Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli— Oomuhuserya

  |  yaneru 2017

Mucicimiherye Yamahalaanyu ya Othanla Woochuna

Mucicimiherye Yamahalaanyu ya Othanla Woochuna

“Weiwo oneraya okhalewo Munepa wa Apwiya, wokhalawo onethi [naari othanla woochuna].”—2 KORINTO 3:17.

MACIPO: 62, 65

1, 2. (a) Moonelo taani woohiyana achu aryaayano vooloca sa othanla woochuna? (b) Tiheeni Piipiliya onanihusiheiye vooloca sa othanla wahu woochuna, nave makoho taani nnahaalaahu othokororya?

VAAVAA aapakeiye yoothanla awe, muthiyana mmoha aaloca wa nthamwene awe ariki: “Ohikeeriheke wuupuwela; pahiru okileele yaweera. Eyo ti yookhweya.” Muthiyana owo aachuna oleeliwa echu yaweera ohiya opharihela othanla wawe woochuna, yamahala ya esisapo enarweela wa Mpatusa awe. Hanka nyuwaano? Munnasiveliwa opaka soolakelela sanyu, naari wi munachuna wi akina yoopakeleeni? Munoona hai othanla woochuna?

2 Achu aakhalano moonelo woohiyana vooloca sa othanla woochuna. Akina analoca wi othanla woochuna hokhanle, woona wi Muluku oolakelela saweera sahu soothene. Akina analoca wi othanla woochuna ti wooweryeya pahiru wakhala wi nookhalano otaphuwa wawaakhwanela. Nyenya Piipiliya onnanihusiha wi nipakiwe ni mavyakelo a opaka soothanla sa miruku. (Mwaalakhanye Yosuwa 24:15.) Mpiipiliyani ninnaphwanyamo tho maakhulo a makoho ala anacharela: Apwanne  othanla wahu woochuna wookhalano mphimo? Nni nipharihele hai otaphuwa wahu wi nipake soolakelela? Soolakelela sahu sinooniherya hai wi ninnamusivela Yehova? Nni nooniherye hai wi ninnacicimiha soolakelela sa akina?

TIHEENI NNAHUSERYAAHU ORWEELA WA YEHOVA NI YESU?

3. Yehova onapharihela hai otaphuwa wawe wawaakhwanela?

3 Yehova torino otaphuwa wawaakhwanela, nave nnanwerya ohuserya mukhalelo owo onaphariheleiye otaphuwa wawe. Ntoko yootakiherya, Yehova aathanla nloko na Isarayeli wi ekhale achu awe, “nloko norelihiwa.” (Malamulo 7:6-8) Owo aakhalano yoolakelela ya opaka yoothanla eyo. Yehova aachuna okhwaaniherya nlakano aapankeiye ni nthamwene awe Aparahamu. (Maphatxuwelo 22:15-18) Mwawaacererya, Yehova wiiliwiili toosivela ni oophimelela vaavaa onaphariheleiye otaphuwa wawe. Ninnoona eyo moorweela wa mukhalelo aalakeiye Aisarayeli vaavaa yahaamwiiwelelaaya. Vaavaa awo yaacharuwaaya, Yehova aanaasivela nave aanaamorela ikharari. Owo aaloca: “Miyano kinampenusa nloko naka; kinamukhwela nenlo ni murima wothene.” (Oseya 14:5) Yehova ootikitherya yootakiherya yaphaama wa hiyo mu opharihela otaphuwa wawe wi aakhaviherye akina!

Ahaakumve orwa veelaponi yavathi, Yesu aathanla okhala oororomeleya wa Muluku ni okhooca okhala ni Satana mu omwaryeya wawe

4, 5. (a) Taani aari oopacerya waakhela yamala ya Muluku ya othanla woochuna, nave aapharihenle hai? (b) Nikoho taani muchu ti muchu a hiyo onaphwaneleiye wiipakela?

