Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli— Oomuhuserya

  |  yaneru 2017

Munanwerya Okhala Awiiyeviha Naamwi Mweehiwaka

Munanwerya Okhala Awiiyeviha Naamwi Mweehiwaka

“Wiyeviha vamithoni va Muluku.”—MIKEYA 6:8.

MACIPO: 48, 95

1-3. Tiheeni aheenreiye mulipa miririmu aarwenle o Yuteya, nave teevi yaari yookhumelela? (Moone eruku yoopacerya.)

MWENE YEROPOWAMU o Isarayeli aatikitherya nipuro noohelavo mukucho wa malapelo atheru mu epooma ya Petel. Yehova aamurumiha mulipa miririmu orweela o Yuteya wi amuleele Yeropowamu michaka sa othoriha. Mulipa miririmu ola awiiyeviha aamwiiwelela Yehova nave aaperekha michaka. Mwene aanyeenyeya ni mulipa miririmu, nyenya Yehova aamukhapelela.—1 Mamwene 13:1-10.

2 Yehova aamulamulela mulipa miririmu wi haaphwanela olya naari owurya o Isarayeli nave akookele owannyawe aviraka ephiro ekina. Akookelaka owannyawe, mulipa miririmu aakumana ni mulopwana awuuluvala yoowo aanwonke, alocaka wi aakhalano muchaka waarweela wa Yehova. Mulopwana awuuluvala owo aanwopa wi aye owannyawe wi alye ni awurye. Mulipa miririmu haamwiiwelenle Yehova nave aamuchara mulopwana awuuluvala owo. Yehova haasiveliwe. Mphironi, mulipa miririmu aahiiphiwa ni mwaco.—1 Mamwene 13:11-24.

 3 Hannasuwela mathowa yaamweerinhe mulipa miririmu onwiriyana mulopwana ole awuuluvala ohiya onwiriyana Yehova. Nyenya echu nnasuwelaahu ti yawi owo haatitelenle “wiyeviha vamithoni” va Yehova. (Mwaalakhanye Mikeya 6:8.) Mpiipiliyani, wiiyeviha vamiithoni va Yehova onavolowela omuroromela Yehova, ororomela ohoolela wawe, ni omwiiwelela. Muchu awiiyeviha onnasuwela wi onnachuna ovekela moohihiyererya. Waakhanle wi mulipa miririmu aari awiiyeviha, owo aahaala omukoha Yehova waakhanle wi sooleeliherya sawe saatorokeya. Ikwaha ikina hiyaanotho nnamuchuna opaka soolakelela soovila, nave onamukhala woovila osuwela yeeyo Yehova onachuneiye wi nipake. Nyenya wakhala wi nri awiiyeviha, nnahaala omveka Yehova wi anihoolele wi nsepe opaka soohesa itokotoko.

4. Tiheeni nnahaalaahu ohuserya mmwaha yoola?

4 Mmwaha ovirale, noohuserya yootaphulela ya wiiyeviha nave ntakhara heeni ti woochuneya wa hiyo olelo. Nyenya nni nikhale hai awiiyevihaxa? Nave mikhalelo taani sini seehe wiiyeviha wahu, eyo ti wi, sini sooniherye waakhanle wi chiryene nri awiiyeviha naari hooye? Hankooni nthokororye mikhalelo seiya miraru.—Masiposipo 11:2.

MIKHALELO SAHU SATOROKEYA

5, 6. Persilayi oonihenrye hai wi aari awiiyeviha?

5 Mukhalelo nnakhalaahu vaavaa mikhalelo naari mirici sahu sinatorokeyaaya, onnooniherya waakhanle wi chiryene nri awiiyeviha. Nnanwerya ohuserya echu orweela wa yootakiherya ya Persilayi, nthamwene oororomeleya a Mwene Tavite. Vaavaa Persilayi aareiyeno iyaakha 80, Tavite aanwopa wi akhaleke mu empa yoocicimiheya ya mwene. Naamwi yaari ekari etokweene, Persilayi aaloca wi yaahaala okhala phaama omvaha murici owo mulopwana iichaniwa Kimam, akhweya aari mwanawe.—2 Samuwele 19:31-38.

6 Ntakhara heeni Persilayi aakhooca nwopelo? Apwanne aasepa okhalano mirici naari opuha ekumi yookhweya? Hooye, nthowa nawi Perisilayi aari awiiyeviha. Owo aasuwela wi mikhalelo sawe saatorokeya, nave aheemererya okotakota wawe. (Mwaalakhanye Galasya 6:4, 5.) Moolikana ni Persilayi, ti woochuneya okhala awiiyeviha. Ohiya okhala ooteteiwa mwa yeeyo nnachunaahu naari wiilikanyiha ni akina, nnateteiwa mu omvaha Yehova owetha wahu. Ela echu yoochuneyaxa opwaha okhalano murici wavameekhaaya naari osuweliwa phaama. (Galasya 5:26) Wakhala wi nri awiiyeviha, nnahaala olapa vamoha ni annihu wi nimucicimihe Yehova ni waakhaviherya akina.—1 Korinto 10:31.

