Ocuphela mwaha

Ocuphela sampuwa

Anamoona a Yehova

Othanla elocelo Elomwe

 MWAHA 1

Muluku Taani?

Muluku Taani?

1, 2. Makoho taani wiiliwiili achu anapakaaya?

ANAMWANE annapaka makoho mancipale. Naamwi mwaakhunle, awo annatitelela okoha eriki, ‘Ntakhara heeni?’ Nave vaavaa muneereryaanyu owaakhula, awo annakookela okoha eriki, ‘Nyenya ntakhara heeni?’

2 Oothene hiyo, anamwane naari atokweene, ninnakhalano makoho. Akhweya ninniikoha vooloca sa yeeyo nnayaahu olya, owara naari othuma. Naari tho ninnakhalano makoho oochuneya vooloca sa okumi ni omwaahiyu. Nyenya wakhala wi hiniphwannye maakhulo oohakalaliha a makoho ahu, ninnahiya waavya maakhulo aya.

3. Ntakhara heeni ancipale anuupuwela wi hewerya ophwanya maakhulo a makoho aya oochuneya?

3 Apwanne Piipiliya ookhalano maakhulo a makoho oochuneya nryaahuno? Achu akina anneemererya wi ookhalano, nyenya anoona wi Piipiliya toovila omwiiwexexa. Awo akhweya anuupuwela wi pahiru ahusiha naari mapaatiri tasuwenle maakhulo ene. Nave akina annuuliwa muru weemererya wi hasuwenle maakhulo. Hanka nyuwaano munoona hai?

4, 5. Makoho taani oochuneya muryaanyuno? Ntakhara heeni ti yaphaama otitelela waasya maakhulo aya?

4 Moohikhwa minikwa munnachuna osuwela maakhulo a makoho ntoko ala: Ntakhara heeni kookhalano ekumi? Tiheeni enii yeereye ni miyaano kakhwa? Muluku ta mukhalelo taani? Yesu, Muhusiha oovuwa, aaloca: “Vekani ni munanvahiwa; asyakani ni munamphwanya; manakani nsele ni munamuhuleliwa.” (Mateu 7:7) Mutitelele waasya ophiyerya ophwanya maakhulo oororomeleya.

 5 Chiryene, wakhala wi munnatitelela ‘wasya’ munahaala ophwanya maakhulo Mpiipiliyani. (Masiposipo 2:1-5) Maakhulo awo hanavila wiiwexexa. Yeeyo munahaalaanyu ohuserya enahaala woovahaani ekumi yoohakalaliha hiihaano ni ewehereryo yaphaama ya muhoolo. Hankooni nthokororye nikoho nnaakacamiha achu ancipale.

MULUKU ONNANIKHAPELELA NAARI WI TAWUUMA MURIMA?

6. Ntakhara heeni achu akina anuupuwela wi Muluku hananikhapelela?

6 Achu ancipale anuupuwela wi Muluku hananikhapelela. Awo anuupuwela wi waakhanle wi Muluku onnanikhapelela chiryene, elapo ela yaahaala okhala yooreera. Nyenya sookhalavo ikhoco, wiicana ni ohaawa mmapuro oothene. Achu anniiceliwa, annahooxeya, nave tho annakhwa. Nthowa na yeela achu annakoha, ‘Waakhanle wi Muluku onnanikhapelela, ntakhara heeni hanamaliha makacamiho?’

7. (a) Ti mwawiihai ahooleli a malapelo anaweerihaaya achu wuupuwela wi Muluku tawuuma murima? (b) Nnasuwela hai wi Muluku hanatannya ichu soonanara?

7 Ahooleli a malapelo ikwaha ikina annaweeriha achu wuupuwela wi Muluku tawuuma murima. Vaavaa eneereyaaya epahu, awo analoca wi ela yookhwela ya Muluku. Nthowa na oloca yeela, annamunyemula Muluku. Nyenya Piipiliya onahusiha wi tahi Muluku onatannya soonanara. Tiyako 1:13 onnanleela wi Muluku hanaweererya achu ni ichu soonanara. Yoorepa ela enii: ‘Vano mutxhu, ereryiwa, ahilotxe: ti Muluku okirumihenle wereryiwa wu. Ntakhara Muluku hanawerya wereryiwa ni yonanara, nari mano hanamwererya mutxhu.’ Ela enataphulela wi Muluku onamweemererya wi ichu soonanara seereyeke, nyenya tahi wi tonatannya ichu iho.  (Mwaalakhanye Yobi 34:10-12.) Hankooni nivahe niphwanaphwaniho.