4 Yehova ohaapatuxa ankeelo, achu ni othanla woochuna. Yoopatuxiwa yoopacerya ya Yehova aari Yesu. Owo aapatuxiwe mu eruku ya Muluku nave aakhalano othanla woochuna. (Kolosi 1:15) Yesu aapharihenle hai otaphuwa wawe? Ahaakumve orwa veelaponi yavathi, Yesu aathanla okhala oororomeleya wa Muluku nave aakhooca okhala ni Satana mu omwaryeya wawe. Vaavaa Yesu aarwiileiye veelaponi yavathi, owo aakhooca saweeha sa Satana. (Mateu 4:10) Voocharela, mu ohiyu ahaakumve okhwa, Yesu aahooniherya wa Tiithi awe wi aanachuna opaka yookhwela Awe. Owo aaloca: “Tithi, wakhwelaka, susihá wa miyo ekahi ela. Nto ohereye okhwela waka, wereye okhwela wà.” (Luka 22:42) Apwanne ti wooweryeya chiryene wa hiyo omutakiherya Yesu ni opharihela othanla wahu woochuna wi nimucicimihe Yehova ni opaka yookhwela awe?

5 Aai, nnanwerya omutakiherya Yesu woona wi hiyaanotho nipakiwe moophwana ni Muluku. (Maphatxuwelo 1:26) Nyenya, hinaano otaphuwa wawaakhwanela yoowo Yehova oreiyeno. Masu a Muluku annathariha wi Yehova oohela mphimo otaphuwa wahu nave owo onaweherya wi neemererye mphimo yoowo. Ntoko yootakiherya, mpuwa mwa emusi, athiyana anaphwanela owiiwelelaka asiiyaya nave anamwane anaphwanela owiiwelelaka asitiithi aya. (Éfeso 5:22; 6:1) Mphimo yoola onavolowela hai mukhalelo nnapharihelaahu othanla wahu woochuna?  Naakhulo na nikoho nla nnanwerya olakelela omwaahiyu ahu woohimala.

OPHARIHELA OTHANLA WOOCHUNA MWAPHAAMA NI MOONANARA

6. Mvahe yootakiherya enooniherya ntakhara heeni ti wookhweleya otaphuwa wahu okhalano mphimo.

6 Apwanne onnaweryeya otaphuwa orino mphimo okhala weeparipari? Aai, onnaweryeya! Ntakhara heeni? Woona wi mphimo onnanikhapelela. Ntoko yootakiherya, akhweya nnamuthanla weeciha ekaaro n’yaaka mu epooma yoorakamela. Nyenya nkaanyiheryani wi weiwo haawowo malamulo a mphironi, nave muchu ti muchu onalakelela ochimakihasa ni weeciha makupa vyakala onachuneiye. Apwanne mwaahaala osiveliwa opaka mukwaha mu ephiro yeeyo? Hooye! Mphimo ti wookhweleya wi oothene epuhe mphurelo wa otaphuwa weeparipari. Hankooni nthokororye sootakiherya sa Mpiipiliyani sinooniherya mukhalelo mphimo otikitheryiwe ni Yehova onanikhaviheryaaya.

7. (a) Ohiyana taani waarivovo variyari va Atamu ni asinama? (b) Mutharihe mukhalelo mmoha Atamu aapharihenleiye othanla wawe woochuna.

7 Vaavaa Yehova ampatunseiye mulopwana oopacerya, Atamu, owo amvaha yamahala emohamoha yeeyo aavanheiye ankeelo, yamahala ya othanla woochuna. Nto Muluku haavanhe asinama othanla woochuna. Atamu aapharihenle hai othanla wawe woochuna mwaphaama? Atamu aanasiveliwa waavaha masina asinama. Muluku ‘àyano wa mutxhu, wi one masina ereiye avahe.’ Amanle omoona mwaasinama ori oothene, owo aanamvaha nsina noophwanelela. Yehova hatoronke yoothanla ya Atamu. Moohiyana, “enama ti enama yàmukhalano nsina yeraya evahiwe ti mutxhu.”—Maphatxuwelo 2:19.

