Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli— Oomuhuserya

  |  Fevereru 2017

Yookhwela ya Yehova Enahaala Okhwaanela!

Yookhwela ya Yehova Enahaala Okhwaanela!

“Kòlotxa ni kinamwera, kihùpuwela ni kanamwakhwaniha.”ISAIYA 46:11.

MACIPO: 147, 149

1, 2. (a) Tiheeni Yehova onileenleiye? (b) Yoororomeliha taani nnaphwanyaahu mu Isaiya 46:10, 11 ni 55:11?

ECICIRI yoopacerya ya Mpiipiliya yookhalano masu ookhweya nyenya arino yootaphulela yookhweleya: “Wopatxeryani Muluku àpatunse erimu ni elapo ya vathi.” (Maphatxuwelo 1:1) Hiyaano nnoona pahiru ichu vakhaani wa seiyo Muluku opankeiye, nave nniiwexexa vakhaani vooloca sa ichu ntoko vasiiyoni, ekamaama, ni nlamulo na omora (ni ekunya força de gravidade). (Eklesiyaste 3:11) Nyenya, Yehova onnanleela yookhwela awe ntakhara elapo ni achu. Owo aapatunxe achu moolikana ni yoowo nave aachuna wi epuhe ekumi veelaponi yavathi. (Maphatxuwelo 1:26) Awo yaahaala okhala anaawe, nave owo aahaala okhala Tiithi aya.

2 Ovinyerya ecima yaneeraru ya Maphatxuwelo, noohuserya wi yookhwela ya Yehova yahaakaahiwa. (Maphatxuwelo 3:1-7) Naamwi hiiha, hinaavovo nikacamiho Yehova ohinaweryeiye omaliha. Haavo onahaala omuhiiha Yehova. (Isaiya 46:10, 11; 55:11) Nnaphwanela ororomela wi  yookhwela yoopacerya ya Yehova enahaala okhwaanela mu elukuluku yoophwanelela!

3. (a) Mahusiheryo taani ananikhaviherya wiiwexexa muchaka wa Piipiliya? (b) Ntakhara heeni nnahaalaahu othokororya mahusiheryo yaala? (c) Makoho taani nnahaalaahu othokororya?

3 Moohikhwa minikwa noosuwela teevi eri yookhwela ya Muluku ntakhara elapo ni achu, hiiha ntoko murici wa Yesu mu yookhwela yeeyo. Iha iparipari sookhweleya sa Piipiliya nave akhweya iparipari soopacerya nihusenryaahu vaavaa naapacenryaahu ohuserya Masu a Muluku. Vano nnachuna waakhaviherya akina ohuserya mahusiheryo yaala ookhweleyaxa. Nookhalano ekari yavameekhaaya ya weerano variyari va eyaakha yeela, vaavaa nnaawopaahu achu wi ephiye va Mukonelo wa okhwa wa Kristu. (Luka 22:19, 20) Wakhala wi aarwa mu yaweereya yeela yookhweleya, awo anahaala ohuserya sincipale vooloca sa yookhwela yootikhiniha ya Muluku. Mwawiihiiha, ela elukuluku ya wuupuwelela makoho nneeraahu nipharihele wi naaceenyerye achu eni erwe. Mmwaha yoola, nnahaala othokororya makoho mararu: Tiivi eri yookhwela ya Muluku ntakhara elapo yavathi ni achu? Tiheeni yeeren’ye? Nave ntakhara heeni mukucho wa woopola wa Yesu onnahula ephiro ya okhwaanela wa yookhwela ya Muluku?

TEEVI YAARI YOOKHWELA YA MPATUSA?

4. ‘Erimu enalaleya ovuwa wa Muluku’ mwawiihai?

4 Yehova Mpatusa a owerya woothene. Soothene owo opankeiye ti sa esisapo yoowalamela. (Maphatxuwelo 1:31; Yeremiya 10:12) Tiheeni nnahuseryaahu orweela wa oreera ni orehereryeya nnoonaahu mu soopatusiwa? Ninnahuserya wi ichu soothene Yehova opatunseiye, ovinyerya ichu ikhaani ni itokweene, tisamphurelo. Munoona hai vaavaa munuupuwelaanyu sa eseelula ya muchu, woona nikwiya nrikimuyariwaru, naari oreera wa oneela wa nsuwa? Ninnatikhiniheya ni ichu seiya nthowa nawi Yehova onipatunse ni mavyakelo a osuwela yeeyo chiryene eri yaphaama.Mwaalakhanye Salumu 19:2; 104:24.

