Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli— Oomuhuserya

  |  yunyu 2017

Mmalihe Ohiiwanana Nave Mpake Murecele

Mmalihe Ohiiwanana Nave Mpake Murecele

YEHOVA MULUKU onachuna wi alapeli awe epuhe murecele. Owo onachuna wi ekhaleno murecele mukina ni mukhweiye. Vaavaa aneeraayano hiiha, muloko Weekristu onnakhalano murecele. Murecele yoowo onnaalekecha achu ancipale ovolowa mmulokoni.

Ntoko yootakiherya, namuku mmoha o Matakaskar aahoona murecele variyari va achu a Yehova, nave aahuupuwela, ‘wakhala wi kinnachuna ovolowa mu ekerexa, ela enahaala okhala emoha ya yeeyo.’ Moovira wa elukuluku aahihiya olapela masololo, apaka matorokelo mu othela wawe, nave apacerya omulapela Yehova, Muluku a murecele.

Ntoko mulopwana yoole, macikhwi a achu eyaakha ti eyaakha annapaka makupa a muloko Weekristu nave annaphwanya murecele anachunaaya vancipale. Nyenya ninnaalakhanya Mpiipiliyani wi “nrima nowawa ni marapwa” mmulokoni sinanwerya opahula onthamwene ni otannya makacamiho. (Tiyako 3:14-16) Nyenya Piipiliya onnanivaha ekano yaphaama mmukhalelo wa osepa makacamiho ni olipiha murecele ahu ni anna ni arokora ahu. Hankooni noone mukhalelo ekano ela ephanraaya muteko wa akina.

MAKACAMIHO NI MUKHALELO WA OVOOTHA

“Kaahikhalano nikacamiho ni munna yoowo aalampe ni miyo. Ekwaha naakhulannaahu, achu eeli yaahirwa nave yeerela onamoona mwaha ahu.”—KRIS.

“Murokora yoowo wiiliwiili kaalaleeryaakano, mootutusa aahimaala opaka marehereryo a olaleerya. Voocharela haaloca ni miyo moomalela. Nkaasuwenle nthowa neni.”—YANETI.

“Naari achu araru nlocihanaka mu telefone. Muchu mmoha aahinilaanya, nave kuupuwela wi onwala. Voocharela kaahiloca ichu soonanara vooloca sa yoowo ni muchu mukina, nyenya eera ahinwanle telefone.—MIKELI.

“Mmuloko ahu, mapiyoneero eeli yaapacerya okhalano makacamiho. Mmoha aanamunyemula mukhweiye. Waakhulana waya waahaaceecheiha akina.”—KARI.

Mikhalelo seiya inakhala wi tahi makacamiho matokweene. Nave akhweya sanwerya otannya wiicela woohimala mwa yaawo yaavoloweliwe ni onanariha murecele mmulokoni. Moohakalaliha, anna ni arokora yaala yaachariha ohoolela wa Piipiliya nave yaahikhalano wanawiili murecele. Munuupuwela wi ohoolela taani wa Piipiliya waakhavihenrye?

‘Mmukwahani muhàkhulaneke.’ (Maphatxuwelo 45:24) Yosefe aahaavaha ekano yeela asinnawe vaavaa yaakookelaaya owaani. Vaavaa muchu ohinavareryeleiye miyoonelo sawe nave aneemererya waakuvela onyeenyeya, makacamiho annatepa. Akinatho anamukhala oonyeenyeya. Kris aahuupuwela wi waari woovila wa yoowo okhala awiiyeviha ni ochariha sooleeliherya. Owo aanachuna opaka matorokelo, mwawiihiiha aahimveka nikhurumuwelo munna yoowo aakhulanneiyeno. Voocharela Kris aahiilipiserya wi avareryele moonelo awe. Vaava munna onneiye wiilipiserya wawe opaka matorokelo,  owotho aaheerano emohamoha. Vano awo aakhalano murecele vaavaa anamurumeelaaya Yehova vamoha.

“Wahiveka miruku, onamòtxèla miteko sà.” (Masiposipo 15:22) Vaavaa nthamwene a Yaneti aamanleiye oloca ni yoowo, Yaneti aahilakelela opharihela eciciri yeela ya Piipiliya. Owo aahiloca ni murokora. Yaneti aahimukoha waakhanle wi aahipaka echu yaamunyeenyeihe. Woopaceryani, oopiili yaari oohaleeliheya. Nyenya vaavaa yaatitelelaaya oloca moomaaleleya, yaahikhala phaama. Murokora aahisuwela wi hiiwexenxe phaama echu yeeren’ye khalai nave wi Yaneti haapanke echu yoonanara. Aahimveka nikhurumuwelo Yaneti, nave oopiili vano asinthamwene vaavaa anamurumeelaaya Yehova vamoha.