8. Atamu aapharihenle hai moonanara othanla wawe woochuna, nave ni yookhumelela taani?

8 Yehova amvaha Atamu murici wa weeriha elapo yavathi okhala parataiso moorweela wa omuleela: “Muyareke, murelaneke, musareye mw’elapo ya vathi. Mulamuleke elapo eyo nave mukhale asinène a ihopa sa mphareya, ipalame sa wirimu ni inama sothene inetxa v’elaponi ya vathi.” (Maphatxuwelo 1:28) Nyenya Atamu aahithanla olya yawiima yaawateelihiwe, nave moorweela wa weerano hiiha owo aakhooca mphimo yoowo Yehova aatikithenryeiye. Woona wi Atamu aahipharihela moonanara othanla wawe woochuna, achu annahooxeya moovira wa iyaakha sincipale. (Aroma 5:12) Hankooni nuupuwelele sookhumelela soowaawa sa yoolakelela ya Atamu. Eyo enahaala onceenyerya opharihela otaphuwa wahu mwaphaama ni weemererya mphimo Yehova onivanheiye.

Aisarayeli yaathanla okhala achu a Muluku ni weemererya mphimo Muluku aatikithenryeiye

9. Yoothanla taani Yehova aavanheiye Aisarayeli, nave nlakano taani yaapankaaya?

9 Achu oothene aarava ohiphaameya ni okhwa orweela wa Atamu ni Eva. Nyenya, nlelo nookhalano ophwanelela wa opharihela yamahala ya othanla woochuna. Nnanwerya woona yeela moorweela wa mukhalelo Yehova aakhalinheiye nloko na Isarayeli. Yehova aahaavaha yoothanla ya okhala nloko nawe nooreelihiwa naari hooye. (Mukwaha 19:3-6) Aisarayeli yaathanla okhala achu a Muluku ni weemererya mphimo Muluku  aatikithenryeiye. Awo yaaloca: “Hiyano nnamwiwelela sothene Apwiya alontxaya!” (Mukwaha 19:8) Moothananiha, ohoolo waya yaananariha nlakano naya ni Yehova. Nnanwerya ohuseryavo echu yookhweleya orweela wa yaweereya yeela. Hankooni mahiku oothene ncicimiherye yamahalahu ya othanla woochuna ni otitelela omwaacamela Yehova ni wiiwelela malamulo awe.—1 Korinto 10:11.

10. Sootakiherya sa mu Ahebri ecima 11 sinooniherya hai wi achu oohiphaameya ananwerya opharihela othanla waya woochuna wi emucicimihe Muluku? (Moone eruku yoopacerya.)

10 Mu Ahebri ecima 11, ninnaphwanyamo masina a alopwana ni athiyana oororomeleya yaawo yaathanlile ocicimiha mphimo otikitheryiwe ni Yehova. Ntoko yookhumelela, awo yaahaakhela mareeliho mancipale ni ewehereryo yoohakalaliha ya omwaahiyu. Ntoko yootakiherya, Nowa aakhalano nroromelo ntokweene nave aahithanla wiiwelela malakiheryo a Muluku a omuteka mwaaceya wi aavuluse amusi awe ni maloko a omwaahiyu. (Ahebri 11:7) Aparahamu ni Sara yaamwiiwelela Muluku nave yaaya elapo Owo aalaihenryeiye waavaha. Naamwi yaarino “elukuluku yokòkelawo” o epoma ya Ur, awo yaateteiwe ni soororomeliha sa Muluku sa omwaahiyu. Piipiliya onnaloca wi awo “anawehererya elapo yorèrasa.” (Ahebri 11:8, 13, 15, 16) Mose aakhooca ncicimiho na o Yikuputu nave aahithanla “ohosiwa vamoha ni nloko na Muluku, ohiya opuha wovira wa sotxheka.” (Ahebri 11:24-26) Hankooni naatakiherye alopwana ni athiyana yaale oororomeleya ni othamalela yamahala ahu ya othanla woochuna, nipharihelaka wi nipake yookhwela ya Muluku.

