Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli— Oomuhuserya

  |  Apirili 2017

“Were Yele Ororomelin’hawe”

“Were Yele Ororomelin’hawe”

“Okhapeleleke malipelelo [naari malakano] wenrawe vamithoni va Apwiya.”MATEU 5:33.

MACIPO: 18, 7

1. (1) Echu taani yoolikana yaarivo variyari va Yefite ni Ana? (Moone eruku yoopacerya.) (2) Makoho taani anahaala waakhuliwa mmwaha yoola?

YEFITE aari muhooleli oolipa murima ni mukhoco oowerya. Ana aari muthiyana awiiyeviha yoowo aamukhapelela iyawe ni echoko awe. Oopiili yaanamulapela Yehova. Nyenya yaakhalanotho echu yoolikana. Yaapaka nlakano wa Yehova, nave mmoha ti mmoha aakhwaaniherya nlakano moororomeleya. Awo yootakiherya yaphaama wa alopwana ni athiyana yaawo olelo anapaka nlakano wa Yehova. Hankooni nthokororye maakhulo a makoho mararu: Nlakano tiheeni? Ophiyerya mweeryo taani oryaaya mwaha mutokweene opaka nlakano wa Muluku? Tiheeni nnahuseryaahu orweela wa yootakiherya ya Yefite ni Ana?

2, 3. (1) Nlakano tiheeni? (2) Tiheeni Soorempwa inalocaaya sa opaka nlakano wa Muluku?

2 Mu Piipiliya, nlakano mwaha mutokweene muchu onapakeiye wa Muluku. Ntoko yootakiherya, muchu onanwerya omuroromeliha Yehova wi onahaala opaka muteko, ovaha echu, ovolowa mmuteko vyakala, naari ichu ikina. Nlakano nnapakiwa moorweela wa othanla, ephariheliwaka  othanla woochuna. Muchu hanakhinyereryiwa opaka nlakano. Nyenya vaavaa muchu onathanleiye weerano hiiha, Yehova onoona nlakano nawe ntoko yoororomeliha etokweene yeeyo enaphwanela ocicimihiwa ni okhwaaniheryiwa. Mu Piipiliya, nlakano, nnamukhala olipela muchu onapakeiye wi eereno echu naari hooye. (Maphatxuwelo 14:22, 23; Ahebri 6:16, 17) Tiheeni Piipiliya onaloceiye sa okhweleya waya okhwaaniherya malakano ahu wa Muluku?

3 Mu Nlamulo na Mose, ninnaalakhanya wi vaavaa muchu aapakeiye nlakano wa Yehova, owo aaphwanela ‘wèrano olontxeiye ni ororomelin’heiye.’ (Namarepela 30:3) Voocharela, Salomoni aarepa: “wamuroromeliha Muluku, were sothene omuroromelin’hawe. Muluku hanamutxhuna mulolo! Were yele ororomelin’hawe.” (Eklesiyaste 5:3) Yesu aahusiha wi opaka nlakano wa Muluku mwaha mutokweene vaavaa alonceiye: “Mùhiwatho itxhu salèliwe atxhu a khalai: ‘ohilipele orikimotha, nto okhapeleleke malipelo wenrawe vamithoni va Apwiya.’”Mateu 5:33.

4. (1) Ophiyerya mweeryo taani opaka nlakano wa Muluku oryaaya mwaha mutokweene? (2) Echu taani nnachunaahu ohuserya wa Yefite ni Ana?

4 Ti yawooneya wi opaka nlakano wa Yehova mwaha mutokweene. Mukhalelo nnoonaahu malakano ahu ennavolowela onthamwene ahu ni yoowo. Tavite ahooniherya vanlakani vaavaa aalonceiye: “Tani oni awele mwako wa Apwiya? Tani oni akhale mu nipuroni nawèla?” Voocharela owo aahaakhula moorweela wa oloca wi Yehova onahaala omweemererya “yole ohinalotxa yawotha.” (Salumu 24:3, 4) Nlakano taani Yefite ni Ana yaapankaaya? Apwanne waari wookhweya wa yaawo okhwaaniherya?

