene. Owo aahuupuwelela ilukuluku Yehova aamukhavihenryeiye, nave aanaweherya elukuluku yeeyo Yehova eereiye amalihe saweeha sawe. Tavite aahisuwela wi waari woophwanelela owehererya mareeliho a Yehova.

Yehova hananiveka weera echu yeeyo ahaahaaleiye ochuna opaka mwaneene

16, 17. Yehova Muluku ni Yesu Kristu avanhe hai yootakiherya yaphaama ya okhala ooreheryeya owehererya?

16 Yehova hananiveka weera echu yeeyo ahaahaaleiye ochuna opaka mwaneene. Owo ootikitherya yootakiherya etokweene ya okhala ooreheryeya owehererya. (Mwaalakhanye 2 Pedro 3:9.) Ntoko yootakiherya, iyaakha macikhwi macikhweene ivirale, mu emaca ya Eteni, Satana aahimootherya Yehova okhala ootakhala. Yehova ori “òvilela” aweheryaka elukuluku yeeyo nsina nawe nneeraaya neelihiwe.  Yookhumelela enahaala okhala yoohakalaliha wa yaale “ananweherya moohakalala.”​—Isaiya 30:18; Moone masu avathi mu Tradução do Novo Mundo.

17 Yesu tho nlelo ori ooreheryeya owehererya. Vaavaa aareiye veelaponi, owo aari oororomeleya ophiyerya okhwa wawe. Mu eyaakha ya 33, owo aahiveleela mukucho wasisapo wa Yehova wirimu. Nyenya aaphwanela owehererya ophiyerya eyaakha ya 1914 wi apacerye olamulela ntoko Mwene. (Saweriwa T’arummwa 2:33-35; Ahebri 10:12, 13) Naamwi hiiha, Yesu onaphwanela oweherya ophiyerya omakuchuwelo wa iyaakha masanaru khumi sa olamulelo awe ehaakumve otoloxiwa amwiicani awe oothene. (1 Korinto 15:25) Ela elukuluku yincipale ya oweherya. Nyenya, onahaala okhala woophwanelela owehererya mareeliho yaala.

TIHEENI ENI ENIKHAVIHERYE

18, 19. Tiheeni eni enikhaviherye ovilela?

18 Mwawooneya, Yehova onachuna wi nikhale oovilela, ooreheryeya oweherya. Tiheeni eni enikhaviherye weerano yeela? Nnaphwanela oveka munepa waweela wa Muluku. Muhicuwale wi ovilela onarweela wa munepa waweela wa Muluku. (Éfeso 3:16; 6:18; 1 Tesalónika 5:17-19) Mwawiihiiha mvekeleke wa Yehova wi ookhaviheryeeni ovilela!

19 Muupuweletho, yeeyo yaamukhavihenrye Aparahamu, Yosefe, ni Tavite owehererya okhwaanela soororomeliha sa Yehova. Naari nroromelo yaaryaayano mwa Yehova. Awo hiyiisuupuwelela pahiru mukhataaya ni yeeyo yaachunaaya. Vaavaa nnuupuwelelaahu mukhalelo ichu saweecenlaaya, hiyaanotho nnahaala olipiheya wi nooniherye ovilela.

20. Tiheeni nnaphwanelaahu olakelela weera?

20 Mwawiihiiha, naamwi niwanihaka ni saweeha, nri oolakelela wooniherya moonelo ‘wowehererya.’ Ilukuluku ikina nnamukoha, Yehova “ophiyerya lini?” (Isaiya 6:11) Nyenya nnikhaviheryo na munepa waweela wa Muluku, nnanwerya omutakiherya mulipa miririmu Yeremiya yoowo aalonce ariki: “Apwiya [Yehova] ti muhakhu aka, wa nthowa na yeyo vano kinnàroromela.”​—Wikhupanyerya 3:21, 24.

^ par. 11 Mu icima 15 sa liivuru a Maphatxuwelo sinnaloca sa okumi wa Aparahamu. Navetho mu Soorepa sa Ekiriki Seekristu sinnamuromola Aparahamu opwaha ikwaha 70.

^ par. 14 Yehova aamukhoonce Sawuli amanle olamulela iyaakha piili naari vakhaani. Nlelo, Sawuli aahititelela olamulela mu iyaakha 38, ophiyerya okhwa wawe.​—1 Samuwele 13:1; Saweriwa T’arummwa 13:21.