Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Ohuserye Miyaha sa Piipiliya

 MWAHA 61

Awo Yaakhooca Okokhorela Eruku

Awo Yaakhooca Okokhorela Eruku

Mwene Napukotonosori amanle oloha, ohoolo waya aapaka eruku etokweene ya ewooro. Aathipela va mureyareya wa Tura nave aawiichana achu oochuneyaxa ophitaanyerya Satraki, Mesaki ni Apeteneko ethukumana ohoolo wa eruku eyo. Mwene aalamulela: ‘Mwiiwa oruma wa mapeca, wa apankwe, achakare ni ichu ikina, mukokhore oothene ni mweepese eruku. Muchu yoole oni ahikokhore ni oni aheepese eruku yeeyo, ariheliwe va cukucha a mooro.’ Apwanne amiravo ale yaahaala okokhorela, naari yaahala omulapela pahiru Yehova?

Mwene aalamulela wi ncipo nipacerye wiipiwa. Achu yaakokhora elapelaka eruku, nto Satraki, Mesaki ni Apeteneko hiyaakokhonre. Alopwana akina yaawoona nave emuleela mwene: ‘Aakhala Ayuta akina ahineepesa eruku mpankaanyu.’ Napukotonosori aahaarumihela michaka iha: ‘Kinamoovahaani ekari yanaawiili. Mwahichuna weera yeeyo, munamuriheliwa va cukucha a mooro. Nave muluku taani oni oovuluxeni?’ Awo yaamwaakhula: ‘Muluku nnamulapaahu, achuna onamunivuluxa va cukucha nave onamunoopola mmatani mwanyu. Naamwi Muluku ahu ahinooponle, hiyaano hanrwa neepesa eruku mpankaanyu.’

Mwene aatepa onyeenyeya. Aahaalamula alopwana awe ariki: ‘Mutetheerye mooro wa cukucha ikwaha thanu napiili opwaha mahiku makina!’ Aahaalamula tho anakhoco ii: ‘Mwaamake amiravo ala nave mwaavonyerye mu cukucha!’ Cukucha  aatepa olucuwa ophiyerya wi anakhoco erikimwaacamelavo yaakhwa. Amiravo ale araru yaamorela mu cukucha. Nyenya vaavaa Napukotonosori aathurumenleiye mpuwa, aahoona wi mu cukucha yaarimo alopwana axexe ohiya araru. Aakhala ootuthuwa nave aakoha ariki: ‘Hiyaari alopwana araru naamankaahu ni naarihela va cukucha? Miyaano kinawoona axexe, nave mulopwana aneexexe onalikana ni munkeelo!’

Napukotonosori aahaacamela va mulako wa cukucha nave aakhuwela: ‘Nyuwo amulapeli a Muluku a Owerya Woothene, vinyammo, ni rwaani nno!’ Achu oothene yaatikhina omoona Satraki, Mesaki ni Apeteneko ekhumaka ehisyile. Mwiili aya, miihi aya ni soowara saya hisaasyile naari mano wunkha mwiixi.

Napukotonosori aaloca: ‘Muluku a Satraki, Mesaki ni Apeteneko acicimihiwe. Owo oomurumiha munkeelo awe ni oowoopola amulapeli awe anamuroromela yoowo.’

Apwanne ori oolakelela okhala oororomeleya wa Yehova moohipwacha yeeyo eni yeereye hiiha ntoko yenraaya amiravo ala araru?

“Owepeseke Apwiya [Yehova] Muluku-à nave yaworu onerawe onakokhorela.”​—Mateu 4:10