Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mulipeleli— Oomuhuserya

  |  Fevereru 2017

Yehova Onnaahoolela Achu Awe

Yehova Onnaahoolela Achu Awe

“Apwiya anamoholelani mahiku othene.”ISAIYA 58:11.

MACIPO: 152, 22

1, 2. (a) Anamoona a Yehova anahiyana hai ni ikerexa ikina? (b) Tiheeni nnahaalaahu ohuserya mmwaha yoola ni onacharela?

IKWAHA sincipale achu annaakoha Anamoona a Yehova “Mano, muhooleli anyu taani?” Annakoha hiiha nthowa nawi ikerexa sincipale sinnakhalano mulopwana naari muthiyana yoowo onakhala muhooleli aya? Mwawiihiiha, ninnasiveliwa oloca wi Muhooleli ahu tahi muchu oohiphaameya. Opwaha yeeyo, Muhooleli ahu ti Yesu Kristu! Nave owo onnamwiiwelela Yehova yoowo ori Tiithi awe ni Muhooleli.Mateu 23:10, Nlakano Nahihano.

2 Nookhalawotho nikhuuru na alopwana, nniichaniwa “mulapeli òroromeleya ni awisuwela,” yoowo onaahoolela achu a Muluku veelaponi yavathi olelo. (Mateu 24:45) Nyenya nnasuwela hai wi chiryene Yehova tonanihoolela moorweela wa Mwanawe? Nnahaala othokororya mathowa mararu ananeeriha okhala oolekecheya. Nave naamwi Yehova aapharihelaka achu wi yaahoolele achu awe, onahaala okhala wawooneya wi Yehova taari nave nlelo Muhooleli eeparipari wa achu awe.Isaiya 58:11.

 MUNEPA WAWEELA WAAHAALIPIHA

3. Tiheeni yaamukhavihenrye Mose waahoolela Aisarayeli?

3 Munepa waweela waahaalipiha yaale yaamweemelela Muluku. Muluku aahimuthanla Mose wi akhale muhooleli a Aisarayeli. Tiheeni yaamukhavihenrye mmuteko yoola wookhweleya? Apwiya Yehova yaahimvaha Mose “munepa aya.” (Mwaalakhanye Isaiya 63:11-14.) Mwawiihiiha Yehova taari muhooleli aachu awe, nthowa nawi waari munepa awe waamukhaviherya Mose.

4. Tiheeni yooniherya wi Mose aakhalano munepa wa Muluku? (Moone eruku yoopacerya.)

4 Apwanne achu yaahiwerya woona wi Mose aahikhalano munepa wa Muluku? Aai! Munepa waweela wa Yehova waahimvaha Mose owerya wa opaka sootikhiniha ni osuweliha nsina na Muluku wa Farawo, mulamuleli oowerya o Yikuputu. (Mukwaha 7:1-3) Munepa waweela waahimukhaviherya tho Mose okhala muhooleli oosivela ni oopisa murima. Owo aari oohiyana ni ahooleli a nrima ni oonanara murima a ilapo ikina! (Mukwaha 5:2, 6-9) Mweeparipari, Yehova aahimuthanla Mose wi akhale muhooleli aachu Awe.

5. Muchu taani mukina Yehova aamvanheiye munepa waweela wi aahoolele achu awe?

5 Muchu taani mukina Yehova aamvanheiye munepa waweela wi aahoolele achu awe? Piipiliya onnaloca: “Yosuwa, mwana a Nuni àri òsareya [munepa wa] miruku.” (Malamulo 34:9) “Munepa wa Apwiya wavolowa mwa Gideyoni.” (Amuthoriha 6:34) Nave “munepa w’Apwiya wamukhuruwela Davide.” (1 Samuwele 16:13) Alopwana yaala oothene yaaroromela munepa wa Muluku wi waakhaviherye opaka ichu seiyo yeeraaya ehiwerye opaka ni ikuru saya. (Yosuwa 11:16, 17; Amuthoriha 7:7, 22; 1 Samuwele 17:37, 50) Mweeparipari, ti Yehova aavaha owerya wa opaka ichu sootikhiniha, mwawiihiiha yoowo pahiru taaphwanela ncicimiho.