5. Wi soopatusiwa sawe soothene ilape mwawiiwanana tiheeni Yehova opankeiye?

5 Yehova oohela minlaano soopatusiwa sawe soothene. Oopaka malamulo a mweelaponi, nave oopaka malamulo a meecelo. Owo oopaka malamulo yaala wi echu eri yoothene mweelaponi ewerye olapa phaama. (Salumu 19:7-9) Ichu soothene mweelaponi sookhalano mapuro ni miteko saya. Ntoko yootakiherya nlamulo na omora ninnamukhapelela atimosfeera wi atitelele waacamela elapo yavathi, nave ninnavareryela iniya. Nihirivo nlamulo na omora, okumi veelaponi yavathi hiwaahaala oweryeya. Minlaano seiyo Yehova otikithenryeiye mweelaponi sinneeriha okhalavo oreheryeya wawaakhwanela. Ela enooniherya wi owo ookhalano yookhwela ntakhara elapo yavathi ni achu. Mmuteko ahu woolaleerya, nnaphwanela waakhaviherya akina omusuwela Mpatusa a elapo yeela yootikhiniha.Wupulula 4:11.

6, 7. Samahala taani Yehova aamvanheiye Atamu ni Eva?

6 Yookhwela ya Yehova yaari yawi achu ekhaleke veelaponi mahiku oothene. (Maphatxuwelo 1:28; Salumu 37:29) Owo teepewe, nave aamvaha Atamu ni Eva samahala saphaama soohiyanahiyana. (Mwaalakhanye Tiyako 1:17.) Yehova aahaavaha othanla woochuna ni mavyakelo a waanyiherya, osivela, ni opuha onthamwene. Mpatusa aanaloca  ni Atamu nave aanamuleela mukhalelo wa opaka ichu saphaama. Atamu tho aahihuserya mukhalelo wa wiikhapelela mukhateiye, waakhapelela asinama ni orehererya elapo. (Maphatxuwelo 2:15-17, 19, 20) Yehova aamvaha Atamu ni Eva mavyakelo a woona osiva, waapareya, woona, wiiwa, ni woona wunkhela ichu saphaama Yehova ampankenleiye. Mmukhalelo yoowo, awo yaanwerya opuha okumi mu echoko aya yooreera. Atamu ni Eva yaakhalano muteko woohakalaliha wa opaka. Nave yaahaala otitelela ohuserya ni osuwela ichu ivyaani okhala wookhala.

7 Echu taani ekina yaapaka makupa a yookhwela ya Yehova? Yehova aamvaha Atamu ni Eva owerya wa okhalano anamwane. Navetho anaaya yaahaala okhalano anamwane, ophiyerya elapo yoothene esareye achu. Owo aachuna wi asitiithi yaasiveleke anaaya, hiiha ntoko owo aasiveleiye anaawe oopacerya, Atamu ni Eva. Yehova aahivaha emusi ya achu elapo yavathi ni ichu soothene saphaama iri mwemmo. Elapo yaaphwanela okhala nipuro naya, nave hiyaahaala okhumavo.Salumu 115:16.

TIHEENI YEEREN’YE?

8. Ntakhara heeni Muluku aamvaha Atamu ni Eva nlamulo nnaphwanyeya mu Maphatxuwelo 2:16, 17?

8 Ichu hiseeren’ye hiiha ntoko Yehova aachuneleiye. Tiheeni yeeren’ye? Yehova aamvaha Atamu ni Eva nlamulo nookhweya wi ewerye osuwela mphimo wa otaphuwa waya. Owo aaloca: “Oni onalya sawima sa miri sa mmatxani, nto ohilye sawima sa mwiri yole onasuweliha saphama ni yonanara. Walya sa yowo onamukhwa!” (Maphatxuwelo 2:16, 17) Nlamulo nlo hinaari noovila wiiwexexa. Navetho hinaari noovila wiiwelela, woona wi yaakhalavo yoolya yincipale yaphaama mu emaca.

9, 10. (a) Satana aamunyemunle hai Yehova? (b) Tiheeni Atamu ni Eva yaalakelenlaaya opaka? (Moone eruku yoopacerya.)

9 Satana Musaserya aapharihela enowa wi amuwoke Eva wi ahimwiiwelele Tiithi awe, Yehova. (Mwaalakhanye Maphatxuwelo 3:1-5; Wupulula 12:9) Satana aaloca wi Muluku hamweemerenrye Atamu ni Eva olya “sawima sa miri iri mmatxani.” Eyo yaari ntoko owo aaloca ariki: ‘Mano, hamunachuna opaka echu munakhwelaanyu?’ Voocharela, owo aaloca wa Eva: “Tahi eparipari wi mwalya munamukhwa.” Iwo waari wootha. Satana aamulekecha Eva wi haaphwanela omwiiwelela Muluku. Owo aaloca: “Muluku òsuwela wi mwalya sawima iho mìtho anyu anamuhuleya.” Satana aaloca wi Yehova haachuna wi elyeke yawiima nthowa nawi yeeraaya elye yaamukhalano nsuweliho navameekhaaya. Vookuchulani, owo aaloca yoororomeliha yatheru: “Munamukhala ntoko yowo: munamusuwelaka yorèra ni yonanara.”

