Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Ohuserye Miyaha sa Piipiliya

 MWAHA 75

Musaserya Onnamweererya Yesu

Musaserya Onnamweererya Yesu

Yesu aamanleiye opatisiwa, munepa waweela waamukeriha mutakhwani. Aamaliha mahiku 40 ahilyile echu. Musaserya aarwa wi amweehe ariki: ‘Waari mwaana a Muluku, olamule maluku ala wi ethatuwe iphaawu.’ Yesu aamwaakhula: ‘Soorempwa wi: Tahi yoolyaru enamukhaliha muchu, nto masu oothene anakhuma mwaano mwa Muluku.’

Musaserya aamweeha wanaawiili ariki: ‘Waari mwaana a Muluku, wiimorihele vathi ntakhara soorempwa: Muluku onamwaaruma ankeelo awe wi yoopharele.’ Nto Yesu aamwaakhula ni soorepa: ‘Yoorempwa tho wi: Ohiweererye Apwiya Muluku aa.’

Voocharela, Satana aamooniha mamwene a elapo ni muhakhu aya nave aaloca: ‘Kinahaala woovaha ichu soothene iha wakikokhorela ekwaha emoha pahi.’ Yesu aariye: ‘Pwahavo Satana, ntakhara yoorepiwa wi: oweepeseke pahiru Apwiya Muluku aa.’

Musaserya aapwahavo nave ankeelo yaarwa emvaha Yesu yoolya. Opacerya elukuluku yeeyo, Yesu aaphara muteko yoowo aarummwaleiye wa olaleerya michaka sa Omwene. Achu yaanasiveliwa ni ohusiha wawe nave yaanamuchara voothevene.

“Mwa [Satana] hiwamo eparipari: owo othaka, onalotxa eri yawawe, ntakhara owo ori mulipa awotha ni tithi a wotha.”​—Yohani 8:44