Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Tiheeni Piipiliya Onanihusiheiye?

 MWAHA 14

Echoko Anyu Enanwerya Okhala Yoohakalala

Echoko Anyu Enanwerya Okhala Yoohakalala

1, 2. Yehova onachuna wi ichoko ikhaleke hai?

YEHOVA MULUKU aatikitherya othela woopacerya. Piipiliya onnanleela wi Apwiya Yehova yaampatuxa muthiyana oopacerya nave “yàmukeriha wa mulopwana.” Aatamu aatepa ohakalala ophiyerya aloca: “Txhiri ola ti nikhuva na makhuva aka, ethai ya ethai aka.” (Maphatxuwelo 2:22, 23) Ela ennanihusiha wi Yehova aachuna wi alipa oothelana ekhaleke oohakalala.

2 Moothananiha, ichoko sincipale hasinahakalala. Nyenya, Piipiliya ookhalano malakiheryo anamukhaviherya muchu ti muchu veechokoni okhaviherya ohakalala.Luka 11:28.

TIHEENI MULUKU ONAWEHERYEIYE WA ALOPWANA

3, 4. (a) Alopwana anaphwanela waakhaliha hai asaaraya? (b) Ntakhara heeni ti woochuneya mulopwana ni mwaariye okhurumuwelana?

3 Piipiliya onaloca wi mulopwana aphaama onaphwanela omusivela ni omucicimiha mwaariye. Ninnoovekaani wi mmwaalakhanye Éfeso 5:25-29. Ti woochuneya wi mulopwana amusiveleke mwaariye ilukuluku soothene. Owo tho onaphwanela omukhapelela, okhala ni yoowo, ni oheerano echu enahaala omunyeenyeiha.

4 Nyenya tiheeni mulopwana onaphwaneleiye weera vaavaa mwaariye onaheseiye? Alopwana annaleeliwa: “Nyuwano tho alopwana, mwakhweleke asarinyu ni muhakhaleleke òpwalu.” (Kolosi 3:19) Alopwana nyu, muupuwele wi nyuwaano tho munnahesa. Nave wakhala  wi munnachuna wi Muluku ookhurumuweleeni, munaphwanela tho waakhurumuwela asaarinyu. (Mateu 6:12, 14, 15) Wakhala wi mulopwana ni muthiyana annakhurumuwelana, eyo enamwaakhaviherya okhalano othela woohakalaliha.

5. Ntakhara heeni alopwana anaphwanela waacicimiha asaaraya?

5 Yehova onachuna wi alopwana yaacicimiheke asaaraya. Mulopwana onaphwanela othokororyaka soothowa sa mwaariye. Ola mwaha mutokweene. Wakhala wi mulopwana hanampwacha mwaariye, Yehova hani awiriyaneke mavekelo awe. (1 Pedro 3:7) Echu eneeriha wi muchu akhale oochuneya ori omusivela Yehova, ohiya nthowa na okhala mulopwana naari okhala muthiyana.

6. Enataphulela eheeni mulopwana ni mwaariye okhala “mutxhu mmoharu”?

6 Yesu aaloca wi mulopwana ni muthiyana “hari eli, nto mutxhu mmoharu.” (Mateu 19:6) Awo anaphwanela okhala ororomeleya mukina ni mukhwaawe ohiya okhala achu oohiroromelana. (Masiposipo 5:15-21; Ahebri 13:4) Wakhala wi mmoha variyari va achu oothelana onnachuna ophitaana ni mukina, awo anaphwanela othokororyanaka. (1 Korinto 7:3-5) Mulopwana onaphwanela wuupuwela wi “havo otonko onyemula mwili awe, nto mutxhu ti mutxhu onnapwatxha mwili awe, onnalyiha ni onnakhapelela.” Mwawiihiiha, mulopwana onaphwanela omukhapelelaka mwaariye. Opwaha echu eri yoothene, muthiyana onachuna wi iyawe akhale oosivela, ni eepewe wa yene.Éfeso 5:29.

TIHEENI MULUKU ONAWEHERYEIYE WA ATHIYANA

7. Ntakhara heeni veechokoni onnachuneyavo oohoolela?

7 Echoko eri yoothene ennamuchuna oohoolela, muchu yoowo onii ahooleleke echoko wi enalapa phaama. Piipiliya onnaloca mu 1 Korinto 11:3: “Muru wa . . . [alopwana]  othene ti Kristu, ni muru wa muthiyana ti mulopwana, nave muru wa Kristu ti Muluku.”

