Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli  |  No. 1 2017

Yesu onnaaxekurya aponkosi a Petro nave onnaapenuxa.—Mateu 8:14, 15; Marko 1:29-31

Okhala Muciye, Apwanne Nlamulo wa Akristu?

Okhala Muciye, Apwanne Nlamulo wa Akristu?

IKEREXA sincipale mu elapo yoothene—ntoko ekerexa ya a Katolika, Ortotoxi, Putismu, ni ikina—sinnalamulela wi ahooleli aya hanaphwanela othela. Mmakupa makina, achu ancipale anoona wi meerelo ala annatannya ocapaheya onooneya mmahiku yaala wa yaale aneeriwa ahooleli a ikerexa.

Nthowa na yeela, ancipale annakoha, okhala Muciye, apwanne nlamulo wa Akristu? Wi naakhule, nnaphwanela othokororya mapacereryo a meerelo ene yaala, waaceereryeya waya, vamoha ni moonelo wa Muluku vooloca sa mwaha yoola.

SAWEEREYA SA IKEREXA VOOLOCA SA OHITHELA

Liivuru mmoha oniichaniwa Encyclopædia Britannica oni: “Ohithela ori otitelela okhala muciye ni, ohikumanela ni muchu a mwiikho woohiyana, naari ocapaheya, wiiliwiili ala meerelo a ahooleli a ikerexa.” Mu eyaakha ya 2006, Papa Benedict XVI alocaka sa mwaha wa ohithela, owo aahi “nla nlamulo nookhinyereryiwa nave yookhovelela epacenrye mu elukuluku ya arummwa.”

Nyenya, yookhovelela ela, hiyaari meerelo a Akristu a nsana noopacerya. Mweeparipari, murummwa Paulo, yoowo aakhanlevo mu nsana noopacerya, aahaalopola Akristu akhwaawe vooloca sa achu yaahaala olocaka “Sawotha ni mahusiho a Satana” wi yaawoke “atxhu wi ehitheleke.”1 Timóteo 4:1-3.

Meerelo ala apacenrye mu nsana nanaawiili, ophiyerya omwaramwasiwa ni achu yiisera okhala “Akristu” a ikerexa. Mwawiiwanana ni liivuru oniichaniwa Celibacy and Religious Traditions, onnaloca wi “ola waari moonelo muvyaani vooloca sa omucicimiha muchu a mwiikho woohiyana yoowo waapacenrye o Roma.”

Mu nsana noocharela, makhuuru a anamiruku a ikerexa yaawo aniichaniwa Asitiithi a Ikerexa,  yaanahiiha wi ahooleli hiyaaphwanela othela. Awo yaanahusiha wi okumanela ni muchu a mwiikho woohiyana yaari echu yooriipiheya wa ahooleli. Ntoko yookhumelela, liivuru Encyclopædia Britannica onnaloca wi “ohoolo waya mu nsana naneekhumi, maphaatiri vamoha ni mapispu yaakhalano athiyana.”

Mithukumano sa 1123 ni 1139 seeriweno o Roma, waaceenyeriwa mwaha yoola wa ohithela nave yaalakeleliwa okhala nlamulo wa anamukucho a Ekerexa Katolika ophiyerya olelo. Ni yoolakelela yeela, Ekerexa yachuna wi ehiyeleele owerya ni muhakhu woona wi yaale yaarino ikerexa eniiha ethenle yaahaala oveleela ikerexa iho wa anamwane aya.

MOONELO WA MULUKU VOOLOCA SA OHIIHA OTHELA

Moonelo wa Muluku onnooniheryiwa vanlakani vene Mmasu awe, Piipiliya. Mummo ninnaalakhanya masu a Yesu alocaka sa yaale yaari aciye, “wa nthowa na omwene wa wirimu.” (Mateu 19:12) Apharihelaka muupuwelo mmohamoha, murummwa Paulo aaloca sa Akristu yaawo yaathanlile okhala aciye “wa nthowa na mutxhaka.”1 Korinto 7:37, 38; 9:23.

Nyenya, haavo mwa yaala oopiili Yesu naari Paulo olamulenle wi Akristu hanaphwanela othela. Yesu aalonce wi okhala muciye “yamahala” ohiya wa oohuserya awe oothene. Vaavaa Paulo aarempeiye “wa yale ahitonko othela nari otheliwa” owo aloca mookwakwaleya ariki: “Nkano nlamulo na Apwiya. Nto kinavaha miruku saka.”Mateu 19:11; 1 Korinto 7:25, masu a vathi.

Piipiliya onnooniherya wi Akristu ancipale a nsana noopacerya, ophitaanyerya murummwa Petro, yaari alopwana ootheleene. (Mateu 8:14; Marko 1:29-31; 1 Korinto 9:5) Mweeparipari, nthowa na ocapaheya waakhanlevo mu elukuluku yeele mu epooma ya Roma, Paulo aarepa wi wakhala wi mutokweene a muloko Weekristu oothela, owo onaphwanela okhala “mulopwana a muthiana mmoha” ni “ókhalano anamwane awe óléleya ni óchichimiheya.”1 Timóteo 3:2, 4, Nlakano Nahihano.

Othela ola tahi waari wa wiiyana weephiini, ntakhara Piipiliya onnaloca wi “Mulopwana anvahe mwariye yeyo eri yomphwanelela” nave tho Piipiliya onnaloca wa mulopwana ni muthiyana athelanne ariki: “Muhikhotxaneke.” (1 Korinto 7:3-5) Moohikhwa minikwa, wiikhinyeererya okhala muciye tahi nlamulo na Muluku, naari tahi nlamulo wa Akristu eeparipari.

NTHOWA NA MICHAKA YAPHAAMA

Waakhanle wi ohithela tahi nlamulo wa Akristu, ntakhara heeni Yesu ni Paulo aloncaaya wi ociye echu yaphaama? Ntakhara ociye onnamweeriha muchu okhalano elukuluku yincipale ya olaleerya michaka yaphaama. Muciye onanwerya olapa vancipale woona wi haano sawuukhula sinaakhumelela yaale athenle.1 Korinto 7:32-35.

Moone yaweereya ya Tavite, yoowo aahin’ye muteko awe waamvaha ikhorowa sincipale o epooma ya Mexiko nave aathaamela elapo ya Kosta Rika wi aakhaviherye achu omuhuserya Piipiliya. Hamunoona wi ociye waamukhaviherya weerano yeeyo? Aai chiryene, owo onnaloca: “Waari woovila wiikhoveleliha ni sookhovelela mukhalelo wa okhala ni yoolya, nyenya woona wi kaari mukhataaka waari wookhweya.”

Claudia, murokora muciye yoowo aathamenle weiwo waariwo othowa otokweene wa alaleeryi, aaloca: Kinnahakalala mu omurumeela waka Muluku. Nroromelo naka vamoha ni onthamwene aka ni yoowo onanvira olipaka vaavaa kinoonaka mukhalelo onakikhapeleleiye.”

“Moohipwacha waakhanle wi mwa muciye naari moothela, munahaala okhala oohakalala wakhala wi munnamurumeela Yehova ni murima woothene.”—Claudia

Ociye honaphwanela okhala echu ya wiikhinyererya. Claudia onnaloca: “Moohipwacha waakhanle wi mwa muciye naari moothela, munahaala okhala oohakalala wakhala wi munnamurumeela Yehova ni murima woothene.”Salumu 119:1, 2.