Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Tiheeni Piipiliya Onanihusiheiye?

 MWAHA 10

Eparipari Vooloca sa Ankeelo

Eparipari Vooloca sa Ankeelo

1. Ntakhara heeni ti yaphaama ohuserya vooloca sa ankeelo?

YEHOVA onachuna wi nsuwele emusi awe. Ankeelo annapaka makupa mu emusi ya Yehova. Piipiliya onnawiichana awo ntoko “anamwane a Muluku.” (Yobi 38:7, Tradução do Novo Mundo) Tiheeni ankeelo aneeraaya? Awo aakhavihenrye hai achu elukuluku ya khalai? Apwanne ananwerya onikhaviherya mmahiku ahu yaala?—Moone Yooleeliherya 8.

2. Ankeelo arweenle woowi? Nave ari akavi?

2 Nnaphwanela osuwela ti woowi ankeelo arweenlaayawo. Kolosi 1:16 onnanleela wi Yehova amanle ompatuxa Yesu, “sothene inakhala wirimu ni vathiva” saapatuxiwa. Soopatuxiwa inaphitaanyerya ankeelo. Ankeelo ari akavi? Piipiliya onnaloca wi aakhalavo opwaha macikhwi macikhweene.Salumu 103:20; Wupulula 5:11.

3. Tiheeni Yobi 38:4-7 onanleeleiye vooloca sa ankeelo?

3 Piipiliya tho onnanihusiha wi Yehova aapatunxe ankeelo woopaceryani ahaakumve opatuxa elapo yavathi. Yaakhanle hai va woona elapo yavathi? Liivuru a Yobi onnanleela wi awo yaatepa ohakalala. Yaari emusi yawiiwanana emurumeelaka vamoha Yehova.Yobi 38:4-7.

ANKEELO ANNAAKHAVIHERYA AKAPURO A MULUKU

4. Nnasuwela hai wi ankeelo aanaapwacha achu?

4 Ankeelo annaapwacha achu nave tho annathokororya yookhwela ya Yehova ntakhara elapo ni achu. (Masiposipo 8:30, 31; 1 Pedro 1:11, 12) Awo yaananariwa nthowa na Aatamu ni Haava omuchekela Muluku. Awo tho hanasiveliwa owoona achu ancipale ehimwiiwelelaka Yehova. Nyenya wakhala wi muchu oocharuwa akookela wa  Muluku, awo annatepa ohakalala. (Luka 15:10) Ankeelo annatepa waapwacha yaale anamurumeela Muluku. Yehova onnaapharihela ankeelo wi yaakhaviherye ni waakhapelela akapuro awe veelaponi yavathi. (Ahebri 1:7, 14) Hankooni noone sawooniherya sa yeela.

“Muluku aka òmuruma munkelo awe, nave ola òmaka eyano ya amwatxo.”Daniyeli 6:22

5. Ankeelo yaakhavihenrye hai alapeli a Muluku khalai?

5 Yehova ahaarumiha ankeelo apiili wi emukhaviherye  Looti ni emusi awe ochawa mu epooma ya Sotoma ni Komora vaavaa yaahaalaaya otoloxiwa. (Maphatxuwelo 19:15, 16) Iyaakha masana masaneene muculi, mulipa a miririmu Taniyeli aavonyeryiwa mu nlici na amwaco, nyenya amwaco hiyaamweerenle echu, Taniyeli aaloca: “Muluku aka òmuruma munkelo awe, nave ola òmaka eyano ya amwatxo.” (Daniyeli 6:22) Ohoolo waya, vaavaa murummwa Petro aawaleliweiye mukariposo, Yehova aamuruma munkeelo wi amuhulele. (Saweriwa T’arummwa 12:6-11) Ankeelo tho yaamukhaviherya Yesu vaavaa aareiye veelaponi yavathi. Ntoko yootakiherya, amanle opatisiwa, “ankelo yanamulapela.” (Marko 1:13) Nave tho Yesu ahaakumve wiiphiwa, munkeelo mmoha aarwa wi “amulipihe.”Luka 22:43.

6. (a) Nnasuwela hai wi ankeelo annaakhaviherya achu a Muluku olelo? (b) Makoho taani nnahaalaahu waakhula hiihaano?