11. (a) Taavi ari mareeliho mamoha matokweene a othanla woochuna? (b) Tiheeni enoocenyeryaani opharihela othanla wanyu woochuna mwaphaama?

11 Onakhala wi ti wookhweya okhalano muchu onanipakela soolakelela, nyenya hanrwa nlawihe mareeliho matokweene anakhumelela mu othanla woochuna. Taavi yaawo? Piipiliya onnathariha mu Malamulo 30:19, 20. (Mwaalakhanye.) Mu eciciri 19, ninnaalakhanya wi Muluku aahaavaha Aisarayeli yoothanla. Mu eciciri 20, ninnahuserya wi Yehova aahaavaha ekari ya wooniherya omusivela waya yoowo. Hiyaanotho nnanwerya othanla omulapela Yehova. Navetho nookhalano ekari yavameekhaaya wi nipharihele yamahala ahu ya othanla woochuna wi nimucicimihe Yehova ni wooniherya omusivela wahu!

MUHIPHARIHELE MOONANARA YAMAHALA ANYU YA OTHANLA WOOCHUNA

12. Tiheeni nihinaphwanelaahu opaka ni yamahala ahu ya othanla woochuna?

12 Mwaanyiherye wi momvaha nthamwene anyu yamahala ya esisapo. Mwaahaala woona hai waakhanle wi oorihela yamahalaanyu vanipuro noonanara naari opharihenle wi amuhooseno muchu mukina? Mwaahaala othanana. Yehova oonivaha yamahala ya othanla woochuna. Mwawiihiiha owo onnathanana vaavaa onawooneiye achu epharihelaka moonanara otaphuwa waya ni opaka soolakelela soonanara naari waahoosa akina. Piipiliya onnaloca wi ‘mmahiku òmaliherya,’ achu yaahaala okhala “òhithamalela.” (2 Timóteo 3:1, 2) Vanonto, nni nooniherye hai wi ninnathamalela yamahala ya esisapo enarweela wa Yehova? Nave nni nsepe hai opharihela moonanara?

13. Mukhalelo taani mmoha nneeraahu nsepe opharihela moonanara otaphuwa wahu Weekristu?

13 Oothene ahu nnakhala ootaphuwa waathanla asinthamwene, soowara, ophwaneliwa  wahu ni mathatelo ahu. Nyenya nnanwerya opharihela otaphuwa wahu wi nipake yoolakelela yeeyo ehinamusivela Muluku naari ochara meecelo a achu a mweelaponi. (Mwaalakhanye 1 Pedro 2:16.) Ohiya opharihela otaphuwa wahu ntoko ekari ya opaka echu yoonanara, nnaphwanela opharihela ntoko ekari ya ‘weera sothene nimutxitximihaka Muluku.’—1 Korinto 10:31; Galasya 5:13.

14. Ntakhara heeni ti woochuneya omuroromela Yehova vaavaa nnapharihelaahu othanla wahu woochuna?

14 Yehova onnaloca: “Miyano, Apwiya, ka Muluku à. Ti miyano kinosuweliha yele enawerya wolapela; ti miyano kinawetxiha mphironi wophwanela otxhara.” (Isaiya 48:17) Ti woochuneya omuroromela Yehova ni weemererya mphimo otikithenryeiye wi niwerye opaka soolakelela saphaama. Mwawiiyeviha ninneemererya wi “havo onasuwela omala wa ekumi awe. Havo onathanla ephiro yaphama.” (Yeremiya 10:23) Atamu vamoha ni Aisarayeli oohiroromeleya yaathanlile okhooca mphimo Yehova aatikithenryeiye, nave yiiroromela mukhataaya. Hankooni nihuseryevo echu orweela wa yootakiherya aya yoonanara. Ohiya wiiroromela mukhatiihu, hankooni ‘naroromele Apwiya ni murima [ahu] wothene.’—Masiposipo 3:5.

