Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli— Oomuhuserya

  |  September 2017

“Nsu na Muluku Ahu ti na Mahiku Othene”

“Nsu na Muluku Ahu ti na Mahiku Othene”

“Ninnuma nnasi nave ethutu ennanyàla; nto nsu na Muluku ahu ti na mahiku othene.”​—ISAIYA 40:8.

MACIPO: 43, 48

1, 2. (1) Okumi waahaala okhala hai ahikhanlevo Piipiliya? (2) Tiheeni eni enikhaviherye ophura Masu a Muluku?

OKUMI anyu waahaala okhala hai waakhanle wi himwaanono Piipiliya? Himwaahaala okhalano miruku wi soohooleleni nihiku ti nihiku. Himwaahaala osuwela eparipari vooloca sa Muluku, okumi, naari omwaahiyu. Nave himwaahaala osuwela echu emoharu mano yeeyo Yehova aaweerenleiye achu khalai.

2 Ninnathamalela vancipale, woona wi hanri mmukhalelo yoowo woothananiha. Yehova oonivaha masu awe Piipiliya. Owo oororomeliha wi muchaka awe horwa omala. Murummwa Petro aahimuuluulela Isaiya 40:8. Naamwi eciciri ela ihimulocaka xaxaxa Piipiliya, ennaphariheleya mu michaka sa Piipiliya. (Mwaalakhanye 1 Pedro 1:24, 25.) Nnanwerya ophura vancipale orweela Mpiipiliyani wakhala wi nnamwaalakhanya mu elocelo ahu. Yaale anasivela Masu a Muluku annasuwela phaama yeela. Mu iyaakha masana ivirale, achu yaahilapa moowetha wi emutaphulele Piipiliya ni omweeriha wi aphwanyeyeke, moohipwacha wiikariwa otokotoko ni makacamiho.  Yehova onakhwela “wavulusa atxhu othene, nave wi ephiye mosuwelani wa eparipari.”​—1 Timóteo 2:3, 4.

3. Tiheeni nnahaalaahu othokororya mmwaha yoola? (Moone eruku yoopacerya.)

3 Mmwaha yoola, nnahaala othokororya mukhalelo Masu a Muluku aryaaya a ilukuluku soothene moohipwacha (1) otorokeya wa malocelo, (2) waaceereryeya wa epoliitika, yoowo waatoronke elocelo yawunlaana ni (3) owatiihiwa otaphuleliwa wa Piipiliya. Othokororya wuuwu oni onikhaviherye hai? Omuthamalela wahu Piipiliya ni Mwaneene a Piipiliya onahaala okhala woothipeleya.—​Mikeya 4:2; Aroma 15:4.

OTOROKEYA WA MALOCELO

4. (1) Mmukhalelo taani ilocelo inatorokeyaaya moovira wa elukuluku? (2) Nnasuwela hai wi Muluku hanathanla elocelo? Eyo enaweerihaani woona hai?

4 Vaavaa elukuluku enaviraaya, ilocelo sinnatorokeya. Masu ni malocelo sinanwerya otaphulelaka ichu soohiyana ni seiho saaphariheliwa khalai. Akhweya munnawerya wuupuwela nsu nimoha mu elocelo munalocaanyu. Eyotho yaaneereya mu ilocelo sa khalai. Elocelo ya Ehepiri ni Ekiriki yeeyo achu analocaaya olelo ti yoohiyana ni yeeyo aarepiweno Piipiliya. Achu ancipale hanawerya omwiiwexexa Piipiliya mu elocelo yakhalai yeeyo aarepiweiyeno, nave awo annachuna omutaphulela. Akina annaloca wi waakhanle wi yaahihuserya Ehepiri ni Ekiriki yakhalai yaahaala omwiiwexexaka phaama Piipiliya. Akhweya eyo hiyaahaala waakhaviherya vancipale hiiha ntoko anuupuwelaaya. * (Moone masu avathi.) Ninnathamalela vancipale, woona wi Piipiliya naari makupaawe aataphuleliwa mu ilocelo opwaha 3.200. Ti yeela Yehova onakhweleiye wi achu a “ilocelo ni mahimo othene” ephure orweela wa Masu awe. (Mwaalakhanye Wupulula 14:6.) Mweeparipari, ela ennaneeriha omwaacamela Muluku ahu, yoowo ori oosivela ni oohikhala nthalu.​—Saweriwa T’arummwa 10:34.

