Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli— Oomuhuserya

  |  September 2017

Mutakiherye Oreera Murima wa Yehova

Mutakiherye Oreera Murima wa Yehova

“Muluku a ikharari, òrèra murima.”​MUKWAHA 34:6.

MACIPO: 18, 12

1. Yehova iisuupulunle hai wa Mose? Ntakhara heeni ela eryaaya yoochuneya?

MU ELUKULUKU ekina, Muluku aahiisuupulula mukhateiye wa Mose orweela wa olokoha nsina nawe ni mikhalelo sawe mikina. Yehova anwerya oceenyerya owerya wawe naari miruku sawe, nyenya moohiyana, aapacenrye oloca ikharari sawe, ni oreera murima. (Mwaalakhanye Mukwaha 34:5-7.) Mose aachuna osuwela waakhanle wi Yehova aahaala omukhaviherya. Mwawiihiiha, Yehova aaceenyenrye mikhalelo seiyo sooniherya wi mweeparipari owo aanachuna omukhaviherya mulapeli awe. (Mukwaha 33:13) Ela enaweerihaani hai osuwela wi Yehova onnanikhapelela vancipale? Mwaha yoola onahaala othokororya oreera murima, yeeyo eri wooniherya niphwanya ntakhara ohooxeya wa akina ni nchuno na waakhaviherya.

2, 3. (1) Tiheeni enooniherya wi tahi yeeleco wa achu okhala ooreera murima? (2) Ntakhara heeni munnaphwanela okhalano nchuno wa yeeyo Piipiliya onaloceiye sa oreera murima?

2 Yehova taikharari, nyenya owo aapanke achu moophwana ni yoowo. Mwawiihiiha tahi yeeleco wa achu waathokororya akina.  Ophiyerya wi yaale ahimusuwenle Yehova, wiiliwiili annooniherya ooreera murima. (Maphatxuwelo 1:27) Mpiipiliyani, ninnaphwanyamo miyaha sawaaca sa achu yaawo yoonihenrye oreera murima. Ntoko yootakiherya, vaavaa Solomoni aachuneiye omusuwela mwa athiyana eeli taani aari mai a mwaana, owo aahiweeha orweela wa olamula wi mwaana akawanyiwe veeri. Amannya a mwaana yaahooniherya niphwanya ntakhara mwanaya, mwawiihiiha yaahimveka mwene wi amuhiyerye muthiyana mukina wi amukuxe. (1 Mamwene 3:23-27) Yootakiherya ekina ya oreera murima ti ya mwaana a mwaamuthiyana a Farawo. Vaavaa owo aamphwannyeiye Mose ari mwaana, owo aahisuwela wi aari Muhepri nave aahaala wiiphiwa. Nyenya aahimooniherya “ikharari [naari oreera murima]” nave aahilakelela omukusa owo ntoko mwanawe.​—Mukwaha 2:5, 6.

3 Ntakhara heeni ninnaphwanela ohuserya sincipale vooloca sa oreera murima? Ti nthowa nawi Yehova onachuna wi nimutakiherye yoowo. (Éfeso 5:1) Naamwi nipakiwe wi nikhale ooreera murima, naachu oohiphaameya nave ninnakhala anrima. Ilukuluku ikina honakhala wookhweya wa hiyaano olakelela waakhanle wi nnahaala waakhaviherya akina naari wiisuupuwelela mukhatiihu. Tiheeni eni enikhaviherye waathokororyaxa akina? Voopacerya, hankooni nthokororye mwawiiseela mukhalelo Yehova ni akina anoonihenryaaya oreera murima. Yanawiili, nnahaala woona mukhalelo wa otakiherya oreera murima wa Muluku ni ntakhara heeni eryaaya yaphaama wa hiyaano weerano hiiha?

YEHOVA​—YOOTAKIHERYA YOOPHAAMEYA YA OREERA MURIMA

4. (1) Ntakhara heeni Yehova aahaarumiha ankeelo o Sotoma? (2) Tiheeni nnahuseryaahu orweela wa yaweereya ya echoko ya Loti?

