Ayuta yanampaka Paskha iyaakha soothene mu nihiku na 14 a mweeri wa Nisani. Eyo yaanawuupuxerya mukhalelo Yehova aawooponleiye mookapuroni o Yikuputu ni waakeriha mu Elapo ya Nlakano. Eyaakha ya 33 E.K., Yesu ni arummwa awe yaampaka Paskha o Yerusalemu. Omakuchuwelo wa yoolya, Yesu aaloca wa arummwa awe: ‘Ookhala mmoha oni akiveleele.’ Arummwa yaahaleeliheya enamukoha Yesu: ‘Taani yoowo?’ Yesu aawaakhula: ‘Yoowo onalya vamoha ni miyaano mparathoni toni akiveleele.’ Owo amvaha ephaawu Yutasi Iskariyoti. Moohilekela, Yutasi aakhuma.

Yesu aavekenleiye, aakawanya ephaawu aavaha arummwa awe. Aloca ariki: ‘Kuxani lyaani, enataphulela mwiili aka.’ Aamukuxa tho viinyu, avekela ni aavaha arummwa awe ariki: ‘Wuryani oothene ntakhara onataphulela nikhami naka na nlakano niyehiwe wa nthowa na nyuwo. Kinnoororomelihaani wi munamukhala mamwene wirimu. Mweereke ela mukuupuwelaka miyo.’ Oohuserya a Yesu anneerano iyaakha soothene. Eyo eniichaniwa Yoolya ya Apwiya.

Emanle olya, arummwa awe yaapacerya waakhulana echunaka osuwela taani aari mutokweene. Nyenya Yesu aaloca wa yaawo: ‘Yoole onachuna okhala mutokweene isooneke okhala mukhaani.

 ‘Nyuwo kiwiichanneeni asinthamwene, woona wi soothene kiiwalaaka wa Atiithi kihosuwelihaani. Nyuwaano mwakhala a wiiyeviha, achu oothene anamusuwela wi muri amuhuserya aka, nyuwo mwaanakhwelana mukina ni mukhwaawe.’

Vookuchulani, Yesu amveka Yehova wi aakhapelele arummwa oothene. Amveka tho wi aakhaviherye elapeke vamoha mmureceleni. Aavekela wi nsina na Yehova neelihiwe. Yesu ni arummwa awe yaahiipa macipo oomuthamala Yehova nave ekhumela vaate. Elukuluku yaaphiya wi Yesu aphariwe.

“Muhòve, muhuwo mukhani, ntakhara òhasivela Atithinyu wovahani omwene.”​—Luka 12:32