Ocuphela mwaha

Ocuphela sampuwa

Anamoona a Yehova

Othanla elocelo Elomwe

 MWAHA 56

Yosiya Aanasivela Malamulo a Muluku

Yosiya Aanasivela Malamulo a Muluku

Yosiya aakhala mwene arino iyaakha thanu nararu. Mmahiku yaale, achu yaanaavya ihako ni waalapela amuluku atheru. Vaavaa Yosiya aareiyeno iyaakha 16, aahiilipixerya ohuserya mukhalelo wa omulapela Yehova mwaweemereryeya. Arino iyaakha 20, aapacerya okumula iruku soopachiwa ni miconco. Nave vaavaa aareiyeno iyaakha 26, owo aarehererya empa ya omulapela Yehova.

Namukucho Hilikiya aaphwanya eroolo ya malamulo a Yehova mu empa ya mithukumano, akhweya eroolo yeeyo Mose aarempeiye. Safani yoowo aari namarepa a mwene aamuruuhela Yosiya eroolo nave aapacerya waalakhanya ni masu oovuwa. Vaavaa Yosiya aawiriyanneiye, aahoona wi achu hiyaamwiiwelela Yehova opacerya khalai. Mwene Yosiya aahi wa Hilikiya: ‘Apwiya aananariwa ni hiyaano. Hawe waakohe Apwiya, nave anamooleela echu yaweera.’ Yehova aahaakhula moorweela wa mulipa a miririmu amwaamuthiyana Hulta: ‘Awo aakitannya ni aaweepesa amuluku akina. Nkaavaha ekoi hiihaano ntakhara Yosiya ohiiyeviha vamiithoni vaka.’

Vaavaa Mwene Yosiya aawiriyanneiye michaka iho, aavolowa mu empa ya mithukumano nave aahaawopa achu wi ethukumane vamoha. Voocharela aahaalakhanya Malamulo a Yehova wa nloko noothene. Yosiya ni achu yaapaka nlakano na omwiiwelela Yehova ni murima woothene.

Saaviravo iyaakha sincipale achu a Yuteya ehimpanke Paskha. Nyenya vaavaa Yosiya aalakhannyeiye Nlamulo wi Paskha  onaphwanela weeriwano iyaakha soothene, owo aahaaleela achu ariki: ‘Nimpake Paskha a waacicimihano Apwiya.’ Voocharela, Yosiya aapaka marehereryo wi ivahiweke mikucho mincipale nave aahaathanla alipa awiipa mu empa ya mithukumano. Nloko naampaka Paskha ni Efesta ya Iphaawu Soohiruruvalihiwa mmahiku mathanu nameeli. Hantonko okhalavo Paskha oolikana ni yoowo opacerya mahiku a Samuwele. Chiryene Yosiya aanasivela Malamulo a Muluku. Weyaano onnasiveliwa ohuserya vooloca sa Yehova?

“Masu anyu ari ntoko muthiko onakimwalèla.”​—Salumu 119:105