“Wavelèlaka vanipuroni na mukutxhu yovaha-à nto wupuwelà wi munna-à ohotxhekela, hiyá vava yovaha-à, okòkele otxuli, wapatxerye watàna ni munna-à.” (Mateu 5:23, 24) Yesu aavanhe ekano yeela va Mwaha wa Vamwaakoni. Mikeli amanle oloca ichu soohithariheya vooloca sa munna, owo aakhalano ekeerelani. Owo aahilakelela opaka echu eri yoothene wi amalihe mwaha. Mwawiihiiha aahiloca ni munna nave aahimveka nikhurumuwelo. Tiheeni yeeren’ye? Mikeli onnaloca, “Munnaka aahikikhurumuwela moomalela.” Wanawiili yaahikhala asinthamwene.

“Mukhale òvilela ni akhwinyu, nave mulevelelaneke wakhalavo nthowa ni mukhwinyu.” (Kolosi 3:12-14) Munnawuupuwela mapiyoneero yaale yaakhulanne mmuteko woolaleerya? Mutokweene mmoha a muloko mweepewe aahaakhaviherya wi esuwele wi akina hiyaahakalala nave yaari ooceecheya. Aahiwuupuxerya wi yaaphwanela okhala oovilelana ni okhaviherya okhapelela murecele mmulokoni. Awo yaaheemererya nave yaahiparihela ekano. Vano ari oohakalala vaavaa analaleeryaaya michaka saphaama.

Ekano emohamoha enaphwanyeya mu Kolosi 3:12-14, enanwerya wookhaviheryaani okhala awiiyeviha, omukhurumuwela muchu yoowo oochekenleni ni ocuwala mwaha yoowo. Nyenya hanka wakhala wi noheererya okhurumuwela nave ohinakhala wooweryeya? Nookhalavo nlakiheryo mu Mateu 18:15 nni nnikhaviherye. Naamwi Yesu aaloca soocheka itokweene, owo oothariha echu nneeraahu nipake wakhala wi nookhalano nikacamiho ni munna naari murokora. Mweepewe ni mwawiiyeviha, nnanwerya oya oloca ni munna naari murokora wi nthokororye mwaha ni weererya omaliha.

Mpiipiliya sookhalamo sooleeliherya sincipale soophara muteko. Sincipale sa seiyo inaphitaanyerya ororomela munepa waweela wa Muluku wi onikhaviherye wooniherya “sawima sa Munepa.” Mikhalelo seiyo ti “osivela, otheya, murechele, oleva, ikharari, epewe, nroromelo, omála, wíhíha.” (Akalatiya 5:22, 23, Nlakano Nahihano) Nkuupuwelani vooloca sa ela. Rotaliivere onneeca mwawaakhwanela vaava onaheliweiye maasa. Mmukhalelo woolikana, onahaala okhala wookhweya omaliha miyaha sahu ni okhalano onthamwene waphaama vaavaa nnooniheryaahu mikhalelo seiya saphaama inarweela wa Yehova.

 MIKHALELO SOOHIYANAHIYANA SA ACHU SINNEERIHA MULOKO OKHALA WOOHAKALALIHAXA

Mmoha ti mmoha a hiyo ookhalano mikhalelo sawe. Navetho nnoona ichu mmukhalelo woohiyana ni oloca moohiyana. Ohiyana yoowo onneeriha onthamwene okhala woohakalaliha ni waphaama. Nyenya ohiyana wa mikhalelo sahu onanweryatho otannya ohiiwanana ni ovaanyihana. Mutokweene a mavyakelo aahivaha yootakiherya mukhalelo eyo eneeraaya yeereye vaavaa aalonceiye: “Muchu awiisoova onamukhalano nikacamiho akhala ni achu anooniherya osivela weeparipari. Ohiyana yoowo akhweya onamukhala wi tahi echweenevo; nyenya, eyo enanwerya ohoolela makacamiho matokweene.” Apwanne munneemererya wi achu arino mikhalelo soohiyana herwa ekhalihana phaama? Hankooni noone sootakiherya sa arummwa eeli. Vaavaa nnuupuwelaahu sa Petro, nnamwaanyiherya muchu yoowo wiiliwiili aaloca echu vyakala uupuweleiye. Vaavaa nnuupuwelaahu sa Yohani, nnamwaanyiherya munna oosivela yoowo wiiliwiili uupuwela ahaakumve oloca naari weera echu. Petro ni Yohani yaahikhalano mikhalelo soohiyana. Nyenya awo yaahilapa phaama vamoha vaavaa yamurumeelaaya Yehova vamoha. (Saweriwa T’arummwa 8:14; Galasya 2:9) Eyo enahaala okhala emohamoha wa hiyo olelo. Naamwi Akristu arino mikhalelo soohiyana ananwerya olapa phaama vamoha.

Nyenya hanka wakhala wi muchu mmulokoni mwanyu ooloca naari oopaka echu ehoosivenleeni? Yaahaala okhala yaphaama wuupuwela wi Kristu okhwile ntakhara munna yoowo hiiha ntoko wa nyuwo, nave munnaphwanela omusivela munninyu. (Yohani 13:34, 35; Aroma 5:6-8) Hiyaahaala okhala yaphaama olakelela wi hamuni mukhale nthamwene ni muchu yoowo naari wi munahaala omusepa. Moohiya, mwiikohe: ‘Apwanne munna opanke echu ehiniiwanana ni nlamulo na Yehova?  Apwanne yaari yoolakelelaawe okeerela yoonanara? Naari wi ohiyana wa mikhalelo? Apwanne chiryene, ookhalano mikhalelo kinachunaaka okhalano?’