4 Piipiliya ookhalano sootakiherya sincipale sa oreera murima wa Yehova. Ntoko yootakiherya, nkuupuwelani yeeyo owo aamweerenleiye Loti. Loti aari muchu awookololowa yoowo ‘ìniwa murima’ ni ocapaheya wa achu o Sotoma ni Komora. Achu yaale hiyaamucicimiha Muluku, nave Yehova aahilakelela waathorihela okhwa. (2 Pedro 2:7, 8) Yehova aahimurumiha munkeelo wa Loti wi amuleele wi Sotoma ni Komora aahaala otoloxiwa nave wi owo aaphwanela ochawa. Piipiliya onnaloca: “Loti ànalekela, nto okhala wi Apwiya [Yehova] yànatxhuna omòpola owo, alopwana ale [ankeelo], yàmphara ni mata owo, mwàriye ni anàwe ale àsithiyana ni yàhàkhumirya vate v’epòma.” (Maphatxuwelo 19:16) Hiiha ntoko Yehova iiwexenxeiye mukhalelo wa Loti, nnanwerya tho ororomela wi owo onniiwexexa makacamiho oothene nnakumanaahuno.​—Isaiya 63:7-9; Tiyako 5:11; 2 Pedro 2:9.

Yehova onniiwexexa makacamiho oothene nnakumanaahuno

5. Ti mwawiihai masu a Muluku ananihusihaaya mukhalelo wa wooniherya oreera murima?

5 Yehova tho ohaahusiha achu awe wi yooniheryeketho oreera murima. Nkuupuwelani malamulo aavanheiye ana a Isarayeli. Wakhala wi muchu oopoleya ikhorowa wa mukina, mulipa oopoleiha aaphwanela okuxa ekaapa ya namapoleya ntoko mweemeseryo yooniherya wi namapoleya aahaala okookiha ikhorowa. (Mwaalakhanye Mukwaha 22:26, 27.) Nyenya mulipa oopoleiha aanamukookiherya ekaapa namapoleya, nsuwa  naaneelaka wi iikhuneeleno ohiyu. Muchu yoowo ahaari ooreera murima haahaala ochuna omukookiherya namapoleya ekaapa awe, nyenya Yehova aahaahusiha achu awe wi ekhale ooreera murima. Tiheeni nlamulo nla nnanihusihaaya? Nihikhale oohithokororya soothowa sa Mukristu mukhwiihu. Vaavaa nnaweryaahu omukhaviherya munna naari murokora yoowo onahooxeya, nnaphwanela weerano hiiha.​—Kolosi 3:12; Tiyako 2:15, 16; mwaalakhanye 1 Yohani 3:17.

6. Tiheeni nnahuseryaahu orweela wa oreera murima wa Muluku ntakhara Aisarayeli oocheka?

6 Yehova aahikhala ooreera murima wa Aisarayeli naamwi awo yaamuchekela wiiliwiili. Ninnaalakhanya wi: “Apwiya, Muluku a makholo aya, itila sintxipale yaharuma anamitxhaka aya, wi yàlopole, ntakhara Apwiya [yaari ooreera muria wa] atxhu aya ni yànakhwela empa aya.” (2 Matharihelo 36:15) Mmukhalelo woolikana, nnaphwanela okhala ooreera murima ni yaale ahinamusuwela Yehova nyenya akhweya nlelo anacharuwa ni okhala asinthamwene awe. Yehova hanakhwela wi achu etoloxiwe ni othoriha onarwa. (2 Pedro 3:9) Mwawiihiiha woona wi elukuluku yookhalavo, nnaphwanela olaleerya muchaka awe woolopola wa muchu ti muchu ophiyerya nnaweryelaahuvo wi naakhaviherya ancipale wakhala wooweryeya wi epuhe oreera murima wa Muluku.

7, 8. Ntakhara heeni emusi emoha yaaroromela wi Yehova aahiwooniherya oreera murima?

