Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Tiheeni Piipiliya Onanihusiheiye?

 MWAHA 19

Mmwaacamele Yehova

Mmwaacamele Yehova

1, 2. Ti woowi nnahaalaahu ophwanyawo nchawelo olelo?

MWAANYIHERYE wi munamweeca nihiku na echeku etokweene. Erimu ennapacerya oriipa, nave etari ennaverunya. Voocharela epwila etokweene ennapacerya orupa. Munnaavya woochawelavo. Nave munnahakalala mwaphwanya nipuro noochawelavo noophwanelela!

2 Nri mmukhalelo mmohamoha olelo. Makhalelo a elapo ananvira enanaraka. Akhweya munniikoha: ‘Kini kichawele woowi?’ Mpiipiliyani namarepa a salumu, “onnalèla Apwiya ariki: ‘Muri ntxhawelo ni ikuru saka, Muluku aka kinamuroromelaka.’” (Salumu 91:2) Aai, Yehova onamunikhaviherya ni makacamiho ahu hiihaano, nave onnanivaha ewehereryo yoohakalaliha ya omwaahiyu.

3. Nnii niwerye hai ompaka Yehova voochawelavo vahu?

3 Yehova onanikhapelela hai? Owo onnanikhaviherya ovootha makacamiho nnakumanaahuno, nave owo takuru opwaha echu eri yoothene enii yeererye onipahula. Naamwi eniphacuwenle yoonanara hiihaano, nroromele wi Yehova onahaala orehererya soothene muhoolo. Piipiliya onnanilipiha: ‘Mwikhapelele mu osivela wa Muluku’. (Yuda 21, Nlakano Nahihano) Nnaphwanela omwaacamela Yehova wi anikhaviherye mu elukuluku yookacamiha. Nyenya nnii neereno hai?

MWAAKHULELE OSIVELA WA MULUKU

4, 5. Yehova onooniherya hai wi onnanisivela?

4 Wi nimwaacamele Yehova, nnaphwanela osuwela osivela otokweene oreiyeno ni hiyaano. Muupuwele soothene onaneereleiye. Oonivaha elapo yooreera erino  axinama ni miri saphaama. Owo oonivaha tho soolya soosiva ni maahi aphaama. Moorweela wa Piipiliya, Yehova oonisuweliha nsina nawe ni makhalelo awe ooreera. Opwaha soothene, owo ohooniherya osivela wawe otokweene moorweela wa omuruma veelaponi yavathi mwanawe oosiveliwa, Yesu, wi anivahe ekumi awe. (Yohani 3:16) Moorweela wa mukucho, hiyaano nookhalano ewehereryo yaphaama omwaahiyu.

5 Yehova ootikitherya Omwene wa Mesiya, olamulelo wa wirimu onahaala omaliha makacamiho oothene. Omwene onahaala otatuxa elapo okhala parataiso, mummo oothene anahaalaaya okhalaka oohakalala ni murecele woohimala. (Salumu 37:29) Mukhalelo mukina Yehova onooniheryeiye onisivela wawe ori onihusiha mukhalelo waphaama wa okhala hiihaano. Owo tho onnaniwopa ovekela wa yoowo, nave ori ooreheryeya wi aniwiriyane. Yehova onnooniherya osivela wawe wa muchu ti muchu.

6. Munii mwaakhulele hai osivela wa Yehova?

6 Munii mwaakhulele hai osivela wa Yehova? Mooniherye wi munnathamalela wa ichu soothene onaweereleiyeni. Moothananiha, ancipale olelo hanathamalela. Ela yaaneereya tho elukuluku Yesu ari veelaponi yavathi. Ekwaha emoha, Yesu aahaapenuxa alipa a mareca khumi, nyenya mmoharu pahi taathamalenle. (Luka 17:12-17) Nnachuna okhala ntoko mulopwana yoole aamuthamalenle Yesu. Nnachuna omuthamalelaka Yehova ilukuluku soothene.

7. Nnii nimusivele hai Yehova?

7 Nnaphwanela tho wooniherya osivela wahu wa Yehova. Yesu ahaaleela oomuchara awe wi emusiveleke Yehova ni murima aya woothene, ni okumi aya woothene, ni muupuwelo aya woothene. (Mwaalakhanye Mateu 22:37.) Ela enataphulela eheeni?

8, 9. Nnii nooniherye hai wa Yehova wi ninnamusivela?

 8 Apwanne olocaru pahi wi ninnamusivela Yehova ennaakhwanela? Hooye. Waakhala wi ninnamusivela Yehova ni murima ahu woothene, okumi, ni muupuwelo, nnahaala wooniherya mu saweera. (Mateu 7:16-20) Piipiliya onnanleela wi wakhala wi ninnamusivela Muluku, nnahaala wiiwelela malamulo awe. Apwanne ti woovila? Hooye, ntakhara malamulo a Yehova “hanalimela.”Mwaalakhanye 1 Yohani 5:3.