8. Muthiyana onii ooniherye hai ncicimiho wa iyawe?

8 Mulopwana ori oothene onnahesa. Nyenya vaavaa mwaariye onakhaviheryeiye soolakelela sa iyawe ni ochariha, echoko yoothene ennaphura. (1 Pedro 3:1-6) Piipiliya onii: “Nave muthiyana amutxitximiheke iyawe.” (Éfeso 5:33) Hanka wakhala wi mulopwana tahi Mukiristu? Muthiyana nlelo onaphwanela omucicimihaka vancipale. Piipiliya onii: “Vamohamohatho nyuwo, athiyana n’wiweleleke asiyanyu, wi, nari akina wa yawo ehemereryaka nsu, ekusiwe ti metxelo anyu, ohirivo masu, yonaka metxelo anyu aphama ni awisumaliha.” (1 Pedro 3:1, 2) Yootakiherya yaphaama ya muthiyana enanwerya omukhaviherya iyawe wiiwexexa ni ocicimiha soororomela sawe.

9. (a) Tiheeni muthiyana onaphwaneleiye weera wakhala wi haneemererya moonelo wa iyawe? (b) Nlakiheryo taani wa athiyana nnaphwanyeya mu Tito 2:4, 5?

9 Tiheeni muthiyana onaphwaneleiye weera wakhala wi haneemererya moonelo wa iyawe? Owo onaphwanela ovaha moonelo awe mmukhalelo woocicimiha. Ntoko  yootakiherya, Saara aaloca echu yeeyo yaamunananre Aaparahamu, nyenya Yehova aamuleela Aaparahamu ariki: “Omwèlihe murima Sara.” (Maphatxuwelo 21:9-12) Wakhala wi mulopwana oopaka yoolakelela ehinavanyihana ni Piipiliya, muthiyana onaphwanela okhaviherya. (Saweriwa T’arummwa 5:29; Éfeso 5:24) Muthiyana aphaama onnathokororya echoko awe. (Mwaalakhanye Tito 2:4, 5.) Vaavaa iyawe ni anamwane awe anoonaaya mukhalelo owo oniilipixeryeiye wi aakhaviherye,awo anahaala omusivelaka ni omucicimiha vancipale.Masiposipo 31:10, 28.

Ti mwawiihai Saara ovanheiye yootakiherya yaphaama wa athiyana ootheliwa?

10. Tiheeni Piipiliya onaloceiye sa omwalamwala ni omwalana?

10 Ikwaha ikina atheli annalakelela omwalamwala naari omwalana mwawaakuveya. Mwawiihiiha, Piipiliya onaloca “wi muthiyana ahimwalane ni iyawe” nave tho wi “mulopwana ahimwalane ni mwariye.” (1 Korinto 7:10, 11) Annakhumelela makacamiho yaawo aneeriha wi atheli emwalamwale, nyenya ela yoolakelela etokweene. Hanka vooloca sa omwalana? Piipiliya onnaloca nthowa nimoharu noophwanelela wi atheli emwalane wakhala wi mulopwana naari muthiyana ooraruwa ni muchu mukina.Mateu 19:9.

TIHEENI MULUKU ONAWEHERYEIYE WA ASITIITHI

Yesu yootakiherya yaphaama wa achu oothene va echoko

11. Tiheeni anamwane anachunaaya opwaha echu ekina?

11 Asitiithi nyu, munaphwanela okhalaka ni anamwane anyu mu ilukuluku sincipale. Anamwane anyu annachuna okhala ni nyuwaano, opwaha echu ekina, awo anachuna wi mwaahusihe vooloca sa Yehova.Malamulo 6:4-9.

12. Tiheeni asitiithi anaphwanelaaya weera wi yaakhapelele anamwane aya?

12 Elapo ya Satana enamvira ekhalaka yoonanara, nave aakhalavo achu anachuna waapahula anamwane anyu, ntoko waakoniha. Asitiithi akina anoona okhala yawuuliha muru oloca mwaha yoola ni anamwane. Nyenya  asitiithi anaphwanela waalopola anamwane aya vooloca sa achu ntoko yaawo ni mukhalelo wa wiikasopa. Asitiithi, mwaakhapelele anamwane anyu. *1 Pedro 5:8.