7 Mmahiku ahu yaala, alapeli a Yehova ancipale annapuha oreera wawe murima. Ntoko yootakiherya, variyari va eyaakha ya 1990 o Posniya, maloko oohiyanahiyana yaanawana ni wiiphana yaawoyaawo. Echoko emoha yaakhala weiwo yaakhalano mmiravo mmoha a iyaakha 12 nsina nawe Milani. Owo, muhima awe, asitiithi awe, ni Anamoona akina yaapaka mukwaha ni ekaaro okhuma o Posniya eyaaka o Siperiya. Awo yaaya o muthukumano wa muceche, weiwo asitiithi a Milani yeeraaya yapatisiwe. Va munlaano wa ilapo, asuphai yaahoona wi emusi ele yaari ya nihimo nikina nave yaahaakuruxa mukaaroni. Voocharela yaahaahiya anna ale yaahanle mukaaroni wi epwahiherye mukwaha aya. Mmahiku meeli, asuphai hiyeemerenrye emusi ele opwaha. Vookuchula, musuphai mmoha aahimwiichana muhooleli awe nave aahimukoha tiheeni aaphwaneleiye weera ni emusi ele. Emusi yeemenle omoono woolopwana yaanamwiiwa muhooleli aakhulaka ariki: “Pahiru waakerihe okhwipi iwe nave wawiiphe!”

8 Vaavaa asuphai ale yaalocaaya, achu oohisuwanyeya eeli yaahaacamela emusi ele. Awo yaahaaleela elocaka vathivathi wi yaaritho Anamoona, wi anna ale yaari mukaaroni tiyaalenle yeeyo yeeren’ye. Anamoona eeli ale yaahimuleela Milani ni munnawe wi yawele mu ekaaro aya wi elapuwe munlaano nthowa nawi asuphai hiyaaweha ipaaxo sa anamwane. Voocharela anna ale yaahaaleela makholo ale wi ekookele oculi wa munlaano nave yakumane ni yaawo onipuro nikina. Milani aari ootikhiniheya ophiyerya wi owo haasuwela waakhanle wi aaphwanela otheya naari winla. Asitiithi awe yaahikoha, “apwanne munuupuwela wi anahaala onihiya wi nipwaheke?” Nyenya vaavaa awo yaapwahaaya, yaakhala ntoko wi asuphai ale hiyaawoona epwahaka. Milani ni munnawe yaahikumana ni asitiithi aya o nipuro nikina na munlaano ole, nave awo yaaya omuthukumano wa muceche. Awo yaahitepa ororomela wi Yehova aahaakhula mavekelo aya! Ninnasuwela orweela Mpiipiliyani wi tahi wi ilukuluku soothene Yehova onnaakhapelela amulapeli awe mmukhalelo yoowo. (Saweriwa T’arummwa 7:58-60) Nyenya mwa yeela, Milani aahiloca: “Wa miyaano enakhala wi ankeelo  yaaruuhenle evaasi asuphai wi Yehova anoopole.”—Salumu 97:10.

Moolikana ni Yesu, apwanne mookhalano nchuno nawiiseela na waakhaviherya achu ni waahusiha vooloca sa Yehova?

9. Yesu oonne hai vooloca sa achu yaawo yaamuchara? (Moone eruku yoopacerya.)

9 Yesu aari yootakiherya yaphaamaxa ya oreera murima. Owo aahithanana mmurimani ni achu nthowa nawi owo aahiwoona wi “yári ómwaryeya ni ómwalamwala ókhala ntoko ipuchepuche sohikhala ni mukukhula.” Vano tiheeni owo eenriye? Owo “àpatxerya wahusiha itxhu sintxipale.” (Mateyu 9:36, Nlakano Nahihano; mwaalakhanye Marko 6:34.) Moohiyana, Afarisi hiyaari ooreera murima nave hiyaachuna waakhaviherya achu. (Mateu 12:9-14; 23:4; Yohani 7:49) Moolikana ni Yesu, apwanne mookhalano nchuno nawiiseela na waakhaviherya achu ni waahusiha vooloca sa Yehova?

10, 11. Apwanne ti woophwanelela wiiliwiili wooniherya oreera murima? Mutharihe.