AWO YAAHIKHWAANIHERYA NLAKANO NAYA WA MULUKU

5. Nlakano taani Yefite aapankeiye? Tiivi yaari yookhumela?

5 Yefite aahipaka nlakano wa Yehova vaavaa aachuneiye owana ni Amoni. Nloko nlo naari mwiicani aachu a Muluku. (Amuthoriha 10:7-9) Yefite aamveka Yehova wi avoothe, owo aahipaka nlakano ariki: “Mwàvelèla ana a Amoni mmatani mwaka; yole òpatxerya okhuma mpa mwaka ni oni akiphwanye kikòkaka kàvonthe yawo, onamukhala a Apwiya.” Muluku aahaakhula nivekelo na Yefite nave aahimukhaviherya ovootha ekhoco. Vaavaa Yefite aakookenleiye owaani, mwanawe amwaamuthiyana yoowo aamusiveleiye taamuthikirenrye. Ti yoowo aahaala okhala “a Apwiya.” (Amuthoriha 11:30-34) Eyo yaataphulenle eheeni wa mwanawe?

Yefite ni mwanawe yaari achu oororomeleya yahaachuna onanariha nlakano naya wa Muluku

6. (1) Apwanne waari wookhweya Yefite ni mwanawe mwaamuthiyana okhwaaniherya nlakano naya wa Muluku? (2) Tiheeni nnahuseryaahu vooloca sa malakano anaphwanyeya mu Malamulo 23:21, 23 ni Salumu 15:4?

6 Wi akhwaaniherye nlakano na tiithi awe, mwaana mwaamuthiyana a Yefite aaphwanela oya omurumeela Yehova elukuluku  yoothene mu tapernaakulu. Apwanne Yefite aapanke nlakano ahuupuwelenle? Hooye. Mweeparipari, owo akhweya aanasuwela wi mwanawe taahaala opacerya omuthikirerya. Nyenya moohipwacha waakhanle wi aanasuwela naari hooye, okhwaaniherya nlakano wa Yehova hiwaari wookhweya wa Yefite naari wa mwanawe. Vaavaa Yefite aamonneiye mwanawe, owo aahiloca wi aahinanariha murima awe. Mwanawe aavinyavo veechokoni wi ‘inle ohitheliwa wawe.’ Ntakhara heeni? Yefite haarino mwaana mukina, nave vano mwanawe mmoharu haahaala otheliwa ni okhalano anamwane. Nsina na emusi ya Yefite naahaala ocakanela. Nyenya Yefite ni mwanawe yaahisuwela wi yaakhalavo echu yookhweleyaxa opwaha moonelo aya. Yefite aaloca: “Kòlipela wa Apwiya, nkinaweryatho okòkela otxuli.” Mwanawe tho aaloca: “Okèrele ntoko olipela wà.” (Amuthoriha 11:35-39) Yefite ni mwanawe yaari achu oororomeleya yahaachuna onanariha nlakano naya wa Muluku, naamwi waari woovila wa yaawo okhwaaniherya.Mwaalakhanye Malamulo 23:21, 23; Salumu 15:4.

7. (1) Nlakano taani Ana aapankeiye, nave ntakhara heeni? Naakhwanenle hai? (2) Nlakano na Ana naataphulela eheeni wa Samuwele? (Moone masu avathi.)

7 Ana aapakatho nlakano wa Yehova mu elukuluku yoovila ya okumi awe. Owo aahitakhaliwa nthowa nawi haayara, nave aanaphuciwa nthowa na yeeyo. (1 Samuwele 1:4-7, 10, 16) Owo aamuleela Yehova mukhalelo ooneiye, nave aapaka nlakano nla: “Apwiya a owerya wothene, mwatxhuna wona winiwa murima wa mulapeli anyu ni mwakùpuwela; mwàhimutxuwala kapuro anyu nave mwanvaha yowo mwana amwàmulopwana, miyano kinamovahani yowo elukuluku yothene ya ekumi awe, nave ntxemo hinrwa nivira mmuruni mwawe.” * (Moone masu avathi.) (1 Samuwele 1:11) Yehova aahiwiriyana nivekelo nawe, nave eyaakha yoocharela aamuyara mwaana amwaamulopwana, Samuwele. Ana aatepa ohakalala! Nyenya haacuwanle nlakano aapankeiye wa Muluku. Vaavaa aamuyanreiye mwana, owo aaloca: “Miyano kinvenke wa Apwiya.”1 Samuwele 1:20.