7, 8. Wiiyeviha oni onikhaviherye hai ohiiroromela?

7 Onakhala woovila otitelela wiiyeviha wakhala wi noovahiwa murici naari olamulelo. Nnanwerya ohuserya orweela wa yootakiherya ya Nehemiya. Vaavaa Nehemiya iiwaleiye wi achu o Yerusalemu yaanakumanano makacamiho mancipale, owo amveka Yehova wi aakhaviherye. (Nehemiya 1:4, 11) Yehova aahaakhula nivekelo na Nehemiya. Mwene Artaserse aampaka Nehemiya mulamuleli a epooma. Naamwi Nehemiya aari oowerya ni ooreela, owo hantonko wiiroromela. Owo aanaavya ohoolela wa Yehova nave aanaalakhanya malamulo awe moohihiyererya. (Nehemiya 8:1, 8, 9) Nehemiya aakhalano owerya wa waalamulela achu oothene. Nto hantonko opharihela olamulelo awe wi iphwanyerye naari waakhaliha akina moonanara.—Nehemiya 5:14-19.

 8 Hiiha ntoko Nehemiya, wakhala wi nohaakhela murici naari murici ahu wootorokeya, nnaphwanela otitelela okhala awiiyeviha. Hinnachuna ororomela mavyakelo ahu. Mano, muchu onapacerya hai wiiroromela? Ntoko yootakiherya, akhweya mutokweene onakhapelela miyaha sa muloko ahipacenre ovekela. Munna naari murokora akhweya onapacerya opaka yoolakelela voocharela avekela wa Yehova wi areelihe yoolakelela yeeyo. Nyenya, muchu awiiyeviha haniiroromela, naamwi apakaka echu opankeiye ikwaha sincipale. Owo onnasuwela wi mavyakelo awe hanlikana ni a Yehova. (Mwaalakhanye Masiposipo 3:5, 6.) Mu elapo yeela, achu ancipale tanrima nave anneererya waavirela akina. Nyenya akapuro a Yehova haneera hiiha. Nihuupuwele wi okhalano mirici sinnaneeriha okhala aphaamaxa waapwaha akina a veemusini vahu naari mmulokoni. Moohiyana, ninnuupuwela murici ahu mmarehereryo a Muluku nave ninnalapa ni anna vamoha ni arokora ahu

VAAVAA AKINA ANANNYEMULAAYA NAARI ONTHAMALELA

9, 10. Wiiyeviha oni onikhaviherye hai vaavaa akina anannyemulaaya?

9 Nnamusooseya wakhala wi muchu onnannyemula. Ela yaaheereya ni Ana. Naamwi iyawe aamusivela vancipale, Ana haahakalala. Penina, mwiicani a Ana, aanamunyemula mahiku oothene. Ana aanachuna okhalano anamwane nto haayara. Nihiku nimoha vaavaa aareiyeno moonelo woohica,  owo aaya o tapernaakulu wi avekele. Mutokweene a Anamukucho Eli aanamoona inlaka nave aamootherya wi aarimuhapaliwa! Akhweya Ana aahaala otepa oonyeenyeya. Moohiyana, owo aamwaakhula Eli mwancicimiho. Ohoolo waya, Ana aapaka nivekelo nenno noonihenrye omuroromela ni omusivela wawe Yehova.—1 Samuwele 1:5-7, 12-16; 2:1-10.

10 Wiiyeviha onannikhaviherya otitelela ‘ovotha yonanara ni yaphama.’ (Aroma 12:21) Elapo yeela enalamuleliwa ni Satana yoosareya ni ichu sootakhala. Mwawiihiiha hannaphwanela okhala ootikhiniheya vaavaa nnakhalihiwaahu moonanara. Naamwi eneerihaka okhala oonanariwa, nnaphwanela owaniha ni moonelo yoowo. (Salumu 37:1) Enamukhala yoothananihaxa wakhala wi nookhalano makacamiho ni anna ni arokora ahu a mmulokoni. Wakhala wi eyo yoheereya, onamuchuneya omutakiherya Yesu. Piipiliya onnaloca: “Aruwaniwaka, hakhula ni oruwana.” Moohiyana, “anivelèla wa yole onathoriha ni wokolola.” (1 Pedro 2:23) Yesu aari awiiyeviha nave aasuwela wi Yehova aahaala omaliha ohookololowa vyakala. (Aroma 12:19) Hiyaanotho ninnachuna okhala awiiyeviha ni ‘ohiliva yonanara ni yonanara.’—1 Pedro 3:8, 9.