Vaavaa achu yamwiiwelelaaya Mose, Yosuwa, Kiteyoni ni Tavite, awo yaamuchara Yehova ntoko Muhooleli aya

6. Ntakhara heeni Muluku aanachuna wi achu awe yaacicimiheke ahooleli a Isarayeli?

6 Tiheeni Aisarayeli yaaphwanelaaya opaka vaavaa yoonnaaya wi munepa waweela waamukhaviherya Mose, Yosuwa, Kiteyoni ni Tavite? Awo yaaphwanela waacicimihaka. Vaavaa achu yaapacenryaaya omwaapa Mose, Yehova aahikoha: “Ophiyerya lini atxhu ala aneraya etitelele okikhòtxa?” (Namarepela 14:2, 11) Chiryene, Yehova aahaathanla alopwana yaale wi yaahooleleke achu Awe. Vaavaa achu yawiiwelelaaya, awo yaamuchara Yehova ntoko Muhooleli aya.

ANKEELO YAAHAAKHAVIHERYA

7. Ankeelo yaamukhavihenrye hai Mose?

7 Ankeelo yaahaakhaviherya yaale yaamweemelela Muluku. (Mwaalakhanye Ahebri 1:7, 14.) Muluku aahaapharihela ankeelo wi emuhoolele Mose. Voopacerya, munkeelo ‘ahoneya mwa yowo vanipuroni va niphara novarela’ nave amvaha murici wa owoopola Aisarayeli ni waahoolela. (Saweriwa T’arummwa 7:35) Wanaawiili,  Muluku ahaapharihela ankeelo wi emvahe Mose Nlamulo ni yoolakelela ya waahusiha Aisarayeli. (Galasya 3:19) Waneeraru, Yehova aamuleela Mose: “Wàkerihe atxhu nipuro kithònnyaka; munkelo aka onamòhòla.” (Mukwaha 32:34) Piipiliya hanaloca wi Aisarayeli yaanamoona munkeelo apakaka ichu seiya. Nyenya, mukhalelo Mose aahusinheiye ni waahoolela achu, waari wawooneya wi ankeelo yaanamukhaviherya.

8. Ankeelo yaamukhavihenrye hai Yosuwa ni Esekiya?

8 Muchu taani mukina ankeelo yaamukhavihenryaaya? Piipiliya onnaloca wi “mutokwene a akhotxo a Apwiya,” eyo ti wi munkeelo, aamukhaviherya Yosuwa ovootha ekhoco ni Akanani. (Yosuwa 5:13-15; 6:2, 21) Ohoolo waya, vaavaa Mwene Esekiya aahoolenleiye achu a Muluku, akhoco a Asiriya yaanawoopopiha wi emutolose Yerusalemu. Mu ohiyu omoha, “munkele a Apwiya . . . awiphawo akhotxo matxikwi nsana ni makhumi mathanu namararu ni akhotxo athanu.”2 Mamwene 19:35.

9. Naamwi yaale yaamweemelela Muluku yaari oohiphaameya, tiheeni yaaweheryiwa wa Aisarayeli?

9 Ankeelo toophaameya. Nyenya alopwana yaakhavihenryaaya hiyaari oophaameya. Ntoko yootakiherya, ekwaha emoha Mose haamvuwinhe Yehova. (Namarepela 20:12) Yosuwa haamukonhe Muluku echu yaweera vaavaa Akapawoni yaachunaaya waataana ni yoowo. (Yosuwa 9:14, 15) Elukuluku ekina, Esekiya aahikhala awiirumiha. (2 Matharihelo 32:25, 26) Naamwi alopwana yaala yaari oohiphaameya, yaaweheryiwa wi Aisarayeli echariheke ohoolela waya. Aisarayeli yaanawerya woona wi Yehova taapharihela ankeelo wi yaakhaviherye alopwana yaale. Mweevelevelo, Yehova taahoolela achu awe.