Ntoko yootakiherya, wakhala wi owo onnasiveliwa ovaanela nyenya nyuwo hooye, ntakhara heeni ohilapa ni yoowo mmuteko woolaleerya nave moone yeeyo muneeraanyu muhuserye? Naari wakhala wi munna ta mahala opwaha nyuwo? Apwanne munnoona ohakalala onarweela waakhaviherya yaale ari awuuluvala, aniiceliwa, naari arino othowa? Munahaala ohuserya orweela wa muchu yoowo mukhalelo munaphwanelaanyu okhala a mahala? Echu eri yookhweleya ti yawi naamwi nyuwaano ni munninyu muri oohiyana, nyuwaano munanwerya okhaviheryeya ni mikhalelo sawe saphaama. Naamwi akhweya muhiyaaka okhala asinthamwene aphaama, munahaala waataana mukina ni mukhweiye. Eyo enahaala okhaviherya okhapelela murecele, nyuwaano ni akina mmuloko.

Mu nsana noopacerya, yaakhalavo arokora eeli Evotiya ni Sintike. Enooneya wi yaahikhalano mikhalelo soohiyana, nyenya murummwa Paulo aahaaceenyerya wi “ekhaleno monelo mmoha mwa Apwiya.” (Filipi 4:2) Hiyaanotho vamoha ni anna ni arokora ahu ninnachuna omulapela Yehova ni okhapelela murecele mmulokoni.

MUHEEMERERYE WI OHIIWANANA OTITELELE

Ntakhara heeni ninnaphwanela omaliha miyoonelo soonanara nryaahuno ni akina? Nnanwerya olikanyiha miyoonelo seiyo ni nikharuwe nninnuwa mmacani. Wakhala wi hiniphonlemo mmacani, nikharuwe nno nnahaala onanariha emaca yoothene. Mmukhalelo woolikana, wakhala wi miyoonelo sahu soonanara vooloca sa akina sohunnuwa, inahaala ovolowela muloko woothene.  Nyenya wakhala wi ninnamusivela Yehova ni annihu, nnahaala opaka yoothene nnaweryaahu wi nikhapelele murecele wa muloko.

Mwawiiyeviha wakhala wi munneererya opaka murecele ni akina, munahaala otikhiniheya ni sookhumelela saphaama

Vaavaa nneereryaahu opaka murecele ni akina, nnahaala otikhiniheya ni mukhalelo ichu ineeraaya ikhumelele phaama. Namoona a Yehova mmoha aahihoolela mukhalelo yoola. Ela yaweereya awe: “Kaahoona wi murokora mmoha aakikhaliha ntoko mwaana. Mukhalelo owo hiwaakisivenle. Vaavaa esaraaka yinnuwaaya, kaahipacerya ohilocano. Kaahuupuwela: ‘Murokora ola hanakivaha ncicimiho kinaphwanelaaka, mwawiihiiha nkini kimucicimiheke.’”

Voocharela murokora ola aahuupuwela vooloca sa moonelo awe. “Kaapacerya woona moonelo aka ohikhala waphaama, nave kaahiceecheya vancipale. Kaahoona wi kaaphwanela otoroka muupuwelo aka. Kimanle ovekela wa Yehova vooloca sa mwaha, kaahithuma echu ekhaani wi kamvahe murokora nave kaahirepa ekaarata kivekaka nikhurumuwelo. Naahikhupaarelana nave naaheemererya ocuwala mwaha. Hanintonko okhalano makacamiho wanawiili.”

Muchu ti muchu onnachuna murecele. Nyenya moonelo woonanara ni wiirumiha sinanweeriha achu opaka ichu mmukhalelo onananariha murecele. Mu elapo yeela, mukhalelo owo ti wawunlaana, nyenya Yehova onaweherya echu yoohiyana wa alapeli awe. Variyari va Anamoona a Yehova onaphwanela okhalavo murecele ni wiiwanana. Yehova aahimveerela Paulo waarepela Akristu wi ‘metxelo aya ekhale òphwanelela witxhaniwa’ yaakhenlaaya. Owo aahaaceenyerya weerano eyo “ni wiyeviha wothene, ni opisa murima, ni nthìti; nvilelanaka mukina ni mukhwawe mokhwelani, òthokorerya okhapelela wiwanana onarwa wa Munepa nulutxelelana wa muretxele.” (Éfeso 4:1-3) ‘Olutxelelana wa muretxele’ yoowo achu a Yehova anapuhaaya ti wasisapo yoowalamela. Mwawiihiiha hankooni muchu ti muchu a hiyo apake soothene onaweryeiye wi alipihe olucelelana wa murecele ni omaliha makacamiho vyakala nneeraahu nikhaleno ni anna ni arokora ahu.