Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Tiheeni Piipiliya Onanihusiheiye?

 MWAHA 15

Mukhalelo Waphaama Wa Omurumeela Muluku

Mukhalelo Waphaama Wa Omurumeela Muluku

1. Taani onawerya onleela mukhalelo waphaama wa omurumeela Muluku?

IKEREXA sincipale sinaloca wi inahusiha eparipari vooloca sa Muluku. Nyenya eyo tahi eparipari, ntakhara iho inahusiha ichu soohiyana vooloca sa Muluku ni mukhalelo wa omurumeela yoowo. Nnii nsuwele hai mukhalelo waphaama wa omurumeela Muluku? Pahiru Yehova tonawerya onleela mukhalelo waphaama wa omurumeela.

2. Munii muhuserye hai mukhalelo wa omurumeela Muluku?

2 Yehova onivaha Piipiliya wi nihuserye mukhalelo waphaama wa omurumeela. Mwawiihiiha, moorweela wa omuhuserya Piipiliya, Yehova onahaala wookhaviheryaani ophura mahusiheryo awe ntakhara owo onnoopwachaani.Isaiya 48:17.

3. Tiheeni Muluku onachuneiye wi neere?

3 Achu akina analoca wi Muluku onneemererya malapelo oothene, nyenya tahi yeeyo Yesu ohusinheiye. Owo ooloca: “Oni avolowe momwene wa Muluku tahi ole [pahiru] oni: ‘Pwiya, Pwiya’, nto ole onatxhariha okhwela wa Atithi aka ari wirimu.” Mwawiihiiha, ti woochuneya ohuserya vooloca sa yookhwela ya Muluku ni weerano. Ola mwaha mutokotoko ntakhara Yesu aahaalikanyiha achu ahinamwiiwelela Muluku ntoko achu ‘awera sotakhala.’Mateu 7:21-23.

4. Vooloca sa weera yookhwela ya Muluku, tiheeni Yesu olonceiye?

4 Yesu aalopola wi vaavaa nnachunaahu weera yookhwela ya Muluku, nnahaala okumanano makacamiho. Owo oloca: “Nvoloweke mulako mukhani, wona wi mulako ni mphiro sawunnuwa sinnamukeriha mutxhu worimelani.  Nave awatxa yale anakusa etila yeyo. Nto mulako ni mphiro inamukeriha mutxhu w’ekumi, oyeva. Nave ari vakhani yale anakusa mphiro yowo.” (Mateu 7:13, 14) Mphiro mukhaani, naari mukhalelo waphaama wa omurumeela Muluku, onakeriha wookumi. Nyenya mphiro wawunnuwa, naari mukhalelo woonanara wa omurumeela Muluku, onakeriha wootoloxiwani. Nyenya Yehova hanachuna wi muchu ori oothene akhwe. Owo oovaha ekari wa achu oothene ohuserya vooloca sa yene.2 Pedro 3:9.

MUKHALELO WAPHAAMA WA OMURUMEELA MULUKU

5. Munii mwaasuwele hai yaale anamurumeela Muluku mmukhalelo waphaama?

5 Yesu aaloca wi nnanwerya waasuwela yaale anamurumeela Muluku mmukhalelo waphaama, moorweela wa othokororya yeeyo aneemereryaaya ni aneeraaya. Owo aaloca: “Munamwasuwela ni sawima saya.” Nave ahaaceererya: “Miri sothene saphama inima saphama.” (Mateu 7:16, 17) Ela henataphulela wi yaale anamurumeela Muluku mmukhalelo waphaama achu oophaameya. Nyenya akapuro a Muluku anniilipixerya weera yeeyo eri yaphaama. Nnahaala woona tiheeni enii enikhaviherye waasuwela yaale anamurumeela Muluku mmukhalelo waphaama.

6, 7. Ntakhara heeni mahusiheryo a malapelo eeparipari anathipeleya Mpiipiliyani? Yootakiherya ya Yesu enanihusiha eheeni?