10 Ela henataphulela wi wiiliwiili ti woophwanela wooniherya oreera murima. Ntoko yootakiherya, Mwene Sawuli akhweya uupuwela wi oonihenrye oreera murima vaavaa ahaamwimpheiye Akaki, yoowo aari mwene a Amaleke ni mwiicani a achu a Muluku. Sawuli tho haawiiphale asinama oothene a Amaleke. Nyenya Yehova aahimuleela Sawuli wi awiiphe Amaleke oothene vamoha ni inama saya. Nthowa na ohiiwelela, Yehova aahimukhooca Sawuli okhala ntoko mwene. (1 Samuwele 15:3, 9, 15) Yehova muthoriha awookololowa. Owo onnawerya waalakhanya mirima sa achu nave onnasuwela elukuluku ehinaphwanelaaya wooniherya oreera murima. (Wikhupanyerya 2:17; Ezekiyeli 5:11) Moohilekela owo onahaala waathoriha yaale ahinachuna omwiiwelela. (2 Tesalónika 1:6-10) Eyo heni ekhale elukuluku yawi Yehova ooniherye oreera murima wa achu oonanara murima. Nyenya, moorweela wa waatoloxa yaawo, owo onahaala wooniherya oreera murima wa awookololowa, yaawo onahaaleiye waavulusa.

11 Mwawiihiiha, tahi muteko ahu waathoriha achu waakhanle wi awo anaphwanela okhalano okumi naari okhwa. Ohiya yeeyo, nnachuna weera soothene ophiyerya nnaweryelaahuvo wi naakhaviherye achu. Mikhalelo taani mikina soophara muteko seiho nneeraahu nooniherye oreera murima ntakhara akina? Sookhalavo sooleeliherya vakhaani.

NNI NIWERYE HAI WOONIHERYA OREERA MURIMA

12. Muni mooniherye hai oreera murima mmukhalelo munaakhalihaanyu akina?

12 Mukhale ookhaviherya mahiku oothene. Yehova onachuna wi Akristu yooniheryeke oreera murima wa amwaacamani ni wa anna aya. (Yohani 13:34, 35; 1 Pedro 3:8) Yootaphulela emoha ya oreera murima ti “ohooxeya vamoha.” Muchu yoowo onooniherya oreera murima onneererya waakhaviherya yaawo anahooxeya. Mwawiihiiha nnaphwanela waavya ikari sa waakhaviherya akina, akhweya orweela wa waapakela muteko naari othuma omusika echu enaathowa.​—Mateu 7:12.

Mooniherye oreera wanyu murima moorweela wa waakhaviherya akina mmikhalelo sawooneya (Moone eparakrafo 12)

13. Tiheeni achu a Muluku yeenraaya vaavaa epahu yaakhumelenlaaya?

 13 Mpake makupa mmuteko wookhaviherya. Vaavaa nnawoonaahu achu ehooxeyaka nthowa na ipahu, ninnachuna owooniherya yaawo oreera murima. Achu a Yehova aasuweliwa phaama moorweela wa waakhaviherya akina mu ilukuluku seiha. (1 Pedro 2:17) Ntoko yootakiherya, murokora mmoha o Xapau aakhala mmuceche yoowo waapahuliwe mu 2011 ni mwaacikinye navetho ni tsunami. Owo aahiloca wi aari “oolipiheya ni ookhapeleleya” vaavaa aawoonneiye anna awiiveleela erwaaka mmakupa oohiyanahiyana o Xapau ni ilapo ikina wi erehererye ipa saya ni Ipa sa Omwene. Owo aahaaceererya: “Yaweereya yeela yaahikikhaviherya osuwela wi Yehova onnathokororya. Nave Anamoona annakhapelelana mukina ni mukhwaawe. Anna ni arokora ancipale a elapo yoothene annanivekelela.”