6 Olelo, ankeelo hanooneya wa achu. Nyenya nlelo Muluku onnaapharihela wi yaakhaviheryeke akapuro awe. Piipiliya onnaloca: “Munkelo a Apwiya onnemela vakhiviru va yale anatxitximiha ni onnavulusa.” (Salumu 34:8) Ntakhara heeni nnachunaahu nikhaviheryo? Ntakhara nookhalano amwiicani akuru yaawo anachuna onipahula. Amwiicani awo taani? Arweenle woowi? Ntakhara heeni anachunaaya onipahula? Wi naakhule makoho yaala, hankooni noone yeeyo yeeren’ye ni Aatamu ni Haava emanle opatuxiwa.

AMWIICANI AHU OHOONEYA

7. Tiheeni ancipale yenraaya nthowa na wootha wa Satana?

7 Noohuserya mmwaha 3 wi munkeelo mmoha aammwareela Muluku nave aanachuna waalamulelaka akina. Piipiliya onamwiichana owo ntoko Satana Musaserya. (Wupulula 12:9) Satana tho aanachuna wi akina  emmwareele Muluku. Owo aawerya omuwoka Haava, nave ovinyerya vaavaa owo onnaawoka achu ancipale. Naamwi ori hiiha, akina, ntoko Apeele, Enoki, ni Noowa, yaakhala oororomeleya wa Yehova.Ahebri 11:4, 5, 7.

8. (a) Ti mwawiihai ankeelo akina yaakhanlaaya masololo? (b) Tiheeni masololo yenraaya wi evuluwe variyari va maahi mancipale?

8 Mmahiku a Noowa, ankeelo akina yaammwareela Muluku nave ehiya nipuro naya wirimu wi ekhaleke veelaponi yavathi ntoko achu. Ntakhara heeni? Piipiliya onnanleela wi awo yaachuna waathela athiyana. (Mwaalakhanye Maphatxuwelo 6:2.) Nyenya eyo yaari yoonanara. (Yuda 6) Ntoko ankeelo ale oonanara, achu ancipale mu elukuluku yeele yaakhala oonanara murima ni a nlala. Yehova aalakelela waatoloxa achu oonanara murima ni maahi. Nyenya Muluku aahaavuluxa akapuro awe oororomeleya. (Maphatxuwelo 7:17, 23) Wi evuluwe, ankeelo ale oonanara yaakookela wirimu. Piipiliya onnawiichana ankeelo ale oonanara ntoko masololo. Awo yaathanla okhala vamoha ni Satana mu ommwareela Muluku, nave Satana aakhala mulamuleli aya.Mateu 9:34.

9. (a) Tiheeni yeerenye ni ankeelo vaavaa yaakookenlaaya wirimu? (b) Voocharela nnahaalaahu ohuserya eheeni?

9 Nthowa na omwareya, Yehova heemerenrye wi masololo epake makupa a emusi awe. (2 Pedro 2:4) Vano masololo hanawerya othatuwa wi ekhale achu, nyenya awo nlelo a “munyenka a elapo yothene emakiwe.” (Wupulula 12:9; 1 Yohani 5:19) Nnahaala ohuserya ti mwawiihai awo anaweryaaya waawoka ni waahuweliha achu ancipale.—Mwaalakhanye 2 Korinto 2:11.

MASOLOLO ANAAWOKA HAI ACHU

10. Ti mwawiihai masololo anaawokaaya achu?

10 Masololo annaawoka achu mmakhalelo oohiyanahiyana. Achu annakumanela ni masololo mukhataaya naari  moorweela wa muchu mukina, ntoko okhwiri naari masica. Eyo eniichaniwa olapela masololo, naari onamulosiwe. Nyenya Piipiliya onnanceenyerya wi nsepe echu pure yeeyo eniiwanana ni masololo. (Galasya 5:19-21) Ntakhara heeni? Hiiha ntoko mulipa oosaya onaphariheleiye miraakho wi aaphare axinama, masololo tho annapharihela mavyakelo aya wi yaawoke achu.—Moone Yooleeliherya 26.

