Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Tiheeni Piipiliya Onanihusiheiye?

 MWAHA 13

Mucicimihe Yamahala Ya Ekumi

Mucicimihe Yamahala Ya Ekumi

1. Taani onivanhe ekumi?

YEHOVA “Muluku a ekumi.” (Yeremiya 10:10) Owo tonipatunxe nave anivaha ekumi. Piipiliya onnanleela wi owo “opatunse itxu sothene, nave sopatusiwa sinnakhala wa nthowa na okhwela [wawe].” (Wupulula 4:11) Aai, Yehova onachuna wi nikhale akumi. Ekumi yamahala enarwa wa yoowo.Mwaalakhanye Salumu 36:9.

2. Tiheeni nnaphwanelaahu weera wi nipuhe phaama ekumi ahu?

2 Yehova onnanivaha yeeyo nnachunaahu wi nikhale akumi, ntoko yoolya ni maahi. (Saweriwa T’arummwa 17:28) Nyenya opwaha yeeyo, owo onachuna wi nipuheke ekumi. (Saweriwa T’arummwa 14:15-17) Wi nipuhe phaama ekumi ahu, nnaphwanela wiiwelelaka malamulo a Muluku.Isaiya 48:17, 18.

MULUKU ONOONA HAI EKUMI

3. Tiheeni Yehova enreiye ni Kayine amanle omwiipha Apele?

3 Piipiliya onnanihusiha wi ekumi ahu ni ekumi ya achu akina ti yookhweleya wa Yehova. Ntoko yootakiherya, vaavaa Kayine—mwana a Aatamu ni Haava—aareiyeno wiica otokweene ni munneeni Apele, Yehova aamulopola Kayine wi owo aaphwanela wiikasoopaka ni esara awe. Nyenya Kayine hawiriyanne, nave owo aatepa onanariwa ophiyerya “àmphoreiha munnawe ni àmwipha.” (Maphatxuwelo 4:3-8) Yehova aamulaka Kayine nthowa na omwiipha munneeni Apele. (Maphatxuwelo 4:9-11) Mwawiihiiha, esara ni wiica ichu soonanara ntakhara sinnatannya owanawana ni wiiphana. Muchu yoowo oneera ichu ntoko seiha hanii aakhele ekumi yoohimala. (Mwaalakhanye 1 Yohani 3:15.) Wi nimuhakalalihe Yehova, nnaphwanela ohuserya waasivela achu oothene.1 Yohani 3:11, 12.

4. Malamulo Muluku aavanheiye Aisarayeli ananihusiha eheeni vooloca sa yamahala ya ekumi?

 4 Ivinrevo iyaakha sincipale, Yehova ahooneiha wi onnacicimiha ekumi vaavaa aavanheiye Malamulo Khumi wa Moose. Nlamulo nimoha na yaawo nnaloca ha: “Ohimwipheke mutxhu.” (Malamulo 5:17) Wakhala wi muchu oomwiipha muchu mukhweiye mwaayiini, owo tho aaphwanela wiiphiwa.

5. Muluku onoona hai vooloca sa oyeeha erukulu?

5 Muluku onoona hai vooloca sa oyeeha erukulu? Ophiyerya tho ekumi ya mwaana orupaliwe ti yasisapo wa Yehova. Mu Nlamulo na Yehova naavahiwe Aisarayeli, Yehova aaloca wi muchu aahaala ommana mai orupanle nave ophiyerya erukulu emoramo, muchu owo aaphwanela wiiphiwa. (Mwaalakhanye Mukwaha 21:22, 23; Salumu 127:3.) Ela enanihusiha wi oyeeha erukulu echu yoonanara.—Moone Yooleeliherya 28.

6, 7. Nnii nooniherye hai wa Yehova wi ninnacicimiha ekumi ahu ni ya akina?

6 Nnii nooniherye hai wa Yehova wi ninnacicimiha ekumi ahu ni ya akina? Moorweela wa oheera echu pure yaahaala okuha ekumi ahu ni ya akina va yawoopiha. Mwawiihiiha hannaphwanela omulya soona, esuruma naari opharihela moonanara mirece, ntakhara iho sinnanariha mwiili ahu nave inanwerya oniipha.

7 Muluku oonivaha mwiili ni ekumi ahu, nave nnaphwanela opharihela phaama ntoko Muluku onachuneleiyevo. Ti woochuneya tho opwachaka phaama mwiili ahu. Neerano hiiha, nnahaala okhala a weela va miithoni va Muluku. (Aroma 6:19; 12:1; 2 Korinto 7:1) Hiyaano hanniwerya omurumeela Yehova, mulipa oovaha ekumi, wakhala wi hinnacicimiha ekumi. Naamwi okhalaka woovila ohiya sookhovelela soonanara, Yehova onahaala  onikhaviherya wakhala wi ninniilipixerya woona ekumi okhala yasisapo.