8, 9. Ntakhara heeni yaahaala okhala yoonanara omukhupanya Muluku nthowa na makacamiho ahu? Mvahe niphwanaphwaniho.

8 Mwaanyiherye sa mwaana mutokweene onakhala vaate va asitiithi awe. Atiithi awe annamusivela vancipale nave annamuhusiha mukhalelo wa opaka soolakelela saphaama. Ohoolo waya, mmiravo owo onnamwaryeya ophiyerya ahinawiiwelela atiithi awe nave avinyavo vaate. Onnapacerya weera ichu soonanara, nave onnamorela mmakacamiho. Mwaahaala waakhupanya atiithi awe nthowa na ohimuhiiha mwanaya ovinyavo vaate? Hooye! (Luka 15:11-13) Moolikana ni tiithi, Muluku haahiihale achu vaavaa yaathanlilaaya omwaryeya ni weera yoonanara. Mwawiihiiha, vaavaa enereyaaya echu yoonanara, nnaphwanela wuupuwelaka wi tahi Muluku otannyile. Yahaala okhala yoonanara omukhupanya Muluku.

9 Aakhalavo mathowa mancipale anamweeriha Muluku ohiya makacamiho wi yeereyeke. Mmwaha 11, Munahaala ohuserya tiheeni Piipiliya onahusiheiye vooloca sa yeeyo. Nyenya muroromele wi Muluku onnanisivela nave hanatannya makacamiho ahu. Moohiyana, ti yoowo pahiru onawerya omaliha makacamiho ahu.Isaiya 33:2.

10. Ntakhara heeni nnaphwanela ororomela wi Muluku onahaala oreherya ichu soothene sinanarihiwe ni achu oonanara?

10 Muluku taweela. (Isaiya 6:3) Ichu soothene oneereiye ti sawookololowa, soophwanelela ni saphaama. Nnaphwanela omuroromela. Owo hanalikana ni achu yaawo ikwaha ikina aneera ichu soonanara. Haavo orino ikuru sincipale soolikana ni Muluku. Owo ookhalano owerya otokweene nave onahaala oreherya soothene sinanarihiwe ni achu oonanara. Owo onahaala omaliha soonanara okhala wookhala.Mwaalakhanye Salumu 37:9-11.

 MULUKU ONOONA HAI OHOOXEYA WA ACHU?

11. Muluku onoona hai vooloca sa ohooxeya wanyu?

11 Muluku onoona hai vooloca sa makacamiho aneereya mweelaponi, nave nyuwaano munoona hai sa yeela? Piipiliya onahusiha wi “Apwiya annamukhwela mutxhu aphama.” (Salumu 37:28) Mwawiihiiha, Muluku onnasuwela ohiyaniha yaphaama ni yoonanara. Onnasooseya ni ohooxeya wa achu. Piipiliya onnaloca wi Muluku “aatuthuleya mmurimani” vaavaa ooneiye soonanara sirikimwaaca veelaponi ya vathi mmahiku a khalai. (Maphatxuwelo 6:5, 6, Tradução do Novo Mundo) Muluku hatoroken’ye. (Malakiya 3:6) Piipiliya onnooniherya wi Muluku onnookhapelelaani chiryene.Mwaalakhanye 1 Pedro 5:7.

Piipiliya onahusiha wi Yehova Mpatuxa oosivela a elapo yoothene

12, 13. (a) Ntakhara heeni nookhalano osivela ni waapwacha akina, nave munoona hai vooloca sa makacamiho ari mweelaponi? (b) Ntakhara heeni ninnaphwanela ororomela wi Muluku onahaala omaliha makacamiho oothene?

12 Piipiliya tho onnaloca wi Muluku onipatunxe moolikana ni yoowo. (Maphatxuwelo 1:26) Ela enataphulela wi owo onipanke ni makhalelo oolikana ni yaawo oreiyeno. Mwawiihiiha, wakhala wi munnasooseya nthowa na ohooxeya wa akina, Muluku tho onnasooseya vancipale! Nnasuwela hai yeeyo?

