Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli— Oomuhuserya

  |  Apirili 2017

“Muthoriha a Elapo” Yoothene Wiiliwiili Onapaka Yeeyo Eri Yawookololowa

“Muthoriha a Elapo” Yoothene Wiiliwiili Onapaka Yeeyo Eri Yawookololowa

“Mwala onanikhapelela; yeyo aneraya ti yawakhwanela, miteko saya ti sawokololowa.”MALAMULO 32:4.

MACIPO: 2, 11

1. Aparahamu oonihenrye hai wi aanaroromela wookololowa wa Yehova? (Moone eruku yoopacerya.)

“MUTHORIHA a elapo wakhweya onarwa athoriha ni ohokololowa?” (Maphatxuwelo 18:25) Mulopwana oororomeleya Aparahamu tahi wi aakhwa minikwa apakaka nikoho nenla. Ohiya yeeyo, nikoho nawe naahooniherya wi owo aanaroromela wi Yehova aahaala othoriha elapo ya Sotoma ni Komora mwawookololowa. Owo aanaroromela wi Yehova harwa ‘awipha alipa òtxheka vamoha n’atxhu òrèra murima!’ Ela yaari echu yoohiphwanelela wa Aparahamu. Piipiliya onnamuthariha Yehova wi: “Mwala onanikhapelela; yeyo aneraya ti yawakhwanela, miteko saya ti sawokololowa. Ti Muluku òroromeleya ni ohiwoka, elukuluku yothene awokololowa ni èparipari.”Malamulo 31:19; 32:4.

2. Ntakhara heeni honaweryeya Yehova okhala oohookololowa?

2 Ntakhara heeni Aparahamu aaroromeleiye wi Yehova elukuluku yoothene onapaka yeeyo eri yawookololowa? Woona wi Yehova yootakiherya etokweene ya ophwanelela ni  wookololowa. Chiryene, masu “ophwanelela” ni “wokololowa” wiiliwiili anaphariheliwa vamoha mu Soorempwa sa Ehepri ni Ekiriki nthowa nawi arino sootaphulela soolikana. Mwawiihiiha, woona wi malakiheryo a Yehova wiiliwiili tawookololowa, elukuluku yoothene onahaala othoriha miyaha moophaameya. Piipiliya oni: “Apwiya onnàsivela ophwanelela ni wokololowa.”Salumu 33:5.

3. Mvahe yootakiherya ya ohookololowa onooneya olelo mweelaponi.

3 Ti yoohakararya osuwela wi elukuluku yoothene Yehova tawookololowa. Nyenya elapo yoosareya ohookololowa. Ntoko yootakiherya, achu annavonyeriwa mukalaposo nthowa na ipahu seiyo awo ahipankaaya. Emanle waalikheliwa wanaawiili, akina annooniwa wi hapanke ipahu seiyo naamwi emalinhe iyaakha sincipale mukalaposo. Ohookololowa ntoko yoowo onnatannya ohaleeliheya ni esara. Nyenyatho wookhalavo mukhalelo mukina wa ohookololowa yoowo onakhala woovila ovilela. Tuuvi yoowo?

OHOOKOLOLOWA MPUWA MWA MULOKO

4. Nroromelo na Mukristu nni neehiwe hai?

4 Akristu annaweherya ohooseya ni ohookololowa mweelaponi. Nyenya, nroromelo nahu akhweya nnahaala weehiwa wakhala wi nohoona naari noohooseya ni echu enakhala wi tahi yawookololowa mpuwa mwa muloko. Wakhala wi eyo yoheereya, muni mweere eheeni? Apwanne munahaala weemererya wi eyo yookwaculeni?

5. Ntakhara heeni nihinaphwanelaahu otikhiniheya wakhala wi ninnoona naari ninnahooseya ni ohookololowa mmulokoni?

5 Oothene ahu naachu oohiphaameya nave ninnahesa, mwawiihiiha onahaala oweryeya muchu onikhaliha moonanara naari hiyaano nnanwerya omukhaliha moonanara muchu mukina mmulokoni. (1 Yohani 1:8) Naamwi eyo eheereyaka wiiliwiili, Akristu oororomeleya hanatikhiniheya naari okwaculiwa vaavaa ohookololowa onakhumelelaaya. Yehova onnanivaha ekano yoophara muteko yoorweela Mpiipiliyani, yeeyo enanikhaviherya okhala oororomeleya wakhala wi ninnahooseya ni ohookololowa orweela wa munna naari murokora.—Salumu 55:13-15.

