Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli— Oomuhuserya

  |  September 2017

“Nsu na Muluku . . . Nrino Owerya”

“Nsu na Muluku . . . Nrino Owerya”

“Nsu na Muluku nrino ekumi ni owerya.”​AHEBRI 4:12.

MACIPO: 37, 48

1. Tiheeni enoolekechaani wi Masu a Muluku aakhalano owerya? (Moone eruku yoopacerya.)

ACHU a Yehova annaroromela wi masu awe, muchaka awe wa achu, ‘wokhalano ekumi ni owerya.’ (Ahebri 4:12) Ninnoona owerya wa Masu a Muluku mu okumi ahu ni mu okumi wa akina. Ehaakumve okhala Anamoona, akina yaari mipava, oolya mirece, naari acapaheya. Akina yaari achu oovuwa naari wi a muhakhu, nyenya nlelo yaanoona wi yaanahala echu ekina mu okumi aya. (Eklesiyaste 2:3-11) Yoohakalaliha ti yawi yaawo yahaarino ewehereryo nave yaarimenle vano aakhalano ohoolela ni ewehereryo. Mu Mulipeleli, nohaalakhanya ni opuha saweereya sincipale sa okumi mmiyaha inaloca “A Bíblia muda a vida das pessoas” (Piipiliya Onnatoroka Okumi wa Achu). Nave naamwi emanle okhala Akristu, achu anaphwanela otitelela olipiha onthamwene aya ni Yehova nnikhaviheryo na Piipiliya.

2. Ti mwawiihai owerya wa Masu a Muluku waavolowenlaaya achu a nsana noopacerya?

2 Ela tahi yootikhiniha wi achu ancipale annapaka matorokelo matokweene vaavaa anahuseryaaya eparipari. Anna ni arokora ahu a nsana noopacerya yaawo yaarino ewehereryo ya  oya wirimu, yaahipakatho matorokelo yaala. (Mwaalakhanye 1 Korinto 6:9-11.) Vaavaa Paulo aalonceiye yaale yahi evolowa mwa omwene wa Muluku, owo aahaaceererya: “Akina mwa nyuwo yànera seiho.” Masu a Muluku ni munepa awe waweela saahaakhaviherya achu opaka matorokelo. Nyenya naamwi emanle okhala Akristu, akina a yaawo yaahipaka soocheka itokotoko seiho saananarinhe onthamwene aya ni Yehova. Ntoko yootakiherya, Piipiliya onnamuloca munna mmoha awoocihiwa yoowo iikariwe mmulokoni. Ohoolo waya, owo aahipaka matorokelo ophiyerya akookela opaka makupa a muloko Weekristu. (1 Korinto 5:1-5; 2 Korinto 2:5-8) Ti yoolipiha woona wi anna ni arokora ahu annapaka matorokelo mancipale nthowa na owerya wa Masu a Muluku.

3. Tiheeni nnahaalaahu othokororya mmwaha yoola?

3 Masu a Muluku aakhalano owerya otokotoko. Woona wi Yehova oonivaha masu yaala, nnachuna ororomela wi ninnapharihela mwaphaama. (2 Timóteo 2: 15) Mwaha yoola onahaala othokororya tiheeni nnaphwanelaahu weera wi nipharihele owerya wa Piipiliya (1) mu okumi ahu, (2) mmuteko ahu woolaleerya, ni (3) vaavaa nnahusihaahu otripuna. Yeeyo nnahaalaahu ohuserya enahaala onikhaviherya wooniherya osivela wahu ni omuthamalela Tiithi ahu awirimu, yoowo onanihusiha yeeyo enawerya onilapela.

MU OKUMI AHU

4. (1) Tiheeni nnaphwanelaahu opaka wi Masu a Muluku enivolowele? (2) Muni mwiivahe hai elukuluku ya omwaalakhanya Piipiliya?

