Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli  |  No. 1 2017

Mwaakhele Mareeliho a Ovaha

Mwaakhele Mareeliho a Ovaha

“EKAARO enneemereryiwa opwaha, nyenya ela ya o Xina enamuhala!” Ala masu Alexantra iiwaleiye elukuluku aakiraantheiye mukaaro, aweheryaka olapuwa munlaano wa ohico wa Amerika oya elapo ekina. Owo aakhuruwa wi oone echu yeereya nyenya aamphwanya mmiravo a o Xina avaanyihanaka ni mulopwana a elapo ya o Espanya eereryaka omuleela mulipeleli a munlaano nikacamiho nawe. Woona Alexantra aaniiwexexa elocelo ya Exina, owo aahiivaha wi ataphuleleke.

Mulopwana owo aalonce wi aari a elapo yeele nave wi aahiiyeriwa itukumento sawe vamoha ni ikhorowa. Woopaceryani mulipeleli ole a munlaano heemerenrye masu awe nave aapacerya omukhwa minikwa Alexantra wi aari mulipa a waachawiha achu. Wookuchulani, owo aaheemererya masu a mulopwana ole, nyenya mulopwana ole aahaala oliva nthowa na ohikhalano itukumento sawaakhwanela. Woona wi haarino ikhorowa, Alexantra aampoleya ikhorowa 20 sa tolara. Mulopwana haarino masu a othamalela nave aaroromeliha wi ahaala omukookiherya ohiya pahiru ikhorowa 20 sa tolara. Alexantra aamuleela wi haachuna ovahiwa phatamari, owo aanasiveliwa okhaviherya nthowa nawi aanasuwela wi yaari echu yaphaama weera. Owo aamvaha mulopwana ole soolaleeryiwa sahu nave aahimucenyerya omuhuserya Piipiliya ni Anamoona a Yehova.

Ti yoohakalaliha wiiwa meerelo a epewe wa muchu oohisuweliwa, nave moohikhwa minikwa meerelo ntoko yaala anneeriwa ni achu a ikerexa vyakala. Apwanne nyuwaano mohintoko wiiveleela okhaviherya muhiweheryaka okookiheryiwa echu? Nikoho nla ti noochuneya nthowa nawi Yesu aaloca wi “yole onavaha ori òrèriwa [naari ohakalala] ompwaha yole onakhela.” (Saweriwa T’arummwa 20:35) Ela tho eneemereryiwa ni alipa oohuserya, awo analoca wi ovaha ti yaphaama wa weyaano. Hankooni noone mmukhalelo taani.

‘NAMAVELELA OHAKALALA’

Saweereya sinnooniherya wi ovaha ni ohakalala ineeca vamoha. Murummwa Paulo aarepa “onavaha n’ohakalala t’onamusiveliha Muluku.” Owo achuna waaloca Akristu yaawo yaapanke sooveleela wi yaakhaviherye Akristu akhwaaya. (2 Korinto 8:4; 9:7, Nlakano Nahihano) Paulo haalonce wi awo yaanavaha nthowa nawi yaari oohakalala. Nyenya moohiyana—awo yaari oohakalala nthowa nawi yaanavaha.

Mweeparipari, mwawiiwanana ni yoohuserya emoha, ovaha “onnarehererya makupa a ocoopare ananikhaviherya okhala oohakalala, otheya, etannyaka murecele.” Yoohuserya ekina yohooniherya wi “omvaha muchu mukina ekhorowa onnaruuha ohakalala opwaha opharihela muchu mukhateiye.”

Mohintoko wuupuwela wi nthowa na okhala oothoiwa hamunawerya ovaha echu eri yoothene? Eparipari ti yawi muchu ori oothene onanwerya ovaha echu ni okhala ‘namavelela ohakalala.’ Wakhala wi munavaha ni murima woothene, yeeyo munavahaanyu himoonaka okhala echu etokweene. Namoona a Yehova mmoha oonirepela michaka  sinacharela vamoha ni yooveleela awe: “Iyaakha soothene iha miyaano nkaawenrye oveleela echu, nyenya pahiru mu Empa ya Omwene.” Voocharela owo onnaloca: “Yehova Muluku onnakivaha sincipale opwaha yeeyo kinaweryaaka ovaha. . . . koothamalela okeemererya oveleela yoovaha yeela—ela ennakilipiha.”