6 Malapelo ahu anaphwanela othipeleya Mpiipiliyani. Piipiliya onnaloca: “Sorempwa sothene supuwelihiwe ti Muluku, nave muteko aya ori ohusiha, ovanya sawotha, otxharusa ni ohusiha n’wokololani wi mutxhu a Muluku akhale awakhwanelela ni awireherya wera saphama sothene.” (2 Timóteo 3:16, 17) Murummwa Paulo aahaarepela Akiristu: “Mwakhelaka wa hiyo nsu na Muluku, himwakhenle ntoko nsu na atxhu, nto ntoko nsu neparipari  na Muluku.” (1 Atesalonika 2:13) Mahusiheryo eeparipari anathipeleya pahiru Mmasu a Muluku, Piipiliya. Hanathipeleya mu mawuupuwelo a achu, mihapo, naari mu ichu ikina.

7 Ichu soothene Yesu ohusinheiye saathipeleya Mmasu a Muluku. (Mwaalakhanye Yohani 17:17.) Wiiliwiili owo aanaromola Soorepa. (Mateu 4:4, 7, 10) Akapuro eeparipari a Muluku annachara yootakiherya ya Yesu nave mahusiheryo aya oothene anathipeleya Mpiipiliyani.

8. Tiheeni Yesu onihusinheiye vooloca sa omurumeela Yehova?

8 Nnaphwanela omurumeela pahi Yehova. Salumu 83:18, Nlakano Nahihano, onnaloca: “Wi esuwele wi Nyenyuru, nsina nanyu mwa Yehova, mwa Awirimurimu velaponi yothene ya vathi.” Yesu aachuna wi achu emusuwele taani ori Muluku eeparipari, nave aahaahusiha achu nsina na Muluku. (Mwaalakhanye Yohani 17:6.) Yesu aaloca: “Owepeseke Apwiya Muluku-à, nave yaworu onerawe onakokhorela.” (Mateu 4:10) Mwawiihiiha, ntoko akapuro a Muluku, ninnachara yootakiherya ya Yesu. Nnamurumeela pahiru Yehova, ninnapharihela nsina nawe, nave ninnaahusiha akina nsina na Muluku ni yeeyo owo onahaaleiye oweerela.

9, 10. Nnooniherya hai osivela wa achu akina?

9 Ninniilipixerya waasivela achu oothene. Yesu aahaahusiha oomuchara awe wi esivelaneke mukina ni mukhwaawe. (Mwaalakhanye Yohani 13:35.) Moohipwacha nruulaahuwo, sookhovelela sahu, naari waakhanle wi naachu ooreela naari ohaawa. Osivela wahu wa achu oothene onnaniiwananiha ni annihu vamoha ni arokora ahu. (Kolosi 3:14) Mwawiihiiha hiyaano hannaya okhoconi naari owiipha achu. Piipiliya onnaloca: ‘Mwa yela t’anoneyaya anamwane a Muluku ni anamwane a musaserya: Othene yole ohinera yawokololowa ni ohinamukhwela munnawe,  hanarwa wa Muluku.’ Nave onnaaceererya: “Nikhwelaneke mukina ni mukhwawe; ohiri ntoko Kaím arule wa mutakhali amwipha munnawe.”1 Yohani 3:10-12; 4:20, 21.

10 Hiyaano ninnapharihela elukuluku ahu, ikuru sahu, ni sookhalano sahu wi naakhaviherye ni waalipiha akina. (Ahebri 10:24, 25) Nnachuna wi “niwereleke saphama atxhu othene.”Galasya 6:10.