Ana aalakelela oyeleela ichu saari sookhweleya wa yoowo wi akhwaaniherye nlakano nawe wa Muluku

8. (1) Apwanne waari wookhweya wa Ana okhwaaniherya nlakano nawe? (2) Salumu 61 onawuupuseryaani hai yootakiherya yaphaama ya Ana?

8 Vaavaa Samuwele aareiyeno iyaakha chaaru, Ana aaheerano hiiha ntoko aamulaihenryeiye Yehova. Aamukusa Samuwele amukeriha wa Eli Mutokweene a Anamukucho o tapernaakulu o Silo nave aaloca: “Omone mwana ene kàvekaka Apwiya. Awo àhìwa oveka waka. Tiva, miyotho kinnàvaha Apwiya, wi àlapeleke yaworu mahiku othene a ekumi awe.” (1 Samuwele 1:24-28) Ovinyerya vaavaa, Samuwele aahikhala mu tapernaakulu. Piipiliya onaloca wi mmiravo “Samuwele ànninnuwa vamithoni  v’Apwiya.”(1 Samuwele 2:21) Okhwaaniherya nlakano hiwaari wookhweya wa Ana. Eyo yaataphulela wi owo haahaala owerya okhalaka vamoha ni mwanawe ookhweleya yoowo aamusiveleiye vancipale. Haahaala owerya omoona unnuwaka. Nyenya Ana aakhwaaniherya nlakano nawe wa Yehova. Aalakelela oyeleela ichu saari sookhweleya wa yoowo wi akhwaaniherye nlakano nawe wa Muluku.1 Samuwele 2:1, 2; mwaalakhanye Salumu 61:2, 6, 9.

Apwanne munnakhwaaniherya malakano anyu wa Yehova?

9. Tiheeni nnahaalaahu othokororya voocharela?

9 Vano nimanlaahu wiiwexexa ophiyerya mweeryo taani opaka nlakano wa Yehova oryaaya mwaha mutokweene, hankooni nthokororye makoho ala: Malakano taani nnapakaahu olelo? Nni nikhwaaniherye hai malakano yaawo?

NLAKANO NANYU NA WIIVELEELA

Nlakano na wiiveleela (Moone eparakrafo 10)

10. Nlakano taani nookhweleya Mukristu onapakeiye? Eyo enavolowela eheeni?

10 Nlakano nookhweleyaxa Mukristu onapakeiye ori vaavaa onaveleeleiye okumi awe wa Yehova. Mu nipuro nawiipitheya, onnaroromeliha mu nivekelo wi onampharihela okumi awe omurumeela Muluku elukuluku  yoothene, moohipwacha yeeyo eni yeereye. Yesu aaloca wi nnaphwanela “wikhotxa” mukhatiihu, eyo ti wi, ninnaroromeliha omukuha Yehova voopacerya, ohiya hiyaano. (Mateu 16:24) Ovinyerya nihiku nenlo ophiyerya ohoolo, “nri a Apwiya.” (Aroma 14:8) Ninnoona wi wiiveleela wahu mwaha mutokweene. Nnoona hiiha ntoko mulipa oomurepa salumu yoowo aalonce: “Kathamale hai Apwiya wa saphama sòthene akerenlaya? Kinamwakhwaniha w’Apwiya maroromeliho aka vamithoni va nloko naya nòthene.”Salumu 116:12, 14.

