Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Ohuserye Miyaha sa Piipiliya

 MWAHA 59

Amiravo Axexe Yaanamuroromela Yehova

Amiravo Axexe Yaanamuroromela Yehova

Vaavaa Napukotonosori aakunxeiye amiravo o Yuteya aakeriha o Papulu, owo aamuruma Asipenasi wi aahooleleke. Napukotonosori aamuleela Asipenasi wi aathanle amiravo akuru ni oovyaka. Amiravo awo yaahaala ovyakihiwa iyaakha raru wi ekhale asitokweene oochuneyaxa o Papulu. Amiravo awo yaaphwanela ohuserya waalakhanya, orepa ni oloca elocelo ya o Papulu. Yaahaala ovahiwaka yoolya ya mwene. Yaakhalavo amiravo axexe awiichaniwa Taniyeli, Hananiya, Misayeli ni Asariya. Asipenasi aahaachuwa masina mavyaani o Papulu: Peltesari, Satraki, Mesaki ni Apeteneko. Apwanne mahusiho awo yaahaala oweeriha ohiya omulapela Yehova?

Amiravo ala yaalakelela omwiiwelela Yehova. Yaanasuwela wi hiyaaphwanela olya yoolya ya mwene ntakhara wi Nlamulo na  Yehova naanaloca wi yaari yooriipiheya. Mwa yeeyo awo yaaloca wa Asipenasi: ‘Muhinivaheke yoolya ya amwene.’ Asipenasi aawaakhula: ‘Wakhala wi hamunalya nave munakhala ntoko munamwiiceliwa, amwene anahaala okiipha!’

Taniyeli aahuupuwela yoophwanela weera nave aaloca ni Asipenasi ariki: ‘Kinnooveka wi oneererye hiyaano mahiku khumi: yoolya ahu ekhaleke makukhuru ni yoowurya ahu ekhaleke maahiru, nave ohoolo waya oniphwanaphwanihe ni amiravo ale anavahiwa yoolya ya amwene.’ Asipenasi aaheemererya.

Yaavinraaya mahiku khumi, Taniyeli ni asinthamwene awe araru yaari oophwaneliwaxa waapwaha amiravo akina. Yehova aahakalala nthowa na wiiwelela waya. Owo aamvaha Taniyeli miruku sa wiiwexexa sooloha.

Vaavaa ovyakihiwa waamanlaaya, Asipenasi aahaakeriha wa Napukotonosori. Mwene aaloca ni yaawo nave aahoona wi Taniyeli, Hananiya, Misayeli ni Asariya yaari akuru, oophwaneliwa ni oovyaka waapwaha amiravo akina. Owo aahaathanla amiravo yaala axexe wi ekhale asitokweene. Mwene aanaaveka miruku mmiyaha mitokweene. Yehova aaweeriha wi ekhale oosuwela waapwaha anamiruku ni alipa masica a mwene.

Naamwi yaari elapo yoorakamela, awo hiyaamucuwanle Yehova. Apwanne weyaano onahaala omuupuwela Yehova naamwi asitiithi aa eri ocai?

“Ahikhale oni anyemule omiravo à. Nto okhale moneiho wa akristu mmasuni, mmereloni, mokhwelani, munroromeloni ni n’wisumalihani.”​—1 Timóteo 4:12