MASU A MULUKU YAAHAAHOOLELA

10. Mose ahooleliwe hai ni Nlamulo na Muluku?

10 Masu a Muluku yaahaahoolela yaale yaamweemelela. Piipiliya onnaloca sa Nlamulo yaavahiwe Aisarayeli ntoko ‘Nlamulo na Mose.’ (1 Mamwene 2:3) Nyenya Piipiliya onnooniherya mookwakwaleya wi ti Yehova aavanhe Aisarayeli Nlamulo. Navetho Mose aanaphwanela wiiwelela. (2 Matharihelo 34:14) Ntoko yootakiherya, Yehova amanle omuleela mukhalelo wa omuteka tapernaakulu, “Mose àhèra phàma yele Apwiya yàmurummaya.”Mukwaha 40:1-16.

11, 12. (a) Tiheeni Yosuwa ni mamwene makina yaawo yaalamulela achu a Muluku yaaphwanelaaya opaka? (b) Masu a Muluku yaahoolenle hai alopwana yaawo yaarino murici wa ohoolela?

11 Yosuwa aakhalano nikupa na Masu a Muluku vaavaa aareiye muhooleli, nave Yehova aamuleela: “Wupuweleke masu a nlivuru yowo ohiyu ni othana ni otxhariheke iri mwemmo.” (Yosuwa 1:8) Ohoolo waya mamwene yaawo yaalamulela achu a Muluku yaakhalanotho murici wa waalakhanya Nlamulo mahiku oothene, orepa, ni wiiwelela ‘etxharihaka ikano seiho ni wetxela seiho.’—Mwaalakhanye Malamulo 17:18-20.

12 Masu a Muluku yaahoolenle hai alopwana yaawo yaarino murici wa ohoolela? Nkuupuwelani sa mwene Yosiya. Nimanle ophwanyiwa Nlamulo na Mose, namarepa a Yosiya aapacerya waalakhanya. * (Moone masu avathi.) “Yosiya iwaleiye sothene Nlivuru nle na Malamulo nalotxaya, murima wamwina, ni ahahula sowara sawe.” Masu a Muluku yaamuceenyerya Yosiya otolosa soophwaniherya soothene mu elapo nave aarehererya  efesta ya Paskha. (2 Mamwene 22:11; 23:1-23) Woona wi Yosiya ni ahooleli akina oororomeleya yaanachariha Masu a Muluku, awo yaari ooreheryeya opaka matorokelo mu ohoolela yaavahaaya achu a Muluku. Matorokelo yaale yaahaakhaviherya achu omwiiwelela Muluku.

13. Ahooleli a Achu a Muluku yaahiyanne hai ni ahooleli a maloko makina?

13 Ahooleli a maloko makina yaahooleliwa ni okotakota wa miruku sa achu. Ntoko yootakiherya, muhooleli a Akanani ni achu awe yaanapaka ichu soonanara, seiyo saaphitaanyerya oraruwa ni muhima, mulopwana oraruwa ni mulopwana mukhweiye, oraruwa ni mwaasinama, waavaha anamwane wi eheleliwe mukucho, ni olapela soophwaniherya. (Onamukutxho 18:6, 21-25) Navetho, ahooleli o Papulu ni o Yikuputu hiyaarino malakiheryo mamohamoha vooloca sa weela yoowo achu a Muluku yaaryaayano. (Namarepela 19:13) Nyenya, achu a Muluku yaanawerya woona mukhalelo ahooleli aya oororomeleya yaaceenyeryaaya otitelela olapela mwaweela, okhala aweela mmwiilini, ni osepa okhala mmwiikhoni. Mweeparipari, Yehova taari muhooleli aya.

14. Ntakhara heeni Yehova aanaalaka ahooleli aachu awe?

14 Tahi wi mamwene oothene yaalamulenle achu a Muluku yaanachariha malakiheryo a Muluku. Mamwene yaawo oohiroromeleya yaanakhooca ochara ohoolela wa munepa waweela wa Muluku, ankeelo awe ni Masu awe. Ikwaha ikina Yehova aanaalaka naari waaraceeliha ni ahooleli akina. (1 Samuwele 13:13, 14) Ohoolo waya, Yehova aahimuthanla muchu yoowo aahaala okhala muhooleli oophaameya.