14. Muni muwerye hai waakhaviherya awiiceliwa ni awuuluvala?

14 Mwaakhaviherye awiiceliwa ni awuuluvala. Vaavaa nnawoonaahu achu ehooxeyaka ni ireca ni wuuluvala, ninnawooniherya oreera murima. Ninnachuna woona omala wa makacamiho yaala, mwawiihiiha ninnavekela wi Omwene wa Muluku orwe. Mu elukuluku emohamoha, ninnapaka soothene ophiyerya nnaweryelaahuvo wi nimukhaviherye awiiceliwa ni awuuluvala. Namarepa mmoha aahirepa wi nihiku nimoha amannya awuuluvala, yaahooxeya ni ereca ya mmuupuwelo, yaahisusaariha ikuwo saya. Vaavaa eereryeiye wi avute, kampaanya a vamukhora aya aahiiruma. Anamoona eeli yaawo yaaxekurya ilukuluku sincipale yaari vaava. Arokora ale  yaahimveka waakhanle wi yaanwerya okhaviherya. Muthiyana ole aahiloca: “Erimukhala yawuuliha muru nyenya kinnachuna.” Arokora ale yaahimukhaviherya omurehererya. Voocharela awo yaahaapakela chaaya nave yaahikhala vaava wi evaaneleke. Namarepa owo aahitepa othamalela vancipale nave aahiloca wi Anamoona “aneerano yeeyo awo anahusihaaya.” Apwanne oreera wanyu murima ntakhara achu awiiceliwa ni awuuluvala onnooceenyeryaani opaka soothene munaweryaanyu wi mwaakhaviherye?​—Filipi 2:3, 4.

15. Mmukhalelo taani muteko ahu woolaleerya onaakhaviheryaaya akina?

15 Mwaakhaviherye achu omusuwela Yehova. Mukhalelo waphaama wa waakhaviherya achu ori waahusiha vooloca sa Muluku ni Omwene awe. Mukhalelo mukina ori waakhaviherya osuwela ntakhara heeni wiiwelela malamulo a Yehova ti yaphaama wa yaawo. (Isaiya 48:17, 18) Muteko woolaleerya mukhalelo mmoha wa omucicimiha Yehova ni wooniherya oreera murima wa akina. Apwanne nyuwaano mwanwerya opaka sincipale mmuteko woolaleerya?—1 Timóteo 2:3, 4.

OREERA MURIMA TI WOOKHWELEYATHO WA NYUWO!

16. Nnaphura hai vaavaa nnakhalaahu ooreera murima?

16 Siyentista onaalikhela okhala phaama wa muupuwelo ooloca wi wooniherya oreera murima onanwerya orehererya okumi ahu ni onthamwene ahu ni akina. Vaavaa nyuwaano munaakhaviheryaanyu yaale anahooxeya, munanwerya okhala oohakalala, okhalano ewehereryo yincipale, ohiisoona oomeekha, ni ohikhala awuukhuwa. Wooniherya oreera murima ti yookhweleya wa nyuwaano. (Éfeso 4:31, 32) Vaavaa osivela onanceenyeryaaya waakhaviherya akina, ninnakhalano yawuupuxerya-ya-murima yaphaama nthowa nawi ninnasuwela wi ninneerano yeeyo Yehova onachuneiye wi nipakeke. Oreera murima onahaala onikhaviherya okhala asitiithi aphaama, atheli, ni asinthamwene aphaama. Mwawaacererya, achu ooreera murima ilukuluku soothene annaakhela nikhaviheryo vaavaa awo anachunaaya.​—Mwaalakhanye Mateu 5:7; Luka 6:38.

17. Ntakhara heeni munnachuna okhala oreera murima?

17 Naamwi wooniherya oreera murima ori waphaama wa hiyaano, nthowa ntokotoko nnaneeriha wooniherya oreera murima ti nawi nnachuna omutakiherya Yehova ni omucicimiha. Owo ehime ya osivela ni oreera murima. (Masiposipo 14:31) Owo oovaha yootakiherya yaphaama wa hiyaano. Mwawiihiiha hankooni nipake soothene ophiyerya nnaweryelaahuvo wi nimutakiherye Muluku mu wooniherya oreera murima. Neerano hiiha nnahaala owaacamela anna ni arokora ahu nave nnamukhapelela onthamwene ahu ni achu yaawo anirukurenrye.​—Galasya 6:10; 1 Yohani 4:16.