11. Ehako tiheeni, nave ntakhara heeni nnaphwanelaahu osepawaavya ehako?

11 Mavyakelo mamoha a yaawo, aniichaniwa ehako. Ehako ori opharihela masenka ni yoolakelela ya ochuna osuwela sa muhoolo naari echu ehisuweliwe. Achu anneerano yeeyo moorweela wa oweha itheneeri ni waavya yootaphulela aya, waalakhanya ikaarata sa masica, opharihela iphiiri, naari waalakhanya miceka sa mmatani. Achu ancipale anuupuwela wi weerano ichu seiha tahi yoonanara, nyenya echu yoonanara. Eyo echu yawoopiha. Ntoko yootakiherya, Piipiliya onnooniherya wi masololo ni anahako analapa vamoha. Mu Saweriwa T’arummwa 16:16-18 ninnaalakhanya sa “munepa wa wanyiherya” yoowo wamweeriha namwali ‘waphwanyiha orela asipwiyawe.’ Murummwa Paulo amanle wiikara masololo, namwali haarino owerya wa oloherya sa muhoolo.

12. (a) Ntakhara heeni ti yawoopiha weererya oloca ni alipa ookhwa? (b) Ntakhara heeni akapuro a Yehova ahinaphwanelaaya ovolowela mihapo sa masololo?

12 Masololo annapharihela mavyakelo makina wi yaahuwelihe achu. Awo anachuna wi achu yeemereryeke wi ti wooweryeya oloca ni ale akhwile nave wi yaale akhwile aakhalano okumi mu nipuro nikina navetho wi ananwerya onikhaviherya naari onihooxa. Ntoko yootakiherya, akhweya muchu omuyelenle muhima naari nthamwene awe mookhwani, onnaya wa nahako wi aloce ni ole okhwile. Nahako akhweya onahaala weera  echu yootikiniha, ophiyerya otakiherya nsu na nthamwene naari muhima ahu okhwile. (1 Samuwele 28:3-19) Mihapo sincipale sa ovitha muruchu tho sinathipeleya mu mahusiheryo awi alipa ookhwa akhalano okumi mmapuro makina. Mihapo iho inavolowela isatakha, opaka mukucho wa alipa ookhwa, makeya, naari mihapo sineeriwa wa anaamukhwele. Vaavaa Akiristu anakhoocaaya opaka makupa mu mihapo seiha, amusi naari achu a mukuma aya annawiica, waaruwana, naari okhooca waakhaviherya. Nyenya akiristu aasuwele wi alipa ookhwa haanono okumi mu nipuro nikina. Honaweryeya olocano, nave awo hanawerya onihooxa. (Salumu 115:17) Mukhaleno ephoole. Muheererye oloca ni alipa ookhwa naari masololo nave muhirwe mvolowele mihapo sa masololo.Mwaalakhanye Malamulo 18:10, 11; Isaiya 8:19.

13. Tiheeni yeerenye ni achu ancipale yaawo khalai yoova masololo?

13 Tahi wi masololo anachuna pahiru waahuweliha achu, nyenya tho waahooxa. Olelo, Satana ni masololo awe annasuwela wi elukuluku aya “ehanle vakhani” wi Muluku aatoloxe, mwawiihiiha awo aasareya ni owali opwaha khalai. (Wupulula 12:12, 17) Moohakalaliha, achu ancipale yaawo khalai yoova masololo, vano hanoova. Tiheeni yeenraaya wi etaphuwe mu woova waya masololo?

MUKHOME NI MASOLOLO NAVE MUTAPHUWE

14. Hiiha ntoko Akiristu a nsana noopacerya, tiheeni nnaphwanelaahu weera wi ntaphuwe ni masololo?

14 Piipiliya onnanleela mukhalelo wa okhoma ni masololo ni mukhalelo wa okhala ootaphuwa. Ntoko yootakiherya, akina mu epooma ya Éfeso yaanakumanela ni masololo ehaakumve ohuserya eparipari. Tiheeni yeeraaya wi etaphuwe? Piipiliya onnanleela: “Antxipale mwa alipa a ihako yàthukumana ni yàhakucha malivuru aya, wi yeyeliwe vamithoni va atxhu othene.” (Saweriwa  T’arummwa 19:19) Woona wi yaanachuna okhala Akiristu awo yaaweeyela aliivuru aya oothene a masica. Olelo tho ti woochuneya weera emohamoha. Muchu ori oothene onachuna omurumeela Yehova onaphwanela weeyela echu eri yoothene eniiwanana ni masololo. Eyo enavolowela aliivuru, irevista, ikhulula, ixilema, macipo, apasakhwe, ni ophiyerya tho iruku sinavolowela masololo, masica, masenka naari echu ekina ya malavi. Navetho inavolowela ichu seiho achu anawaraaya wi ehiloiweke naari wiisaakiha wa echu yoopahula.1 Korinto 10:21.