10 Atamu ni Eva yaaphwanela olakelela echu yaweera. Apwanne yaahaala omwiiwelela Muluku, naari yaahaala owiriyana enowa? Moothananiha, awo yaalakelela ohimwiiwelela Muluku. Yaamukhooca Yehova okhala Tiithi aya, nave yaaphitaana ni Satana. Mmukhalelo yoowo, yaari mmakupa aya, ehirino okhapelela wa Yehova.Maphatxuwelo 3:6-13.

11. Ntakhara heeni Yehova haaphwanela ohipwacha yoocheka ya Atamu ni Eva?

11 Vaavaa Atamu ni Eva yahiiwelenlaaya nlamulo na Muluku, awo yaayeleela okhala oophaameya. Opwaha yeeyo, yaari amwiicani a Muluku nthowa nawi owo onniica  yoonanara. ‘Mitho awe àtepa warwa wi avilele wona itxhu sonanara.’ (Habakukhi 1:13) Waakhanle wi Yehova ookhaviherya yoocheka ya Atamu ni Eva, okhala phaama wa soopatusiwa sawe soothene waahaala onanara. Ankeelo vamoha ni achu yaahaala okhwaaka minikwa waakhanle wi ti woophwanelela wiiwelela masu awe. Nyenya Yehova toororomeleya mmalakiheryo awe; owo hanavirikanya. (Salumu 119:142) Naamwi Atamu ni Eva yaarino othanla woochuna, awo hiyaahaala osepa sookhumelela sa ommwareela waya Yehova. Moovira wa elukuluku yaakhwa nave yaachikela vachayani yaakhumalaayavo.Maphatxuwelo 3:19.

12. Tiheeni yeeren’ye ni anamwane a Atamu?

12 Vaavaa Atamu ni Eva yaalyilaaya yawiima, Yehova haawemerenrye mu makupa a emusi awe. Owo aahiwiikarawo o emaca ya Eteni, nave hiyaarino ekari ya okookelawo. (Maphatxuwelo 3:23, 24) Yehova aaheeriha wi ehooseye ni sookhumelela sa yoolakelelaaya. (Mwaalakhanye Malamulo 32:4, 5.) Ntoko yookhumelela, awo hiyaawerya otakiherya mikhalelo sa Yehova mwawaakhwanela. Atamu ooyeleela omwaahiyu wootikhiniha ohiya pahiru wa yoowo mukhateiye, nyenya wa anamwanaawe tho. Owo aaravinhe pahiru ohiphaameya, yoocheka, ni okhwa. (Aroma 5:12) Atamu aawaakha ekari ya okhala wookhala. Atamu ni Eva hiyi ekhaleno mwaana oophaameya, nave anaaya hiyi ekhaleno anamwane oophaameya. Ovinyerya vaavaa Satana aamuhuwelinheiye Atamu ni Eva, Musaserya onneererya waawoka achu oothene weera emohamoha.Yohani 8:44.

WOOPOLA WOHEERIHA OKHALA WOOWERYEYA ONTHAMWENE NI MULUKU

13. Tiheeni Yehova onachuneiye wa achu?

13 Nlelo Yehova onnaasivela achu. Naamwi Atamu ni Eva yaamuhin’ye, nlelo owo aanachuna wi achu ekhaleno onthamwene ni vaiye. Nave haachuna wi mmoha a yaawo akhwile. (2 Pedro 3:9) Mwawiihiiha, mwawaakuveya Muluku aapaka marehereryo wi achu ewerye okhalano wanawiili onthamwene ni yoowo. Vano aahaala weerano hai ahinanarinhe malakiheryo awe? Hankooni noone.

Atamu ni Eva emanle omuhiya Muluku, mwawaakuveya owo aapaka marehereryo wi achu ewerye okhalano wanawiili onthamwene ni yoowo

14. (a) Mwawiiwanana ni Yohani 3:16, tiheeni Muluku opankeiye wi awoopole achu mu yoocheka ni okhwa? (b) Nikoho taani nnaphwanelaahu othokororya ni achu?

14 Mwaalakhanye Yohani 3:16. Achu ancipale nnaawopaahu wi ephiye va Mukonelo aasuwela phaama yoorepa yeela. Nto mukucho wa Yesu weerinhe hai okhala wooweryeya ekumi yoohimala? Nookhalano ekari ya waakhaviherya achu wiiwexexa naakhulo na nikoho nenla vaavaa nnaawopaahu ntakhara Mukonelo, okiraathino vamoha va Mukonelo, ni vaavaa nneeraahu naasekurye. Yiiwexexa phaama woopola, anahaala osuwela mukhalelo Yehova onaasiveleiye  achu ni mukhalelo oreiye a miruku. Miyaha taani vooloca sa woopola nneeraahu nuuke ni yaawo?