6, 7. Ohookololowa taani munna mmoha aahoolenleiye mmulokoni, nave mikhalelo taani saamukhavihenrye?

6 Muthokororye yaweereya ya Willi Diehl. Ovinyerya eyaakha ya 1931, Munna Diehl aarumeela moororomeleya Opeteli ya Bern, o Suisa. Mu 1946, owo aahivolowa mu nikhuuru na neethanu nachaaru na exikola ya Kiliyati o Nova York, E.U.A. Emanle exikola, owo aahithanliwa orumeela mmuteko wa weeceeca o Suisa. Mu yaweereya ya okumi awe, Munna Diehl ooloca wi mu Maiyu a 1949, aahilokoha ofiliyale ya o Suisa wi aanachuna othela. Anna yaari ahooleli yaamuleela wi mirici aareiyeno saahaala omala. Pahiru aahaala weemereryiwa orumeela ntoko piyoneero. Munna Diehl ooloca: “Nkeemereryiwe oloca miyaha sa vanlakani. Ancipale hiyaanilocela, naanakhalihiwa ntoko achu iikariwe mmulokoni.”

7 Munna Diehl oonne hai? Owo ooloca: “Hiyaano naanasuwela wi othela tahi echu yoonanara mwawiiwanana ni soorepa, mwawiihiiha naanapaka mavekelo nave naanamuroromela Yehova.” Naamwi anna akina yahiiwexexa phaama moonelo wa Yehova vooloca sa othela, moovira wa elukuluku  yaahiiwexexa mwaphaama, nave Munna Diehl aahikookela mirici sawe. Yehova aahireeliha ororomeleya wawe. * (Moone masu avathi.) Hankooni niikohe: ‘Wakhala wi koohooseya ni ohookololowa ntoko yoola, apwanne kinahaala okhala oopixa murima ni onweherya Yehova wi ookolole mwaha? Naari kinahaala wiiroromela mukhataaka ni weererya omaliha ohookololowa?’Masiposipo 11:2; mwaalakhanye Mikeya 7:7.

Ti wookhweleya wuupuwela wi naachu oohiphaameya nave akhweya haniwerya wiiwexexa phaama mwaha

8. Ntakhara heeni akhweya yaahaala okhala yoonanara wuupuwela wi hiyaano naari achu akina aheereliwa echu yoohookololowa?

8 Wakhala wi munnoona wi wookhalavo ohookololowa vyakala mmulokoni, muupuwele wi nyuwaanotho munnahesa. Ntakhara heeni? Woona wi naachu oohiphaameya akhweya haniwerya wiiwexexa phaama mwaha. Akhweya tho hansuwenle soothene sinavolowela mwaha. Nyenya moohipwacha waakhanle wi wiiwexexa wahu tiwawookololowa naari hooye, nnaphwanela ovekela wa Yehova vooloca sa mwaha yoowo, nimuroromele, nave ntitelele okhala oororomeleya. Weerano hiiha, enahaala onikhapelela ‘ohimurukunuwela Muluku.’Mwaalakhanye Masiposipo 19:3.

9. Sootakiherya taani nnahaalaahu othokororya mmwaha yoola ni onacharela?

9 Hankooni nihuserye orweela wa sootakiherya chaaru sa ohookololowa yoowo achu a Yehova yaahoolenlaaya mu ilukuluku sakhalai. Mmwaha yoola, nnahaala omuthokororya Yosefe ni yaweereya awe ni asinnawe. Mmwaha onacharela, nnahaala othokororya mukhalelo Yehova aamukhalinheiye Mwene Akape ni yaweereya ya murummwa Pedro, o Antiokeya o Siriya. Vaavaa nnathokororyaahu sootakiherya seiya, muhuserevo mikhalelo muneeraanyu mutitelele omuroromela Yehova ni okhapelela onthamwene anyu ni yoowo, xaxaxa vaavaa munoonaanyu wi mukhalihiwe moonanara.

YOSEFE AAHOOSEYA NI OHOOKOLOLOWA

10, 11. (1) Ohookololowa taani Yosefe aahoolenleiye? (2) Ekari taani Yosefe aareiyeno vaava aareiye mukalaposo?