YEHOVA ONNAMUTHANLA MUHOOLELI OOPHAAMEYA

15. (a) Alipa miririmu yoonihenrye hai wi muhooleli oophaameya aanarwa? (b) Taani aari muhooleli oophaameya?

15 Mu iyaakha sincipale, Yehova aalaiherya wi owo aahaala omuthanla muhooleli oophaameya ntakhara achu awe. Ntoko yootakiherya, Mose aahaaleela Aisarayeli ariki: “Apwiya, Muluku anyu, anamwera wi oneye mulipa a miririmu ntoko miyo nave owo onaya okhala a nloko nanyu mun’wiriyaneke.” (Malamulo 18:15) Isaiya aalonce wi Owo aahaala okhala muhooleli ni “mwene.” (Isaiya 55:4) Nave Taniyeli aarepa vooloca sa Mesiya yoowo aahaala okhala “mutokweene” naari muhooleli. (Daniyeli 9:25) Wookuchulani, Yesu Kristu aaloca sa yoowo mwaneene ntoko “Muhóli” aachu a Muluku. (Mwaalakhanye Mateu 23:10, NN.) Oohuserya a Yesu yaahiiveleela wi emuchare, nave awo yaanaroromela wi aari yoowo Yehova aamuthanlileiye. (Yohani 6:68, 69) Tiheeni yaalekenche wi Yesu Kristu aari yoowo Yehova aahaaleiye ompharihela wi aahooleleke achu awe?

Yehova aahimuthanla Yesu wi akhale muhooleli oophaameya

16. Tiheeni enooniherya wi Yesu aahilipihiwa ni munepa waweela?

16 Munepa waweela waahimulipiha Yesu. Vaavaa Yesu aapatisiweiye, “Yohani àhona wirimu ohulen’yewo ni Munepa ntoko ekakaiya omukhuruwelaka yowo.” Moohilekela “munepa wàmukeriha okulutxuni.” (Marko 1:10-12) Variyari va muteko awe  veelaponi yavathi, munepa waweela wa Muluku waahimukhaviherya ohusiha ni opaka sootikhiniha. (Saweriwa T’arummwa 10:38) Mwawaacererya, munepa waweela waahimukhaviherya Yesu wooniherya mikhalelo ntoko osivela, ohakalala, ni nroromelo noolipa. (Yohani 15:9; Ahebri 12:2) Haavo muhooleli mukina oonihenrye wi aakhalano munepa waweela wa Muluku. Chiryene, Yehova aahimuthanla Yesu ntoko Muhooleli.

Ankeelo yaamukhavihenrye hai Yesu amanle opatisiwa? (Moone eparakrafo 17

17. Tiheeni ankeelo yeenraaya wi emukhaviherye Yesu?

17 Ankeelo yaahimukhaviherya Yesu. Elukuluku vakhaani amanle opatisiwa, “ankelo a wirimu yàrwa enamulapela.” (Mateu 4:11) Elukuluku vakhaani ahaakumve okhwa, “àhoneya wa yowo munkelo a wirimu, wi amulipihe murima.” (Luka 22:43) Yesu aasuwela wi Yehova aahaala waarumiha ankeelo wi emukhaviherye mu elukuluku yoophwanelela.Mateu 26:53.

18, 19. Masu a Muluku yaahoolenle hai mahusiheryo ni okumi wa Yesu?

18 Masu a Muluku yaahimuhoolela Yesu. Ovinyerya vaavaa aapacenryeiye muteko awe ophiyerya okhwa wawe vamwirini woohooxa, Yesu aaheemererya ohooleliwa ni Soorempwa. Ophiyerya wi ahalaka vakhaani okhwa, aanaromola sooloherya vooloca sa Mesiya. (Mateu 4:4; 27:46; Luka 23:46) Nyenya, mu elukuluku yeele ahooleli a ikerexa yaari oohiyana ni Yesu. Awo yaanakhooca Masu a Muluku naamwi yahiiwanana ni mahusiheryo aya. Yesu aaromola Masu a Muluku, vaavaa aalonceiye sa yaawo: “Atxhu ala anakitxitximiha ni eyanoru, nto murima aya ori otxiwene wa miyo. Awo anakepesa siyo, ntakhara malamulo aya anakhuma mwa atxhu.” (Mateu 15:7-9) Yehova haahaala waathanla alopwana yaawo yaahaachariha Masu awe wi yaahoolele achu awe.

