Ocuphela mwaha

Ocuphela menu anaawiili

Anamoona a Yehova

Elomwe

Munnachuna Osuwela Eparipari?

Munnachuna Osuwela Eparipari?

EPARIPARI vooloca sa eheeni? Vooloca sa makoho makina oochuneyaxa yaawo achu anakohaaya. Akhweya nyu munniikoha makoho ntoko ala:

  • Muluku onnanthokororya chiryene?

  • Ekhoco ni masooso enarwa emala?

  • Tiheeni eneereya ni hiyaano nakhwa?

  • Yookhalavo ewehereryo wa achu ookhwa?

  • Kinii kivekele hai wi kiwiriyaniwe ti Muluku?

  • Kinii kiphwanye hai ohakalala muukumini?

Ti woowi munahaalaanyu waavyawo maakhulo a makoho ala? Mwarowa opiipilioteka nari olooxa ya aliivuru munahaala ophwanya masana masaneene a aliivuru elocaka wi annavaha maakhulo. Ikwaha sincipale, liivuru mmoha onnanvaanya mukina. Aliivuru akina anakhala ntoko oochuneya mu elukuluku ene yeele, moohilekela annamala muteko nave annatorokiwa.

Nyenyanto, ookhalawo liivuru mmoha yoowo orino maakhulo oororomeleya. Owo ti liivuru a eparipari. Yesu Kiristu aaloca mu nivekelo wa Muluku: “Masu anyu ti eparipari.” (Yohane 17:17) Olelo nnasuwela Masu awo ntoko Piipiliya Aweela. Mu ipaaxina inacharela, munahaala ophwanya maakhulo awiiweya, oororomeleya a mPiipiliyani, ntakhara makoho ari vasulu.

 Muluku Onnanthokororya Chiryene?

NTAKHARA HEENI NNAKHUMAAYA NIKOHO NLA: Hiyaano nnakhala mu elapo esaren’ye ni otakhala ni ohikhala ekhaikhai. Ikerexa sincipale sinahusiha wi masooso yaawo ananihooxa ti yookhwela ya Muluku.

PIIPILIYA ONAHUSIHA WII: Muluku hantonkoru weeriha echu yoonanara. Yobi 34:10 (Bibliya Nsu na Muluku) onnaloca: “Muluku, owerya sothene, hanera itxhu sonanara ni s’ohokololowa.” Muluku ookhalano yoochuna yoosivela ntakhara achu. Ti nthowa nenla Yesu onihusinheiye ovekela: “Atithihu a wirimu . . . Omwene anyu orwe. Okhwela wanyu wereye, ntoko wirimu hihá vathi vano.” (Mateyu 6:9, 10) Muluku onnanthokororya vancipale ophiyerya wiilipixerya wi akhwaaniherye yoochuna awe.Yohane 3:16.

Vareryani tho Genesis 1:26-28; Yakobo 1:13; ni 1 Petro 5:6, 7.

Ekhoco ni Masooso Enarwa Emala?

NTAKHARA HEENI NNAKHUMAAYA NIKOHO NLA: Ekhoco ennapwahiherya owiipha achu oohaalakhanyeya. Oothene hiyo niinnahooxeya ni masooso aachu.

PIIPILIYA ONAHUSIHA WII: Muluku onnalaiherya elukuluku onahaaleiye otikitherya murecele veelaponi yavathi. Mu Omwene awe, epooma ya wirimu, achu herwaru ‘ehuserya meerelo a ekhoco.’ Moohiyana, awo “anamutatusa masipatxa aya ekhale ihipa.” (Isaiya 2:4, BNM) Muluku onahaala omaliha ohikhala ekhaikhai ni masooso oothene. Piipiliya onnalaiherya: “[Muluku] anarwa-avuta mithori yothene ovíha’mo m’mithoni mwaya; nave hevarwa-vakhalatho okhwa; nave hevarwa-vakhalatho iyinlo, nari wunla, nari sawichela, ntakhara sopacherya iho [ophitaanyerya ohikhala ekhaikhai ni masooso a olelo] sóvira.”Yawupulula 21:3, 4.

Vareryani tho Salmo 37:10, 11; 46:9; ni Mikeya 4:1-4.

Tiheeni Eneereya ni Hiyaano Nakhwa?

NTAKHARA HEENI NNAKHUMAAYA NIKOHO NLA: Ikerexa sincipale sa mulaponi sinahusiha wi vaculi va okhwa yookhala echu mpuwa mwa muchu enapwahiherya okhala ekumi. Akina anneemererya wi achu ookhwa poti waaphoreiha achu akumi nari wi Muluku onnaalaka alipa oonanara mwa waahooxa mu cukucha a mooro okhala wookhala.

PIIPILIYA ONAHUSIHA WII: Muchu akhwa, haanono okumi. Eklesiasti 9:5 (BNM) onaloca wi achu “akhwile hanasuwelaru etxhu.” Okhala wi achu ookhwa hanawerya osuwela, wiiwa, nari weera echu, awo hanawerya waaphoreiha nari waakhaviherya akumi.—Salmo 146:3, 4.

Vareryani tho Genesis 3:19; ni Eklesiasti 9:6, 10.

 Yookhalavo Ewehereryo wa Achu Ookhwa?

NTAKHARA HEENI NNAKHUMAAYA NIKOHO NLA: Hiyaano ninnachuna okhala, opuha okumi ni yaale nnasivelaahu. Okhalano munkhela wa owoonatho oosiveliwa ahu ti echu ya muyareriwo.