15. Yesu aahiyanne hai ni Atamu?

15 Yehova aamvaha mulopwana oophaameya yoowo aahaala ovaha ekumi ntoko woopola. Mulopwana yoowo aaphwanela okhala oororomeleya wa Yehova. Aaphwanela oveleela ekumi awe ntakhara achu. (Aroma 5:17-19) Yehova aathaamiha okumi wa Yesu, yoopatusiwaawe yoopacerya orweela wirimu. (Yohani 1:14) Mwawiihiiha, Yesu aari muchu oophaameya, hiiha ntoko Atamu aakhanleiye. Nyenya moohiyana ni Atamu, Yesu aahichariha malakiheryo Yehova aaweheryeiye wa mulopwana oophaameya. Naamwi aakumanne ni saweeha soovila, aahichariha malamulo oothene a Muluku.

16. Ntakhara heeni woopola yoovaha yasisapo?

16 Moorweela wa okhwa ntoko muchu oophaameya, Yesu anwerya waavulusa achu mu yoocheka ni okhwa. Owo aahaakhwaniherya soothene Atamu aahaaleiye opaka. Yesu aari mulopwana oophaameya, oororomeleya nave aanamwiiwelela Muluku. (1 Timóteo 2:6) Owo aakhwile ntakhara hiyo, nave mukucho awe wohaavaha alopwana, athiyana, ni anamwane ekari ya okhala wookhala. (Mateu 20:28) Woopola ephiro enahula okhwaanela wa maroromeliho a Muluku.2 Korinto 1:19, 20.

YEHOVA OOHULA EPHIRO WI NIMUKOOKELE

17. Tiheeni woopola onapakaaya?

17 Yehova aahivaha woopola ni wiicela otokweene. (1 Pedro 1:19) Owo onnanisivela vancipale ophiyerya omweemererya mwanawe ookhweleya okhwa ntakhara hiyo. (1 Yohani 4:9, 10) Mmukhalelo yoowo, Yesu tori  tiithi ahu opwaha Atamu. (1 Korinto 15:45) Yesu oonivaha ekari yawi nikhaleno ekumi yoohimala, navetho wi nikookele opaka makupa a emusi ya Muluku. Moorweela wa woopola, achu anahaala okhala oophaameya nave Yehova onanwemererya wanawiili mu emusi awe ahinanarinhe malamulo awe. Nkaanyiheryani elukuluku yeeyo achu oothene ari oororomeleya wa Yehova eneeraaya ekhale oophaameya! Voocharela, soopatusiwa wirimu ni veelaponi yavathi inahaala okhala sawaataana mu emusi emoha. Oothene ahu nnahaala okhala ana a Muluku.Aroma 8:21.

18. Ti liini Yehova oneereiye akhale “sothene mwa othene”?

18 Naamwi asitiithi ahu oopacerya yaamukhonche Yehova, owo haamaanle waasivela achu, nave aavahererya woopola. Nave naamwi nri oohiphaameya, Satana harwa anihiiha okhala oororomeleya wa Yehova. Moorweela wa woopola, Yehova onahaala onikhaviherya okhala awookololowa mwawaakhwanela. Nkaanyiheryani mukhalelo ekumi enahaalaaya okhala vaavaa muchu ti muchu “onamona Mwana ni onamwemererya yowo” oneereiye akhalano ekumi yoohimala! (Yohani 6:40) Tiithi ahu oosivela ni amiruku onahaala okhwaaniherya yookhwela awe ni waakhaviherya achu okhala oophaameya. Voocharela Yehova “onamukhala sothene mwa othene.”1 Korinto 15:28.

19. (a) Othamalela woopola onaphwanela onceenyerya opaka eheeni? (Moone ekaaxa “ Ntitelele Okoha Weiwo Oriwo Muchu Onachuna Onaakhela.”) (b) Tiheeni nnahaalaahu othokororya mmwaha onacharela?

19 Othamalela wahu woopola onaphwanela onceenyerya waaleela akina vooloca sa yoovaha yeela yasisapo. Achu anaphwanela osuwela wi moorweela wa woopola, Yehova moosivela onnaavaha achu oothene ekari ya okhala wookhala. Nyenya woopola onnapaka sincipale opwaha yeela. Onnarehererya mwaha yoowo Satana otannyileiye o emaca ya Eteni. Nnahaala othokororya mukhalelo yeeren’yaaya mmwaha onacharela.