4 Naariki neemererye wi Masu a Muluku enivolowele, nnaphwanela waalakhanya moohihiyererya. Nnaphwanela weererya waalakhanya yaawo nihiku ti nihiku. (Yosuwa 1:8) Ancipale a hiyaano ninnatepa oweiwa mookumini mwahu, nyenya niheemererye wi echu vyakala, ophitaanyerya mirici sahu, enihiihe omwaalakhanya Piipiliya. (Mwaalakhanye Éfeso 5:15, 16.) Akhweya nnaphwanela wiivaha elukuluku woosiiselo, othana, naari ohiyu. Ninnamweemererya mulipa oomurepa salumu yoowo aarempe: “Kinnakhwelasa malamulo anyu! Kinnupuwela yawo mahiku òthene.”—Salumu 119:97.

Hannaphwanela weemererya wi echu vyakala, ophitaanyerya mirici sahu, enihiihe omwaalakhanya Piipiliya nihiku ti nihiku

5, 6. (1) Ntakhara heeni ninnachuna wuupuwelela? (2) Wuupuwelela wahu oni okhale hai wamphurelo? (3) Omwaalakhanya Piipiliya ni wuupuwelela wookhavihenryeni hai?

5 Nyenya, henaakhwanela omwaalakhanyaru Piipiliya. Nnaphwanela wuupuwelela, naari othokororya moopwacha ni mwawiiseela, vooloca sa yeeyo nimanlaahu waalakhanya. (Salumu 1:1-3) Weerano hiiha nnahaala owerya opharihela miruku sa Mpiipiliyani mu okumi ahu. Moohipwacha waakhanle wi nnamwaalakhanya Piipiliya a wimprimiriwa naari mu ekhankoonya, neemererye wi Masu a Muluku enitoroke nave eniceenyerye.

6 Wuupuwelela wahu oni okhale hai wamphurelo? Vaavaa nnamwaalakhanyaahu Piipiliya, nnaphwanela omaala vakhaani ni wiikoha mukhatiihu: ‘Tiheeni yeela  enakileelaaya vooloca sa Yehova? Mmukhalelo taani kinapharihelaaka mu okumi aka yeela kimanlaaka waalakhanya? Matorokelo taani nlelo kinaphwanelaaka opaka?’ Vaavaa nnuupuwelelaahu Masu a Muluku ni ovekela vooloca sa yeeyo naalakhannyaahu, nnahaala ochuna opharihela. Voocharela nnanwerya ophura owerya wa Piipiliya mu okumi ahu.​—2 Korinto 10:4, 5.

MMUTEKO WOOLALEERYA

7. Nni nipharihele hai phaama Masu a Muluku mmuteko ahu woolaleerya?

7 Ti yoochuneya opharihela Masu a Muluku ilukuluku soothene vaavaa nnalaleeryaahu ni ohusiha. Munna mmoha aahiloca: “Waakhanle wi nyuwaano munalaleerya ni Yehova empa ni empa, mwaahaala omuhiya owo wi aloce naari mwaahaala olocaka meekhinyu?” Vaavaa nnamwaalakhanyeryaahu muchu Piipiliya, nnamuhiya Yehova wi aloce ni yoowo. Yoorepa yoophwanelela, yookhalano owerya opwaha echu eri yoothene naahaalaahu oloca. (1 Tesalónika 2:13) Vaavaa nyuwaano munakhalaanyu mmuteko woolaleerya, apwanne munneererya omwaalakhanya Piipiliya wiiliwiili ophiyerya munaweryelaanyuvo?