PIIPILIYA ONAHUSIHA WII: Achu ancipale yaawo akhwile enarwa eviihiwa muukhwani. Yesu oolaiherya wi “othene ari m’mahiyeni enarwa-yiwa masu awe, ekhuma.” (Yohane 5:28, 29) Moovarihana ni yoochuna yoopacerya ya Muluku, achu anahaala oviihiwa enarwa ekhalano ekari ya okhala mparadaiso veelaponi yavathi. (Luka 23:43) Yoolaiheryiwa ela ya muhoolo enaphitaanyerya okumi woohimala ni woophaameya wa achu awiiwelela. Piipiliya onii: “Ekhaikhai tiniriaya yakhele elapo ya vathi, yikhaleleru mummo okhala wokhala.”Salmo 37:29.

Vareryani tho Yobu 14:14, 15; Luka 7:11-17; ni Saweriwa Tarummwa 24:15.

Kinii Kivekele Hai wi Kiwiriyaniwe ti Muluku?

NTAKHARA HEENI NNAKHUMAAYA NIKOHO NLA: Achu a ikerexa soothene annavekela. Nyenya, ancipale annoona wi mavekelo aya hanaakhuliwa.

PIIPILIYA ONAHUSIHA WII: Yesu oonihusiha wi nsepeke wuuluulela masu mmavekelo ahu. Owo oriye: “Vovekela muhúluleulule siyo hoe.” (Mateyu 6:7) Wakhala wi ninnachuna wi Muluku awiriyane mavekelo ahu, nnaphwanela ovekela mmukhalelo oneemereryiwa ti yoowo. Naariki neereno eyo, nnachuna ohuserya tiivi eri yookhwela ya Muluku namala nivekele moovarihana ni yeeyo. 1 Yohane 5:14 onnataphulela: “Wu ti onyesererya wiwo nriahuno mwa yowo, wi navekaru etchu ntoko ni okhwela wawe [wa Muluku], ananíwa.”

Vareryani tho Salmo 65:2; Yohane 14:6, 14; ni 1 Yohane 3:22.

Kinii Kiphwanye Hai Ohakalala Muukumini?

NTAKHARA HEENI NNAKHUMAAYA NIKOHO NLA: Achu ancipale aneemererya wi ikhorowa, ovuwa, oreera onahaala waavaha ohakalala. Mwawiihihaa awo annaavya ichu seiyo—nyenya annoona wi iho hasinahakalaliha.

PIIPILIYA ONAHUSIHA WII: Yesu ohooniherya yohulela ya ohakalala vaava owo aalonceiye: “Óréla ari óhawa m’munepani.” (Mateyu 5:3) Ohakalala weeparipari poti ophwanyiwa pahi wakhala wi ninneera echu wi nikhwaaniherye yoothowa ahu etokotokoxa—ochuna wahu omusuwela Muluku ni yoochuna awe ntakhara hiyaano. Eparipari eyo enaphwanyeya mPiipiliyani. Osuwela eparipari eyo enahaala onikhaviherya oroora yeeyo eri yoochuneyaxa ni yeeyo ehiri. Weemererya wi eparipari ya Piipiliya ehoolele soothanla ni saweera sahu ennahoolela okumi woohakalaliha.Luka 11:28.

Vareryani tho Proverpio 3:5, 6, 13-18 ni 1 Timoteo 6:9, 10.

 Mookwasa noothokororya maakhulo a Piipiliya a makoho mathanu nammoha. Nyu munnachuna osuwela vancipale opwaha ala? Wakhala wi mwa mmoha a “óhawa m’munepani,” moohikhwa minikwa nyu munnachuna. Akhweya nyu munniikoha makoho makina, ntoko ala: ‘Wakhala wi Muluku onnanthokororya, ntakhara heeni owo onneemererya onanara ni masooso mancipale veelaponi? Kinii kiwerye hai wunnuwiha makhalelo a echoko aka?’ Piipiliya onnavaha maakhulo oohakalaliha a makoho ala ni makina mancipale.

Nyenyanto, achu ancipale olelo annoovelela omwaalikhela Piipiliya. Awo anamoona Piipiliya ntoko liivuru mutokotoko oovila omwiiwexexa. Nyu munnachuna okhaviheryiwa wi mphwanye maakhulo mPiipiliyani? Anamoona a Yehova annavaha ifaramento piili seiyo sinahaala wookhaviheryaani.

Yoopacerya, liivuru Piipiliya Onahusiha Eheeni Chiryene? opakiwe wi aakhaviherye achu ooweiwa wi yaalikhele maakhulo awiiweyaxa a Piipiliya ntakhara makoho oochuneya. Efaramento yanapiili ti eprograma ya yoohuserya ya Piipiliya vachokoni yoohiliveliwa. Mmoha a Anamoona a Yehova mwaacamani anyu onawerya omuhusiha Piipiliya poti orwa vaate vanyu nari mpuro mukina onaphwanelela wi amaliha elukuluku tonto khata esumana amuthokororyaka Piipiliya ni nyuwo mwa mahala. Mamilyawu aachu mu elapo yoothene ahiiphwanyerya moorweela wa eprograma yeela. Ancipale a yaawo annaloca moohakalala wii: “Miyo koophwanya eparipari!”

Eparipari ya Piipiliya ti muhakhu mutokotoko orivovo. Chiryene Piipiliya onnanitaphula mu malavi, ohiiwanana, ni woova. Owo onnanivaha ewehereryo, yoochuna, ni ohakalala. Yesu oriye: “Munarwa-musuwelasha eparipari, nave eparipari enarwa-yotaphulani.”Yohane 8:32.