11, 12. (a) Nni ntitelele hai wiiyeviha wakhala wi akina annanicicimiha naari onthamalela moopwaha mphimo? (b) Nni nooniherye hai wi nri awiiyeviha mmeerelo ahu ni mmawarelo?

11 Enamukhalatho yaweeha ya wiiyeviha  wahu wakhala wi achu annanicicimiha naari onthamalela moopwaha mphimo. Estere aahaakhela ncicimiho nincipale ni nthamalelo noopwaha mphimo. Owo aari mmoha a asimwali ooreera o Persiya. Mu eyaakha emoha aacikicheliwa makhurwa avameekhaaya ooreeriha mwiili, vamoha ni asimwali yaawo yaawanela okhala mwaara a mwene. Voocharela mwene aamuthanla Estere wi akhale mwaariye. Nto mwa soothene seiya owo haatoroken’ye. Estere haakhanle a nrima. Owo aatitelela okhala awiiyeviha, aphaama ni oocicimiha.—Estere 2:9, 12, 15, 17, Tradução do Novo Mundo.

Apwanne mukhalelo nnawaraahu ninnooniherya ncicimiho wa Yehova ni akina naari nnooniherya wi hanri awiiyeviha? (Moone eparakrafo 12)

12 Wakhala wi nri awiiyeviha, nnahaala wooniherya ncicimiho wa akina mmeerelo ahu ni mmawarelo. Ohiya wiirumiha naari weererya waatikhiniha achu, ninniilipiserya okhalano “munepa wawitchachala ni womála.” (Mwaalakhanye 1 Pedro 3:3, 4, Nlakano Nahihano; Yeremiya 9:23, 24) Mukhalelo nniisoonaahu voovira wa elukuluku onahaala wooneya mmalocelo ahu ni mu saweera. Ntoko yootakiherya, akhweya nnanweeriha akina wuupuwela wi naachu avameekhaaya nthowa na yeeyo nnapakaahu, nsuwenlaahu naari muchu nimusuwenlaahu. Akhweya nnamweererya wooniherya wi nipanke meekhihu echu yookhweleya, naamwi akina enikhavihenrye. Nyenya nuupuwele sa Yesu. Owo anwerya waacapariha achu masuwelelo aareiyeno. Moohiyana, Yesu wiiliwiili aanaromola Masu a Muluku. Owo haachuna wi achu emvaheke ncicimiho. Elukuluku yoothene aachuna wi ncicimiho n’yeeke wa Yehova.—Yohani 8:28.

VAAVAA NNAPAKAAHU SOOLAKELELA

13, 14. Wiiyeviha oni onikhaviherye hai opaka soolakelela saphaama?

13 Nnachuna okhala awiiyeviha vaavaa nnapakaahu soolakelela, naari vaavaa akina anapakaaya soolakelela sinanivolowela. Vaavaa murummwa Paulo aareiye o Kaisareya, aanachuna oya o Yerusalemu wi amalihe muteko Yehova aamvanheiye. Nyenya mulipa a miririmu Akapo aamuleela Paulo wi wakhala wi ooyawo, aahaala ophariwa, ophiyeryatho wiiphiwa. Anna yaamulopola Paulo wi ahiyewo. Nyenya Paulo aalakelela oya o Yerusalemu. Apwanne naari nthowa na wiiroromela? Hooye, Paulo aari awiiyeviha nave aanamuroromela moomalela Yehova. Anna tho yaari awiiyeviha. Mwawiihiiha, yaakhaviherya yoolakelela ya Paulo nave yaamuhiya wi apwahe.—Saweriwa T’arummwa 21:10-14.

14 Wiiyeviha onamunikhaviherya opaka soolakelela saphaama naamwi nihiweryaka osuwela naari ovareryela mukhalelo ichu inahaalaaya weereya. Ntoko yootakiherya, akhweya nnamuupuwela opacerya muteko wa elukuluku yoothene. Nyenya tiheeni enahaala weereya wakhala wi noopacerya wiiceliwa? Tiheeni enahaala weereya wakhala wi asitiithi ahu aapacerya wiiceliwa nave annachuna nikhaviheryo? Hanka wakhala wi nohuuluvala? Haniwerya waakhula makoho oothene yaala, naamwi nivekelaka nave nuupuwelaka vooloca sa yaala. (Eklesiyaste 8:16, 17) Nyenya wakhala wi ninnamuroromela Yehova, nnahaala osuwela ni weemererya okotakota wahu. Nnahaala waalikhela iparipari, oveka ekano, nave echu yookhweleyaxa, oveka ohoolela. Voocharela nnaphwanela ochara ohoolela wa munepa wa Yehova. (Mwaalakhanye Eklesiyaste 11:4-6.) Yehova onamureeliha soolakelela sahu, naari onamunikhaviherya otoroka soochuna sahu.—Masiposipo 16:3, 9.