10 Yosefe aari kapuro oororomeleya a Yehova yoowo aahoosen’ye ni ohookololowa wa akhopela. Nyenya echu yaamuhonse vancipale waari ohookololowa eereliweiye ni asinnawe. Vaavaa areiyeno iyaakha 17 sa oyariwa, asinnawe yaahimwiiya nave emutumiha ntoko kapuro. Voocharela aakerihiwa o Yikuputu. (Maphatxuwelo 37:23-28; 42:21) Ari weiwo, aahootheryiwa wi aaheererya omuhiphela muthiyana nave aavonyeryiwa mukalaposo ahithorihiwe. (Maphatxuwelo 39:17-20) Yosefe aahooseya ntoko kapuro ni ntoko mulipa oophariwa mu iyaakha 13. Tiheeni nnahuseryaahu orweela wa yootakiherya ya Yosefe yeeyo eni enikhaviherye wakhala wi ninnahoolela ohookololowa orweela wa annihu?

 11 Vaavaa Yosefe aareiye mukalaposo, mutokweene aalawiha eviinyu ya mwene aawaleliwatho. Nihiku nimoha, mutokweene owo aakhalano yooloha, yeeyo Yosefe aamukhavihenreiye otaphulela. Yosefe aahimutharihela wi aahaala okumihiwa mukalaposo navetho aamukookela omurumeela Farawo. Voocharela, Yosefe aahikhalano ekari ya omutharihela mulopwana yoowo yaweereya awe. Nnanwerya ohuserya sincipale ohiya pahiru wa yeeyo Yosefe aalonceiye nyenyatho wa yeeyo ahaalonceiye.Maphatxuwelo 40:5-13.

12, 13. (1) Tiheeni enooniherya wi tahi wi pahiru Yosefe aarimoona weemererya ohookololowa? (2) Tiheeni Yosefe ahaamulenleiye mulipa oolawiha eviinyu ya mwene?

12 Mwaalakhanye Maphatxuwelo 40:14, 15. Moone wi Yosefe olonce wi “kirimwìyiwa.” Mweeparipari, owo aahooseya ni ohookololowa. Yosefe tho aaloca wi haapanke yoonanara, nto aarimootheriwa. Ti nthowa nene aamvenkeiye mulipa oolawiha eviinyu ya mwene wi aloce sa yoowo wa Farawo. Tiivi yaari yoolakelelaawe? Yosefe aaloca: “Wi akivinyihemo mukaripòso mu.”

13 Apwanne Yosefe aarimoona weemererya nikacamiho aheerenrye weeravo echu? Hooye! Yosefe aahisuwela wi aahooseya ni ohookololowa. Ti nthowa nene aamutharihenleiye mulipa oolawiha eviinyu, awehereryaka wi aahaala omukhaviherya. Nyenya Soorempwa hasinaloca wi Yosefe aahimuleela muchu, naari Farawo, wi asinnawe yaarimmwiiya. Mweeparipari, vaavaa asinnawe  yaaruulaaya o Yikuputu nave epaka murecele ni Yosefe, Farawo aahiwaakhela phaama nave aahaawopa wi ekhaleke o Yikuputu mu “elapo yawùtxelanasa.”Maphatxuwelo 45:16-20.

Waapa onanwerya otepiha mwaha (Moone eparakrafo 14)

14. Tiheeni enahaala onikhaviherya ohiloca echu yoonanara wakhala wi ninnahoolela ohookololowa mmulokoni?

14 Wakhala wi ninnoona wi noheereliwa echu yoohookololowa mmulokoni, nnaphwanela okhalano ephoole wi nihaape vooloca sa mwaha yoowo. Mmakupa makina, nnaphwanela oveka nikhaviheryo orweela wa atokweene ni waaleela waakhanle wi munna oopaka yoocheka etokweene. (Onamukutxho 5:1) Nyenya, mmikhalelo mincipale ehinavolowelaaya yoocheka etokweene, onamukhala wooweryeya opaka murecele ni munna ohichunen’ye omuleela muchu mukina, ophitaanyerya atokweene. (Mwaalakhanye Mateu 5:23, 24; 18:15.) Hankooni nikhale oororomeleya nave nipharihele malakiheryo a Piipiliya mmikhalelo seiya. Ikwaha ikina, nnahaala osuwela wi hiniiwexenxe phaama mwaha nave wi hineereliwe echu yoohookololowa. Hiiha, nnahaala ohakalala osuwela wi hintepinhe mwaha moorweela wa oloca ichu soonanara vooloca sa annihu! Muupuwele wi moohipwacha waakhanle wi nookhalano mathowa aphaama naari hooye, oloca echu yoonanara heni erehererye mwaha. Okhala oororomeleya wa Yehova ni wa annihu enahaala onikhapelela ohipaka soohesa. Mulipa oomurepa salumu aaloca wi ookhala “mutxhu onetxa ahirino yootxeka.” Muchu ntoko yoowo ‘hanòtherya ni nlumi nawe, hanamwerela yonanara mukhweiye.’Salumu 15:2, 3; Tiyako 3:5.