Vaavaa nnamwaalakhanyeryaahu muchu Piipiliya, nnamuhiya Yehova wi aloce ni yoowo

8. Ntakhara heeni ninnaphwanela opaka sincipale ohiya pahiru waalakhanya soorepa vaavaa nnalaleeryaahu?

8 Nyenya, waalakhanya eciciri ya Piipiliya wa yaawo nnaalaleeryaahu henaakhwanela. Achu awaaca haniiwexexa yootaphulela ya Piipiliya. Eyo yaaneereya mu nsana noopacerya, nave olelo enneereya emohamoha. (Aroma 10:2) Hannaphwanela wuupuwela wi mwaneene a vaate ohiiwexexa yoorepa naalakhanyaahu. Nnaphwanela omukhaviherya owo orweela wa wuuluulela masu ookhweleya naari yoolakelela ya eciciri nave voocharela nimutharihele yootaphulelaaya. Mmukhalelo yoowo, Masu a Muluku ananwerya otannya mawuupuwelo ni mirima sa achu.​—Mwaalakhanye Luka 24:32.

9. Nni naakhaviherye hai achu omucicimiha Piipiliya orweela wa yeeyo nnalocaahu nihaakumve waalakhanya yoorepa? Vahani yootakiherya.

9 Yeeyo nnalocaahu nihaakumve waalakhanya yoorepa enanwerya tho omukhaviherya mwaneene a vaate omucicimiha Piipiliya. Ntoko yootakiherya, nnahaala oloca: “Haya noone yeeyo Mpatuxa ahu onaloceiye mmakupa ala.” Naari wakhala wi nnaloca ni muchu yoowo ohiri Mukristu, nnanwerya oloca, “Hankooni noone yeeyo Soorempwa Saweela sinanleelaaya.” Wakhala wi nnaloca ni muchu ohinapwacha ekerexa, nnanwerya omukoha “Apwanne mohintoko wiiwa masu ala akhalai?” Waakhala wi ninnuupuwela wi muchu ti muchu ookhalano muyareriwo ni soororomela sawe, nnahaala opaka soothene nnaweryaahu wi mapaceryiho ahu ekhaleke ootannya murima.​—1 Korinto 9:22, 23.

10. (1) Tiheeni yeeren’ye ni munna mmoha? (2) Moonne hai owerya wa Masu a Muluku mmuteko anyu woolaleerya?

10 Ancipale ahoona wi opharihela Masu a Muluku onnawerya waavolowela yaawo anaalaleeryaaya. Ntoko yootakiherya,  Munna mmoha aahimuxekurya mulopwana awuuluvala yoowo aalakhannye irevista sahu mu iyaakha sincipale. Nihiku nimoha, ohiya wiimoona omuhiyerya Mulipeleli muvyaani, owo aahilakelela waalakhanya yoorepa. Owo aalakhannye yoorepa ya 2 Korinto 1:3, 4, yeeyo enaloca wi: “Tithi a ikharari ni Muluku a nihakalaliho nothene . . . onnanihakalaliha mwa masoso ahu othene.” Masu yaala yaahitannya vancipale murima wa mulopwana ole ophiyerya wi aahimveka munna wi aalakhanye iciciri ihe wanaawiili. Voocharela owo aahiloca wi yene ni mwaariye chiryene yaanachuna nihakalaliho. Nthowa na yoorepa yeeyo, owo aahichuna osuwela sincipale vooloca sa Piipiliya. Opharihela Masu a Muluku mmuteko ahu woolaleerya wookhalano owerya otokotoko!​—Saweriwa T’arummwa 19:20.

VAAVAA MUNAHUSIHAANYU O TRIPUNA

11. Murici taani aryaayano anna yaawo onanihusiha orweela o tripuna?

11 Ninnasiveliwa ophiya mmithukumano sahu sa muloko, sa ekulucu, ni sa muceche. Nthowa ntokotoko na othukumana ori omulapela Yehova. Ninnaphuratho orweela wa yeeyo nnahuseryaahu. Wa nthowa na yeela, anna yaawo anahusiha orweela o tripuna aakhalano ekari ni murici mutokotoko. (Tiyako 3:1) Awo anaphwanela ororomela wi ohusiha waya othipelen’ye mu Masu a Muluku. Waakhanle wi mookhalano ekari yeela, muni nwerye hai opharihela owerya wa Piipiliya wi mutannye mirima sa alipa oowiriyana?

