Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Ohuserye Miyaha sa Piipiliya

 MWAHA 63

Masu Yaarempwe Vaxiri

Masu Yaarempwe Vaxiri

Ohoolo waya, Pelsasare aakhala mwene o Papulu. Ohiyu omoha, owo aahaawopa achu oovuwa wi epake efesta. Owo aalamulela wi eruuhiwe akoopho a ewooro yaawo Napukotonosori aakunxeiye mu empa ya Yehova. Pelsasare ni aleco awe yaahaapharihela akoopho yaawo a mu empa ya Yehova yaacicimihaka amuluku aya. Mootutuxa naachweela ntata nave naapacerya orepa masu oovila wiiwexexa va exiri ya empa.

Pelsasare aapacerya woova. Aawiichana alipa masica nave aahaaroromeliha ariki: ‘Yoole oni ataphulele, onamukhala mulamuleli aneeraru a omwene aka.’ Awo yaaheererya otaphulela nave haavo aawenrye othariha. Mwaara a mwene aarwa nave aaloca: ‘Mulopwana Taniyeli ookhalano owerya wa otaphulela sooloha. Owo onahaala otaphulela masu yaala.’

Taniyeli aaya wa mwene. Pelsasare aahi wa Taniyeli: ‘Wawerya waalakhanya echu erempwe vaxiri ni wawerya okitaphulela, weyaano onamukhala mutokweene aneeraru a omwene aka.’ Taniyeli aahi: ‘Nyuwaano mukhale ni muhakhu anyu naari mumvahe muchu mukina, nto miyaano kinamutaphulela masu ari vaxiri. Atiithi anyu, Napukotonosori, yaari awiirumiha nave Yehova aahaalamwiha. Nyuwaano mwaanasuwela soothene iho nto himwiiyevinhe. Moowana mapokha ni Mwene a wirimu nave moheera wi iruuhiwe ikahi sa ewooro sa empa ya Yehova wi nwurerye eviinyu. Va nthowa na yeeyo Muluku oorumiha ntata wi arepe masu ala: Mene, Tekel, Pares. Masu ala anataphulela wi omwene anyu onahaala omala nave achu a Meto ni Persiya anahaala okuxa omwene owo.’

Yakhala ntoko wi haavo aahala omvootha Papulu. Epooma ela yaarukurerihiwe ni ixiri soolipa ni muhice mutokweene. Ohiyu yoole, akhoco a Meto ni Persiya yaatoloxa epooma. Mwene o Persiya awiichaniwa Siru aaweleeliha maahi a muhice wi anakhoco evolowe mu epooma. Vaavaa  yaalapunwaaya, mikhora siiso sihulen’ye! Anakhoco yaavolowa, evootha epooma ni emwiipha mwene. Voocharela Siru aakhala mwene o Papulu.

Mpuwa mwa eyaakha emoha, Siru aalokoha: ‘Apwiya Muluku a wirimu aakiruma oteka empaaya o Yerusalemu. Vano mukookele o Yerusalemu wi mwaatekele empa.’ Ayuta ancipale yaakookela o Yerusalemu ivinrevo iyaakha 70 hiiha ntoko Yehova aalonceiye. Siru aahaakuxa akoopho a ewooro ni a eparata ni ikahi ikina seiyo Napukotonosori aakunxeiye mu empa ya Yehova. Onnawerya woona mukhalelo Yehova aampharihenleiye Siru wi aavuluxe achu Awe?

“Òhùwa, òhùwa Babilòniya mutokotoko ole! Vano othatuwa empa ya satana ntxhawelo na minepa sonanara.”​—Wupulula 18:2