 19 Yesu tho aanapharihela Masu a Muluku vaavaa aahusiheiye akina. Vaavaa ahooleli a ikerexa yaamukacamihaaya, owo haapharihenle osuwela wawe naari mavyakelo a okumi wi awaakhule. Moohiyana, owo aahahusiha achu orweela mu Soorempwa. (Mateu 22:33-40) Navetho, Yesu anwerya waatikhiniha achu ni miyaha mincipale aareiyeno vooloca sa okumi awe wirimu naari sa opatusiwa wa elapo. Opwaha yeeyo, woona wi aanasivela Masu a Muluku, owo aari ooreheryeya wi aaleele akina, ni “àhula miru saya wi esuwele sorempwa.”Luka 24:32, 45.

20. (a) Yesu aamuciciminhe hai Yehova? (b) Ohiyana taani waarivovo variyari va Yesu ni Herote Akripa I?

20 Naamwi yaale yanwiriyana Yesu yaakhalaka ootikhiniheya mmukhalelo aaloceiye, owo wiiliwiili amvaha ncicimiho Yehova, Muhusiha awe. (Luka 4:22) Vaavaa mulopwana ooreela eerenryeiye omucicimiha Yesu ni masu awi “Muhusiha aphama,” Yesu aahiiyeviha nave aahi: “Onakerelani aphama? Havo ori aphama omuhiya Muluku pahi.” (Marko 10:17, 18) Nyenya, Herote Akripa I, aahikhala muhooleli o Yuteya iyaakha thanu nararu ohoolo waya, owo aakhalano moonelo woohiyana ni wa Yesu! Nihiku nimoha, va muthukumano wavameekhaaya, Herote aahiwara ikuwo sa omwene. Vaavaa achu yaamonnaaya nave yiiwalaaya nsu nawe, awo yaakhuwela: “Nla nri nsu na Muluku nave tahi nsu na mutxhu!” Herote waanamusivela ocicimihiwa. Nyenya tiheeni yeeren’ye? “Vano elukuluku ene yeyo munkelo Apwiya àmmana Heróde, wona wi owo hamutxitximin’he Muluku. Heróde àkhuriwa ti miyuku, ni àkhwa.” (Saweriwa T’arummwa 12:21-23) Mweeparipari, Yehova haamuthanlile Herote wi akhale muhooleli. Nyenya, Yesu aahooniherya wi Muluku aahimuthanla, nave wiiliwiili aanamucicimiha Yehova ntoko Muhooleli Mutokweene aachu Awe.

21. Tiheeni nnayaahu nthokororye mmwaha onacharela?

21 Yehova aachuna wi Yesu akhale Muhooleli ohiya pahiru mu iyaakha vakhaani. Amanle oviihiwa mookhwani, Yesu aahaaleela oohuserya awe ariki: “Kòvahiwa ikuru sothene, wirimu ni vathiva.” Owo aahaaceererya: “Miyo kini kinakhala ni nyuwano mahiku othene ophiyerya ophiyerya nihiku nomaliha elapo.” (Mateu 28:18-20) Nyenya Yesu aahaala owerya hai waahoolela achu a Muluku veelaponi ari muchu oohooneya wirimu? Taani Yehova aahaaleiye ompharihela wi amweemelele Yesu veelaponi yavathi? Nave Akristu yaahaala owerya hai waasuwela yaale anamweemelela Muluku? Mwaha onacharela onahaala othokororya maakhulo a makoho yaala.

^ par. 12 Akhweya ala yaari masu oopacerya yaarepiwe ti Mose.