12. Namaloca oni aroromele hai wi mwaha awe onathipeleya mu Soorempwa?

12 Soorempwa sinaphwanela okhala makupa  ookhweleyaxa mmiyaha vyakala. (Yohani 7:16) Mwawiihiiha mwiikasope ni mukhalelo munaperekhaanyu mwaha ni maphwanaphwaniho ni saweereya munapharihelaanyu wi ihaalekeche vancipale achu ompwaha Piipiliya. Navetho, muupuwele wi waalakhanya orweela Mpiipiliyani tahi echu emohamoha ni ohusiha orweela Mpiipiliya. Mweeparipari, wakhala wi munnaalakhanya soorepa sincipale, achu ancipale heni yuupuweleke. Mwawiihiiha muthanle phaama soorepa seiho munachunaanyu opharihela. Voocharela mmalihe elukuluku wi mwaalakhanye, mutharihe, mphwanaphwanihe, ni mpharihele mwaphaama. (Nehemiya 8:8) Vaavaa mwaha anyu onathipeleyaaya mu yoochariha, muhuserye yoochariha eyo ni soorepa sinaphwanyeya vaava. Mweererye wiiwexexa mukhalelo yoochariha eyo ni soorepa siniiwananaaya. Voocharela mpharihele soorepa seiyo ikina wi muhusihe miyaha soochuneya mmwaha anyu. (Munanwerya ophwanya sooleeliherya saphaama mu soohuserya 21 ophiyerya 23 mu Beneficie-se da Escola do Ministério Teocrático.) Nave echu yoochuneyaxa, mumveke Yehova wi ookhavihenryeni operekha miyuupuwelo sawe sasisapo soorweela Mpiipiliyani.​—Mwaalakhanye Esdra 7:10; Masiposipo 3:13, 14.

13. (1) Murokora mmoha aavoloweliwe hai ni yoorepa yeeyo iiwaleiye omuthukumano? (2) Mukhalelo aaphariheliweiye Piipiliya mmithukumano sahu woovolowenleni hai?

13 Murokora mmoha o Australiya vaavaa aareiye mwaana, saahimphacuwela ipahu  sincipale, nave naamwi voocharela aamusuwenle Yehova, owo nlelo heemererya wi Yehova aanamusivela. Omithukumano, murokora ola aahiiwa yoorepa yeeyo yamvolowenle vancipale. Owo aahuupuwelela nave aahipaka otholathola mwa yeeyo, nave eyo yaahimweeriha waalakhanya iciciri ikina sa Mpiipiliyani. Owo aahilekecheya wi Yehova aanamusivela. * (Moone masu avathi.) Mohintoko wiiwa yoorepa omuthukumano wa muloko, wa ekulucu, naari wa muceche yeeyo yoovolowenleeni mmukhalelo ntoko yoola?​—Nehemiya 8:12, Tradução do Novo Mundo.

14. Nni nooniherye hai wi ninnasivela nave ninnavaha esisapo Masu a Muluku?

14 Mano, hannamuthamalela Yehova ntakhara Masu awe oorempwa, Piipiliya? Owo aahiroromeliha wi Piipiliya aahaala okhala a mahiku oothene nave owo aahaakhwaniherya yoororomeliha yeeyo. (1 Pedro 1:24, 25) Mwawiihiiha nnachuna ororomela wi ninnamwaalakhanya Piipiliya moohihiyererya, ompharihela mu okumi ahu, navetho ompharihela wi naakhaviheryeno akina. Vaavaa nneeraahuno yeela, ninnooniherya wi mweeparipari ninnasiveliwano nave ninnathamalela muhakhu yoola, nave echu yookhweleyaxa, Mukaneene, Yehova Muluku.

^ par. 13 Moone ekaaxa “ Mapacereryo.”