1, 2. Nikoho taani achu ancipale anapakaaya?

NAYUUPURU oomwarya ipa sincipale. Mulopwana onneeyela ekerexa ni kapuchi, aaphoreihaka ni owiipha achu ancipale. Mai onnakhwa nthowa na ereca nave onnaahiya anamwane athanu a ikwaasuni.

2 Vaavaa sineereyaaya ipahu naari makacamiho ntoko yaala, achu ancipale anniikoha: “Ntakhara heeni?” Awo anachuna osuwela ntakhara heeni elapo esaren’yaaya makacamiho ni ipahu. Nyuwaano montoko wiikoha vooloca sa yeela?

3, 4. (a) Makoho taani Hapakukhi aapankeiye? (b) Nave Yehova aakhunle hai?

3 Piipiliya onnooniherya wi alopwana yaawo yaarino nroromelo noolipa wa Muluku yaapaka tho makoho ntoko yaala. Ntoko yootakiherya, mulipa a miririmu Hapakukhi aamukoha Yehova: “Munakòniheryani sohokololowa? Onaweryeya hai munan’weha pahi sohòsa?”Habakukhi 1:3.

4 Mu Habakukhi 2:2, 3, ninnaalakhanya naakhulo na Muluku wa nikoho na Hapakukhi nave aaroromeliha omaliha makacamiho. Yehova ookhalano osivela otokweene ntakhara achu. Piipiliya oni: “Ti yowo onokhapelelani.” (1 Pedro 5:7) Mweeparipari, Muluku hanasiveliwa owoona achu ehooxeyaka. (Isaiya 55:8, 9) Vano, Hankooni nthokororye nikoho nla: Ntakhara heeni aakhalavo makacamiho mancipale mweelaponi?

NTAKHARA HEENI AAKHALAVO MAKACAMIHO MANCIPALE?

5. Tiheeni ahooleli ancipale a ikerexa anahusihaaya vooloca sa makacamiho? Tiheeni Piipiliya onahusiheiye?

5 Mapastore naari mapaatiri, anahusiha wi Muluku  onakhwela wi achu ehooxeyeke. Akina analoca wi echu eri yoothene enamphacuwela muchu, ophitaanyerya epahu, ti Muluku aarepenle khalai nave tho annaloca wi ti woovila wiiwexexa nthowa nene. Akina annaloca wi achu ophitaanyerya anamwane, anakhwa wi yakhale ni Muluku wirimu. Nyenya ela tahi eparipari. Tahi Yehova oneeriha wi ichu soonanara seereyeke. Piipiliya onii: “Musuwele phama wi Muluku, owerya sothene, hanera itxhu sonanara ni s’ohokololowa.”Yobi 34:10.

6. Ntakhara heeni achu ancipale annamukhupanya Muluku nthowa na makacamiho oothene ari mweelaponi?

6 Achu ancipale annamukhupanya Muluku nthowa na makacamiho oothene ari mweelaponi, nthowa nawi awo anuupuwela wi ti Muluku onalamulela elapo. Nyenya noohuserya mu Mwaha 3, wi onalamulela elapo ela ti Satana Musaserya.

7, 8. Ntakhara heeni aakhalavo makacamiho mancipale mweelaponi?

7 Piipiliya onnanleela wi “elapo yothene ennatxhonkiwa ni mutakhali.” (1 Yohani 5:19) Mulamuleli a elapo ela, Satana, toosareya minkhela ni wuuma murima. Owo tori “munyenka a elapo yothene emakiwe.” (Wupulula 12:9) Achu ancipale anamutakiherya yoowo. Ti nthowa nene elapo esaren’yaaya wootha, wiicana, ni wiiphana.

8 Nookhalavo nthowa nikina nneeriha wi ekhalevo makacamiho mancipale veelaponi. Vaavaa Aatamu ni Haava yaachenkaaya, awo yaahaaraviha yoocheka anamwane aya. Nave nthowa na yoocheka, achu annaahooxa achu akina. Wiiliwiili awo anachuna okhala a vasulu waapwaha akina. Annawana, annaya okhoconi, ni waaroxa akina. (Eklesiyaste 4:1; 8:9) Ikwaha ikina achu annahooxeya nthowa nawi “orèryiwa ni otakhaliwa, honamuthanla mutxhu.” (Eklesiyaste 9:11) Nthowa na okhala va nipuro  noohiphwanelela ni elukuluku yoohiphwanelela, achu annaphacuweliwa epahu naari echu ekina yoonanara.