Ninnathamalela vancipale, woona wi Piipiliya anteero naari makupa awe ootaphuleliwa mu ilocelo opwaha 3.200

5. Tiheeni yeerinhe wi Piipiliya Versão Rei Jaime akhale ookhweleyaxa?

5 Mweeparipari otorokeya wa ilocelo ennavolowela tho otaphuleliwa wa Piipiliya. Piipiliya yoowo aari ookhweya omwaalakhanya vaavaa aapakiweiye woopaceryani, akhweya hani akhale ookhweya moovira wa elukuluku. Yootakiherya emoha ya yeela ti ya Versão Rei Jaime, aataphuleliwe woopaceryani mu 1611. Aari Piipiliya awunlaana mu Apiipiliya ancipale a Enklesi. Masu yaaphariheliwa mu Versão Rei Jaime yaanavolowela tho elocelo ya Enklesi. * (Moone masu avathi.) Nyenya, Piipiliya yoowo aapharihela nsina na Yehova pahiru mmakupa vakhaani. Mmapuro mancipale mummo soorepa soopacerya sa Ehepiri naaphwanyeyaayamo nsina na Muluku, naaphariheliwa nsu nawi “APWIYA” mu ileetera itokotoko.  Ohoolo waya ikaruma sa wimprimiri saanapharihela masu yaala awi “APWIYA” mu ileetera itokotoko mu iciciri ikina mu Soorempwa sa Ekiriki Seekristu. Mmukhalelo yoola, alipa oomutaphulela Versão Rei Jaime yaahiphiyerya osuwela wi nsina na Muluku naaphwanela ophariheliwa mu Nlakano Nahiihaano.

6. Ntakhara heeni ninnathamalela okhalano Tradução do Novo Mundo?

6 Vaavaa Versão Rei Jaime aataphuleliweiye woopaceryani, masu a Enklesi yaaphariheliwe muteko yaakhala wi tahiihaano. Nyenya vaavaa elukuluku yaaviraaya, masu makina yaahipacerya okhala akhalai, nave olelo annatepa okacamiha wiiwexexa. Emohamoha yaaheereyatho ni Apiipiliya akina ahiihaano yaataphuleliwe mu ilocelo ikina. Mwawiihiiha ninnathamalela vancipale okhalano Tradução do Novo Mundo da Bíblia Sagrada, yoowo onapharihela malocelo a mutano. Piipiliya ola onnaphwanyeya anteero naari mmakupa awe mu ilocelo soopwaha 150. Ela enataphulela wi achu ancipale mulaponi ananwerya omwaalakhanya Piipiliya yoola mu ilocelo saya. Masu ookwakwaleya ni amutano onaphariheleiye enneeriha okhala wookhweya muchaka wa Muluku otannya mirima sahu. (Salumu 119:97) Mweeparipari echu eneeriha wi Tradução do Novo Mundo akhale a vameekheiye, tiyawi nsina na Muluku ninnaphwanyeya mmapuro yaawo naaphwanyeyaayamo woopaceryani.

ELOCELO YAWUNNLAANA

7, 8. (1) Ntakhara heeni Ayuta ancipale mu iyaakha masana mararu oopacerya E.E.K. hiyaawerya wiiwexexa Soorempwa sa Ehepiri? (2) Tiheeni Seputuwaxinta a Ekiriki?

7 Waaceereryeya wa epoliitika mulaponi ilukuluku ikina waanatoroka elocelo yeeyo achu yaalocaaya. Nyenya Yehova aahisuwela wi Piipiliya aahaala ophwanyeya wa achu mu elocelo yaahaalaaya wiiwexexa. Ntoko yootakiherya, aliivuru 39 oopacerya a Piipiliya yaarepiwe ti Ayuta, naari Aisarayeli. Awo yaari oopacerya Muluku waahiyera “masu awe.” (Aroma 3:1, 2) Woopaceryani yaarempe aliivuru ale mu Ehepiri naari mu Aramaiko. Nyenya mu iyaakha masana mararu oopacerya E. E K., Ayuta ancipale hiyiiwexexa Ehepiri. Ntakhara heeni? Vaavaa Alexantre Mutokotoko aavoontheiye makupa mancipale a elapo, Olamulelo wa Ekiriki waahimwaramwaxeya. Ntoko yookhumela, Ekiriki yaahikhala elocelo yawunlaana mmapuro mummo omwene wa Kresiya waalamulelaayamo, nave achu ancipale yaahipacerya oloca Ekiriki ohiya elocelo aya. (Daniyeli 8:5-7, 20, 21) Eyo yaaphitaanyerya Ayuta ancipale, mwawiihiiha waari woovila wa yaawo omwiiwexexa Piipiliya mu Ehepiri. Mwaha ola waamanle hai?