11. Ntakhara heeni ninnamweemererya Yesu okhala ephiro yooyano wa Muluku?

11 Ninnamwiiwelela Yesu ntakhara owo ephiro yooyano wa Muluku. Piipiliya onii: “Hiwavo ovuluwa wa mutxhu mukina, wona wi vathiva hinavo nsina nikina nivahiwe atxhu wi hiyo nivuluwele.” (Saweriwa T’arummwa 4:12) Mmwaha 5 wa liivuru yoola, noohuserya wi Yehova oomurumiha Yesu wi avahe okumi awe ntoko woopola wa achu awiiwelela. (Mateu 20:28) Yehova omuthanla Yesu wi akhale Mwene a elapo yoothene ya vathi. Ti nthowa nene Piipiliya onanleeleiye wi namwiiwelela Yesu nnahaala okhalano okumi woohimala.Mwaalakhanye Yohani 3:36.

12. Ntakhara heeni nihinavolowelaahu miyaha sa elapo?

12 Hannaphwanela ovolowela miyaha sa elapo. Yesu haavolowenle miyaha sa elapo. Vaavaa owo aathorihiweiye, owo aaloca ni Pilato mwene a o Roma ariki: “Omwene aka tahi wa elapo yela.” (Mwaalakhanye Yohani 18:36.) Hiiha ntoko Yesu, hiyaano ninnooniherya okhala oororomeleya wa Omwene wa Muluku ori wirimu, nave mwa nthowa na yeela, nihipwachaka nnakhalaahuwo, hannavolowela miyaha sa elapo. Naamwi hiiha, Piipiliya onnanceenyerya “owiwelela asitokwene a elapo,” yaawo ari alamuleli. (Aroma 13:1) Ninniiwelela malamulo a elapo nnakhalaahuwo. Nyenya, wakhala wi malamulo awo annavaanyihana ni malamulo a Muluku, hiyaano ninnaatakiherya arummwa, yaawo yaalonce:  “Ennakhweleyasa  omwiwelela Muluku wapwaha atxhu.”Saweriwa T’arummwa 5:29; Marko 12:17.

13. Tiheeni nnalaleeryaahu vooloca sa Omwene wa Muluku?

13 Ninneemererya wi pahiru Omwene wa Muluku tonahaala omaliha makacamiho a elapo. Yesu aaloca wi “Mutxhaka . . . wa Omwene” waahaala olaleeryiwa mu elapo yoothene yavathi. (Mwaalakhanye Mateu 24:14.) Hiwaavo olamulelo veelaponi yavathi onawerya weera yeeyo Omwene wa Muluku onahaalaaya oneerela. (Salumu 146:3) Yesu oonihusiha ovekela ntakhara Omwene wa Muluku vaavaa aalonceiye ariki: “Omwene anyu orwe. Okhwela wanyu wereye, ntoko wirimu hiha vathiva.” (Mateu 6:10) Piipiliya onnanleela wi Omwene wa Muluku onahaala otoloxa olamulelo woothene wa achu nave Omwene awe “onamukhala mahiku othene.”Daniyeli 2:44.

14. Nikhuuru taani nnamurumeela Muluku mmukhalelo waphaama?

14 Nimanlaahu ohuserya miyaha seiha, mwiikohe: ‘Nikhuuru taani mahusiheryo aya anathipeleya Mpiipiliyani? Nikhuuru taani nnaahusiha akina vooloca sa nsina na Muluku? Nikhuuru taani nnooniherya osivela otokweene wa achu oothene nave aneemererya wi Muluku oomurumiha Yesu wi anivuluxe? Nikhuuru taani nihinavolowela miyaha sa elapo? Nikhuuru taani nnalaleerya wi pahiru Omwene wa Muluku tonahaala omaliha makacamiho ahu?’ Pahiru ti Anamoona a Yehova.Isaiya 43:10-12.

TIHEENI MUNAHAALAANYU WEERA?

15. Tiheeni nnaphwanelaahu weera wi Muluku eemererye omurumeela wahu?

15 Weemererya pahi wi Muluku ookhala, henaakhwanela. Masololo tho anneemererya wi Muluku ookhala, nyenya hanamwiiwelela. (Tiyako 2:19) Wi Muluku eemererye omurumeela wahu, hannaphwanela pahiru weemererya  wi okhala, nyenya tho nnaphwanela weerakano yeeyo onaloceiye.

