Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Ohuserye Miyaha sa Piipiliya

 MWAHA 99

Mulipeleli a Ekalaposo Onnahuserya Eparipari

Mulipeleli a Ekalaposo Onnahuserya Eparipari

O Filipi, aakhalawo namwali yoowo aaphariwe ni nsololo. Nsololo naanamweeriha oloherya echu, nave asipwiya awe yaanaphwanya ikhorowa sincipale moorweela wa yoowo. Vaavaa Paulo ni Sila yaakelaaya o Filipi, owo aanaachara mahiku mancipale. Nsololo naanamweeriha okhuwela ariki: ‘Alopwana ala ari amulapeli a Muluku Mutokweenexa.’ Vano Paulo aalamulela nsololo ariki: ‘Mwa nsina na Yesu kinnooruma okhumemo mwa mwali ola.’ Nsololo naamuhiya mwali.

Vaavaa asipwiya a namwali yaasuwenlaaya wi hewerya okhalakano ikhorowa, yaatepa onanariwa. Awo yaamphara Paulo ni Sila emukeriha wa alipa oothoriha eloca eriki: ‘Alopwana ala haniiwelela nlamulo nave annuukhula epooma ahu.’ Alipa oothoriha yaalamulela wi Paulo ni Sila emaniwe nave eriheliwe mukalaposo. Mulipa oolipelela aahaakeriha mu nipuro na epiiphi nave aahaawalela.

Alipa oowaleliwa akina, yaananwiriyana Paulo ni Sila emwiipelaka Yehova. Mootutuxa, ohiyu eriyari, mwaacikinye aavira nave ekalaposo yoothene yaacikinyeya, ovinyerya osulu ophiyerya vathi. Mikhora sa ekalaposo saahuleya, nave onyooro yoowo yaamakiwaayano waataphuwa. Mulipeleli aachimakelawo aphwanya mikhora soohuleya. Uupuwelaka wi alipa oophariwa aachawa, aakuxa nsipaaca wi isiiphe.

Vano Paulo aamwiichana ni masu oovuwa ariki: ‘Oheere yeeyo, oothene nri muumu.’ Mulipeleli aayawo mwawaakuveya nave aakokhora vamiithoni va Paulo ni Sila. Owo aahaakoha: ‘Achu nyu, tiheeni kinaphwanelaaka weera wi kivuluwe?’ Awo yaamwaakhula: ‘Weyaano ni emusi aa mmweemererye Yesu.’ Paulo ni Sila yaamuhusiha masu a Yehova nave mulipeleli ni emusi awe yaapatisiwa.

“Nto ihakunve ophatxuwa sothene seiyo anamurwa ewikarene, yomaneni ni yokerihani musinagoga ni mukalaposo. Munanvirihiwa mmamweneni ni mwa asitokwene wa nthowa na nsina naka. Ni itxhu iha inamovahani okhala anamona aka.”​—Luka 21:12, 13