13. Asitiithi anaphwanela waahusiha hai anamwane aya?

13 Asitiithi aakhalano murici wa waahusiha anamwane aya meecelo aphaama. Munii muwerye hai waahusiha anamwane anyu? Anamwane anyu anachuna ovyakihiwa, nyenya olaka honaphwanela okhala woonanara naari woohooxa. (Yeremiha 30:11) Muhirwe mmulake  mwaninyu muniiha muri oonyeenyeya. Muheerihe wi masu anyu ekhale oophoreiha “ntoko nsipàtxa.” (Masiposipo 12:18) Mwaahusihe anamwane anyu ntakhara heeni awo anaphwanelaaya okhala a wiiwelela.Éfeso 6:4; Ahebri 12:9-11; moone Yooleeliherya 30.

TIHEENI MULUKU ONAWEHERYEIYE WA ANAMWANE

14, 15. Ntakhara heeni anamwane anaphwanelaaya owiiwelelaka asitiithi aya?

14 Yesu aanawiiwelela Atiithi awe ilukuluku soothene, naamwi waari woovila. (Luka 22:42; Yohani 8:28, 29) Yehova onaweherya tho wi anamwane ewiiweleleke asitiithi aya.Éfeso 6:1-3.

15 Anamwane nyu, naamwi moonaka wi ti woovila owiiwelela asitiithi anyu, muupuwele wi wakhala wi munniiwelela, Yehova vamoha ni asitiithi anyu anamuhakalala ni nyuwaano. *Masiposipo 1:8; 6:20; 23:22-25.

Tiheeni enahaala waakhaviherya anaamiravo okhala oororomeleya wa Muluku vaavaa aneehiwaaya wi yeere echu yoonanara?

16. (a) Ti mwawiihai Satana onaweeriheiye anamwane weera yeeyo eri yoonanara? (b) Ntakhara heeni ti woochuneya waathanla asinthamwene anamurumeela Yehova?

16 Musaserya onnaapharihela asinthamwene anyu naari anaamiravo akina wi eweeheeni. Owo onnasuwela wi yaweeha eyo enamukhala yoovila ovootha. Ntoko yootakiherya, Tiina mwaana a Yakopo, aakhalano asinthamwene yaawo yahaamurumeela Yehova. Ela yaaruuha makacamiho matokweene variyari va emusi awe. (Maphatxuwelo 34:1, 2) Wakhala wi asinthamwene anyu hanamurumeela Yehova, awo anahaala wookhinyereryaani weera echu enamunanara Yehova, yeeyo enahaala oruuha makacamiho wa nyuwaano, emusi anyu, vamoha tho ni Muluku. (Masiposipo 17:21, 25) Ti nthowa nene oryaaya woochuneya  waathanla asinthamwene anamurumeela Yehova.1 Korinto 15:33.

ECHOKO ANYU ENANWERYA OKHALA YOOHAKALALA

17. Murici taani muchu ti muchu va echoko oreiyeno?

17 Wakhala wi achu oothene va echoko annachariha malakiheryo a Muluku, awo annasepa makacamiho mancipale. Mwawiihiiha, waakhanle wi nyuwaano mwa mulopwana oothela, mmusiveleke mwaarinyu nave mmukhapeleleke. Waakhanle wi nyuwaano mwa muthiyana ootheliwa, mwaacicimiheke ni owiiwelela aiyanyu nave mucharihe yootakiherya ya muthiyana onalociwa mu Masiposipo 31:10-31. Wakhala wi nyuwaano mwa asitiithi, mwaahusihe anamwane anyu omusivela Muluku. (Masiposipo 22:6) Wakhala wi nyuwaano mwa tiithi, ‘mwetxihe phama’ echoko anyu. (1 Timóteo 3:4, 5; 5:8) Nave anamwane nyu, nwiiweleleke asitiithi anyu. (Kolosi 3:20) Muupuwele wi muchu ori oothene va echoko onnahesa, mwawiihiiha, mukhale awiiyeviha ni oveka nikhurumuwelo. Aai, Piipiliya ookhalano malakiheryo wa muchu ti muchu va echoko.

^ par. 12 Wi mukhaleno sooleeliherya ikina mmukhalelo wa waakhapelela anamwane anyu moone mwaha 32 wa Liivuru Grande Instrutor, olaleeryiwe ni Anamoona a Yehova.

^ par. 15 Anamwane hanaphwanela wiiwelela wakhala wi asitiithi aya annaruma echu yeeyo enawatiihiwa Mpiipiliyani.—Saweriwa T’arummwa 5:29.