9 Naanamwiiwelela Yehova, nnamukhala oohakalala. (Isaiya 48:17, 18) Nyenya tiheeni enii enikhaviherye omwaacamela Yehova? Hankooni noone.

TITELELANI OMWAACAMELA YEHOVA

10. Ntakhara heeni ti yaphaama otitelela ohuserya vooloca sa Yehova?

10 Muwenrye hai okhala nthamwene a Yehova? Moorweela wa omuhuserya Piipiliya, moomusuwela phaama Yehova nave mookhalano onthamwene woolipa ni yoowo. Onthamwene owo ori ntoko mooro onachuna ohuheryiwa wi otitelele ovarela. Hiiha ntoko mooro onachunaaya ikhuuni wi otitelele ovarela, nyuwaano tho munaphwanela otitelela ohuserya sa Yehova wi onthamwene anyu otitelele okhala woolipa.Masiposipo 2:1-5.

Hiiha ntoko mooro, osivela wanyu wa Yehova onachuna ikhuuni wi otitelele ovarela

11. Mahusiheryo a Piipiliya anoovolowelaani hai?

11 Mwatitelela omuhuserya Piipiliya, munahaala ohuserya ichu sinahaala otannya murima anyu. Vaavaa Yesu aakhavihenryeiye oohuserya awe apiili wiiwexexa sooloherya, awo yaaloca: “Murima ahu hiwanimalamo vale alotxaka ni hiyano mwimphironi, antaphulelaka sorempwa?”Luka 24:32.

12, 13. (a) Tiheeni enii yeereye ni osivela wanyu wa Muluku? (b) Tiheeni nnaphwanelaahu weera wi osivela wahu wa Yehova ohiriirye?

12 Hiiha ntoko oohuserya a Yesu yaatannyen’ye  murima vaavaa yiiwexenxaaya soorepa, nyuwaano tho akhweya mwaahoona emohamoha vaavaa mwaapacenryaanyu omwiiwexexa Piipiliya. Eyo yaahookhaviheryaani omusuwela Yehova ni omusivela. Muheemererye wi osivela owo oriirye.Mateu 24:12.

13 Woona wi mwa nthamwene a Muluku, munaphwanela wiilipixerya wi onthamwene anyu otitelele okhala woolipa. Munaphwanela otitelela ohuserya sa yoowo ni Yesu, wuupuwelela yeeyo munahuseryaanyu ni mukhalelo wa opharihela mu okumi anyu. (Yohani 17:3) Variyari va yoohuserya anyu ya Piipiliya, muniikoha: ‘Ela enakihusiha eheeni vooloca sa Muluku? Ntakhara heeni kinaphwanelaaka omusivela Yehova ni murima vamoha ni okumi woothene?’1 Timóteo 4:15.

14. Nivekelo nnanikhaviherya hai?

14 Wakhala wi mookhalano nthamwene aphaama, nyuwaano munnaloca ni yoowo moohihiyererya, wi  onthamwene anyu otitelele okhala woolipa. Moolikana, vaavaa nnalocaahu ni Yehova moohihiyererya mu nivekelo, omusivela wahu onnakhala woolipa. (Mwaalakhanye 1 Tesalónika 5:17.) Nivekelo yamahala yaphaama enarwa wa Tiithi ahu a wirimu. Nloceke ni murima woothene ni yoowo. (Salumu 62:8) Tahi yaphaama wuuluulela mavekelo, nyenya ekhalekeno yootaphulela. Aai, wakhala wi nootitelela omuhuserya Piipiliya ni opaka mavekelo ni murima woothene, omusivela wahu Yehova onahaala okhala woolipa.

MWAALEELE AKINA VOOLOCA SA YEHOVA

15, 16. Munoona hai muteko wa olaleerya?

15 Wakhala wi ninnachuna otitelela omwaacamela Yehova, nnaphwanela tho waaleela akina soororomela sahu. Waaleela akina vooloca sa Yehova ekari etokweene. (Luka 1:74) Nave owo murici Yesu aavanheiye Akiristu oothene eeparipari. Mmoha ti mmoha a hiyo onaphwanela olaleerya michaka yaphaama ya Omwene wa Muluku. Moopacerya weerano yeeyo?Mateu 24:14; 28:19, 20.

16 Murummwa Paulo oona muteko wa olaleerya okhala wasisapo etokweene; owo aaloca wi waari “muhakhu.” (2 Korinto 4:7) Waaleela akina vooloca sa Yehova ni yoochuna awe muteko woochuneya yoowo munaphwanelaanyu weera. Ola mukhalelo wa omurumeela Yehova, nave owo onnathamalela yeeyo muneeraanyu wa yene. (Ahebri 6:10) Muteko wa olaleerya onnaakhaviherya oothene, nyuwaano ni yaale anawiriyana, wi mmwaacamela Yehova ni ophwanya okumi woohimala. (Mwaalakhanye 1 Korinto 15:58.) Apwanne wookhalavo muteko mukina onoovahaani ohakalala otokweene?