9. Ntakhara heeni nnaphwanelaahu ororomela wi Yehova ookhalano mathowa aphaama a weemererya wi makacamiho etitelele?

9 Yehova hantonko otannya makacamiho. Hinnaphwanela omukhupanya Muluku nthowa na ikhoco, nlala, ni masooso. Muluku tho hanatannya ipahu ntoko mwaacikinye, okumuwa wa echaya, naari maahi mancipale. Nyenya akhweya nyuwaano munniikoha, ‘Woona wi Yehova ta ikuru soothene, ntakhara heeni hanamaliha ichu soonanara?’ Ninnasuwela wi Muluku onnanthokororya vancipale, mwawiihiiha owo ookhalano mathowa oophwanelela a weemererya wi makacamiho etitelele.1 Yohani 4:8.

NTAKHARA HEENI MULUKU ONNEEMERERYA MAKACAMIHO

10. Waakaaha taani Satana aampakenleiye Yehova?

10 Mu emaca ya Eeteni, Musaserya aanwoka Aatamu ni Haava. Satana aamphuca Muluku wi owo mulamuleli oonanara. Owo aaloca wi Muluku onnaawatiiherya Aatamu ni Haava ichu saphaama. Satana aheeriha wi yuupuweleke wi yene ahaala okhala mulamuleli aphaama ompwaha Yehova nave wi awo hiyi enachuna olamuleliwa ni Muluku.Maphatxuwelo 3:2-5; moone Yooleeliherya 27.

11. Nikoho taani nnaphwanelaahu waakhula?

11 Aatamu ni Haava hiyaamwiiwelenle Yehova nave yaammwaryeela. Awo yuupuwela wi yaakhalano ophwanelela olakelela mukhataaya yeeyo yaari yaphaama ni yoonanara. Mano, Yehova ii ooniherye hai wi alipa oomwaryeya yaapaka yoothanla yoonanara, nave wi owo tasuwenle yeeyo eri yaphaama wa hiyaano?

12, 13. (a) Ntakhara heeni Yehova haatolonxe alipa oomwareya mwawaakuveya? (b) Ntakhara heeni Yehova oomuhiya Satana okhala mulamuleli a elapo nave wi achu eniilamulela mukhataaya?

12 Yehova haamutolonxe Aatamu ni Haava mwawaakuveya.  Ohiya yeeyo, owo aaheemererya wi awo ekhaleno anamwane. Voocharela, Yehova ohaavaha ekari anamwane a Aatamu ni Haava wi emuthanle yoowo anamuchunaaya wi akhale mulamuleli aya. Yookhwela ya Yehova ori wi elapo yavathi esareye ni achu oophaameya, nave eyo enahaala weereya moohipwacha wiilipixerya wa Musaserya.Maphatxuwelo 1:28; Isaiya 55:10, 11.

13 Satana aamwaakanhe Yehova variyari va ankeelo ancipale. (Yobi 38:7; Daniyeli 7:10) Mwawiihiiha Yehova oomvaha Satana elukuluku wi ooniherye waakhanle wi masu awe teeparipari. Owo tho oovaha elukuluku wi achu etikitherye olamulelo aya ehooleliwaka ni Satana wi yooneye waakhanle wi anahaala okhumelela phaama ehirino nikhaviheryo na Muluku.

14. Tiheeni yoonen’ye moovira wa elukuluku?

14 Mu iyaakha masana masaneene achu aheererya wiilamulela mukhataaya, nyenya hanakhumelela phaama. Yohooneya wi Satana mulipa a wootha. Achu annachuna nikhaviheryo na Muluku. Ti yeeparipari yeeyo mulipa a miririmu Yeremiya aalonceiye ariki: “Pwiya, kosuwela phama: Havo onasuwela omala wa ekumi awe, havo onathanla ephiro yaphama.”Yeremiya 10:23.

NTAKHARA HEENI YEHOVA OOWEHERERYA ELUKULUKU YINCIPALE?

15, 16. (a) Ntakhara heeni Yehova onneemererya wi makacamiho etitelele mu elukuluku yincipale? (b) Ntakhara heeni Yehova hanahiiha makacamiho anatannyiwa ni Satana?