13 Piipiliya onahusiha wi “Muluku ti osivela.” (1 Yohani 4:8, Nlakano Nahihano) Echu eri yoothene Muluku onapakeiye enahooleliwa ni osivela. Hiyaano ninnasivela ntakhara wi Muluku ti osivela. Muupuwele ela: Waakhanle wi mookhalano owerya, mwaahaala omaliha makacamiho ni onanara ori mweelaponi? Moohikhwa minikwa mwaahaala weerano, ntakhara munnaasivela achu. Hanka vooloca sa Muluku? Owo ookhalano owerya, nave nthowa na onisivela wawe, onahaala omaliha makacamiho oothene.  Musuwele wi mareeliho alociwe wuupaceryani anahaala waakhwanela! Nyenya wi muroromele, munaphwanela osuwela sincipale vooloca sa Muluku.

MULUKU ONACHUNA WI MMUSUWELE

Wakhala wi munachuna opaka onthamwene ni muchu, nyuwaano munnamuleela nsina nanyu. Muluku oonileela nsina nawe Mpiipiliyani

14. Nsina na Muluku taani, nave nnasuwela hae wi nnaphwanela opharihela?

14 Wakhala wi munachuna opaka onthamwene ni muchu mukina, echu taani yoopacerya mwaahaalaanyu omuleela? Nsina nanyu. Muluku ookhalano nsina? Ikerexa sincipale sinaloca wi nsina nawe ti Muluku naari Apwiya, nyenya ala tahi masina. Iwo wiichana wa ncicimiho, ntoko “mwene” naari “musatoro.” Muluku onnanleela wi owo oniichaniwa Yehova. Salumu 83:18, NN, onii: “Wi esuwele wi Nyenyuru, nsina nanyu mwa Yehova, Mwa Awirimurimu velaponi yothene ya vathi.” Anamarepa a Piipiliya yaapharihela nsina na Muluku ikwaha sincipale. Yehova onachuna wi nyuwaano musuwele nsina nawe nave mpharihele. Owo ohooleelaani nsina nawe wi mukhale nthamwene awe.

15. Nsina nawi Yehova nnataphulela eheeni?

15 Nsina na Muluku, Yehova, nookhalano yootaphulela yoochuneya. Nsina nla nnataphulela wi owo onanwerya waakhwaniherya soolaiherya opankeiye ni weerano yoochuna  awe. Hiyaavo enii emuhiihe. Pahiru Yehova tonaphwanela okhalano nsina nenla. *

16, 17. Onataphulela eheeni wiichana wa ncicimiho (a) “a Ikuru sothene”? (b) “Mwene [oohimala] a ilapo”? (c) “Mpatuxa”?

16 Ntoko naalakhannyaahu woopaceryani, Salumu 83:18, NN, onnanleela vooloca sa Yehova: “Nyenyuru . . . mwa Awirimurimu velaponi yothene ya vathi.” Nave tho liivuru a Wupulula 15:3 onii: “Mitokotoko ni sotikiniha ti  miteko sà, weyano, Pwiya [Yehova] Muluku a ikuru sothene, miphiro sà ti sawokolola ni separipari, we mwene [oohimala] a ilapo.” Masu a ncicimiho awi “a ikuru sothene” anataphulela eheeni? Anataphulela wi Yehova ta ikuru opwaha echu eri yoothene eri mweelaponi. Nave masu a ncicimiho awi “mwene [oohimala] a ilapo” anataphulela wi owo tawiikhalelaru. Salumu 90:2 onnaloca wi Yehova Muluku onakhala ilukuluku soothene. Ela ti yootikhiniha!

17 Pahiru Yehova tori mpatuxa. Liivuru a Wupulula 4:11 onii: “Òphwanela ti . . . [Yehova] Muluku ahu wakhela ovuwa, ntxitximiho ni owerya wona wi opatunse itxhu sothene nave sopatusiwa sinnakhala wa nthowa na okhwela wà.” Aai, opacerya ankeelo wirimu, itheneeri sa wirimu, sawiima mmirini ni ihopa ineekha muniya—ti Yehova opanke ichu soothene munoonaanyu!

 MUNANWERYA OKHALA NTHAMWENE A MULUKU?

18. Ntakhara heeni achu akina anoona wi ti woovila okhala nthamwene a Muluku? Tiheeni Piipiliya onaloceiye sa yeela?

18 Achu annakhala a woova vaavaa anaalakhanyaaya vooloca sa makhalelo a Yehova, nave annuupuwela: ‘Muluku ta ikuru soothene, ta vasuluxa, nave ori ocai wene, owo akhweya hanakipwacha.’ Apwanne ti yeeyo Muluku onachuneiye wi nuupuweleke? Hooye tahi yeeyo. Yehova onachuna wi apake onthamwene ni hiyaano. Piipiliya onnaloca wi owo “hari òtxiwene wa hiyo.” (Saweriwa T’arummwa 17:27) Muluku onachuna wi nyuwaano mwaataane ni yoowo. Owo onnaroromeliha wi “onan’waatxamelani.”Tiyako 4:8.