11. Tiheeni yeeren’ye nihiku mwaapatisiwaanyu?

11 Apwanne mooveleela okumi anyu wa Yehova nave mpatisiwa mmaahini? Waakhanle wi muheerano, munnaphwanela othamaleliwa! Munnuupuwela vaavale munna aalonce mwaha wa opatiso aakonheiye waakhanle wi mwaahiiveleela wa Yehova ni mwiiwexexa wi “wiiveleela ni opatiso anyu onathoonyerya wi mwa mmoha a Anamoona a Yehova”? Vaavaa mwaakhunlaanyu wi aai, achu oothene yaahisuwela wi mwaaveleela okumi anyu nave mwaahiphwanelela opatiso ntoko murummwa a Yehova. Yehova aatepa ohakalala!

12. (1) Makoho taani nnaphwanelaahu wiipakela? (2) Mikhalelo taani Petro onanceenyeryeiye wunnuwiha?

12 Nihiku mwaapatisiwaanyu, mwaamuroromeliha Yehova wi mwaahaala opharihela okumi anyu wi mmurumeele ni opaka soothene wi mucharihe malakiheryo awe. Nyenya opatiso mapacereryo. Vaavaa elukuluku enaviraaya, oothene ahu nnaphwanela otitelela wiisaalikhela. Nnaphwanela wiikoha: ‘Onthamwene aka ni Yehova wunnunwe hai ovinyerya vaavale kipatisiwaaka? Apwanne nlelo kinnamurumeela ni murima aka woothene? (Kolosi 3:23) Kinnavekela moohihiyererya? Kinnamwaalakhanya Piipiliya mahiku oothene? Kinnaphwanyeya mmithukumano moohihiyererya? Kinnaya mmuteko woolaleerya wiiliwiili? Naari kooyeleela mvai aka mmiteko seiya?’ Murummwa Petro oonilopola wi yookhalavo yawoopiha wakhala wi noovolola omulapela wahu Yehova. Nnamusepa yeeyo wakhala wi ninnalapa mwakuru wi nunnuwe mu nroromelo, nsuweliho, nthiti, ni omulapela Muluku.Mwaalakhanye 2 Pedro 1:5-8.

13. Tiheeni Mukristu awiiveleela ni oopatisiwa onaphwaneleiye wuupuwela?

13 Woona wi noopaka nlakano na omurumeela Yehova, honaweryeya okookela muculi. Muchu onaceecheya omurumeela Yehova naari ohinakhala mmukhalelo onaweheryiwa Mukristu, hanaphwanela oloca wi hiivelenle wa Muluku nave wi opatiso awe hiwaarino yootaphulela. * (Moone masu avathi.) Wakhala wi muchu ivelenle wa Yehova oopaka yoocheka etokweene, voocharela owo onnakhalano mulacu ni Yehova vamohatho ni muloko. (Aroma 14:12) Hiyaano hinnachuna okhala ntoko yaale Yesu aalonceiye ariki: “Wòhiya okhwela wà wopatxerya.” Moohiyana, nnachuna wi aloce wa hiyo: ‘Miyo kòsuwela metxelo à, okhwela, nroromelo, wivaha wà, ni nthìti, nave miteko sà sahihano va, iri sokhwanela opwaha wopatxeryani.’ (Wupulula 2:4, 19) Nnachuna omuhakalaliha Yehova moorweela wa okhala mwawiiwanana ni wiiveleela wahu.

 NLAKANO NANYU NA OTHELA

Nlakano na othela (Moone eparakrafo 14)

14. Tinivi nri nlakano nanawiili nookhweleya muchu onapakeiye? Ntakhara heeni?

14 Nlakano nanawiili nookhweleya muchu onapakeiye nri nlakano na othela. Othela ti waweela. Yehova onoona nlakano na othela okhala mwaha mutokweene. Vaavaa mulipa a waakamela ni a waakameliwa anapakaaya nlakano, awo annaroromelihana vamiithoni va Yehova ni wa oothene yaale ari vaava. Awo wiiliwiili annapaka nlakano na osivelana, okhapelelana ni ocicimihana ophiyerya elukuluku yeeyo oopiili anakhalaaya akumi mwawiiwanana ni marehereryo a Muluku a othela. Akina akhweya hanapharihela masu yaala, nyenya naamwi hiiha annapaka nlakano vamiithoni va Muluku. Vaavaa anapakaaya nlakano nenla, awo anakhala mulopwana oothela ni muthiyana ootheliwa. Othela onataphulela okhala vamoha elukuluku yoothene. (Maphatxhuwelo 2:24; 1 Korinto 7:39) Yesu aaloca: “Yeyo Mululu ophitànnyeiye, mutxhu ahimwalanye!” Yoole opanke othela hanaphwanela wuupuwela wi wakhala wi annakhalano makacamiho mu othela waya, anammwalana.Marko 10:9.