Enavahiwa tahi ikhorowa pahiru. Sookhalavo ichu ikina sinaphwanela ovahiwa.

OVAHA TI WAPHAAMA MU OKUMI ANYU

Ovaha ti waphaama wa nyuwaano ni akina

Piipiliya onnaloca: “Mutxhu òrèra murima onirèriha mwanène, nave n’owali onitakhaliha mwanene.” (Masiposipo 11:17) Achu ooreera murima ta mahala, awo anniiveleela ovaha—elukuluku aya, ikuru saya, othokororya waya ni sikina. Meerelo ala a ekumi annaakhaviherya mukhataaya ophura mmikhalelo soohiyanahiyana, ti nthowa nene ovaha oryaaya waphaama wa nyuwaano.

Soohuserya sinnaloca wi yaale aniivaha wi yaakhviherye akina naamwi erino masooso, ennakhaviherya okukuca masooso aya. Wiiliwiili awo annaakuvela openuwa. Ovaha tho onnaakhaviherya yaale arino ereca yoohipenuxeya ntoko ereca eniichaniwa esclerose múltipla naari HIV. Yoohuserya ekina ennaloca wi alipa oohapaliwa anachuna ohiya ohapaliwa, onakhala wookhweya weerano hiiha wakhala wi anniiveleela waakhaviherya akina nave annasepa ohooxeya mmuupuweloni.

Mwawiihai? Ennalociwa wi “meerelo a eepewe, mahala ni osivela annamaliha muupuwelo woonanara.” Ovaha tho onanwerya ovukula ereca ya mmuupuweloni vamoha ni makacamiho a weeceeca wa nikhami. Nave muchu yoole omuyeleenle othelana awe mu okhwa onanwerya ovootha othanana wawe moorweela wa waakhaviherya akina.

Chiryene hisaavo minikwa. Ovaha onnakhaviherya ekumi ya muchu.

OVAHA ONNAVALIHANIWA

Yesu ahaalela oomuchara awe: “Nvaheke nave munarwa nvahiwa. Mphimo waphama, wosareya, wokhitxeliwa, wotathiwa, onamuyeheryiwa mmatani mwanyu, wona wi mphimo yowo muneranyu mumphimeleno mukhwinyu, munarwatho mphimeliwano.” (Luka 6:38) Wakhala wi nyuwaano munnaweerela akina sa mahala awo tho onahaala otakiheryaka ophiyerya okhala achu oovaha. Ovaha tho onnalipiha onthamwene.

Ovaha onnalipiha wiiwanana ni onthamwene

Alipa ootholathola yaawo anahuserya makhalelo a achu ahoona wi “achu yaawo anooniherya mahala ni epewe annaaceenyerya akina ochara meerelo aya aphaama.” Mweeparipari, “pahiru waalakhanya vooloca sa meerelo matokweene a epewe ennaaceenyerya ancipale okhala a mahala.” Navetho, mwawiiwanana ni yoohuserya emoha, “muchu mmoha onapaka saphaama onanwerya waaceenyerya achu ancipale, yaawo ahimusuwenle naari ahintonko omoona.” Mmasu makina, yaweera ekhaani ya ovaha enanwerya omvolowela muchu ti muchu ophiyerya muceche woothene. Nyuwaano hamunachuna okhalano murecele ntoko yoola? Aai, onahaala okhala mphurelo mutokweene wakhala wi achu ancipale ta mahala.

