Arummwa a Yesu yaaniiwelela nlamulo na olaleerya michaka yaphaama elapo yoothene. Mu 47 E.K., anna o Antiyokeya yaamukhaviherya Paulo ni Parnapa opaka mukwaha aya wi yalaleerye. Oopiili yaalaleerya michaka mwamvai elapuwela o Asiya Mukhaani eyaaka o Terpe, o Lustra ni Ikoniyo.

Paulo ni Parnapa yaanaahusiha achu oothene, achu ooreela, oohaawa, amiravo ni atokweene. Achu ancipale yaaneemererya eparipari vooloca sa Kristu. Vaavaa Paulo ni Parnapa yaamulalenryaaya Serxiyu Paulus mutokweene o Xipre, mulipa a masica aahaahiiha olaleerya. Paulo aaloca ni mulipa a masica ariki: ‘Apwiya anamoovaha ekoi.’ Moohilekela aarweela evaasi. Vaavaa mutokweene Serxiyu Paulus onneiye yeeyo aaroromela.

Paulo ni Parnapa yaanalaleerya mapuro oothene, echoko ni echoko, mmusika, mphironi ni mu sinakooka. Vaavaa awo yampenunxaaya mulopwana oorakala o Lustra, yaale yeerenle onamoona yootikhiniha yeeyo yuupuwela wi awo yaari amuluku nave yaapacerya waakokhorela. Paulo ni Parnapa yaahaahiiha eriki: ‘Mmulapeke pahi Muluku! Hiyaano naachu.’ Ayuta akina yaarwa yeeriha wi muloko wa achu omurukunuwele Paulo. Achu awo yaamvonya maluku Paulo, empurulela vaate wa epooma emuhiya yuupuwelaka wi ookhwa, nto Paulo haakhwile! Anna yaarwa emukuxa emukeriha mpuwa mwa epooma. Voocharela Paulo aakookela o Antiyokeya.

Mu 49 E.K.,Paulo aapaka mukwaha mukina. Amanle ochikawo wi awoone anna o Asiya Mukhaani, owo aaya o Europa wi alaleerye michaka yaphaama. Owo aaya o Atena, Efeso, Filipi, Tesalonika ni mapuro makina.  Sila, Luka ni mmiravo iichaniwa Timoteo yaachaana ni Paulo. Awo yaanalapa vamoha etikitheryaka miloko nave yaanaakhaviherya anna okhala oolipa. Paulo aakhala o Korinto eyaakha emoha ni emeya aalipihaka anna. Owo aalaleerya, ohusiha ni orepa ikaarata wa miloko. Aanapaka ipa sa ekuwo wi iivakuleleke. Moovira wa elukuluku, aakookela o Antiyokeya.

Voocharela, mu 52 E.K., Paulo aapaka mukwaha waneeraru apaceryaka o Asiya Mukhaani. Owo aaya makupa oorakamela ntoko Filipi nave aakhuruwela o Korinto. Paulo aanawetha o Efeso ahusihaka, apenuxaka ni okhaviherya miloko. Owo aanavaha onamoona mahiku oothene mu nipuro na vanlakani. Ancipale yaanawiriyana nave yaanatoroka mukhalelo aya. Vookuchulani, amanle olaleerya michaka yaphaama mu ilapo sincipale, Paulo aaya o Yerusalemu.

“Haweni, mwahusihe atxhu othene.”​—Mateu 28:19