15 Ntakhara heeni Yehova onneemererya wi makacamiho etitelele mu elukuluku yincipale? Ntakhara heeni hanahiiha ichu soonanara? Yaaphwanela oviravo elukuluku wi yooneye wi olamulelo wa Satana ti woonanara. Achu aheererya makhalelo oothene a olamulelo, ehikhumelelaka phaama. Naamwi ekele vahoolo mmakupa a  siyensiya ni ikhankoonya, nlelo Ikhoco, ohaawa, ohikhala eekhaikhai inamvira saacaka opwaha khalai. Hanrwa nikhumelela phaama wiilamulela mukhatiihu nihirino nikhaviheryo na Muluku.

16 Nave tho, Yehova hanahiiha makacamiho anatannyiwa ni Satana. Waakhanle wi onnahiiha, yaahaala otaphulela wi Muluku onnakhaviherya olamulelo wa Satana, nyenya Owo harwa eerano yeeyo. Nyenya tho, achu yaahala wuupuwelaka wi annakhumelela phaama mu wiilamulela mukhataaya. Nyenya eyo ti yawootha, nave Yehova hanakhaviherya wootha. Owo hantonko nave harwa ootha.Ahebri 6:18.

17, 18. Tiheeni Yehova onahaaleiye weera ni soothene sinanarihiwe ni Satana?

17 Apwanne Yehova onanwerya omaliha makacamiho oothene atannyiwe ni omwareya wa Satana vamoha ni achu? Aai. Wa Muluku, ichu soothene ti sooweryeya, Yehova onnasuwela elukuluku onahaaleiye waakhula waakaaha wa Satana. Voocharela onamweeriha wi elapo yoothene ekhale parataiso, hiiha ntoko aakhweleiye. Oothene yaale “ari mmahiyeni [anuupuweliwa]” enarwa evinya. (Yohani 5:28, 29) Achu herwa eniiceliwa tho naari okhwa. Yesu onahaala orehererya soothene sinanarihiwe ni Satana. Yehova onii ampharihele Yesu “wi amwarye miteko sa musaserya.” (1 Yohani 3:8) Ninnamuthamalela Yehova opixa wawe murima mu elukuluku yincipale ophiyerya nimusuwela ni olakelela omuthanla okhala Mulamuleli ahu. (Mwaalakhanye 2 Pedro 3:9, 10.) Naamwi nihooxeyaka, owo onnanikhaviherya ovootha.Yohani 4:23; mwaalakhanye 1 Korinto 10:13.

18 Yehova hananikhinyererya omuthanla owo ntoko Mulamuleli ahu. Yene ohaavaha achu yamahala ya othanla  wootaphuwa. Hankooni nthokororye yootaphulela ya yamahala eyo wa hiyaano.

MUNII MPHARIHELE HAI YAMAHALA YA OTHANLA WOOTAPHUWA?

19. Yamahala taani yoohakalaliha Yehova onivanheiye? Ntakhara heeni nnaphwanelaahu omuthamalela?

19 Yamahala yoohakalaliha ya othanla wootaphuwa ennanihiyaniha ni asinama akina. Awo aneera ichu mwawiiwanana ni yookhovelela aya, nyenya hiyaano ninnathanla mukhalelo nnachunaahu okhala, omuhakalaliha Yehova naari hooye. (Masiposipo 30:24) Nave tho, hanri ntoko maakina yaawo aneera pahiru yeeyo apakeliwaaya weera. Nookhalano otaphuwa wa othanla vooloca sa omuchu ahu, asinthamwene ahu, ni yeeyo nnakhwelaahu weera mu okumi ahu. Yehova onachuna wi nipuhe okumi.

20, 21. Yoothanla taani yaphaama munaphwanelaanyu opaka hiihaano?

20 Yehova onachuna wi nimusiveleke. (Mateu 22:37, 38) Owo ori ntoko tiithi onahakalala omwiiwa mwanawe ariki “miyaano kinnoosivelaani,” alocaka ni murima woothene ohiya nthowa na orummwa. Yehova oonivaha othanla wootaphuwa wa omurumeela yoowo naari hooye. Satana, Aatamu, ni Haava yaathanlile ohimwiiwelela Yehova. Hanka nyuwaano munii mpharihele hai yamahala ya othanla wootaphuwa?

21 Mpharihele oothanla wanyu wootaphuwa wi mmurumeele Yehova. Aakhalavo macikhwi macikhweene a achu yaawo athanlile omuhakalaliha Muluku ni omukhooca Satana. (Masiposipo 27:11) Tiheeni munaphwanelaanyu weera hiihaano wi mukhale mu elapo yahiihaano ya Muluku mummo oni ohikhalemo makacamiho oothene? Mwaha onacharela onahaala waakhula nikoho nenla.