 Yaweereya emoha enarweela o elapo ya Florita, E.U.A. enooniherya wi ela eparipari. Nikhuuru na Anamoona a Yehova naahiiveleela mmuteko wa okhaviherya nthowa na mwaacikinye aapahunle ichu. Elukuluku yaaweheryaaya okuxa ikaruma sa otekano empa, yaahoona wi ekintaale ya mwaacamani yaathoowa okhopolomoha, nave yaahiivaha oreherya. Ohoolo waya mwaacamani ole aarepa ekaarata wa nipuro na Anamoona a Yehova ni masu ala: “Kinnathamalela moohihiyererya, koosuwela wi haavo achu arino mahala olikana ni nyuwaano nkintonko owoona achu ntoko nyuwaano.” Othamalela wawe waamweeriha opaka yooveleela wi ephariheliwe va muteko yoowo owo oniichaneiye muteko mutokweene wa Onamoona.

MUCHARE YOOTAKIHERYA ETOKWEENE YA OVAHA

Otholathola wa alipa oohuserya wohooniherya wi “yookhalavo echu enamuceenyerya muchu waakhaviherya akina.” Yoohuserya emoha ennooniherya wi anamwane “annooniherya opwacha naamwi nlelo ehaakumve ohuserya oloca.” Ntakhara heeni? Piipiliya onnavaha naakhulo vaavaa onaloceiye wi achu apakiwe “òphwana ni” Muluku, ela ti wi, awo aakhalano makhalelo oochuneya yaawo Muluku oreiyeno.Maphatxuwelo 1:27.

Mahala annapaka makupa mu mikhalelo sootikhiniha seiho Mpatuxa ahu Yehova oreiyeno. Owo oonivaha ekumi ni ichu soothene nnachunaahu wi nikhale oohakalala. (Saweriwa T’arummwa 14:17; 17:26-28) Nnanwerya opaka onthamwene ni Tiithi ahu a wirimu ni osuwela yoochuna awe wa hiyaano moorweela wa ohuserya Masu awe, Piipiliya. Piipiliya tho onnanikhaviherya osuwela wi Muluku oopaka marehereryo wi nikhale oohakalala omwaahiyu. * (1 Yohani 4:9, 10) Woona wi Yehova ti ehime ya mahala nave wi hiyaano nipakiwe moolikana ni yoowo, ti nthowa nene nryaanhuno nchuno na omutakiherya Muluku, nave eyo enamunikhaviherya waakhela mahala awe.Ahebri 13:16.

Nyuwaano munnamuupuwela Alexantra olociwe woopaceryani wa mwaha yoola? Tiivi yaari yookhumelela ya yaweereya awe? Naamwi achu akina yaawo yaari vamoha ni yoowo mukaaro yaaloca wi ekhorowa awe yooyeeheya mahaleene, mulopwana owo aamukhavihenryeiye aaloca ni asinthamwene awe a epooma yaayaayawo ekaaro ele, nave owo aakookiha ikhorowa seihe aapolen’yeiye. Nave tho mulopwana aachariha masu a Alexantra a okhalano yoohuserya ya Piipiliya. Murokora ola aahakalala vancipale okumana ni yoowo sivinre miyeeri miraru va muthukumano wa muceche wa Anamoona a Yehova elapo ya o Peru. Mulopwana ole aanwopa Alexantra ni oothene yaale yaari ni yoowo wi yalye mu empa awe onakuliheiyemo yoolya.

Ovaha ni waakhaviherya akina onnaruuha ohakalala otokweene. Ohiya yeeyoru, nyuwaano tho munanwerya waakhaviherya achu opaka onthamwene ni Yehova Muluku, yoowo ori ehime ya mahala oothene aphaama! (Tiyako 1:17) Apwanne nyuwaano munnapuha mareeliho anarweela mu ovaha?

^ par. 21 Wi mukhaleno sooleeliherya ikina, mmoone liivuru Tiheeni Piipiliya Onanihusiheiye? Olaleeryiwe ni Anamoona a Yehova nave onnaphwanyeya mu www.jw.org/ngl. Moone vathi va SOOLALEERYIWA > ALIIVURU & IPROXURA..