8. Tiheeni nnaphwanelaahu weera wi nihikuhe ekumi ahu ni ya akina va yawoopiha?

8 Noohuserya wi ekumi yamahala yoochuneyaxa. Yehova onaweherya wi nnahaala weera yeeyo nnaweryaahu wi nihikuhe ekumi ahu ni ya akina va yawoopiha. Nnahaala weerano yeeyo moorweela wa mukhalelo nneecihaahu ekaaro ahu, moota naari yoowela ekina. Ninnasepa opaka makupa mu apaxakhwe naari echu ekina yawoopiha. (Salumu 11:5) Hiyaanotho ninniilipixerya orehererya empa ahu. Yehova aahaalamulela Aisarayeli: “Mwatekaka empa esyani, osulu waya musiryewo ni etarato [naari, evaranta] wi muhikhale ni mulatxu wa nthowa na mutxhu oni uwele vathi.”Malamulo 22:8.

9. Nnaphwanela waakhalihaka hai axinama?

9 Ophiyerya tho mukhalelo nnaakhalihaahu axinama onnamvolowela Yehova. Owo onneemererya wi niwiipheke axinama wi naapake mathaapa naari yoowara, nave onneemererya wi niwiipheke axinama wi niisaakihe. (Maphatxuwelo 3:21; 9:3; Mukwaha 21:28) Hannaphwanela owiiphaka axinama mwapuremwapure.Masiposipo 12:10.

OCICIMIHA WEELA WA EKUMI

10. Nnasuwela hai wi nikhami nneemelela ekumi?

10 Nikhami ti naweela wa Yehova, ntakhara nikhami nneemelela ekumi. Kayine amanle omwiipha Apele, Yehova aaloca ni Kayine: “Ephome ya munna à ennakiveka nthorihelo.” (Maphatxuwelo 4:10) Ephome ya Apele yeemelela ekumi awe, nave Yehova aamulaka Kayine nthowa na omwiipha Apele. Evinre maahi mancipale mmahiku a Noowa, Yehova wiiliwiili ahooneiha wi nikhami nneemelela ekumi. Yehova amvaha Noowa ni emusi awe waapharihela axinama ntoko mathapa. Owo aaloca: “Sothene  inetxà ni iri n’ekumi ti solya sanyu, ntoko kovan’hakani miri mikithi.” Mwawiihiiha, yaakhalavo echu yeeyo Yehova aawatihaleiye wi ehilyeke: “Nto muhikhùreke enama nnikhami nene.”Maphatxuwelo 1:29; 9:3, 4.

11. Nlamulo taani vooloca sa nikhami Muluku aavanheiye nloko na Isarayeli?

11 Ivinre iyaakha 800 Yehova amanle omuleela Noowa wi ahilyeeke ephome, owo aahuuluulela nlamulo nla wa achu awe: “Akhala mutxhu a Isarayele nari namarwa onakhala n’atxhu a Isarayele, aya osaya ni ìpha enama nari epalame enakhùriwa, avuviherye vatxheyani ephome ni ùhèle.” Owo tho aaloca: “Muhilyeke nikhami.” (Onamukutxho 17:13, 14) Nlelo Yehova onachuna wi achu awe yooneke nikhami okhala naweela. Awo yaaphwanela okhuura enama nyenya ohiya nikhami. Vaavaa yaamwiiphaaya mwaaxinama wi emukhuure, awo yaaphwanela ovuuviha nikhami ni wuuheela.

12. Akiristu anaphwanela woonaka nikhami mmukhalelo taani?

12 Iyaakha vakhaani Yesu amanle okhwa, arummwa ni asitokweene a mmulokoni Weekiristu o Yerusalemu yaalakelela wi makupa a Malamulo yaavahiwe a Isarayeli yaanaphwanela ocharihiwa ni Akiristu. (Mwaalakhanye Saweriwa T’arummwa 15:28, 29; 21:25.) Yehova aahaakhaviherya wiiwexexa phaama wi nikhami tinasisapo wa yene nave nlelo awo yaaphwanela woonaka ntoko naweela. Akiristu oopacerya hiyaaphwanela olya naari owurya nikhami naari omukhuura mwaaxinama oonyopocholiwa. Wakhala wi awo aaheerano yeela, yaahaala okhala echu yoonanara ntoko olapela masololo naari ocapaheya. Ovinyerya elukuluku yeeyo oya ohoolo, Akiristu eeparipari annakhooca olya naari owurya nikhami. Hanka mmahiku ahu? Yehova nlelo onachuna wi nooneke ephome okhala naweela.

13. Ntakhara heeni Akiristu hanaphwanela weemererya ovahiwa naari ovaha nikhami?

 13 Apwanne eyo enataphulela wi Akiristu anaphwanela okhoocaka ovahiwa nikhami? Aai, ti yeeyo. Yehova oolamulela wi nihilyeke naari owurya nikhami. Wakhala wi totore ohooleenani wi muhiwureke soohapala, mwahaala oveka wi muheleliwe mmixipheni? Mweeparipari hooye! Mmukhalelo mmohamoha, nlamulo na ohilya naari owurya nikhami nnataphulela wi hannaphwanela weemererya ovahiwa naari ovaha nikhami.—Moone Yooleeliherya 29.

14, 15. Ntakhara heeni ti yoochuneya Akiristu ocicimiha ekumi ni omwiiwelela Yehova?