15. Ntakhara heeni Akristu hanoona othela hiiha ntoko elapo enoonelaaya?

15 Mweeparipari, woona wi haavovo muchu oophaameya, hiwaavotho othela woophaameya. Ti nthowa nene Piipiliya onanleeleiye wi muchu othenle ‘onamukhalano sokatxamiha’ veelukuluku aya. (1 Korinto 7:28) Mu elapo yeela ancipale aakhalano moonelo woonanara vooloca sa othela. Awo anuupuwela wi wakhala wi ichu hasineeca phaama, wiiliwiili anaphwanela omaliha othela waya. Nyenya tahi hiiha alopwana ni athiyana Eekristu anoonaaya othela. Awo annasuwela wi apanke othela waya vamiithoni va Muluku. Wakhala wi oonanariha nlakano nenlo, eyo yaahaala okhala ntoko wi arimootha vamiithoni va Muluku, nave owo onniica wootha. (Namarepela 19:12; Masiposipo 6:16-19) Atheli ari Akristu anaphwanela wuupuwela masu a murummwa Paulo: “Wòthela? Ohasye omwalana ni mwara-à.” (1 Korinto 7:27) Paulo anwerya oloca yeela woona wi aanasuwelatho wi Yehova onniica omwalana.Malakiya 2:13-16.

16. Tiheeni Piipiliya onaloceiye sa omwalana ni omwalamwala?

16 Yesu ohusinhe wi nthowa nimoharu Soorempwa sineemereryaaya ohiyana, ori wakhala wi oothelana mmoha oopaka mararuwo nave ole ochekeliwe ahichuna omukhurumuwela oothelana awe. (Mateu 19:9, Nlakano Nahihano; Ahebri 13:4) Hanka vooloca sa omwalana? Piipiliya tookwakwaleya mmwaha yoowo. (Mwaalakhanye 1 Korinto 7:10, 11.) Vooloca sa omwalana Soorempwa hasinavahererya nlamulo. Nyenya, mweelukuluku aya akhweya nnamukhumelela nikacamiho nnamweeriha Mukristu wuupuwela wi ori woochuneya omwalana ni oothelana awe. Ntoko yootakiherya, akina akhweya anamuupuwela wi okumi aya onahaala okhala va yawoopiha waakhala wi aatitelela okhala vamoha ni oothelana yoowo ori oohooxa naari mulipa oomwaryeya. * (Moone masu avathi.)

17. Mutheli ori Mukristu onaphwanela opaka eheeni wi othela waya olekele?

17 Wakhala wi mutheli ooya oloca ni atokweene a muloko wi aveke ekano ya orehererya othela waya, atokweene anaphwanela waakoha waakhanle wi ahoona  exilema Osivela Weeparipari ni aahuserya eproxura Echoko Anyu Enanwerya Okhala Yoohakalala. Soolaleeryiwa seiya sinnavuwiha malakiheryo yaawo eni ekhaviherye othela okhala woolipa. Mutheli mmoha ooloca: “Ovinyerya elukuluku nipacenryaahu ohuserya eproxura yeela othela wahu ti woohakalaliha opwaha khalai.” Murokora mmoha omalinhe iyaakha 22 atheliwe ohoona wi othela wawe waahala vakhaani omala. Voocharela owo aahoona exilema. Owo ooloca: “Oopiili ahu noopatisiwa, nyenya hiyaano nri oohiyana mmuupuweloni. Exilema ephin’ye mweelukuluku yoophwanelela! Vano ninnapaka sincipale saphaama ntoko mutheli.” Mwawooneya, wakhala wi mulopwana ni mwaariye annapharihela malakiheryo a Yehova mu othela waya, onthamwene aya onahaala okhala woohakalaliha ni woolipa.

