Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Ohuserye Miyaha sa Piipiliya

 MWAHA 72

Yesu Ari Mmiravo

Yesu Ari Mmiravo

Yosefe ni Mariya yakhala o Nasareti vamoha ni anamwane aya akina. Yosefe aanaavakulela achu a emusi awe alapaka ntoko karpintero nave tho aanaahusiha Malamulo a Yehova. Emusi yoothene yaanaya mu sinakooka wi emulapele Muluku. Yaanaya tho o Yerusalemu iyaakha soothene wi empake Paskha.

Yesu arino iyaakha 12, owo ni emusi awe yaapaka mukwaha woorakama eyaaka o Yerusalemu. Epooma yaasareya ni achu yaaruule ompaka Paskha. Aamanleiye Paskha, Yosefe ni Mariya yaapacerya okookela owaani yuupuwelaka wi Yesu yaarino vamoha. Nyenya vaavaa yamwanvyaaya, hiyaamphwannye.

Yaakookela o Yerusalemu, nave yaamwaavya Yesu mahiku mararu. Voomaliheryani, awo yaamphwanya mu empa ya Muluku akiranthe veeri va ahusiha, aawiriyanaka ni aapakelaka makoho aphaama. Ahusiha yaatikhiniheya ni Yesu ophiyerya epacerya ompakela tho makoho. Nave yaanahaleeliheya ni maakhulo awe. Yaahoona wi Yesu aasuwela phaama Malamulo a Yehova.

 Yosefe ni Mariya yaatepa otumwatumwa. Mariya aahi: ‘Mwanaka, atiithi aa ni miyaano naanawaavya ni murima oniinale! Waari woowi?’ Yesu aahaakhula: ‘Hamwaasuwela wi enaphwanela wi kithokororyeke sa Atiithi aka?’

Yesu aarowa vamoha ni asitiithi awe. Yosefe aamuhusiha Yesu olapa ni ithaapwa. Onuupuwela wi vaavaa Yesu aareiye mmiravo aari a mukhalelo taani? Vaavaa unnunweiye, aanakhalano miruku nave tho aaneemereryiwa ti Muluku ni achu.

“Werano ohakalala wanyu onnakisivela Muluku aka; Nave malamulo anyu ari mpuwa mwa murimáka.”​—Salumu 40:8, NN