14 Hanka wakhala wi totore onleela wi naahivahiwa nikhami nnahaala okhwa? Muchu ori oothene ookhalano murici wa olakelela waakhanle wi onahaala wiiwelela nlamulo na Muluku vooloca sa nikhami. Hiyaano Akiristu ninnacicimiha vancipale yamahala ya ekumi, mwawiihiiha ninnaavya mukhalelo mukina wa oloola wi nikhale akumi; nyenya hanneemererya waakhela nikhami.

15 Ninneera soothene nnaweryaahu wi nikhale akumi, ntakhara wi ekumi ti yasisapo wa Muluku, mwawiihiiha, hanneemererya waakhela naari ovaha nikhami. Echu eri yoochuneyaxa ori omwiiwelela Yehova ohiya ochekela malamulo awe nthowa na ochuna waakiha ekumi. Yesu aariye: “Ole onasya ovulusa ekumi awe, onamuyelela; nto yole oni ayelele ekumi awe wa nthowa naka, onarwa aphwanya.” (Mateu 16:25) Ninnamwiiwelela Yehova ntakhara ninnamusivela. Owo tosuwenle yeeyo eri yaphaama wa hiyaano nave ninnoona ekumi okhala echu yasisapo ni yaweela ntoko Yehova onooneiye.Ahebri 11:6.

16. Ntakhara heeni akapuro a Muluku anamwiiwelelaaya Yehova?

16 Akapuro oororomeleya a Muluku ari oolakelela wiiwelela nlamulo na Muluku vooloca sa nikhami. Awo hanalya  naari owurya nikhami, nave haneemererya waakhela nikhami nthowa na oloola. * Mwawiihiiha, awo anneemererya mukhalelo mukina wa oloola wi evuluxe ekumi aya. Awo anneemererya wi Mpatuxa a ekumi ni nikhami osuwela yeeyo eri yaphaama wa yaawo. Apwanne hamuneemererya wi owo tosuwenle yeeyo eri yaphaama wa nyuwo?

MUKHALELO MMOHA WA OPHARIHELA NIKHAMI YEHOVA EEMERENREIYE

17. O Isarayeli, tuuvi waari mukhalelo mmoha wa opharihela nikhami weemereryiwa ni Yehova?

17 Mu Nlamulo Muluku anvanheiye Moose, Yehova aaloca wa a Isarayeli: “Ekumi ya enama enakhala munikhamini. Apwiya ahorumani oyeherya v’altarini ephome ntoko mukutxho woleveleliwano sotxheka sanyu [naari, oveka nikhurumuwelo]: txhiri ephome ennavaha wàkhela nlevelelo, ntakhara yokhalano ekumi.” (Onamukutxho 17:11) Vaavaa a Isarayeli yaachekaaya, awo yaanaakhela nlevelelo na Yehova moorweela wa ovaha mukucho wa axinama ni yaanayeeherya nikhami va altare ari mu empa ya Yehova. Ola waari mukhalelo mmoha Yehova eemereryeiye wi a Isarayeli ephariheleke nikhami.

18. Ekari taani nryaahuno nthowa na mukucho wa Yesu?

18 Vaavaa Yesu aareiye veelaponi ya vathi, owo aavaha ekumi awe, naari nikhami nawe, va nipuro na mukucho wa axinama, wi nleveleliwe soocheka sahu. (Mateu 20:28; Ahebri 10:1) Ekumi wa Yesu yaari yoochuneya ophiyerya Yehova omviiha mookhwani wi aye wirimu, mwawiihiiha Yehova ahaavaha achu oothene ekari ya okhalano ekumi yoohimala.Yohani 3:16; Ahebri 9:11, 12; 1 Pedro 1:18, 19.

Munii mooniherye hai wi munnacicimiha ekumi ni nikhami?

19. Tiheeni nnaphwanelaahu weera wi nihikhaleno “nthowa [na nikhami]” wa orimeela wa achu?

 19 Ninnamuthamalela Yehova wa yamahala yoochuneya ya ekumi! Nave nnachuna waaleela achu wi yakhalano nroromelo wa Yesu, awo anahaala okhalano ekumi yoohimala. Hiyaano ninnaasivela achu, nave nnahaala wiilipixerya waakhaviherya wi ephwanye ekumi yoohimala. (Ezekiyeli 3:17-21) Chiryene, hiiha ntoko murummwa Paulo, nnanwerya oloca: “Mutxhu oni arimele, tahi miyo kirino nthowa [na nikhami], ntakhara kìhohusihani okhwela wothene wa Muluku.” (Saweriwa T’arummwa 20:26, 27) Aai, hiyaano nnahaala wooneiha wi ninnacicimiha ekumi ni nikhami vaavaa nnaaleelaahu akina vooloca sa Yehova ni waaleela wi ekumi ti yoochuneya.

^ par. 16 Wa sooleeliherya sikina vooloca sa opharihela nikhami, moone ipaaxina 77-79 sa liivuru ‘Mwikhapelele mu Osivela wa Muluku,’ olaleeryiwe ni Anamoona a Yehova.