17. Ntakhara heeni muteko wa olaleerya ti wawaakuveya?

17 Muteko wa olaleerya ti wawaakuveya. Nnaphwanela  ‘olaleya nsu,’ ni ‘otitelela olalerya.’ (2 Timóteo 4:2) Achu anaphwanela wiiwa sa Omwene wa Muluku. Piipiliya onii: “Nihiku ntokotoko na esara y’Apwiya nohatxamela, nokhuvèla, nnarwa ni wakuva.” Makuchuwelo “helekelà.” (Sofoniya 1:14; Habakukhi 2:3) Aai, moohilekela, Yehova onahaala otoloxa elapo ela yoonanara ya Satana. Ehaakumve wi eyo yeereye, achu anaphwanela olopoliwa wi ethanle omurumeela Yehova.

18. Ntakhara heeni nnaphwanela omurumeela Yehova ni Akiristu akina eeparipari?

18 Yehova onachuna wi nimurumeeleke vamoha ni Akiristu akina eeparipari. Piipiliya onii: “Nlipihaneke mokhwelani ni mwamiteko saphama. Nave nihitxompeleke oya omathukumaneloni wahu, ntoko akina akhovelenlaya. Nto, nlipiseryaneke, opwahasa musuwelakatho wi ninnatxamela nihiku na orwa wa Apwiya.” (Ahebri 10:24, 25) Nnaphwanela wiilipixerya ophiya mmithukumano soothene. Mithukumano sinnanivaha ekari ya oceenyeryana ni olipihana mukina ni mukhwaawe.

19. Tiheeni enii enikhaviherye waasivela annihu?

19 Mmithukumanoni, munahaala waaphwanya asinthamwene aphaama yaawo anahaala wookhaviheryaani omurumeela Yehova. Munahaala waasuwela anna ni arokora oohiyanahiyana, yaawo aniilipixerya wi emurumeele Yehova. Hiiha ntoko nyuwaano, awo tho achu oohiphaameya annahesa. Wakhala wi ahoochekelaani, mwaakhurumuwele. (Mwaalakhanye Kolosi 3:13.) Ilukuluku soothene muthokororyeke makhalelo aphaama a anna ni arokora anyu Eekiristu, weerano yeeyo enahaala wookhaviheryaani waasivela ni omwaacamela Yehova.

EKUMI YEEPARIPARI

20, 21. “Ekumi yeparipari” tiheeni?

20 Yehova onachuna wi asinthamwene awe oothene  ekhaleno ekumi yaphaama. Piipiliya onnahusiha wi ekumi ahu omwaahiyu enahaala okhala yoohiyana ni yeela nryaahuno olelo.

Yehova onachuna wi mpuhe “ekumi yeparipari.” Apwanne hamunachuna?

21 Omwaahiyu, nnamukhalaka okhala wookhala, ohiya pahiru iyaakha 70 naari 80. Nnahaala opuha “ekumi yohimala” ni yoophaameya, murecele ni ohakalala mu parataiso ooreera. Piipiliya oniichana “ekumi yeparipari.” Yehova ooloca wi onahaala onivaha ekumi yeeyo yeeparipari, nyenya nnaphwanela weera soothene nnaweryaahu wi ‘niphwanye’ ekumi eyo.—1 Timóteo 6:12, 19.

22. (a) Nnii niwerye hai ophwanya “ekumi yeparipari”? (b) Ntakhara heeni hinnaphwanela ekumi yoohimala?

22 Nnii niwerye hai ophwanya “ekumi yeparipari”? Nnaphwanela ‘weraka saphama’ ni osareya “miteko saphama.” (1 Timóteo 6:18) Ela enataphulela wi nnaphwanela opharihela yeeyo nnahuseryaahu Mpiipiliya. Nyenya, hinnahaala ophwanya ekumi yeeparipari nthowa na wiilipixerya wahu pahiru. Hiyaano hinnaphwanela ekumi yoohimala. Eyo yamahala ya Yehova wa akapuro awe oororomeleya, navetho yawooniherya ya mahala awe “matokwenesa”. (Aroma 5:15) Tiithi ahu a wirimu chiryene onnachuna waavaha akapuro awe oororomeleya yamahala yeela.

23. Ntakhara heeni ti yaphaama opaka soolakelela saphaama hiihaano?

23 Mwiikohe, ‘Kinnamurumeela Muluku mmukhalelo owo oneemereryeiye?’ Wakhala wi mohoona wi munnaphwanela opaka matorokelo, ti yaphaama weerano mwawaakuveya. Vaavaa nnamuroromelaahu Yehova ni weera echu eri yoothene wi nimwiiwelele, Yehova onahaala okhala woochawelavo vahu. Owo onahaala waakhapelela akapuro awe oororomeleya mmahiku yaala ookuchula a elapo ela yoonanara ya Satana. Voocharela  Yehova onahaala weeriha wi nikhale mu Parataiso okhala wookhala, hiiha ntoko olaihenryeiye. Aai, munamukhalano ekumi yeeparipari wakhala wi moopaka soolakelela saphaama hiihaano!