Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli— Oomuhuserya

  |  Maiyu 2017

Ohakalala Onarweela mu Okhweiha Okumi

Ohakalala Onarweela mu Okhweiha Okumi

TANIYELI NI MIRIYA yaahipaka othela mu Setempuru a 2000 nave yaahikhalano okumi woohakalaliha o Parselona, o Espanya. Taniyeli onnaloca: Muteko ahu waananeeriha olya mu irestaurante saphaama, weeca mikwaha ni okula soowara soowalamela. Hiyaano naanaya mmuteko woolaleerya moohihiyererya”. Nyenya voocharela yaaheereya echu.

Muthukumano wa muceche wa 2006, Taniyeli ahiiwa mwaha waarino nikoho: “Apwanne ninnapaka soothene nnaweryaahu wi naakhaviherye ‘yawo anaya wiphiwa ehitxenke’ ovolowa mu ephiro yookumi yoohimala?” (Masiposipo 24:11) Mwaha waahithariha wi hiyaano nookhalano murici wa olaleerya michaka sa Piipiliya woona wi ti sookhweleya wa achu. (Saweriwa T’arummwa 20:26, 27) Taniyeli onnuupuwela: “Yakhala ntoko Yehova taaloca ni miyaano.” Mwahatho waahiloca wi ninnahakalala vaavaa nnapakaahu sincipale mmuteko wa Yehova. Taniyeli aahisuwela wi eyo yaari eparipari nthowa nawi aanamoona mwaariye, yoowo ampaceraru muteko wa opiyoneero atepaka ohakalala.

Mwaha yoola waahimvolowela vancipale Taniyeli ophiyerya oona wi yaari elukuluku yoophwanelela ya opaka matorokelo matokweene mweekumi mwawe. Owo aammora olapa iwora vakhaani o muteko wawe, aahipacerya muteko wa opiyoneero, nave aahuupuwela mukhalelo owo ni mwaariye yaahaalaaya ohakalala waakhanle wi aaya okhaviherya wiiwo oriwo nchuno ntokweene na alaleeryi a Omwene.

SOOKACAMIHA SOOPACERYA-VOOCHARELA MICHAKA SOOHAKALALIHA

Mu Maiyu a 2007, Taniyeli ni Miriya yaahihiya muteko aya nave yaahithaamela o Panama, elapo yeeyo yaaxekunryaaya khalai. Ekulucu aya yaaphitaanyerya ivilivili sa Arkipelako Pokas Tel Toro o eniya yo Karipi. Achu ancipale anakhala weiwo a Kuaymi. Taniyeli ni Miriya yaahuupuwela wi yaahaala okhala o Panama miyeeri mithanu nararu epharihelaka ikhorowa yaakhapelenlaaya.

Awo yaanapaka mikwaha epharihelaka makula ni icika. Awo nlelo annuupuwela elukuluku yoopacerya yeencaaya ni icika saya mastatiya 30 ewelelaka miyoko mu elukuluku yooviha. Taniyeli aahitepa okutuphuwa anahaala vakhaani okhwa. Nyenya a Kuaymi yaasuwenlaaya yaanooniherya owaakhela aleco, xaxaxa vaava mutheli owo aahusenryeiye masu a elocelo ya weiwo. Voocharela yaahikhalano soohuserya sa Piipiliya sawaakhwana 23.

Tiheeni yeeren’ye vaava awo yaamalinhaaya ikhorowa saya? Taniyeli onnaloca: “Nimorihaka miithori naanuupuwela okookela o Espanya. Naakhala ohica waahiya ohuserya ahu a Piipiliya.” Nyenya ovinre Mweeri mmoha, awo yaahaakhela michaka soohakalaliha. Miriya onnaloca: “Nahiwompwa orumeela ntoko mapiyoneero avameekhaaya. Naahitepa ohakalala otitelela mmuteko ahu!”

YAAKHALANO OHAKALALA OTOKWEENE

Nthowa na matorokelo mmarehereryo a Yehova, Taniyeli ni mwaariye yaahimaala orumeela ntoko mapiyoneero avameekhaaya mu 2015. Vano tiheeni yaahaalaaya opaka? Awo yaahiroromela masu anaphwanyeya mu Salumu 37:5: “Waroromeleke Apwiya mwa ekumi-à, waweheryeke yawo ntakhara anamwerano sothene.” Awo yaahiphwanya muteko yoowo waakhaviherya mmuteko aya wa opiyoneero wa elukuluku yoothene, nave olelo awo anarumeela mmuloko wa Verakuas, Panama.

Taniyeli onnaloca: “Nihaakumve opwahawo o Espanya hinaasuwela waakhanle wi naahaala owerya okhweiha okumi. Olelo hiyaano nookhweiha nave hiyaavo echu eri yookhweleyaxa n’yelenlaahu.” Tuuvi ori ohakalala otokweene aryaayano? Awo annaloca: “Waakhaviherya achu awiiyeviha ohuserya sa Yehova tori ohakalala otokweene!”