8 Mu iyaakha 250 Yesu ahaakumve oyariwa, aliivuru oopacerya a Piipiliya yaataphuleliwe mu Ekiriki. Ohoolo waya, Soorempwa sa Ehepiri seiyo saahalenle saahitaphuleliwatho. Makupa yaawo yaataphuleliwe yaasuweliwe ntoko Seputuwaxinta a Ekiriki. Owo aari Piipiliya aataphuleliwe oothene mmasu a Soorempwa sa Ehepiri.

9. (1) Mmukhalelo taani Seputuwaxinta ni sootaphulela ikina soopacerya saakhavihenryaaya achu yaawo yaalakhanya masu a Muluku? (2) Nikupa taani nnoosivelaani mu Soorempwa sa Ehepiri?

9 Seputuwaxinta aahaakhaviherya Ayuta yaaloca Ekiriki waalakhanya Soorempwa sa Ehepiri mu Ekiriki. Munnawerya waanyiherya ohakalala yaaryaayano ntakhara wiiwa naari waalakhanya Masu a Muluku mu  elocelo aya? Moovira wa elukuluku, makupa a Piipiliya yaahitaphuleliwa mu ilocelo ikina sawunlaana saalociwa, ntoko Esiiriya, Ekotiki, ni Elatini. Vaavaa achu ancipale yaaweryaaya waalakhanya ni wiiwexexa masu a Muluku, awotho yaanapacerya osiveliwano. Akhweya awo yaahikhalano iciciri saya sa vamurimani, hiiha ntoko nneeraahu olelo. (Mwaalakhanye Salumu 119:162-165.) Aai, Masu a Muluku ta mahiku oothene moohipwacha otorokeya wa epoliitika ni otorokeya wa elocelo yawunlaana.

OWATIIHIWA OTAPHULELIWA

10. Mu elukuluku ya John Wycliffe, ntakhara heeni achu ancipale hiyaawerya omwaalakhanya Piipiliya?

10 Moovira wa iyaakha, ahooleli ancipale ooweryaxa yaaheererya waahiiha achu omwaalakhanya Piipiliya. Nyenya alopwana oomoova Muluku hiyaahiyale olapa muteko wi Piipiliya aphwanyeye wa achu oothene. Mmoha a yaawo aari John Wycliffe, yoowo aakhala o Inklatera variyari va nsana naneexexe. Owo eemererya wi muchu ti muchu aanaphwanela omwaalakhanya Piipiliya. Variyari va okumi awe woothene, achu ancipale o Inklatera hiyantonko wiiwa muchaka wa Mpiipiliya mu elocelo aya. Apiipiliya yaari oowalamelaxa, nave ekoopiya ti ekoopiya yaarempwa ni mata. Mwawiihiiha, achu avakhaani pahi ti yaarino Piipiliya. Navetho, achu ancipale mu elukuluku yeeyo hiyaawerya omwaalakhanya mano. Yaale yaaya okerexa akhweya yaaniiwa waalakhanyiwa wa Piipiliya moovuwa mu Elatini, nyenya eyo yaari elocelo yakhalai yeeyo achu ancipale yahiiwexexaaya. Mukhalelo taani Yehova eerinheiye wi achu ekhaleno Piipiliya mu elocelo aya?​—Masiposipo 2:1-5.

