Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Ohuserye Miyaha sa Piipiliya

 MWAHA 42

Yonata Aari Olipa Murima ni Oororomeleya

Yonata Aari Olipa Murima ni Oororomeleya

Yonata mwaana mutokweene a Sawuli, aari nakhoco oolipa murima. Tavite ooloca wi Yonata aari oochimaka opwaha enaka ni oolipa ompwaha mwaco. Nihiku nimoha, Yonata aawoona anakhoco 20 Afilisti. Owo aahi wa mukhaviheryi awe: ‘Nnahaala owana ni yaawo wakhala wi Yehova oonileela. Wakhala wi Afilisti aaniichana wi niwaneno nnahaala oyawo.’ Afilisti yaakhuwela: ‘Murwe nno wi niwane!’ Mwawiihiiha, oopiili yaawela wi ewaneno.

Woona wi Yonata aari mwaana oopacerya a Sawuli, owo aakhalano owerya okhala mwene. Nyenya Yonata aanasuwela wi Yehova oomuthanla Tavite wi akhale mwene a Isarayeli, nto haamukhalela nrima. Yonata ni Tavite yaapaka onthamwene. Yaalakana okhaviheryana mukina ni mukhwaawe. Yonata aamvaha Tavite malaya awe, nsipaaca, munra ni murupa ntoko eneneeryo ya onthamwene aya.

 Elukuluku Tavite amuchaweiye Sawuli, Yonata aaya wa yoowo aloca: ‘Ohoove! Weyaano onamulamula o Isarayeli, nave miyaano kini kikhale anaawiili. Ni atiithi ene Sawuli aasuwela yeeyo.’ Onnachuna okhalano nthamwene ntoko Yonata?

Ikwaha sincipale Yonata aahela okumi awe va yawoopiha wi amukhaviherye nthamwene awe. Yonata aanasuwela wi Sawuli aanachuna omwiipha Tavite, mwa yeeyo aaloca wa atiithi awe: ‘Enahaala okhala yoocheka omwiipha Tavite; owo hapanke echu yoonanara.’ Sawuli aanyeenyeya ni Yonata nave ohoolo waya, Sawuli ni Yonata yaakhwa vamoha mu ekhoco.

Vaavaa Yonata aakhwileiye, Tavite aamwaavya mwaana a Yonata awiichaniwa Mefiposeti. Aamphwannyeiye aamuleela ariki: ‘Miyaano kinachuna oreera murima ni weyaano wa nthowa na waakhwela atiithi aa Yonata. Onahaala okhalaka mpa mwaka nave mahiku oothene oni olyeeke ni miyaano.’ Tavite haamucuwanle nthamwene awe Yonata.

“Mukhwelaneke ntoko miyo kokhwenlakani. Havo mutxhu orino okhwela otokotoko ompwaha yowo onavaha okumi awe wa nthowa na asinthamwene awe.”​—Yohani 15:12, 13