MUUPUWELE ONTHAMWENE ANYU WOOKHWELEYAXA

15. Ti mwawiihai onthamwene wa Yosefe ni Yehova waaryaaya mareeliho?

15 Nnanweryatho ohuserya echu yookhweleya orweela wa Yosefe. Variyari va iyaakha 13 aahoosen’yeiye ni ohookololowa, Yosefe aahooniherya wi aakhalano moonelo wa Yehova vooloca sa ichu. (Maphatxuwelo 45:5-8) Owo hatonko omukhupanya Yehova nthowa na nikacamiho nawe. Nyenya, Yosefe hatonko ocuwala ohookololowa eereliweiye, nave hatonko wiikhupanyeraxa. Echu yookhweleyaxa, owo heemerenrye wi ohiphaameya ni meerelo oonanara a akina simurakamelihe wa Yehova. Ororomeleya wa Yosefe waahimvaha ekari ya omoona Yehova arehereryaka ohookololowa ni amureelihaka vamoha ni emusi awe.

Yosefe heemerenrye wi ohiphaameya ni meerelo oonanara a akina simurakamelihe wa Yehova

16. Ntakhara heeni ninnaphwanela omwaacamela Yehova naamwi nihoolelaka ohookololowa mmulokoni?

16 Moolikana, nnaphwanela ocicimiherya ni okhapelela onthamwene ahu ni Yehova. Hannaphwanela weemererya wi ohiphaameya wa annihu onirakamelihe wa Muluku ahu nnamusivelaahu ni omulapela. (Aroma 8:38, 39) Opwaha yeeyo, wakhala wi ninnahoolela ohookololowa mmulokoni, hankooni nimutakiherye Yosefe ni omwaacamela  Yehova. Mweererye okhalano moonelo wa Yehova vooloca sa ichu. Nimanle opaka soothene wi nimalihe nikacamiho moorweela wa ochariha malakiheryo a Piipiliya, nnaphwanela ohiya mwaha mmatani mwa Yehova. Nnaphwanela ororomela wi owo onahaala orehererya mwaha mweelukuluku ni mmukhalelo awe.

MMUROROMELE “MUTHORIHA A ELAPO” YOOTHENE

17. Nni nooniherye hai wi ninnamuroromela “Muthoriha a elapo” yoothene?

17 Ophiyerya elukuluku nneeraahu nikhale veelaponi yeela yoonanara, nnahaala ohoolela ohookololowa wawaaca. Mu ikwaha ikina, nyuwaano naari muchu mmusuwenlaanyu onamuhoolela naari onamoona yeeyo enakhala wi ohookololowa mmulokoni. Hamunaphwanela otuthuwa naari okwaculiwa. (Salumu 119:165) Opwaha yeeyo, mutitelele okhala oororomeleya wa Muluku, mvekele wa yoowo mvekaka nikhaviheryo, nave mmuroromele. Muupuwele wi nthowa na oohiphaameya, akhweya munamphiyerya ohiiwexexa mwaha, ni ohisuwela phaama soothene sinavolowela. Mmutakiherye Yosefe nave musepe malocelo oonanara, yaawo anahaala otepiha mwaha. Vookuchula, opwaha wiiroromela, mutitelele okhala oororomeleya ni onweherya Yehova moopisa murima wi arehererye mwaha. Voocharela munahaala weemereryiwa ni Yehova nave munamwaakhela mareeliho awe, hiiha ntoko Yosefe. Munaphwanela ororomela wi Yehova yoowo ori “Muthoriha a elapo” yoothene wiiliwiili onapaka yeeyo eri yawookololowa, woona wi ‘miteko sawe ti sawokololowa.’Maphatxuwelo 18:25; Malamulo 32:4.

18. Tiheeni nnahaalaahu othokororya mmwaha onacharela?

18 Mmwaha onacharela nnahaala othokororya sootakiherya piili sa ohookololowa variyari va achu a Yehova mu ilukuluku sakhalai. Sootakiherya seiyo sinahaala onikhaviherya woona mukhalelo wa wiiyeviha ni okhurumuwela sinahaalaaya onikhaviherya otakiherya moonelo wa Yehova vooloca sa wookololowa.

^ par. 7 Moone yaweereya ya okumi ya Willi Diehl, Jeová é meu Deus, em quem vou confiar,’ mu Mulipeleli 1 a Novempuru a 1991 (a ekunya).