Ocuphela mwaha

Ocuphela sampuwa

Anamoona a Yehova

Othanla elocelo Elomwe

 MWAHA 92

Yesu Onnaaphwanya Alopwana Etothaka Ihopa

Yesu Onnaaphwanya Alopwana Etothaka Ihopa

Yesu amanle waaphiyerya arummwa, ohoolo waya Petro aalakelela oya o Eniya ya Kalileya wi atothe ihopa. Tomasi, Yakopo, Yohani ni akina yaachaana. Awo yaatotha ohiyu woothene nyenya hiyaaphunre echu.

Wooxixelo awo yaamoona mulopwana eemenle okhopela. Owo aawiichana nave aahi: ‘Mookhalano yoolya?’ Awo yaahaakhula: ‘Hooye!’ Mulopwana owo aaloca: ‘Reyani milapa moono woolopwana wa mwaaceya ni munamphara ihopa.’ Vaavaa yenraayano, mulapa waasareya ihopa ophiyerya ehinawerya oruulela mmwaaceya. Yohani aahoona wi mulopwana owo aari Yesu nave aahi: “Ti Apwiya!” Mwawaakuveya, Petro aacuphela mmaahini nave aaheekha aphiya okhopela. Oohuserya akina yaamuchara mmwaaceyani.

Vaava yaaphiyalaaya okhopela, awo yaahoona iphaawu ni ihopa sooxeyaka va mooro. Yesu aahaaleela wi eruuhe ihopa saya wi yaaceererye yoolya eyo. Voocharela aahi: ‘Rwaani! Mulye.’

 Yaamanlaaya olya, Yesu aamukoha Petro: ‘Weyaano onnakikhwela opwaha ihopa?’ Petro aahaakhula: ‘Aai Pwiya nyuwaano munnasuwela wi kinnookhwelaani.’ Nave Yesu aahi: ‘Okukhuleke ipucepuche saka.’ Yesu aamukoha wanawiili: ‘Petro onnakikhwela miyo?’ Petro aahi: ‘Pwiya moosuwela wi kinnookhwelaani.’ Yesu aamuleela: ‘Okukhuleke ipucepuche saka.’ Yesu aamukoha tho ekwaha yaneeraru nave Petro aathanana. Aamwaakhula ariki: ‘Pwiya nyuwaano moosuwela soothene. Moosuwela wi kinnookhwelaani.’ Yesu aamuleela tho: ‘Okukhuleke ipucepuche saka nave okichareke.’

“Yesu àhalèla ì: ‘Mukitxhare, kiwereni alipa awatotha atxhu.’ Awo yàhiya vavale milapa saya, emutxhara.”​—Mateu 4:19, 20