16. Ntakhara heeni nnaphwanelaahu okhooca malapelo atheru?

16 Wi Muluku eemererye omurumeela wahu, nnaphwanela okhooca malapelo atheru. Mulipa a miririmu Yesaya oorepa: “Haya, haya! Vinyan’wo nno! Muhiphare etxhu yamwikho.” (Isaiya 52:11; 2 Korinto 6:17) Ti nthowa nene nnaphwanelaahu okhooca echu eri yoothene eneeriwa mmalapelo atheru.

17, 18. “Babilónia mutokotoko” tiheeni, nave ntakhara heeni ti woochuneya okhumamo mwawaakuveya?

17 Malapelo atheru tiheeni? Malapelo oothene yaawo anahusiha yeeyo ehiniiwanana ni Masu a Muluku. Piipiliya oniichana malapelo yaawo ntoko “Babilónia mutokotoko.” (Wupulula 17:5) Ntakhara heeni? Mahusiheryo mancipale oowoka yaapacenrye o Paapulu, emanle ovira maahi mancipale mmahiku a Noowa. Mahusiheryo awo atheru yaamwaramwaxeya veelaponi yoothene. Ntoko yootakiherya, achu yakhala o Paapulu yaanaalapela amuluku a mikhalelo miraru. Olelo, malapelo mancipale anahusiha wi Muluku ori mmakhalelo mararu, nyenya Piipiliya onahusiha wi orivo Muluku mmoharu, Yehova, nave Yesu ti Mwanawe. (Yohani 17:3) Achu yakhala o Paapulu tho yeemererya wi muchu akhwa, munepa awe honakhwa nave wi onnahooxiwa omooroni. Nyenya ela tahi eparipari.—Moone Yooleeliherya 14, 17, ni 18.

18 Muluku ooloherya wi malapelo oothene atheru anahaala otoloxiwa. (Wupulula 18:8) Munniiwexexa phaama ntakhara heeni ti woochuneya okhumamo mwawaakuveya mmalapelo atheru? Yehova Muluku onachuna wi mweereno yeela ohaakumve oxavo.Wupulula 18:4.

Moorweela wa omurumeela Yehova ni achu awe, munahaala opaka makupa a emusi awe ya elapo yoothene

19. Vaavaa munalakelelaanyu okhala kapuro a Yehova, ti mwawiihai owo onahaaleiye wookhapelelaani?

19 Vaavaa munalakelelaanyu ohiya malapelo atheru ni  omurumeela Yehova, akhweya asinthamwene anyu naari amusi heni yiiwexexe phaama ntakhara heeni mpankaanyu yoolakelela yeeyo, nave akina anahaala owiicani. Nyenya Yehova harwa oohiyaani. Nyuwaano munahaala opaka makupa a emusi yawiiwanana ya elapo yoothene anasivelana mukina ni mukhwaawe mweeparipari, nave munahaala okhalano ohakalala otokweene mu elapo evyaani ya Muluku. (Marko 10:28-30) Akhweya akina a asinthamwene yaawo naari amusi moovira wa elukuluku anamulakelela omuhuserya Piipiliya ni omurumeela Yehova.

20. Ntakhara heeni ti woochuneya omurumeela Yehova mmukhalelo yoowo oneemereryeiye?

20 Moohilekela, Muluku onahaala waatoloxa achu oothene oonanara nave Omwene awe onahaala olamulela elapo yavathi. (2 Pedro 3:9, 13) Eyo enahaala okhala elukuluku yoohakalaliha! Oothene anahaala omurumeela Yehova mmukhalelo yoowo onachuneiye. Ti woochuneya weeravo echu hiihaano wi nimurumeele Yehova mmukhalelo owo oneemereryeiye.