Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli— Oomuhuserya

  |  yunyu 2017

Mwaanasuwela?

Mwaanasuwela?

Ntakhara heeni Yesu aahiloca wi yaari “ampava” yaale yaatumiha asinama mu empa ya Muluku?

MU MUCHAKA wa Mateu ninnaalakhanya: “Yesu àvolowa mpa mwa Muluku ni àwikaramu alipa a marotxa ni alipa òthuma yari mpa mwa Muluku, àpitxula mesa alipa òtxintxa ikhorowa ni mipatxo sa yale yatumiha ikakaiya. Ni Yesu àhi wa yawo: ‘Yòrempwa: Empa aka eni yitxhaniweke empa ya mavekelo, vano nyuwo munera nikhuku na ampava’.”Mateu 21:12, 13.

Miyaha sinnooniherya wi alipa a maroca mu empa ya Muluku yaanaakhaliha alipa oothuma mmukhalelo woohiphwanelela moorweela wa owalameliha maroca. Ntoko yootakiherya, ikakaiya hisaawalamela ophiyerya wi muchu oohaawa aanawerya othuma wi apakele mikucho. Nyenya soorepa sakhalai sa Ayuta sinnaloca wi yaahikhalavo elukuluku mu nsana noopacerya vaavaa muchu aathumeiye ikhorowa piili sa itenaariyu wi athume ikakaiya piili. Wi muchu aphwanye ikhorowa seiyo aaphwanela olapa mahiku 25. Ikakaiya saahitepa owalamela ophiyerya wi muchu oohaawa haawerya othuma. (Onamukutxho 1:14; 5:7; 12:6-8) Mulipa oohusiha Simeon ben Gamaliel aahitepa onyeenyeya ni mukhalelo yoowo ophiyerya ovukula mikucho saachuneya wi Muyuta aveleele. Mwawaakuveya, ikakaiya hisaawalamela.

Ntoko noonnaahu, alipa ootumiha mu empa ya Muluku yaari a nrima nave yaanaahuhula alipa oothuma. Ti nthowa neni mwawaakuveya Yesu aawiichanneiye “ampava.”