19. (a) Munii muwerye hai okhala nthamwene a Muluku? (b) Makhalelo taani a Yehova anoosivelaani vancipale?

19 Munii muwerye hai okhala nthamwene a Muluku? Yesu aaloca: “Ekumi yohimala ti ela: Wi yawo yosuwele weyano Muluku mmoharu ni a eparipari, ni emusuwele yole omurummawe, Yesu Kristu.” (Yohani 17:3) Mwatitelela ohuserya, munahaala omusuwela Yehova ni Yesu. Nave munamukhalano ekumi yoohimala. Ntoko yootakiherya, noomala ohuserya wi “Muluku ti osivela.” (1 Yohani 4:16, NN) Nyenya tho owo ookhalano makhalelo makina ooreera. Piipiliya onnanleela wi Yehova “Muluku a ikharari, òrèra murima, òvilela ni òroromeleya.” (Mukwaha 34:6) Yehova, Muluku “òlevelela.” (Salumu 86:5) Muluku toopixa murima ni awiichacala. (2 Pedro 3:9; Wupulula 15:4) Munanwerya waaceererya ohuserya makhalelo yaala ooreera moorweela wa omwaalakhanya Piipiliya.

20-22. (a) Munii muwerye hai wiisoona okhala a waataana ni Muluku naamwi muhimoonaka? (b) Tiheeni eri yoophwanelela weera wakhala wi akina annoohihaani omuhuserya Piipiliya?

20 Munii muwerye hai waataana ni Muluku naamwi muhimoonaka? (Yohani 1:18; 4:24; 1 Timóteo 1:17)  Vaavaa munaalakhanyaanyu sa Yehova Mpiipiliyani, munahaala omusuwela ntoko muchu awooneya. (Salumu 27:4; Aroma 1:20) Vaavaa munayaanyuno vahoolo ohuserya wanyu vooloca sa Yehova, osivela wanyu onahaala wunnuwa nave munamwiisoona okhala nthamwene awe.

Ntoko tiithi onamusivela mwanawe, Tiithi ahu tho a wirimu onnanisivela vancipale

21 Munahaala osuwela wi owo Tiithi ahu. (Mateu 6:9) Owo onnanivaha ekumi, nave tho onachuna wi nikhaleno ekumi yaphaamaxa. Ti yeeyo tiithi oosivela onachuneiye wa anamwane awe. (Salumu 36:9) Aai, Piipiliya onahusiha wi nyuwaano munanwerya okhala nthamwene a Muluku. (Tiyako 2:23) Nkaanyiheryani, okhala nthamwene a Yehova, Mpatuxa a elapo. Ela ekari etokweene!

22 Achu akina anahaala ochunaka woohiihaani omuhuserya Piipiliya. Akhweya nthowa na woova wi munahaala ohiya ekerexa anyu. Nyenya muheemererye wi muchu vyakala oohiiheni okhala nthamwene a Yehova. Owo Nthamwene aphaama munaphwanelaanyu okhalano.

23, 24. (a) Ntakhara heeni munaphwanela otitelela opaka makoho? (b) Mwaha onacharela onahaala onikhaviherya hai?

23 Vaavaa munamuhuseryaanyu Piipiliya, sinahaala okhalavo ichu muhinahaalaanyu wiiwexexaka phaama. Muhuuliwe muru okoha naari oveka nikhaviheryo. Yesu aaloca wi ti yaphaama okhala a wiiyeviha, ntoko mwaana mukhaani. (Mateu 18:2-4) Anamwane annapaka makoho mancipale. Muluku onachuna wi nyuwaano mphwanye waakhuliwa waya. Mwawiihiiha, mmuhuserye Piipiliya moomaaleleya wi muroromele wi yeeyo munahuseryaanyu eparipari.Mwaalakhanye Saweriwa T’arummwa 17:11.

24 Mukhalelo waphaama wa osuwela vooloca sa Yehova ori omuhuserya Piipiliya. Mwaha onacharela, onahaala onikhaviherya osuwela ntakhara heeni Piipiliya toohiyana ni aliivuru akina.

^ par. 15 Wakhala wi mu Piipiliya anyu hinaamo nsina nla naari wakhala wi munachuna osuwela sincipale vooloca sa yootaphulela ni mukhalelo wa wiichana nsina na Muluku, moone Yooleeliherya 1.