MUCICIMIHE OTHANLA WOOCHUNA WA AKINA

15. Tiheeni nnahuseryaahu orweela wa nlakiheryo nnaphwanyeya mu Galasya 6:5?

15 Nnaphwanelatho ocicimiha otaphuwa akina aryaayano wa opaka soolakelela saya mookumini. Ntakhara heeni? Woona wi oothene nookhalano yamahala ya othanla woochuna, tahi wi Akristu eeli wiiliwiili anakhalano soolakelela imohamoha. Iho  sinaphitaanyerya soolakelela vooloca sa meecelo ahu ni malapelo. Muupuwele nlakiheryo nnaphwanyeya mu Galasya 6:5. (Mwaalakhanye.) Vaavaa nnasuwelaahu wi Mukristu ori oothene torino murici wa soolakelela sawe, nnahaala ocicimiha otaphuwa akina aryaayano wi epharihele othanla waya woochuna.

Nnanwerya opaka soolakelela sahu nihaakhinyerenrye akina opaka soolakelela imohamoha (Moone eparakrafo 15)

16, 17. (a) Othanla woochuna waakhanle hai mwaha wookhweleya o Korinto? (b) Paulo aakhavihenrye hai Akristu yaale, nave tiheeni nnahuseryaahu?

16 Hankooni nthokororye yootakiherya ya Piipiliya enooniherya wi ti woochuneya ocicimiha othanla woochuna wa annihu. Akristu a muloko wa o Korinto yaanaakhulana vooloca sa okhuura emece yeeyo yaavahiwa soophwaniherya, voocharela enatumihiwa o musika. Oleela-wa-murima wa Akristu akina waanaweemererya okhuura emece eyo woona wi awo yuupuwela wi yoophwaniherya tahi echu yeeparipari. Nyenya, akina yaawo khalai yaalapela soophwaniherya seiyo yoona wi okhuura emece eyo, waahaala okhala wi anamulapela. (1 Korinto 8:4, 7) Nla naari nikacamiho ntokweene naahaala okawanya muloko. Vano Paulo aakhavihenrye hai Akristu orehererya mwaha yoola woochuneya?

17 Voopacerya, Paulo aawuupuserya wi yoolya hiyi ewaacamelihe wa Muluku. (1 Korinto 8:8) Voocharela, aahaalopola wi hiyaaphwanela weemererya wi “merelo” aya yaachekihe yaale yaari ooceecheya. (1 Korinto 8:9) Ohoolo waya, aahaaleela yaale yaarino oleela-wa-murima wooceecheya wi hiyaaphwanela waathoriha yaale yaathanla okhuura emece eyo. (1 Korinto 10:25, 29, 30) Mwawiihiiha, mmiyaha vyakala siiwanana ni malapelo, Mukristu ori oothene aaphwanela opaka yoothanla awe. Mano hiyaahaala tho okhala yaphaama wa hiyo ocicimiha otaphuwa wa annihu wi epake soolakelela saya naamwi mmiyaha mikhaani?—1 Korinto 10:32, 33.

18. Muni mooniherye hai wi munnacicimiherya yamahala anyu ya othanla woochuna?

18 Yehova oonivaha yamahala ya othanla woochuna, yeeyo enanruuhela otaphuwa weeparipari. (2 Korinto 3:17) Ninnacicimiherya yamahala ela woona wi ennaneeriha opaka soolakelela sinooniherya wi ninnamusivela vancipale Yehova. Mwawiihiiha, hankooni ntitelele opaka soolakelela seiyo sinamucicimiha, nave hankooni ncicimihe ophwanelela wa akina wi ethanle mukhalelo aneeraaya epharihele yamahala yeela yasisapo.