 NNI NIWERYE HAI OKHALA AWIIYEVIHAXA?

15. Wuupuwelela sa Yehova eni onikhaviherye hai okhala awiiyeviha?

15 Nni niwerye hai okhala awiiyevihaxa? Nnahaala othokororya makhalelo masese. Yoopacerya wa soothene, nnaphwanela wuupuwelela sa Yehova, wuupuwelela mwawiiseela vooloca sa Muluku a mukhalelo taani. Vaavaa nniilikanyihaahu ni Yehova, ninnasuwela wi tahi neechweenevo nave nootepa oyevasa. (Isaiya 8:13) Nuupuwele wi nnamurumeela Muluku Oowerya Woothene, ohiya wa muchu naari munkeelo. Wuupuwelela sa yeela enahaala onikhaviherya okhala awiiyeviha “vathi va ntata nowerya na Muluku.”—1 Pedro 5:6.

16. Wuupuwelela osivela wa Muluku oni onikhaviherya hai okhala awiiyeviha?

16 Mukhalelo wanaawiili nneeraahu nikhale awiiyevihaxa ori wuupuwelela mukhalelo Yehova onansiveleiye vancipale. Paulo aalikanyiha muloko ni mwiili wa muchu. Yehova opaka makupa oothene a mwiili wi ekhale asisapo. (1 Korinto 12:23, 24) Muchu ti muchu a hiyo tasisapo wa Yehova. Owo hananilikanyiha ni akina, nave hani ahiye onisivela naamwi nihesaka. Ninnakhala awoopowa osuwela wi Yehova onnanisivela.

17. Nni niphure hai wakhala wi ninnaavya saphaama wa akina?

17 Waneeraru, nnahaala okhala awiiyevihaxa vaavaa nnaavyaahu saphaama wa akina, hiiha ntoko Yehova oneereleiye. Ohiya mahiku oothene okhala ooteteiwa naari waaleela akina echu yaweera, nnahaala waaveka ekano ni okhala ooreheryeya weemererya miruku saya. (Masiposipo 13:10) Ninnahakalala vaavaa anna ni arokorahu anaakhelaaya mirici savameekhaaya. Nave ninnamuthamalela Yehova oneemererya oothene ahu omurumeela.—1 Pedro 5:9.

18. Ovyakiha oleela-wa-murima ahu oni onikhaviherye hai okhala awiiyevihaxa?

18 Waneesese, nnahaala okhala awiiyevihaxa vaavaa nnapharihelaahu malakiheryo a Piipiliya wi nivyakihe oleela-wa-murima ahu. Malakiheryo yaawo annanihusiha mukhalelo Yehova onooneiye ni onuupuweleiye. Vaavaa nnahuseryaahu woona ichu mmoonelo wa Yehova, nnanwerya opaka soolakelela sinii simuhakalalihe Muluku. Vaavaa nnahuseryaahu, nnavekelaahu ni opharihela yeeyo nnahuseryaahu, oleela-wa-murima ahu onamukhala woolipa. (1 Timóteo 1:5) Ninnahuserya waapwacha akina. Wakhala wi ninneerano ichu seiya, Yehova oolaiherya wi onahaala “okhwaaniherya ovyakihiwa wahu” ophitaanyerya onikhaviherya okhala awiiyevihaxa.—1 Pedro 5:10, NM.

19. Tiheeni eni enikhaviherye okhala awiiyeviha okhala wookhala?

19 Munnamuupuwela mulipa miririmu o Yuteya nimuloncaahu woopaceryani wa mwaha yoola? Owo aayeleela okumi awe ni onthamwene awe ni Yehova woona wi haatitelenle okhala awiiyeviha. Nyenya nnamutitelela wiiyeviha naamwi okhalaka woovila. Sootakiherya sa akapuro oororomeleya a Yehova sinnooniherya wi ti wooweryeya. Vaavaa nnamalihaahu elukuluku yincipale nimurumeelaka Yehova, omuroromela wahu tho onahaala waaceereryeya. (Masiposipo 8:13) Moohipwacha mikhalelo sahu, nlelo nnanwerya okhala vamiithoni va Yehova. Nla ncicimiho ntokweene nnakhalaahuno. Mwawiihiiha, hankooni nipake soothene nnaweryaahu wi ntitelele okhala awiiyeviha vamiithoni va Yehova okhala wookhala.