Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Ohuserye Miyaha sa Piipiliya

 MWAHA 29

Yehova Onnamuthanla Yosuwa

Yehova Onnamuthanla Yosuwa

Amanle weeciha nloko na Isarayeli mu iyaakha sincipale, yaaphiya elukuluku wi okumi wa Mose okuchuwe. Yehova aamuleela: ‘Honi waavoliihe Aisarayeli mu Elapo ya Nlakano. Nto kinanwooniha elapo eyo.’ Mose aamveka Yehova wi amuthanle muhooleli muvyaani wi aweeciheke achu. Yehova aamuleela ariki: “Omuthanle Yosuwa.”

Mose aaloca ni achu a nloko wi moohilekela aahaala okhwa nave wi Yehova aamuthanla Yosuwa wi aakerihe mu Elapo ya Nlakano. Mose aaloca wa Yosuwa: ‘Apwiya anamukhala ni weyaano. Ohoove ni ohooceye.’ Voocharela Mose aaya vasulu va Mwaako Nepo nave Yehova aamooniha elapo yeeyo aamuroromelinheiye Aparahamu, Isaki ni Yakopo. Mose aarino iyaakha 120 akhwaaka.

Yehova aamuleela Yosuwa: ‘Vinya olapuwe Muhice Yortano nave ovolowe elapo kineeraaka kaavahe Aisarayeli. Masu a liivuru a malamulo ehirwe erame vayanoni va; olipihe murima! Ohoove.’

 Yosuwa aahaarumiha anamahocela apiili oya epooma ya Yeriko. Mmwaha onacharela nnahaala ohuserya sa yeeyo yeeren’ye weiwo. Yaakonkaaya, yaalokoha wi yaanaphwanela oya ovolowa o Kanani. Mmeeloni mwaya, Yosuwa aahaaleela achu wi ecimule. Aahaahooliha anamukucho yaawo yaatenxe ekaaxa ya nlakano wi elapuwe Muhice Yortano. Muhice owo waasareya maahi. Nyenya vaavaa anamukucho yaanyikanlaaya maahi, muhice waamaala weeca, nave maahi yaahuuma! Anamukucho yaaheemela veeri va muhice yaaweheryaka achu oothene wi elapuwe. Apwanne yootikhiniha yeela yaanawuupuxerya yeeyo Yehova enreiye mu Eniya Yooxeerya?

Vookuchulani Aisarayeli yaavolowa mu Elapo ya Nlakano. Yaahaala otekaka ipa ni ipooma, ni olimaka imaca saya. Eyo yaari elapo yooreera.

“Apwiya anamoholelani mahiku othene: anamovonihani veri va ntakhwa.”​—Isaiya 58:11