NLAKANO NA MUTEKO WA VAMEEKHAAYA WA ELUKULUKU YOOTHENE

18, 19. (1) Tiheeni asitiithi ancipale ari Akristu anapakaaya? (2) Tiheeni enaphwanela olociwa wa yaale ari mmuteko wa vameekhaaya wa elukuluku yoothene?

18 Woopaceryani noothokororya malakano Yefite ni Ana yaapankaaya. Wa nthowa na malakano yaala, mwaana a Yefite ni mwaana a Ana yaapharihela ikumi saya wi emurumeele Yehova mmikhalelo savameekhaaya. Asitiithi ancipale Eekristu annaaceenyerya anamwanaaya ovolowa mmuteko wa elukuluku yoothene wi epharihele ikumi saya mmuteko wa Muluku. Nave oothene ahu nnaphwanela waaceenyerya amiravo otitelela mmuteko aya.Amuthoriha 11:40; Salmo 110:3NN.

Nlakano na muteko wa vameekhaaya wa elukuluku yoothene (Moone eparakrafo 19)

19 Olelo, aakhalavo arummwa 67.000 ari mu Nlamulo na Elapo Yoothene na Arummwa a Vameekhaaya a Muteko wa Elukuluku Yoothene wa Anamoona a Yehova. Akina anarumeela o Peteli naari mmuteko wa oteka naari mmuteko wa weeceeca. Akina analapa mwakuru ntoko ahusiha a muteko woolaleerya, mapiyoneero a vameekhaaya, mamisiyonaario, arummwa a Empa ya Muthukumano wa Ekulucu, naari arummwa a mapuro a ixikola sa Piipiliya. Muchu ti muchu oopaka “Nlakano na Wiiwelela ni Ohaawa.” Mu nlakano nenlo, awo aaroromeliha olapa mwakuru mu nikupa vyakala anakaweliwaaya mmuteko wa Yehova, okhalano okumi wookhweya, ni ohiphara muteko wa elapo, waahikhala wi aaheemereryiwa weerano. Tahi wi achu yaawo tari avameekhaaya, nyenya muteko aya tonooniwa ntoko wavameekhaaya. Mwawiiyeviha awo ari oolakelela otitelela waakhwaniherya nlakano naya na orumeela mmuteko wa vameekhaaya.

20. Nnaphwanela woonaka hai malakano ahu? Ntakhara heeni?

20 Mmwaha yoola, noothokororya malakano mararu naaphwanelaahu opaka wa Muluku. Akhweya moopaka makina a yaawo. Noosuwela wi ti woochuneya woonaka malakano ahu ntoko mwaha mutokweene nave nnaphwanelatho opaka soothene nnaweryaahu wi nikhwaaniherye. (Masiposipo 20:25) Wakhala wi hinnakhwaaniherya malakano ahu wa Yehova, nnamukhalano sookhumelela soowaawa. (Eklesiyaste 5:5) Mwawiihiiha, hankooni nikhale ntoko mulipa oomurepa salumu yoowo aalonce wa Yehova: “Hiha kini kinamutxitximiha nsina nanyu, nave mahiku othene kinamwerakano maroromeliho aka.”Salumu 61:9.

^ par. 7 Ana aamuroromeliha Yehova wi eereiye akhaleno mwaana, owo aahaala okhala Nasirewu okumi awe woothene. Eyo yaataphulela wi mwanawe aahaala oveleeliwa wi apake makupa mmuteko wa Yehova.—Namarepela 6:2, 5, 8.

^ par. 13 Woona wi sookhalavo ichu sincipale atokweene anathokororyaaya muchu ahaakumve ophwanelela opatiso, enahaala okhala yoovila muchu oloca wi opatiso hiwaarino yootaphulela.

^ par. 16 Moone mwaha “Moonelo wa Piipiliya Vooloca sa Ohiyana ni Omwalana” mu Masu Awaaceererya a liivuru ‘Mwikhapelele mu Osivela wa Muluku.’