15. Echu taani ekina nnaphwanelaahu weera wi nikhome ni Satana vamoha ni masololo awe?

15 Ivinrevo iyaakha vakhaani anna yaale a o Éfeso emanle oweeyela aliivuru aya a masica, murummwa Paulo aahaarepela wi awo nlelo yaaphwanela “owana” ohiya ni achu nyenya ni “otokwene ni anamatxhonka a elapo ela epiphi.” (Éfeso 6:12) Aai, naamwi yaweeyenle aliivuru aya, masololo nlelo yaaneererya waavolowela. Mwawiihiiha, echu taani ekina yaaphwanelaaya weera? Paulo ahaaleela: “Mwetxeke mahiku othene ni eyakiha ya wemererya, munaweryanyuno otxipiha inyakara sovarela sa musaserya.” (Éfeso 6:16) Hiiha ntoko eyaakiho enamukhaviheryaaya mutoropa variyari va ekhoco, nroromelo nahu nnanwerya onikhaviherya. Wakhala wi nookhalano nroromelo noolipa wi Yehova onahaala onikhapelela, nnahaala owerya okhoma ni Satana vamoha ni masololo awe.Mateu 17:20.

16. Nnii nlipihe hai nroromelo nahu wa Yehova?

16 Nnii niwerye hai olipiha nroromelo nahu wa Yehova? Nnaphwanela omwaalakhanyaka Piipiliya mahiku oothene ni okhalano nroromelo wi owo onahaala onikhaviherya. Wakhala wi nookhalano nroromelo noolipa wa Yehova, Satana ni masololo awe hewerya onivolowela.1 Yohani 5:5.

17. Echu taani ekina enii enaakihe wa masololo?

 17 Echu taani ekina Akiristu a Éfeso yaaphwanelaaya weera? Awo yaakhala mu epooma yoosareya ni masololo. Mwawiihiiha Paulo ahaaleela: “Ni mavekelo a miloko miloko mvekeleke mahiku othene.” (Éfeso 6:18) Waanachuneya omveka Yehova wi aakhapeleleke mu ilukuluku soothene. Hanka vooloca sa hiyaano? Hiyaano tho nnakhala mu elapo ela yoosareya ni onamulosiwe. Nnaphwanela tho omveka Yehova wi anikhapeleleke, nave ti yaphaama opharihela nsina nawe vaavaa nnavekelaahu. (Mwaalakhanye Masiposipo 18:10.) Wakhala wi ninnatitelela omveka Yehova wi anaakihe ovolowela wa Satana, owo onamwaakhula mavekelo ahu.Salumu 145:19; Mateu 6:13.

18, 19. (a) Nnii niwerye hai ovootha owana wahu ni Satana ni masololo awe? (b) Nikoho taani nnahaala waakhuliwa mmwaha onacharela?

18 Wakhala wi noheeyela echu eri yoothene mu okumi ahu yeeyo eniiwanana ni masololo ni ororomela wi Yehova onahaala onikhaviherya, nnahaala owerya omvootha Satana ni masololo awe. Hannaphwanela woovaka masololo. (Mwaalakhanye Tiyako 4:7, 8.) Yehova torino ikuru opwaha masololo. Owo ohooniherya ikuru sawe mmahiku a Noowa vaavaa aalankeiye masololo, nave omwaahiyu owo onahaala otoloxa. (Yuda 6) Muupuwele wi hiyaano hanri mukhatiihu mu owana wahu. Yehova onnaapharihela ankeelo awe wi enikhapelele. (2 Mamwene 6:15-17) Nnaphwanela ororomela wi nnikhaviheryo na Yehova, nnahaala ovootha mu owana wahu ni Satana vamoha ni masololo.1 Pedro 5:6, 7; 2 Pedro 2:9.

19 Nyenya woona wi Satana ni masololo awe annatannya makacamiho mancipale, ntakhara heeni Muluku hanaatoloxa mwawaakuveya? Nikoho nla nnahaala waakhuliwa mmwaha onacharela.