John Wycliffe ni akina yaachuna wi muchu ti muchu akhaleno Masu a Muluku. Apwanne ti yeeyotho munachunaanyu? (Moone eparakrafo 11)

11. Tiheeni yaari yookhumelela ya Piipiliya a Wycliffe?

11 Mu 1382, John Wycliffe ni akina yaahimutaphulela Piipiliya mu Enklesi. Piipiliya a Wycliffe ahikhala awunlaana variyari va nikhuuru naasuweliwe ntoko Lollards. Achu awo yaanamusivela Piipiliya. Awo yaaneeca muceche ti muceche orukurerya epooma yoothene ya Inklatera. Awo yaanamwaalakhanya Piipiliya wa achu nave yaanaavaha makupa a ikoopiya saarempwa ni mata. Muteko aya waahimweeriha Piipiliya wunlaana wanawiili.

12. Ahooleli a ikerexa yoonne hai vooloca sa Wycliffe ni muteko awe?

12 Ahooleli yaahimwiica Wycliffe, Piipiliya  awe, ni oomuchara awe. Awo yaahiwiikara a Lollards nave yaahaananariha Apiipiliya oothene yaaphwanyaaya. Naamwi Wycliffe aakhwile, nlelo ahooleli yaahimuthoriha ntoko mulipa oomwaryeya naari ntoko mwiicani a Ekerexa. Awo yaahuuhula makhuva awe, yeeyela, nave erihela ecuurwa ene mmuhice Swifite. Nyenya achu ancipale yaanachuna waalakhanya ni wiiwexexa Masu a Muluku, nave ekerexa hiyaawenrye waahiiha. Mu iyaakha masana soocharela, achu o Europa ni makupa makina a elapo yaahipacerya omutaphulela Piipiliya ni omwimprimiri mu ilocelo seiho achu yaalocaaya.

“TI MIYANO KINOSUWELIHA YELE ENAWERYA WOLAPELA”

13. Tiheeni nnaphwanelaahu ororomela? Eyo enalipiha hai nroromelo nahu?

13 Piipiliya oveereliwe ti Muluku. Nyenya ela henataphulela wi otaphuleliwa wa Seputuwaxinta, Piipiliya a Wycliffe, Versão Rei Jaime, naari Apiipiliya akina yaaveereliwe ni Muluku. Mwawiihiiha, vaavaa nnathokororyaahu mukhalelo otaphuleliwa iwo waapakiwaaya, tiyawooneya wi pahiru ntoko Yehova aaroromelinheiye, Masu awe ta mahiku oothene. Ela ennalipiha nroromelo nahu wi echu eri yoothene Yehova onalaiheryeiye enahaala okhwaanela chiryene.—Yosuwa 23:14.

14. Yeeyo nihusenryaahu vooloca sa Piipiliya ennannuwiha hai omusivela wahu Muluku?

14 Vaavaa nnahuseryaahu mukhalelo Yehova aakinheiye Masu awe, nroromelo nahu mwa yoowo ninnakhala noolipa nave nsivelo nahu mwa yoowo ninnakhala nawiiseela. * (Moone masu avathi.) Ntakhara heeni Yehova ayaaka onivaha Piipiliya nave voocharela alaiherya omukhapelela? Nthowa nawi owo onnanisivela nave onachuna onihusiha mukhalelo wa ophura mukhatiihu. (Mwaalakhanye Isaiya 48:17, 18.) Ela ennanceenyerya omusivela ni omwiiwelela.

15. Tiheeni nnahaalaahu othokororya mmwaha onacharela?

15 Ninnasivela mwawiiseela Masu a Muluku, mwawiihiiha nni niwerye hai okumihavo mphurelo muncipale omwaalakhanya wahu Piipiliya? Nni naakhaviherye hai yaale nnavaanelaahuno mmuteko woolaleerya omuthamalela Piipiliya? Ahusiha a mmulokoni eni esuwele hai wi echu eri yoothene anahusihaaya enathipeleya Mmasu a Muluku? Nnahaala othokororya makoho yaala mmwaha onacharela.

^ par. 4 Moone mwaha Você Precisa Aprender Hebraico e Grego?mu Mulipeleli 1 a Novempuru a 2009 (a ekunya.)

^ par. 5 Masu mancipale a Enklesi anataphulela echu ekina, yaahiphariheliwa mu Versão Rei Jaime. Ntoko yootakiherya, “nrapala na iyano nrukurenrye mino aka.”​—Yobi 19:20.

^ par. 14 Moone ekaaxa “ Moone Meekhinyu!